طعنات الغدر والحب الكاتبة ايمي ج4

خرجت نيرمين متجهه الى السيارة وركبتها وهى تقول:ازيك ياعم حسين
حسين:الحمد لله يا ست هانم
مدت نيرمين يدها بالورقة المدون بها العنوان وهى تقول:تعرف تودينى العنوان ده ياعم حسين؟؟
حسين بعدما اخذ الورقة ونظر فيها ابتسم قائلا:ومعرفش ليه يا ست هانم ده عنوان سهل اوى بس بعيد حبتين
انتى ليكى قرايب هناك ولا ايه يا ست هانم؟؟
ابتسمت نيرمين وقالت:لا طبعا انا اصلا ماليش حد هنا فى مصر خالص
بس العنوان ده فيه واحد يبقى صديق والدى
وعنده امانة والدى سايبهالى عنده
ادار عم حسين محرك السيارة وهو يقول:توكلنا على الله ثم انطلق بها
************************************************** *

فى هذا الوقت تلقى عمر اتصالا هاتفيا وهو جالس فى مكتبه يكلم احد العاملين بالشركة وكان يملى عليه بعض الاوامر
وقبل ان يجيب على الهاتف امره بالانصراف
بعدها اجاب على الهاتف
ليجد الرجل المكلف بمراقبة نيرمين يخبره بخروجها
رد عمر:انت متأكد من اللى انت بتقوله ده؟؟
شوفتها بعينك؟؟
الرجل:ايوة يا عمر بيه بس هى مش لوحدها معاها السواق
عمر:اول ما توصل للمكان اللى هى رايحاه اتصل بيا وعرفنى على طول وقولى هى فين بالظبط
وعايزك تعرفلى هى رايحة هناك ليه؟
الرجل:امرك يا عمر بيه
عمر:بس انت متأكد انها معهاش غيرالسواق؟؟
الرجل:ايوة يا عمر بيه
هى خرجت لوحدها من البيت وركبت العربية ومكنش فيها غير السواق بس
عمر:طب اسمع الكلام اللى هقولك عليه ونفذه بالحرف الواحد
*********************************************
وصلت نيرمين الى العنوان المطلوب
نزلت من السيارة وهى تقول لحسين:استنانى هنا يا عم حسين انا جايا على طول
صعدت نيرمين الدرج الى الدور الثالث وطرقت باب الشقة وظلت منتظرة فترة ليست بالقليلة
وهنا خرجت امرأة تسكن بجوار شقة صديق والدها وقالت لنيرمين:انتى عايزة مين يا هانم؟
نيرمين:هو عم رجب لسة مرجعش من السفر؟؟
المرأة:انتى عايزة رجب الرفاعى
نيرمين:ايوة هو ده
المرأة:لا والله لسة مرجعش
تنهدت نيرمين بحزن وقالت بصوت منخفض:لسة!!
المرأة:انا شوفت حضرتك هنا قبل كده مش كده؟؟
نيرمين:آه انا كنت جيت من فترة سألت عليه وشوفت حضرتك
المرأة:على العموم انتى ممكن تسيبى رقم تلفونك وهو اول ما يرجع هتصل بيكى اعرفك
ابتسمت نيرمين وقالت:فكرة برده
اعطت نيرمين الرقم لتلك المرأة وقبل ان تنصرف قالت لها المرأة:على فكرة يا هانم نسيت اقولك انه ليه بنت متجوزة فى مدينة نصر لو انتى محتجاها فى حاجة يعنى
التفتت نيرمين اليها بسعادة وقالت:مش كنتى تقوليلى من الصبح اكيد هحتاجها
ممكن تقوليلى عنوانها بالظبط
المرأة:والله يا هانم ما اعرف العنوان بالظبط بس انتى ممكن تسألى واللى يسأل ميتوهش
اومأت نيرمين رأسها باحباط وقالت :طب لو عرفتى عنوانها او لو عم رجب رجع اتصلى بيا فورا ارجوكى
المرأة:من عنيا حاضر
نزلت نيرمين من تلك العمارة واتجهت الى السيارة وركبتها وهى تنفخ
عم حسين:مالك يا هانم حضرتك مالقيتهوش ولا ايه؟؟
نيرمين:الظاهر ان الموضوع هيطول شوية يا عم حسين
انطلق حسين بالسيارة ليعود الى القصر
وفى الطريق بعد فترة قصيرة توقفت السيارة التى تسير امامه فجأة فاضطر الى ان يتوقف هو الاخر فجأة فاصطدم بالسيارة التى خلفه
شعرت نيرمين بفزع شديد من اثر الاصطدام ووضعت يدها على قلبها فقالت:مش تحاسب ياعم حسين؟؟
حسين:والله يا هانم مش غلطتى الراجل اللى قدامى ده هو السبب
شوفتى !! هو السبب فى اللى حصل ده وهرب اهو
نزل صاحب السيارة المصدومة متوجها الى حسين
واضطر حسين الى النزول هو الاخر ليحاول معالجة الامر وترقبت نيرمين الامر وهى فى غاية القلق
جاء الرجل وهو غاضب للغاية وقال:مش تاخد بالك يا بنى آدم عاجبك كده؟
اديك بوظتلى العربية
حسين:انا اسف والله مكنتش اقصد العربية اللى كانت قدامى هى السبب هى اللى وقفت قدامى مرة واحدة
الرجل:وانا اعمل ايه بآسف ده
كانت نيرمين تنظر للوضع وهى خائفة ولا تدرى ماذا تصنع
وفى تلك الاثناء مر عمر بسيارته وهو يترقب الامر من بعيد مبتسما ثم اقترب منهم ونزل من سيارته مرتديا نظارته الشمسية الانيقة
نزعها من على عينه وعو يتأمل سيارة الرجل وهو يقول:ايه ده عم حسين!!!
ايه اللى حصل؟؟
حسين:عمر بيه!!
كويس انك موجود الحقنى يا عمر بيه
عمر:فى ايه يا عم حسين؟!انا كنت فايت بعربيتى بالصدفة لولا انى عارف عربية سيف كنت فكرت ان اللى بيتخانق واحد شبهك
حسين:انا والله مكونتش اقصد اخبطله العربية بس والله غصب عنى
العربية اللى كانت قدامى وقفت مرة واحدة واضطريت انى اقف غصب عنى فخبطت فى عربية الاستاذ
نظر عمر الى صاحب السيارة المصدومة وقال:خلاص يا استاذ معلش تصليح عربيتك عندى
يلزمك كام؟؟
كانت نيرمين تترقب ما يحدث وهى تشعر بالضيق من وجود عمر الذى سيقوم بدور المخلص
ولكنها لا تستطيع ان تنكر فى نفسها ان وجوده انقذهم من مشكلة كانت ستعطلهم كثيرا