رواية الجر.م الأكبر بقلم دفنا عمر الجزء 5
ضحكت رغما عنها وهتفت: والله يا بابا حسن أنت أحسن حاجة حصلتلي في حياتي!
__________________
بعد أشهر قليلة!
_ عروستنا الأمورة سمورة خلصت لوازمها ولا لسه؟
_ كله بقى تمام يا لوكا، فارس كل حاجة عملها معايا واخرهم فستان الفرح هيتطبط فيه شوية حاجات طلبتها عشان. يكون مناسب للمحجبات!
_ طب تمام أوي، امال ليه حاسة انك قلقانة ياسمر!
تنهدت: خايفة اوي يا ملك، حياة جديدة ومجتمع ووسط مختلف عن اللي اتربيت فيه. خايفة افشل في حياتي. خايفة ما اقدرش اسعد فارس زي ماهو عمل كل حاجة تسعدني!
ملك بنبرة مطمئنة: قلقك وخوفك ده طبيعي جدا حتى لو فارس من وسطك، دي حياة مختلفة فعلا بس مش عشان اللي في دماغك. لأ.. لكن لأنك هتكوني مسؤلة عن أنسان وكل شيء يخصه مهما كان بسيط، وعن أسرة هتكوني عمودها الاساسي.. وفرد جديد في أسرة زوجك اللي لازم تكسبيهم بكل ذكاء وساعتها هتكسبي راحة بالك ورضا زوجك اللي هو رقم واحد.. عرفتي بقى أيه سبب القلق؟!! بس كل اللي ذكرته ليكي ده هتنجحي فيه بحاجة واحدة.. أنك تعملي كل حاجة لوجه الله وبحب خالص..!
وانا احب اطمنك.. طول ما انتي ربنا كرمك براجل بجد زي فارس ماتقلقيش، انتي هتكسبي الكل بطيبتك واخلاقك ونيتك الصافية يا سمر!
_ كلامك ريحني أوي يا ملك وطمن قلبي.. أنا بجد لو ليا أخت ماكانتش هتقف معايا وقفتك دي!
ملك بعتاب: أخص عليكي وانا مش اختك؟
هتفت مبتسمة: واكتر يا لوكا..!
_ طب بلا بقي روحي اعملي ارتاحي، لازم تنامي كويس عشان وشك ينور يوم الفرح..!
_ ماشي ياحبيبتي، بوسيلي يامن روح قلبي!
_ من عنية ياقلبي، يلا تصبحي على خير
_ وانتي من اهل الخير حبيبتي!
__________________
مريم وهي تطالع شقيقها الذي يرتدي أمامها”بدلة” زفافه: ماشاء الله يافارس البدلة تهبل عليك، انا فرحانة اوي عشانك لأنك اخيرا هترتبط ببنت بتحبها وهي تستاهل والله ، مؤدبة ومحترمة وعاقلة، ثم غمزت له بعينيها: وجميلة جدا..!
ضحك، وقبل رأس مريم: حبيبتي ياروما، الحمد لله ، احسن حاجة إن ماما كمان بقيت راضية عنها بعد ما اتكلموا سوا.. بس في حاجة عايز اوصيكي بيها..!
هتفت: أيه هي؟
اجابها: حاتم.. انتي عارفة إن أنا وسمر بعد الفرح هنسافر شهر عسل وهنسيبه معاكي انتي وأياد.. عايزك تاخدي بالك منه كويس، الولد ده حساس ولسه مش مندمج معانا.. مش عايزه يحس بغربة يا مريم، اوعي حاجة تحصل تزعله، ده أمانة في رقبتك..!
