طع,نات الغد,ر والحب الكاتبة ايمي ج7

خرج الطبيب من غرفة العمليات وهو يتنفس من اثر الضغط النفسى الذى مر به
اقبل عليه الجميع وسيف اولهم فقال له:طمنى يا دكتور
حالته عاملة ايه؟؟
الطبيب:الحمد لله قدرنا نشيل الرصاصة
لو كانت اتحركت مللى واحد كانت اخترقت القلب لكن ربنا ستر يعنى كان بينه وبين الموت خطوة
تنهد الجميع بارتياح نظر سيف الى الطبيب قائلا:طب هو دلوقت فايق؟؟
اعرف اكلمه؟؟
الطبيب:حاليا لسة
بس كمان كام ساعة كده هيفوق وتقدروا تشوفوه بس ياريت متطولوش معاه فى الكلام لان حالته صعبة شوية
عن اذنكوا
تنهد سيف بارتياح وهو يقول :الحمد لله
الحمد لله
حضر البوليس الى المستشفى وتفاجأت دادة فاطمة بقدومهم قائلة:
سيف الحق
البوليس جه
هتقولهم ايه انا خايفة ليخدوك
سيف بصوت هادئ:اهم حاجة انى اطمنت على عمر وبعد كده كل حاجة سهلة
دادة:لا يا حبيبى متقولهومش حاجة علشان خاطرى كفاية اللى احنا شوفناه هو كل ما نخلص من مصيبة نقع فى مصيبة تانية؟؟
اقبل الضابط على سيف فسلم عليه قائلا:ازيك يا سيف بيه
سيف بابتسامة خفيفة:الله يسلمك
الضابط:احنا سألنا الدكتور وقال انه مينفعش نتكلم مع عمر دلوقت ياريت حضرتك تبقى تشرفنا علشان ناخد اقولك ونعرف من حضرتك تفاصيل الواقعة
احنا عاينا المكان واخدنا السلاح اللى تمت بيه الجريمة علشان نعاين البصمات،وسألنا بعض الموظفين اللى كانوا موجودين ساعة الحادث ،وقالوا انهم ما شافوش حاجة بعنيهم بس عمر قالهم انه هو اللى ضرب نفسه،الكلام ده صحيح؟؟
سيف:معلش حضرتك ممكن تأجل الكلام ده لحد ما اطمن على عمر،وبعد كده اوعد حضرتك انى هاجى لحضرتك المكتب وهقولك كل اللى اعرفه
الضابط:خلاص هستناك تيجى بكرة ان شاء الله
غادر الضابط بينما تنهد سيف وهو يشعر بالضيق
اقتربت دادة منه وقالت له:اوعى تعترف للبوليس باللى عملته يا سيف،علشان خاطرى متوديش نفسك فى داهية انت لو اتحبست انا ممكن يجرالى حاجة
سيف بحزن:متخافيش يا دادة
ان شاء الله كل حاجة هتبقى تمام
انا اللى شاغل بالى دلوقت هلاقى نيرمين ازاى
ياترى راحت فين؟؟
****************
دخلت منى الى الغرفة وهى تحمل فى يدها صنية عليها كوبان من الشاى ثم جلست امام نيرمين ووضعت الصنية فى المنتصف واعطتها كوبا من الشاى
اخذته نيرمين وهى تقول:تعبتى نفسك ليه بس يا منى
منى:تعب ايه بس ،دى حاجة بسيطة
نيرمين بعد ان اخذت رشفة نظرت اليها باعجاب قائلة:مممم طعمه لذيذ اوى
منى:طب الحمد لله انه لذيذ
مش هتقوليلى حكايتك ايه بقى؟؟
تنهدت نيرمين بألم ثم قالت:عايزة تعرفى حكايتى؟؟
منى:طبعا
على فكرة انا فضولية جدا
نيرمين:ماشى بس انتى اللى جيبتيه لنفسك
منى:ليه بقى؟؟
نيرمين:اصل حكايتى كلها غم
مافيهاش حاجة تفرح
………………………………
افاق عمر بعد خروجه من غرفة العمليات بثلاث ساعات
وقف الطبيب خارج الغرفة وهو يقول لمن حوله:ممكن تدخلوا تشوفوه بس ياريت مطولوش فى الزيارة لانه لسة تعبان
سيف:حالته عاملة ايه دلوقت يا دكتور
الطبيب:اطمن هو كويس بس محتاج يرتاح شوية علشان كده بقول مطولوش عنده
سيف:شكرا يا دكتور
الطبيب:الشكر لله
تقدروا تدخلوا
دخل سيف ودادة وندى وزوجها ومختار الى عمر وكان مستلقى على السرير يرتدى قميصا مفتوحا من اعلى والشاش الابيض موضع الجراحة ظاهر من اسفل القميص
نظر اليه سيف وهو يشعر بالاسى اما ندى فاقتربت منه وقبلته من جبهته وهى تقول:الف سلامة عليك يا عمر
عمر بصوت منخفض:الله يسلمك
مختار:حمد الله على السلامة كده تخضنا عليك؟؟
كمال:حمد الله على السلامة ياعمر
دادة:الف الف حمد الله على السلامة يا حبيبى
كان عمر يومئ لكل من سلم عليه بابتسامة خفيفة لانه لا يستطيع ان يرد عليهم جميعا من الالم ولكن عيناه كانت تبحث فى الموجودين عن شخص بعينه فهو لم يسمع صوت سيف
فادار وجهه للناحية الاخرى ليجد سيف يقف بعيدا وهو يربع يديه فى حزن فنظر اليه عمر وجاهد ان يتكلم فقال بصعوبة:مش
هتقولى الف سلامة يا سيف
اقترب سيف منه وهو يبتسم بحزن وجلس بجانبه وقال:حمد الله على السلامة يا عمر
شعر عمر بسعادة كبيرة من وجوده فى الغرفة معهم
ادمعت ندى وهى تقول:مين اللى عمل فيك كده يا عمر
ده لازم يروح فى داهية
نظرت دادة الى سيف وهى تشعر بالقلق بينما لم تتغير نظرة سيف فكان هادئا وكأنه لم يفعل شئ
نظر عمر الى سيف وهو يقول:انا اللى ضربت نفسى يا ندى
وسيف كان عايز يلحقنى لكن ملحقش
ندى بحزن وليه كده يا حبيبى مافيش حاجة فى الدنيا تستاهل
مختار:انا لو اعرف انى اللى عملته ده هيزعلك اوى كده مكونتش عملت كده
عمر بصوت منخفض يحمل الما:خلاص يا عمى
اللى حصل حصل
احست دادة بسعادة كبيرة عندما انكر عمر مافعله سيف
فهذا يعطى مؤشر بان سيف لن يسجن
دخل الطبيب وامرهم بالخروج لان حالته لا تسمح بالاطالة فى الزيارة اكثر من ذلك فسلموا عليه جميعا وقبل ان يخرج سيف وكان فى مؤخرة من سيخرج امسك عمر بيده فالتفت اليه سيف
نظر عمر اليه قائلا:لو البوليس سألك عن اللى حصل قولهم انى انا اللى ضربت نفسى
ارجوك يا سيف
انا مش عايز اخسرك تانى
اوعدنى انك مش هتعترف على نفسك
لمعت عيون سيف وهو يبتسم بحزن قائلا:اوعدك يا عمر
…………………………….