حب امتلاك حنان اسماعيل ج1

ايمى : انى اصاحب كذا واحد فى وقت واحد فده مضطرة له عشان اجيب مصاريف الجامعه ,انتى عارفه ان دادى من ساعه مااتجوز وهو منفض لى وعايش بره مع مراته بالطول والعرض مش زيك ياست الحاجة منحة مجانا من بابها

ليلى : يمكن تكون منحة مجانا بس متنسيش انى بدفع السكن والاكل معاكى ومع فاطمة ده غير المواصلات للجامعه ولمشاويرى التانية

ايمى وهى تشغل الاغانى بالسيارة قائله : بس الواد جامد يا لى لى بذمتك مش عارف كان غايب عنى فين ده ؟قال وانا برسم على اخوه وفكراه وارث زيه ,طلع عبدالله ده هو الكل فى الكل وصاحب الليله كلها اصل طارق اخوه من امه وتقريبا كده مش بيحبوا بعض .

ليلى مستغربة : وعرفتى كل ده من يوسف طبعا .

ايمى مبتسمة فى خبث : طبعا هو فى غيره

قالتها وهى ترفع صوت الاغنية الاجنبية من الراديو .

……………………………

دخل عبدالله الفيلا وهو ينادى على سيدة الشغاله بصوت غاضب

عبدالله : سيدة سيدة

جاءت سيدة وهى ترتجف من الخوف قائله : نعم ياسى عبدالله

عبدالله : اعمليلى فنجان قهوة حالا

اقتربت منه امه جيهان فى لهفه قائله :عبدالله طمنى على اخوك

عبدالله بلامبالاه : اسمه ابنك انا ماليش اخوات

جيهان بتنهد : يابنى ماتتعبش قلبى طمنى على اخوك هو فين دلوقتى

عبدالله بتأفف : البيه ابنك شوية وهتلاقيه هنا ارتحتى كده ممكن تسيبينى اشوف ورايا ايه ..ولعلمك دى اخر مرة اتدخل له فى حاجة ,كفاية عليا انى بدفع له مصاريف الجامعه دى مصاريف البيه جوزك

جيهان : البيه جوزى ده يبقى عمك وطارق ده اخوك

عبدالله بغضب : انا ماليش اخوات ,ابويا مات ومخلفشى غيرى ومتهيألى انى ماليش ام عشان اعتبر ان ليا اخوات منها ,ولولا ضغط جدى عليا مكنتش هستحملكم فى بيتى لحظة واحدة فإحمدى ربنا

قالها وكاد ان يغادر لولا انها اوقفته وهى تجذب ذراعه قائله له فى توسل وآسى

جيهان :هتفضل لحد امتى ياعبدالله فاكر انى قت*لت ابوك ده جدك نفسه صدقنا وسمح لنا نتجوز ونعيش معاه

عبدالله وهو يجذب ذراعه بعيدا عنه فى غضب : عشان جدى طيب صدقكم انما انا عمرى ماهنسى الليله اللى ابويا غرق فيها فى حمام السباحة ,ساعه ماسمعتك انتى وعمى وانتم بتتكلموا عن هيامكم وحبكم لبعض وان العقبة اللى مانعه جوازكم جوازك من اخوه وجوازه من بنت عمه ,بعدها بساعتين لقينا بابا غرقان فى البسين رغم انه كان بيعرف يعوم