للنصيب رأي اخر بقلم لوليتا ج1

تانى يوم نهى صحيت بدرى وجهزت نفسها وصلت الصبح وشربت النسكافيه بتاعها، وبصت لنفسها فى المرايا بتوتر، وهى بتكلم نفسها:إيه يا نهى؟! مالك؟! خايفه و متوتره ليه كده؟! لا بلاش إنهاردة تكونى كده!! اه انتى بقالك كتير مش بتحضرى جلسات لحد، بس مش لازم التوتر ده إنهارده، لازم تمسكي نفسك شويه وتحاول تهدى كده، عشان ما يحصلش اى حاجه وحشه…
نهى أخذت نفس عميق ولبست، بدله سوده وقميص أحمر، ولبست حجابها..
نهى مش بتحب تحط مكياج خالص..كانت زمان ايام الكليه وبعد ما اتخرجت، كانت بتحط، بس بعد كده شويه بشويه بطلت تحط اى حاجه غير الكحل فى عنيها وبس.
نهى وهى خارجه لقت منى صاحية..
منى: صباح الخير يا حبيبتى، خلاص نازله؟!
نهى: اه يا ماما، انا هنزل دلوقتي قبل ما ندى تصحى و أعمل معاها مشكله عشان تنزل معايا.
منى بتسأل نهى بأهتمام: نهى! هتعدى على شقتك بعد ما تخلصى الجلسه؟
نهى بهدوء: مش عارفه والله يا ماما، لسه هشوف الوضع إيه، حسب الجلسه هتخلص إمتى… أقولك.. لما أخلص الجلسه هكلمك وأقولك هعمل إيه.. سلام يا قلبى..
منى بتدعى من قلبها: مع السلامه يا حبيبتى، ربنا يوفقك، ويوقفلك ولاد الحلال دايما..
نهى أمنت على دعاء منى ومشيت.
نهى راحت محكمة حلوان، وشافت مكان القاعة وبتسأل على الرول بتاعها، لقت قضيتها رقم ١٣ فى الرول، وسألت الحاجب الجلسة هتبدأ إمتى قالها، أن القاضى لسه مجاش، و اول ما القاضى هييجى هيبدأ على طول.
نهى راجعت الورق إللى معاها، ولبست روب المحاماة، وبتستعد عشان اول ما القاضى ييجى تكون جاهزه..
شويه والحاجب قال:هدوء يا أساتذة.. فتحت الجلسة لإشكالات حلوان.. بسم الله الرحمن الرحيم، رول واحد …. ضد….
شويه والحاجب نده على رول أتنين…
و فضل الحاجب ينادى على رول رول لغايه ما نده على رول ١٣…
نهى حضرت قدام القاضى لوحدها مكنش فى اى حد حضر قصادها من الخصوم..
نهى بتوجه كلامها للقاضى بثبات وثقه: حاضر عن المدعية…/ نهى عادل عن الأستاذ/ فادى التهامي، بالتوكيل رقم… أ لسنه ٢٠٢١ مكتب توثيق حلوان..
نهى لسه هتكمل كلامها للقاضى… لقت شخص غريب دخل القاعة وحضر جنبها وبيوجه كلامه للقاضى..
الشخص: بعد إذنك يا ريس انا بتتدخل فى الدعوى الماثلة امام حضراتكم تدخل هجومى، وأحب اثبت حضورى..
نهى وقفت فى القاعة مصدومه ومذهوله، هى ماكنتش عامله حسابها ان ممكن حد يقف قصادها فى القضيه او يكون معاها حد.. بقت واقفه مصدومه ومتكتفه مش عارفه تعمل إيه.. وخصوصا انه أتدخل فى القضية تدخل هجومى، يعنى هو أصلا مش خصم فى القضيه، وحب يكون خصم فيها..
كل ده بالنسبه لنهى مفاجأه، وصدمه، وخضه لأنها كانت سابت المحاماة من فتره طويله وبقت مش عارفه تعمل إيه، أو تتصرف إزاى..
الشخص بيكمل كلامه للقاضى: انا عايز اثبت حضورى بالتدخل الهجومى فى القضيه الماثلة أمام حضراتكم يا ريس…
القاضى بيرد عليه: اتفضل اثبت حضورك..
الشخص: انا حامد ثابت المحامى… بتدخل فى الدعوى تدخل هجومى بشخصى..المدعية خلتنى اعملها شغل، وفعلا عملت شغل إنذارات ليها، بس هى ما دفعتش ليا فلوس.. فأنا بتدخل فى الدعوى تدخل هجومى عشان عايز احجز على عفشها والحاجة إللى موجوده فى الشقه عشان اخذ حقى منها..
حامد بيكمل كلامه: ف بطلب آجل لإعلان المدعيه و المدعى عليهم، بالتدخل الهجومى، ودفع مصاريف التدخل..
نهى وقفت مصدومه وعندها ذهول تام ومش عارفه تعمل إيه أو تتصرف إزاى..
حامد بيكمل كلامه: انا بطلب آجل أسبوع واحد بس للإعلان ودفع المصاريف يا ريس.. انا مش عارف أخذ حقى من المدعية…
نهى اتكلمت بسرعه للقاضى: يا ريس أولا…هو مش خصم فى الدعوى، ثانيا.. أصل الصحيفة ورد؟! نهى سألت القاضى بسرعه عن اصل الصحيفة عشان تتوه شويه عن كلام المحامى..
القاضى سأل سكرتير الجلسة إللى بيأيد كل حاجه فى ملف القضيه..
القاضى بيسأل السكرتير: أصل الصحيفة ورد من المحضرين؟!
السكرتير: لأ يا ريس اصل الصحيفة لسه ما وردش..
نهى حست بإرتياح لان بعدم ورود اصل الصحيفة رجعت الأمور تانى بين أيديها.. وردت بكل ثقه على كلام المحامى حامد: انا بطلب آجل لورود اصل الصحيفة يا ريس… لما الشكل يكتمل بورود اصل الصحيفة، يبقى نتكلم عن موضوع القضيه، والتدخل إللى الأستاذ بيتكلم عنه، ازاى نقدر نتكلم فى الموضوع من غير إكتمال الشكل..
حامد وقف بصدمه كان هيتجنن من كلام نهى..، كان واقف متغاظ انها اتكلمت بالشكل ده.. وحس ان القاضى ممكن يأجل القضيه اكتر من الاسبوع إللى هو طلبه..
القاضى بيرد: تم تأجيل القضية لمده أسبوعين لحين ورود أصل الصحيفة، مع الاعلان بالتدخل الهجومى ودفع مصاريف التدخل…
حامد اتجنن من قرار القاضى ووجه كلامه للقاضى بعصبيه: بس يا ريس هما قاصدين يطولوا فى القضيه عشان ما ناخدش حكم، وكمان أسبوعين كتير قوى.. كفايه أسبوع واحد بس.
نهى واقفه مبتسمه ان القاضى مد الدعوى أسبوعين عشان فادى يلحق يتصرف فى موضوع المحامى حامد، إللى ظهر فى القضيه فجأه، وكمان انها لقت ثغره فى القضيه وهو موضوع الشكل، إللى اغلب القضاه مش بيهتموا بيه رغم أنها مهمه جدا، و ممكن بسبب عدم إكتمال شكل الدعوى، المحامى يخسر قضيته، لأن من غير الشكل يبقى فى بطلان فى القضيه…
القاضى رد بنرفزه على حامد : إزاى يا أستاذ عايزنا نتكلم فى الموضوع من غير إكتمال الشكل..انت عارف ده معناه ايه؟! هيبقى فى بطلان فى الحكم وإجراءات التقاضى.. انا أصدرت قرار بالتأجيل لمده أسبوعين..
القاضى بص للحاجب بعصبيه: نادى على الرول إللى بعده..
حامد خرج من القاعة ونهى خرجت بعديه، حامد كان بيبصلها بتوعد وغيظ لأنها بوظت إللى هو كان مخطط ليه،بالرغم صغر سنها وهو كان اكبر منها فى السن، بس حس انها انتصرت عليه، وأن إزاى عيله صغيره زيها تخلى القاضى يسمع لكلامها، مع أنه محامى كبير، بس نسى أن نهى اتكلمت ودافعت بالحق وفى حدود القانون، حتى لو كانت استخدمت ثغره الشكل، فده شئ فى اصل القانون صح مش غلط، ولو حصل غير كده كان هيبقى فعلا فى بطلان فى حكم القاضى..
نهى خرجت من القاعة كانت بتتشاهد على إللى حصل جوه، ما كنتش مصدقه انها عرفت تتصرف بالشكل ده، وفضلت تحمد ربنا ان ربنا الهمها و قدرت تفتكر حاجه فى القانون صح تخرج منها من الموقف ده…