سبر اغوار قلبي بقلم نورهان سامي ج12
زفر أسر بضيق قائلا : حاسس أني واقف بلبوص يا أدهم كما ولدتني الحاجة أمي ياريتني ما حلقته .. أردف قائلا بمرارة : يا فضيحتك يا أسر وسط أصحابك انهارده .. يا فضيحتك يا أسر وسط الناس .. يا فضيحتك يا أسر وسط المجرمين بتوعك .. أتت بباله فكرة فصاح قائلا : أدهم أنا هكلم عمي أقوله يأجل كل حاجة انهارده و نبقي نكتب الكتاب لما شنبي يطلع
زفر أدهم بنافذ صبر قائلاً بدعاء : يا رب صبرني علي ما ابتلاني
أسر بمرارة : يا أبني انت ليه مش قادر تحس بيا .. أنا و الله حاسس أن كل البني أدمين اللي ماشين في الشارع بيبصوا عليا و بيقولوا ايه ده شوفوا الراجل اللي هناك ده حالق شنبه
صاح به بنافذ صبر قائلاً : هقولك كلمة وحشة عمرك ما سمعتها قبل كده .. أرجع يده بين خصلات شعره و هو يعتصرها قائلاً : و أنا الحمد لله اكتشفت أن عندي معجم فأسكت و خاف علي نفسك بقي
أسر بنفس المرارة : أصلك مش فاهم عشان مكنش عندك شنب زي شنبي فمش حاسس بمعاناتي .. أردف قائلا : أنت مش عارف فايدة الشنب ده ايه ؟ ده بيخلي الواحد يحس بهبته كده وسط المساجين غير لما يبقي عيل فرفور و غير ده كله بيدفيني في الشتاء يا أدهم .. تنهد بحزن قائلا : و أنا بعد كل اللي كان بيقدمهولي ده أتخليت عنه بكل بساطة عشان أفرحها .. شوفت أنا قد ايه ظالم يا أدهم
نفذ صبر أدهم حقاً فصاح به قائلا : أبوك لأبو أدهم لأبو شنب المقشة بتاعك يا أخي حد ضربك علي إيدك و قالك أحلقه .. غمغم قائلا : أستغفر الله العظيم يا رب هتخلي الواحد ياخد ذنوب بسببك
فُتِح باب الكوافير لتخرج منه أسيل لينتبه أسر لها بدأ يتفحصها من أخمص قدميها و هو يصعد بعينيه من أسفل لأعلي ليجدها ترتدي فستان فيروزي رقيق للغاية يليق بعروس رقيقة مثلها و ما زينها و زادها رقة هو حجابها .. حجابها !!! هل ما يراه صحيح !! هل تحجبت !! و برغم من هذا لم يأخذ حجابها من جمالها أو أنوثتها التي كان يبرزها شعرها بل زادها جمالاً و نوراً .. أنزل يده من علي وجهه و دعك عينيه ثم فتحهما ثانية حتي يتأكد أنها هي .. ليسمع بعدها صياحها و هي تتجه نحوه قائلة بفرحة : أنت حلقت شنبك ؟
صاح بها بنفس الفرحة قائلا : أنت اتحجبتي ؟
كان أدهم يقف بالمنتصف بينهما فضرب كفاً علي كف قائلاً بسخرية : يا مجانين .. لاحظ تلك اليد التي تربت علي كتفه فالتفت لها ليجدها تالا تأبطت يده و سحبته بعيداً عنهما قليلاً قائلة : شكلهم حلو أوي مش كده .. أردفت قائلة بابتسامة : و أسيل لبست الحجاب مش قولتلك إن كلامك هيجيب نتيجة معها
