خداع انثى الجزء الأول دودو محمد
ربت على ظهره بحنو وقالت
-ربنا يحفظك يا ابنى ويجمعك بأختك على خير وخليك متأكد “أن الله خير حافظا” وان احنا كلنا تحت رحمته ورحمة ربك وسعت كل شئ متنساش الدعاء اللى قولته ليك رددته فى كل وقت ونهضت من على المقعد وقالت
-همشى انا يا ابنى بقى يا عالم هنتقابل تانى ولا لا استودعك الله الذى لا تضيع ودائعه وتحركت بعيد وتركته
ظل ينظر إليها حتى اختفت من امام أنظاره وابتسم بأرتياح شديد ونهض من على المقعد اوقف سيارة أجرة وذهب إلى العمل
……………………………………………………
عند رائد
وصل إلى إحدى الكافيهات ودلف إلى الداخل وجد اسر ينتظره بالداخل اتجه إليه وجلس على المقعد بغضب نظر له أسر بأستغراب وقال
-فيه ايه مالك متعصب كده حتى لما اتصلت بيا مفهمتش منك ولا كلمه
زفر بضيق وقال
رائد :- انا زهقت من اللى بابا بيعمله ده قولى بقى انت عملت ايه فى الشركه عند ابوك علشان ميقولش ليك انزل تانى
أبتسم له بمكر وقال
اسر :- ولا حاجه وافقت على صفقات لشركات بابا مانع التعامل معاهم علشان معملتهم فى الفلوس مش كويسه ورفض صفقات تانيه لناس مهمه فى الشركه طبعا الدنيا اتشالت واتحطت فى الشركه وبقوا يجروا وراه الشركات دى تانى علشان يصلحوا علاقتهم بيهم ويثبتوا ليهم أن اللى حصل ده خطئ مش مقصود وطبعا اللى وافقت ليهم ما صدقوا وقالوا لو عايزين يلغوا الصفقه يدفعوا الشرط الجزائى اللى هو بأرقام مهوله بعد كل اللى حصل ده بابا طلب منى مليش دعوه بالشركه تانى ولا رجلى تخطى المكان ده تانى طبعا قعد اترجى فيه يسامحنى ويدينى فرصتى وهو رفض تماما وانا كنت هموت من الفرحه بس طبعا لسه موضوع السياسه بتاعه ده مصمم عليه وعايزنى انا أترشح مكانه السنه الجايه عايز افكر فى فكره شيطانيه برضه اخليه يبعدنى عن السكه دى واعيش بقى لنفسي ولحياتى
نظر له بعدم تصديق وقال
رائد :- ابليس بيصقفلك وبيرفع ليك القبعه وبيقولك شابو
تعالت ضحكاته وقال
أسر :- ميرسي ميرسي لا داعى لتصفيق ، ها ناوى انت كمان تعمل كده
رد عليه بضيق وقال
رائد:- مش قدامى حل تاني غير كده هو اللى بدأ ورافض يسمعنى وعايزنى امشى كلامه وبس
نظر له بقلق وقال
اسر :- بس خلى بالك ابوك مريض قلب ممكن ميستحملش حركه زى دى
حرك رأسه بعدم اهتمام وقال
رائد :- لا متقلقش هو شاطر يعنى يوم ما يحصل لغبطه فى الشركه بأشاره واحده منه كل حاجه هترجع لطبيعتها
