خداع انثى الجزء الأول دودو محمد
وفى ذلك الوقت سمعوا صوت ارتطام شديد على الأرض يأتى من غرفة والده نظر لها بأستغراب وركض بأتجاه الباب وفتحه سريعا وجد والده ملقى على الأرض وفاقد الوعى ركض إليه ومال بجسده حمله من على الأرض ووضعه على السرير وربت على وجهه وقال
هشام :- ابا يا ابا رد عليا ونظر إلى والدته بقلق وقال
-ابويا مش بيرد عليا يا اما
تكلمت بعدم اهتمام وقالت
امينه :- تلاقى السكر عالى عليه ولا حاجه روح اعمله شوية ميه بسكر
نظر لها بضيق وقال
هشام :- ميه بسكر ايه بس يا اما احنا لازم نخده المستشفى ده شكله فى غيبوبه ونهض سريعا من على السرير وحمله بين ذراعيه وقال
-انا مش هستنى دقيقه واحده يا اما عايزه تيجى معايا تعالى عايزه تستنى هنا خليكى وهبقى اتصل بيكى اقولك حصل ايه
نظرت له بضيق وقالت
امينه :- اصبر جايه معاك هلبس العبايه بسرعه واتجهت إلى خزانة الملابس وارتدت العبايه فوق ملابسها ووضعت الطرحه على شعرها ونزلوا إلى الأسفل أوقفوا سيارة اجره وصعدوا بها واتجهوا إلى اقرب مشفى لهم وبعد عدة دقائق وقفت السياره ونزل هشام حمل والده وركض به إلى الداخل ووضعه بغرفة الفحص وخرج يبحث عن طبيب وبعد وقت طويل جدا جاء أحد الأطباء وبدأ يفحصه ثم قال بتساؤل
-فين اهل المريض
أجاب عليه سريعا وقال بقلق
هشام :- انا يا دكتور ابنه ودى مراته ابويا ماله يا دكتور
نظر له بأسف وقال
-البقاء لله الوالد توفي
نظر له بعدم تصديق وقال
هشام :- بتقول ايه يا دكتور والد مين ده اللى مات انت هتستعبط اكشف على ابويا كويس أنا متأكد أنه مماتش
نظر له بغضب وقال
-اتكلم بأسلوب محترم يا اخ بقولك ابوك مات انا متأكد من كلامى وتركه وغادر الغرفه
نظر إلى والده بدموع واقترب منه وأمسك يده وقال
هشام :- يا أبا اصحى يا ابا رد عليا اوعى تموت يا أبا فتح عينك اباااااا
نظرت له بعدم اهتمام وقالت
امينه :- اهو مات ارتاح وريح يعنى وهو عايش كان نافعنا بأيه
رفع رأسه للأعلى والدموع على وجهه وقال بأستغراب
هشام :- ايه الكلام اللى بتقوليه ده يا اما ده مهما كان اللى مات ده جوزك ابو عيالك إذا تستقبلى خبر موته بالبرود ده انا اه كنت معترض على حاجات كتير عمالها زمان واحنا صغيرين بس مهما كان ده ابويا وعاش عمره كله معاكى يكفر عن جوازه من واحده غيرك عاش وسطنا من غير ما يقول رأى ولا كلمه انتى ازاى بالقسوه دى مع جوزك
