سبر اغوار قلبي بقلم نورهان سامي ج12
اؤمأت برأسها بضيق قائلة و هي علي نفس حالتها : الله يبارك فيك .. عن إذنك
أوقفها قائلا بتساؤل : نيفين ممكن أتكلم معاكي
حركت رأسها نافية و هي تقول : مفيش يبنا كلام يا ابن خالتي .. ولادك و بسمحلك تشوفهم يبقي عداني العيب
ماجد بجدية : اديكي قولتي يا ابن خالتي
قاطعته ضاحكة بسخرية و هي تقول : هو انت متعرفش ولا ايه ؟ خالتي و خالتك و اتفرقت الخالات و القرابة ديه أسم مش أكتر
ماجد برجاء : نيفين أسمعيني أنا من بعد اللي حصل لمروة اتغيرت و الله اتغيرت و بقيت بحبك .. من ساعة ما جبت الكلب اللي اسمه عمرو ده و خليته يكتب عليها و يطلقها و أنا بتحايل عليكي ترجعيلي .. صدقيني حسيت بيكي يا نيفين و عايز أعوضك عن كل حاجة حصلت زمان .. أنا ندمان ندمان أوي .. نظر لأطفاله قائلاً : عايزين نربيهم مع بعض عشان ميحسوش بالنقص و إن في حد أحسن منهم .. خلينا نرجع عيلة واحدة تاني و صدقيني هعوضك عن كل حاجة عملتها زمان
أمرت أطفالها بالدخول لأنها تريد التحدث معه على انفراد لتتهلل أساريره فهو طوال السنين الماضية و هو يحاول أن يجعلها تقف وقفتها تلك للتحدث معه .. كان يظن أنها ستجلس لكنها ظلت واقفة و قالت بعدما فرت دمعة من عينيها : تفتكر إني ممكن أقدر أستأمن نفسي معاك تاني بعد ما كنت بتحلل لنفسك جسم واحدة تانية .. تفتكر إني ممكن أرجعلك و أنا مطمئنة علي نفسي معاك و أغمض عيني و أنا في بيتك ؟
ماجد بجدية : أنا أتغيرت والله و نسيت تالا خالص و غير ده كله أنا عارف إنك لسة بتحبيني فهتقدري
حركت رأسها نافية و هي تقول : حتي لو في لسة في قلبي اللي دمرته شوية حب فاضلين ناحيتك فأنا أسفة مش هقدر أرجع و ياريت متتكلمش في الموضوع ده تاني .. التفتت و تركته لتدخل لغرفتها لتسمعه يقول بصوت عال من الخارج : مش هيأس يا نيفين و هعمل أي حاجة لحد أما تقتنعي إني اتغيرت و بحبك .. كل أما أشوفك هترجاكي عشان ترجعيلي .. أنت اترجتيني زمان و جه الوقت اللي أرد فيه اللي عملته فيكي .. صدقيني مش هيأس و هفضل أحاول معاكي لحد أخر نفس في عمري .. بعدما تغلغلت كلماته أذنها ابتسمت بغموض !! و لا أحد يعلم سر هذه الإبتسامة الغامضة أو حتي نوعها غيرها هي .. فهل ابتسمت لأنه ذاق المر كما أذاقها اياه قديماً و انتقم منه ربها أم ربما لأنها ستعطيه فرصة جديدة أم ربما لأنها لم تكن تتخيل أن يفعل ماجد ما يفعله معها الأن في يوم من الأيام .. أم ربما لأنها سعدت كأي امرأة عندها مفتقرة لعاطفة لتمسك رجل لم تكن تحلم بتمسكه بها أم لسبب غير كل هؤلاء ! لا أحد يعلم .. لا أحد يعلم ما تطمره العقول و القلوب غير الله .
