رواية خارج أسوار القلب (الجزء الأخير) بقلم صابرين الديب

الفصل الخامس والعشرون
__________________

في الموعد المحدد ارتدت (دينا) ملابسها وكما هي عادتها حرصت أن تكون جميلة, ودعت والدتها وقادت سيارتها للعنوان المنشود, لم ترق لها المنطقة كثيرا فهبطت من سيارتها وهي تتطلع إليها بنوع من الاشمئزاز, تطلعت للعقار الذي يفترض بها الصعود إليها ولم تلحظ نظرات البعض من حولها لها ولسيارتها الفارهة, صعدت للطابق الثاني واتجهت للشقة الوحيدة به ثم ضغطت زر الجرس لثانية, بعد لحظات فتح الباب ليظهر على عتبته (هشام) وهو يبتسم ابتسام واسعة مرحبة ويهتف :
– دينا هانم, أهلا أهلا, نورتي المنطقة ولو إنها مش قد المقام.

أفسح لها الطريق فدخلت وقالت وهو يغلق الباب خلفها :
– كويس إنك عارف إنها مش قد المقام ياهشام, ليه جبتني هنا كان ممكن نتقابل في أي مكان تاني ؟

ابتسم في دهاء وهو يقودها لأريكة في منتصف الردهة ويشير لها بالجلوس وقال :
– ما انا قلت لك في التليفون, مش هينفع نتقابل برا, اللي هتساعدنا ماتحبش حد يشوفها مع الزباين بتوعها.

تأففت لحظة ثم عادت تهادنه وتسأل :
– ها ماقلتليش خطتك ؟ ناوي على ايه ؟ لاحظ إنهم اتجوزا خلاص فالخطة لازم تكون أقوى من أي حاجة فكرت فيها قبل كده .

احتفظ بابتسامته الخبيثة ورد :
– طبعا فاهم, إنت فاكراني بالعب, تشربي حاجة الأول.

كانت ابتسامتها ساخرة وهي تتطلع إليه وتتساءل :
– حاجة زي ايه ؟

هز كتفيه وأجاب :
– معلش بقى إنت عارفة إني عازب يعني مفيش حاجة فريش, ياشاي يا عصير في العلبة .

قالت بقرف :
– اوك هاخد عصير, أي فلافر Flavor ماتفرقش.

ابتسم وغمغم :
– تمام .