احتاج إليك بقلم نهلة ابو شهبة

جلست مايا في السيارة و تظاهرت بالنوم حتى تفكر في ذلك النذل الذي دمر حياتها في الماضي و يريد تدميرها في المستقبل …..
كيف ستتصرف ؟؟؟ ماذا يمكنها ان تفعل لتواجهه ؟؟؟ أحست بالدموع تنساب منها ….. دعت الله أن يساعدها في أزمتها الجديدة …
( يا رب …. أنا أستغفرتك كتير ….. و تبت بجد …. يا رب أبعده عني و عن جوزي …. يا رب أسترني )

وصلت مايا الى منزلها فخاطبها سالم قائلا:أدخلي أنت أرتاحي و أنا هانيم أحمد
دخلت مايا الى غرفتها و أستلقت عالسرير و أغمضت عينيها و أستسلمت للنعاس حى تهرب من أفكارها ………………

أستيقظت مايا ليلا لتجد سالم نائما و هو يحتضن أحمد في سريره فوضعت عليهما الغطاء جيدا و أغلقت الباب و خرجت أمسكت هاتفها و دخلت الى الحمام لتجري مكالمة ….. لم تكن ترغب في إجراءها ….. لكنها قررت أن تواجه الأمر بنفسها ….. فهي لم تعد ضعيفة ….. لقد أصبحت قوية منذ زواجها من سالم ….. أصبحت قوية بحبها لزوجها و ابنها ….. و ستلقن وائل درسا لن ينساه …… و ستجعله يدفع ثمن ما سببه لها من ألم …… ثمن وفاة والدتها حزنا عليها …… ثمن كل تلك الكوابيس التي تراها كل يوم ……………..
الحلقة الحادية عشر

أمسكت مايا هاتفها الخليوي وبيد مرتعشة و أتصلت برقم وائل ….. و كانت تسمع ضربات قلبها عالية من شدة خوفها مما هي مقدمة عليه ….. سمعت صوته البغيض يجيب :
وائل:الو …. الو
مايا بصوت يرتعش من الخوف:الو
وائل:يااااااااااااه وحشني صوتك اوي
مايا احست بدموعها تنساب دون إرادتها ولم تجبه
وائل:ايه ده انت لسه بتتكسفي؟؟؟؟
مايا:عايز ايه يا وائل؟
وائل وقد أستلقى في فراشه و هو يستمتع بعذابها:وحشتيني
مايا:يا وائل أرجوك أبعد عني كفايه اللي حصلي بسببك
وائل:أبعد عنك ازاي !! ده أنت أول حب في حياتي
مايا:أرجوك أخرج من حياتي
وائل:بصي بقى يا قطة ….. أحنا لازم نتقابل عشان نتكلم براحتنا
مايا:أقابلك !!!!!!!!
وائل:ايوه زي زمان و لا نسيتي؟
مايا:مينفعش أقابلك
وائل:ليه ان شاء الله؟
مايا:مش بخرج لوحدي
وائل:بسيطة تاهت ولقيناها
مايا:هي ايه ده اللي لقيناها
وائل:أجيلك انا
مايا بانفعال شديد:تيجي فين؟ انت اتجننت؟
وائل:براحه براحه لجوزك يسمعك
نظرت مايا نحو باب الحمام في خوف ثم أحست أنها في كابوس لن ينتهي…….
وائل:متخافيش انا هآجي وجوزك فالشغل
مايا وهي تبكي:تيجي تعمل ايه ….. مش كفاية اللي عملته فيا زمان …. و امي اللي ماتت بسببك
وائل بقسوة:هتقابليني يعني هتقابليني و مش هقولك انا ممكن اعمل ايه ….. عشان انت عارفه
مايا:انساني يا وائل ………..
وائل:انساكي ؟؟؟ ده انا عمري ما قدرت انساكي ……………
مايا:خلاص يا وائل انا بقيت متجوزة و مش هقابلك مهما حصل
وائل:تبقي عايزة كل حاجه تنكشف ادام جوزك …… آه بالحق ده شكله حنين خالص
مايا:ملكش دعوة بيه
وائل:بتخافي على مشاعره ؟؟؟؟ امال هتعملي اهي لما أقوله أني أول راجل في حياة مراتك ؟؟؟؟ ها تفتكري هيعمل ايه؟؟؟؟
مايا:حرام عليك سيبني في حالي
وائل:بقولك ايه هستناكي بكره لساعه 12 الظهر في المطعم اللي اتقابلنا فيه أول مره متتأخريش
مايا:مش هآجي يا وائل
وائل بثقة:هتيجي يا مايا