سبر اغوار قلبي بقلم نورهان سامي ج10
تنهد أسر تنهيدة عميقة و قال بهيام : يخرابى على ميرسى بتاعك .. أخشنى شوية يا بت أنا كده هضيع منك
ابتسمت أسيل ثم تغيرت مية و ثمانون درجة و هى تقول بملل : أنا وافقت على الخطوبة بس مش هتجوزك غير بشرط .. صمتت قليلاً و قالت بتفكير : هما الصراحة شرطين لا تلاتة .. توء أربعة
ابتسم أسر بغيظ قائلاً : متخليهم خمسة يا حبيبتى
أسيل بملل : لو افتكرت شرط تانى هبقى أقولك و يبقوا خمسة .. أردفت قائلة بجدية بعدما تذكرت كلامها مع تالا قبل قليل : أول حاجة أنت قولتلى إننا هنتجوز عشان نساعد بعض اننا نمشى فى الطريق الصح .. صمتت قليلاً و قالت بجدية : أنا مش هتجوزك و لا هنكتب كتاب غير لما أنا و أنت نحفظ سورة يوسف و نسمعها لبعض و من غير أى غلط .. و ده هيبقى أول شرط تانى شرط لما الأدان يدن أنت تتصل بيا أو تبعتلى مسج تقولى قومى صلى و أنا نفس الحكاية عشان منفوتش صلاة و نبقى بنفكر بعض دايماً فى حاجة بتقربنا من ربنا زي ما تالا بقت بتعمل معايا فى الفترة الأخيرة عشان مفوتش صلاة .. أردفت قائلة : أنا ياما قلدت ناس فى الغلط نفسى أقلدهم فى الصح بقى .. أنا نفسى بجد أبقى بصلى كل الصلوات زي تالا و أبقى حافظة و لو جزء صغير من القرآن زي أدهم و عايزاك أنت كمان تبقى كده .. ابتسم لها أسر و قد أعجبه ما قالته بشدة لتكمل هى قائلة : تالت شرط و هنعتبره تهديد مش شرط .. رفع أسر حاجبيه لتقول هى بتوعد : لو عرفت إنك بتكلم واحدة غيرى هموتك يا أسير و هبقى قضية عند واحد صاحبك .. الشرط الرابع و الأخير .. أنك توعدنى إنك تجبلى كب كيك حتى بعد ما نتجوز و نخلف و أبقى أنة كمان
أسر بتساؤل : أفرضى محل الكب كيك اللى بتحبيه قفل أو اتشمع
نظرت له بضيق و قالت بغيظ : مش هيقفل متخفش .. صاحت به قائلة : أنا نسيت شرط مهم جداً .. نخليهم خمس شروط
أسر بدهشة : شرط ايه ؟
أسيل بجدية : شنبك ده
تحسسه أسر بفخر و قال بابتسامة : حلو صح ؟
أسيل بضجر : هتحلقه
وقف أسر و قال بانفعال : نعم ياختى .. شنب أيه ده اللى أحلقه !
خرج عبد العزيز و كريمة و أم أسر من حديثهم و نظروا اليه بدهشة ليقول هو بابتسامة حرج : لا متخدوش فى بالكوا أحنا بنتناقش
وجه نظره لأسيل لتقول بملل : هو ده اللى عندى .. مش عايز نتجوز و رجعت فى قرارك يبقى No problem
