فيروز بقلم ريم احمد ج 1

………………………………………………..

فيروز طول اليوم مكانتشى طبيعيه وهى قاعده مع مها كانت سرحانه ومش معاها خالص
مها باستغراب : فيروز … فيروز
فيروز : ها … نعم ياماما بتقولى حاجه
مها بحنيه :بكلمك من الصبح وانتى ولا هنا … مالك يا حبيبتى انهارده
فيروز : مش عارفه حلمت حلم وحش ومن ساعته وانا حسه ان قلبى مقبوض ومضايقه اوى
مها وهى بطبطب على ايدها : قولى خير الله ما اجعله خير … وان شاء الله خير
فيروز بتنهيده : امين يارب … انا هقوم اغير هدومى عشان يوسف هيجى نروح للدكتور
مها بابتسامه كلها حب طمنت فيروز : ماشى يا حبيبتى خالى بالك من نفسك
قامت فيروز ولسه بتفتح الباب لقت عمار فى وشها
فيروز حست ان قلبها اتنفض وفضلت تبصله وهى متنحه
عمار بابتسامه : مالك متنحه كده ليه
فيروز بارتباك : لا مفيش حمد الله على السلامه
عمار : الله يسلمك
ودخل باس مامته و قاعد جانبها وفيروز لسه بتبصله وقلبها بيدق
مها باستغراب : انت مش المفروض ترجع بكره
عمار : اصلكم وحشتونى فرجعت على طول … انتى عامله ايه
مها : انا بخير عشان شوفتك
عمار : يارب دايما
وبعدين بص لفيروز : وقفه كده ليه بعيد
فيروزبارتباك : ها ..اصل .. اصل عندى ميعاد مع الدكتور بعد اذنكم
وطلعت بسرعه على اوضتها
عمار باستغراب : مالها
مها : مش عارفه مالها انهارده …المهم عملت ايه احكيلى بقى كل حاجه بسرعه

……………………………………………………….

بعد حوالى ساعيتن

كانت فيروز نايمه على شزلونج ومغمضه عنيه
الدكتور : لسه شايفه صورته قدامك
فيروز بدمعه : اه … شكله بيخوفنى اوى
وفتحت عينها بسرعه : اسفه يا دكتور مش قادره اشوفه اكتر من كده
الدكتور : طيب مش فاكره مين الشخص ده
فيروز : لاء اول مره اشوفه فالحلم انهارده
الدكتور : طيب شكله مألوف بالنسبالك ولا حاسه انك شوفتيه قبل كده
فيروز بتعب وهى بتمسك دماغها : مش عارفه …. انا مصدعه اوى
الدكتور : انا هكتبلك دواء للصداع ده …. انا مش هضغط عليكى اكتر من كده … بس زى متفقنا اى حاجه تفتكريها تكتبيها على طول عشان متنسيهاش
فيروز : حاضر
الدكتور بابتسامه : الجلسه انتهت وهستناكى كمان اسبوعين ان شاء الله
فيروز وهى قايمه من مكانها : ان شاء الله
وعند الباب وقفت فيروز وبصت للدكتور تانى
فيروز : دكتور ممكن اسال حضرتك سؤال
الدكتور : اكيد اتفضلى
فيروز بكسوف وارتباك : هو يعنى … هولو انا كنت بحب شخص … بس مش دلوقتى قبل كده يعنى وانا دلوقتى مش فاكره حاجه هحس بيه وبانى بحب ولا لاء
الدكتور بابتسامه : الحب اكيد مرتبط بالقلب يعنى الاحساس بس كمان مرتبط بالعقل والتصرفات يعنى لو الشخص ده مش قدامك وانتى اصلا مش عرفاه هتعرفى منين انك بتحبيه حتى فى مثل بيقول” البعيد عن العين بعيد عن القلب ” يعنى احنا بنحب بعنينا وبعقلنا وبقلبنا اللى هوا احساسنا مش هتقدرى تكتشفى ده غير لما تفتكرى او تشوفى الشخص ده
فيروز : طيب لو شوفته وافتكرته بس محستشى انى بحبه
الدكتور : يبقى انتى مكنتيش بتحبيه اصلا من الاول ممكن يكون كنتى بس محتجاه فى وقت معين … حاولى تفرقى بين الحب والاحتياج
فيروز وهى مش مستوعبه كلامه اوى : امممممممم … ماشى … بعد اذنك