خداع انثى الجزء الأخير

أمسكت يدها سريعا وقالت بترجى
رقيه :- وانا كمان حبيتك اوى وارتحت معاكى فى الكلام خليكى معايا شويه

ربت على يدها بحنو وقالت
سهير :- معلش يا حبيبتى انا لازم اروح الشقه اصل سايبه جوزى هناك تعبان ومش بيقدر يتحرك انتى ابقى تعالى اقعدى معايا شويه مافيش حد موجود معايا ابنى خرج ويا عالم هيجى امته وجوزى هياخد العلاج وينام بدرى وانا هقعد لوحدى زهقانه

اومأت رأسها بالموافقه وقالت بنبره حنونه
رقيه :- حاضر شويه واجى اساعدك لو محتاجه حاجه

ابتسمت لها بحب وقالت
سهير :-ربنا يجبر بخاطرك يا بنتى ويريح بالك عن اذنك وتركتها وذهبت شقتها

اغلقت الباب سريعا واسندت ظهرها على الباب وقالت بوجع
رقيه:- اااااااه يارب يا ترى ايه مستخبي ليا تانى فى الايام الجايه وجلست على الاريكه وهى مصدومه من هذه الصدفه.
…………………………………………………….
بعيادة الطبيب النفسى الخاص برائد

جلس رائد ينتظر دخوله إلى الطبيب بتوتر شديد وظل يتذكر هذه الفتاة ودقات قلبه تزداد ودقائق معدوده سمع هتاف عليه من الممرضه نظر لها ونهض من على مقعده و تحرك بأتجاه الغرفه و دلف إلى الداخل وأغلق الباب خلفه وجلس امام الطبيب نظر له بأبتسامه وقال بتساؤل

مصطفى :- اخبارك ايه يا استاذ رائد طمنى

نظر له بتوتر وقال بنبره مختنقه
رائد:- كنت كويس لحد من شويه بس رجعت اشوف الناس رقيه تانى يا دكتور من شويه بنت خبطت فيا شوفتها هى ونديت عليها انا اه لسه بشوفها كل يوم فى احلامى بس ده مش مضايقنى خالص بالعكس دى الحاجه الوحيده اللى بتصبرنى على فراقها لكن من زمان اوى محصلتش ليا الحكايه دى هو انا كده حالتى رجعت تسوء تانى وهرجع المصحه!؟

حرك رأسه بالنفى وقال
مصطفى :-لا طبعا مش محتاج ترجع المصحه تانى انت لما دخلتها دخلتها علشان كنت مش مصدق انها ماتت وكنت على طول بتشوفها وتكلمها على اساس انها موجوده زى يوم المستشفى كده كنت مقتنع انها كانت عندك ولابسه نقاب وكلمتك وكلمتها مع ان سألنا كل اللى فى المستشفى اكدوا ان مافيش اى حد دخلك فى الوقت ده وكان لازم وقتها تدخل المصحه علشان حالتك متدهورش اكتر من كده، بس ممكن تكون اليومين دول بتفكر فيها زياده علشان كده رجعت تانى تشوفها فى الناس وممكن تكون البنت دى فيها حاجه شبها خلاك تشوفها رقيه لأنك دلوقتى انت عارف انك بتشوفها فى الناس مش بتشوفها هى وبتكلمها اهم حاجه العلاج إياك توقفه لان ده هيأثر عليك