طعنات الغدر والحب الكاتبة ايمي ج4
دفع عمر المبلغ المالى المطلوب الى صاحب السيارة المصدومة بعد ان حدد مقدار المبلغ
واخذ سيارته وهو يبتسم فرحا بهذا المبلغ الذى يفوق ثمن تصليح السيارة بمراحل
واستدار عمر الى عم حسين وهو يقول:خد بالك المرة الجاية يا عم حسين المرة دى انا كنت موجود لكن المرة الجاية محدش عارف
مش كل مرة تسلم الجرة ولا ايه؟
حسين:حاضر يا عمر بيه
متشكر اوى
نظر عمر الى السيارة وهو يقول:ايه ده نيرمين!!!
معلش مختش بالى منك ازيك عاملة ايه
تصنعت نيرمين الابتسامة وقالت :الحمد لله
عمر:مش محتاجة اى حاجة؟؟
نيرمين:لا متشكرة اوى
وشكرا على اللى انت عملته
ابتسم عمر وقال:ولا يهمك دى حاجة بسيطة
انا زى اخوكى لو عوزتى اى حاجة متتكسفيش وقوليلى
نيرمين:ان شاء الله
ظل عمر واقفامنتظرا ان تسير سيارة نيرمين ليظهر انه يريد الاطمئنان عليهم
وهنا اكتشف عم حسين ان عجلات السيارة لا تتحرك
نزل ليجد ان ثلاث عجلات منها قد تم تفريغ الهواء منها فقال:اوف
هو يوم باين من اوله
كان عمر يقف على مسافة منهم وتظاهر بعدم معرفته للامرفقال :ايه ده ايه اللى حصل!!!
نزلت من العربية ليه يا عم حسين
حسين:كاوتش العربية عايز يتغير
ده كمان مش واحد دول تلاتة
عقدت نيرمين حاجبيها بسأم وقالت:طب والعمل ياعم حسين هفضل انا هنا ولا ايه؟!
عمر:اومال انا لازمتى ايه يا نيرمين انا هوصلك وعم حسين هيغير الاستبن وهبعتله حد يساعده متقلقيش
نظرت نيرمين الى عم حسين وهى تقول:لا انا هستنى لما يخلص
حسين:لا يا ست هانم عمر بيه بيتكلم صح الموضوع هياخد وقت وبعدين لو فضلتى هنا هتتبهدلى
نزلت نيرمين من السيارة وقالت:خلاص هاخد تاكس
نظر اليها عمر بعتاب وقال بصوت منخفض:ينفع كده!!بقى اكون واقف وبقولك هوصلك تقوليلى هاخد تاكس
للدرجة دى انتى مش واثقة فيا
نيرمين:لا والله مش كده بس ……..
عمر:بس ايه
اركبى بقى ميصحش وقفتنا كده
وافقت نيرمين بالرغم من انها غير راضية عن هذا الامر وتنهدت بضيق بعد ان ركبت فى الكرسى الخلفى
بينما ركب عمر السيارة وهو فى غاية السعادة
تحرك عمر بالسيارة وهو يفكر فى الامر وهو لا يصدق ان بداية ترتيباته قد نفذت بنجاح
نظر عمر الى المرآة فرأى نيرمين تنظر من نافذة السيارة متأملة فى هدوء شديد بوجهها الهادئ الجذاب فضغط على شفتيه وهو متردد فى محادثتها
فظل يختار كلماته بعناية حتى لا تضايق منه
وبعد تفكير لحظات قال:نيرمين
انتى متضايقة انك ركبتى معايا؟
انتبهت نيرمين لكلامه وقالت:لا ابدا
انا بس مكونتش متوقعة اللى هيحصل ده
عمر:انا محظوظ انى قابلتك النهاردة لانى كنت محتاجك فى حاجة مهمة اوى
ومرضيتش اتصل بيكى لانى عارف انك بتضايقى من كده
وانا مرضيتش اضايقك
وكمان ميصحش انى اجيلك البيت
نظرت نيرمين اليه وهى متعجبة من كلامة
فاستكمل عمر:وانا بحترم رغبتك فى انى متصلش عليكى
عندما سمعت نيرمين هذه الجملة شعرت بسعادة من تفهمه للامر بطريقة حضارية
استكمل عمر حديثه بجدية:
بس فعلا انا محتاجلك جدا
نيرمين:محتاجلى انا!!!!
عمر:ايوة
فاكرة الموضوع اللى كلمتك فيه لما كنا عند سلمى؟؟
نيرمين:ايوة فاكرة
عمر:هو ده الموضوع اللى عايزك فيه واخر حاجة قولتهالك انى عايزك تساعدينى لكن سيف جه ومعرفناش نكمل كلامنا
نيرمين:طب وعايزنى اساعدك ازاى؟؟
عمر:ممكن نقعد فى مكان هادى ونتكلم شوية؟
نيرمين:ومينفعش نتكلم هنا
عمر:صدقينى مش هاخد من وقتك كتير
ترددت نيرمين وقالت :اصل……..
عمر:ارجوكى يا نيرمين
مش هعطلك
اومأت نيرمين براسها وهى تشعر بعدم الرضا ولكنها اشفقت عليه فقالت:موافقة بس بشرط
خمس دقايق مش اكتر
عمر:وانا مش عايز اكتر من الخمس دقايق دول
************************
