خداع انثى الجزء الأول دودو محمد
هطلت دموعه بغزاره واغلق المصحف مره اخرى وقال بندم
خالد :- حقك عليا يا بنتى انا مستهلش اكون اب زى ما كنت زمان مستهلش أن أكون زوج ونهض من على الأرض وخرج من الغرفه واتجه إلى غرفة اسلام وطرق على الباب وفتحه وقال
-فاضى شويه يا ابنى عايز اتكلم معاك كلمتين
ترك الهاتف من يده سريعا واعتدل على السرير وقال
اسلام :- اتفضل يا بابا طبعا حتى لو مش فاضى افضى ليك
دلف خالد الغرفه وجلس على السرير أمام اسلام ونظر له بضعف وقال
-انا جاى اطلب منك طلب انا مقدرتش عليه يا ابنى
نظر له بأستغراب وقال
اسلام :- طلب ايه يا بابا اتفضل
نظر له بدموع وقال
خالد :- تحمى اختك من امك واخوك حاول توصل ليها قبل منهم اوعدنى يا ابنى انك هتحميها ومش هتسمح لحد فيهم يأذيها
تنهد بحزن وقال
اسلام :- انا فعلا هعمل كده من غير ما تطلب منى يا بابا انت عارف غلاوة رقيه عندى ازاى وان هى اقرب حد ليا ومش هسمح لحد يأذيها طول ما انا عايش
نزلت دموعه على وجه بقلة حيله وقال
خالد :- انا قلقان عليها اوى يا اسلام الله أعلم هى عامله ايه دلوقتى ولا ايه حصلها وهى لوحدها فى الشارع
رد عليه بنبره حنونه وقال
اسلام :- متقلقش على رقيه يا بابا رقيه بمية راجل وتعرف تحمى نفسها كويس اوى كتر القسوه قوة قلبها
أبتسم له وقال بنبرة حنونه
خالد :- ربنا يريح قلبك يا ابنى يارب انت اللى طالع شبهى قلبك طيب وعمرك ما كنت ظالم مش زى اخوك هشام اللى طالع زى امك واخد قلبها الاسود ربنا يهديه ويصلح حاله يارب
ربت على يده وقال بفخر
اسلام :- وده شرف ليا يا حبيبى أن طالع شبهك واخد طيبة قلبك انت طول عمرك قدوه ليا وبفتخر بيك فى اى مكان اروحه
احتضنه بسعاده وقال
خالد :- ربنا يجبر بخاطرك يا حبيبى ويسعدك ويكفيك شر ولاد الحرام.
……………………………………………………..
بالفيلا الخاصه بعائلة مدحت
وصل مدحت ومعه رقيه ودلفوا إلى الفيلا من الداخل وفى ذلك الوقت قابلتهم سهير نظرت لهم بأستغراب وقالت بتساؤل
-مين دى يا مدحت
أجابها بنبره هادئه وقال
مدحت :- دى رقيه بنت من ذوى الاحتياجات الخاصة ابنك لاقها فى الشارع وانا صممت تيجى تعيش معانا هنا ونظر لها وقال
-سلمى على طنط سهير
اقتربت منها وقالت
رقيه :- ازيك يا طنط سهير انا رقيه عندى اتنين واربعه
