سبر اغوار قلبي بقلم نورهان سامي ج1
نظرت له بغضب و قالت بحدة : انت ايه اللى جابك هنا ؟ و مين اداك الحق انك تنام كدة ؟ و عرفت عنوان بيتى ازاى ؟ مين فتحلك اصلا ؟
قبض على يده بغضب ثم قال بهدوء و هو يضغط على اسنانه : ممكن تهدى ؟
تالا بحدة : لا مش ههدى غير لما اعرف انت بتعمل ايه هنا ؟
لم يستطع السيطرة على اعصابه اكثر من هذا فقال بحدة : ممكن تسكتى شوية و انا هفهمك .. ممكن
نظرت له بخوف من نبرته و تمسكت بالملاءة التى مازالت تغطيها لكنها قالت بحدة : لا مش ههدى
هدأت اعصابه عندما رأى ذعرها الواضح ثم اعطى ظهره لها و قال بهدوء : انا اسف مكنش قصدى اتعصب عليكِ
ظلت تنظر له لبعض الوقت بصمت و هى تسترجع ما حدث بالامس بسرعة .. الى ان توقفت عند ما قالته لها عائشة
Flash Back
عائشة و التعب يتزايد عليها : تالا انت لازم تسمعى اللى هقولك عليه ده
تالا بدموع : لما تخفى هسمعك
عائشة بجدية : تالا متتعبنيش .. اسمعى .. صمتت تالا عن الكلام و هيأت نفسها كى تسمعها بتركيز و انصات قويان
اكملت عائشة قائلة : عايزاكى الأول تحفظى على نفسك و متيأشيس ابدا من الحياة و تعرفى انى كنت بحبك اوى يا تالا .. كنت بتفكرينى ببنتى .. نظرت لها تالا بعدم فهم .. فتابعت عائشة حديثها و هى تقول بصوت ضعيف : ايوة بنتى انا عندى بنت .. محدش يعرف الموضوع ده.. ثم ابتسمت بحسرة و قالت : و لا حتى بنتى تعرف انى امها
نظرت لها تالا بصدمة و هى مازلت لا تفهم اى شئ .. فتابعت عائشة كلامها : لما كان عندى 16 سنة .. كنت بخدم عند ناس اكابر اوى .. راجل و مراته .. بس ربنا مكنش رايدلهم انهم يخلفوا .. كان فيه خناقات مع مامته على موضوع الحمل ده.. كانت دايماً تزن عليه و تقوله انها ” انا عايزة اشوف ولادك .. انت لازم تتجوز واحدة تانية .. مراتك دى مش نافعة ” .. هو كان بيحب مراته اوى .. فمكنش عايز يتجوز عليها و يكسر قلبها .. كانت مشاعر مراته عاملة زى الإزاز عنده .. كان خايف عليها تتكسر و ميقدرش يلمها تانى .. بس نسى ان الإزاز ساعات بيجلوا سرطان .. يخليه بودرة .. و دة اللى حصل مع مراته لما مامته جت هزأتها و قالتلها كلام زى السم .. يحرق اى واحدة .. كان الكلام ده كله قدامى بس مكنتش فاهمة اى حاجة غير ان مراته كانت صعبانة عليا اوى و هى متشحتفة من العياط .. عملتلها عصير لمون و ادتهولها .. ثم ابتسمت بمرارة و قالت : بس برغم انى كنت صغيرة بس كان جسمى فاير و لا احسنها بت .. جت فى دماغ امه الحرباية فكرة شيطانية .. اتصلت بابويا و ابنها و جمعتهم .. جمعتهم عشان تقولهم ان ابنها ممكن يتجوزنى لحد اما احمل و اجبله عيل و يقول ان مراته هى اللى خلفت .. يعنى ابقى حضانة .. من الأخر آلة للحمل .. بس هيبقى كله بحسابه .. ابويا حليت فى دماغه الفكرة فقرر انه يبيع واحدة فسبيل ال 12 عيل اللى عنده .. و انا ساعتها مكنتش فاهمة يعنى ايه ضنى و ان يبقى ليا عيل و اتخلى عنه و كده.. فوافقنا .. و حصل الحمل و خلفت بنت .. سموها اسيل .. و بعد كدة طلقنى و خدت بدال بنتى شوية فلوس .. فضلت اربيها لحد 4 سنين .. بس ست هانم خافت لأضعف فى يوم و اقول الحقيقة لبنتى فبعتتنى اشتغل عند ناس تانية .. ثم قالت ببكاء : انا كل السنين اللى فاتت دى بضرب نفسى ميت جزمة عشان اتخليت عن بنتى عشان شوية فلوس هيخلصوا مع الوقت .. كنت كل فترة اروح اطمئن عليها من بعيد .. من غير ما تعرف .. ثم قالت بدموع : انا بقولك كده يا تالا يا بنتى عشان لو جه يوم و مامتك طلبت فيه انك تسمحيها .. يا ريت تسمحيها .. سمحيها يا بنتى .. فى ظروف بتبقى اقوى من الواحد
