خداع انثى الجزء الأخير
أبتسم بسعاده وقال بنبره حنونه
اسامه :- ما هو ده اللى كنت بقوله ليكى من زمان وانتى كنتى رافضه تسمعى كلامى رائد هيكون قوتك وقت ضعفك وهيقدر يحميكى من الدنيا بحالها
ردت عليه بحب وقالت
رقيه :- انت كان عندك حق انا فرحانه اوى يا اسامه
وفى ذلك الوقت سمعت صوت جرس الباب نظرت إليه بأستغراب وقالت بقلق
-مين هيجى ليا فى وقت زى ده
رد عليها بقلق وقال
اسامه :- طيب قومى افتحى الباب وانا معاكى على التليفون ولو فيه حاجه نادى على رائد بسرعه
نهضت من على الاريكه بخوف واتجهت إلى الباب وفتحته ببطئ وأخذت نفس عميق واخرته بهدوء وقالت
رقيه :- رائد !! خير فيه حاجه
اقترب منها وقال بحب
رائد :- امممم فيه وحشتينى
ابتلعت ريقها بتوتر وتراجعت للخلف وقالت
رقيه :- م م ما انا لسه كنت عندكم دلوقتى روح يلا نام مينفعش كده ممكن حد يشوفك واقف معايا
اقترب منها أكثر وقال
رائد :- طيب خلينى اقعد معاكي شويه انا من فرحتي مش عارف انام
تعالت ضحكات اسامه بالهاتف وقال
-ربنا يعينك على اللى انتى فيه سلام
ردت عليه سريعا وقالت
رقيه :- استنى رايح فين
رد عليها بأستغراب وقال
اسامه :- هقفل معاكى علشان انام وانتى بقى خلى بالك على نفسك واوعى تدخليه الشقه سلام واغلق الخط
نظر لها بغضب وقال بتساؤل
رائد:- مين ده اللى كنتى بتكلمى
ردت عليه بأستغراب وقالت
رقيه :- ده اسامه الدكتور اللى قولتلك عليه وساعدني كتير الفتره اللى فاتت وعلى طول بيتصل بيا يطمن عليا
صر على أسنانه بغضب وقال
رائد:- والله والمطلوب منى ايه اروح اشكره دلوقتى ولا أقف اتفرج عليكم وانتوا عاملين تتكلموا مع بعض فى التليفون البنى آدم ده تقطعى علاقتك بى اصلا مافيش واحد بيساعد واحده لله وللوطن اكيد غرضه مش كويس
نظرت له نظره مطوله وقالت بعدم رضا
رقيه :- خلاص خلصت كلامك، ماشى، اسامه انا مش هقطع علاقتى بى لانى مشوفتش منه حاجه وحشه لحد دلوقتى بالعكس ده اكتر انسان ساعدنى فى اصعب وقت فى حياتى ثانيا انت عارف ومتأكد لو كنت حسيت انه مش كويس او غرضه فى حاجه كده ولا كده كنت بعد عنه من غير ما حد يطلب منى حاجه زى كده ثالثا بقى والكلام ده يخصك انت مش علشان كنت شاب مقضيها مع البنات زمان يبقى كل الشباب زيك ونظرتهم للبنات مش زى نظرتك فبلاش تحكم على حد انت متعرفهوش ولا قابلته قبل كده
