أنت قدري بقلم سمية بلال ج3

دخل الاوضة والاسلاك مغطياها قلبه وجعه على حالت ملاكه فى الحال ده ولكن تمتم بسرعة: اللهم لا اعتراض اللهم لاعتراض
مشى ناحيته وقعد على الكرسى ومسك كفها وضمه بين ايديه وبدأ يمسح عليهم بحنية: ازيك ياورد يا وردة حياتى وريحانة قلبى وحشتينى اوى انا عارف انك دلوقتى سمعانى

فوقى انا محتاجلك اوى مبنامش فى البيت علشان عارف انى هصحى مش هشوفك قدامى ولا هشوف بسمتك اللى بتنور ليا حياتى عمار ضعيف من غيرك ياورد اه ننسيت اقولك

انت لسه معرفتيش انك كنتى حامل فى توأم بنت و ولد زى ماتمنيتى عارفة ياقلبى انا سميتها فاطمة زى ماتفقنا
والولد سميته ياسر على اسم اغلى صاحب عندى لانه تعب ووقف جنبى

تعرفى ان اولادنا برضو مستنيينك مصممين يفضلوا فى الحضانة ههههههه متخافيش هما بخير بس علشان الولادة كانت مبكرة بس رافضين يطلعوا منها لانهم كانوا جواكى وعرفوا حنيتك ومستنيينك ياورد يلا ياحبى فوقى ولادنا محتاجينك وانا انا كمان يازهرتى

يلا بقى ميعاد الزيارة انتهت اصل الدكتور ده رخم اوى كل مرة يطلعنى بالعافية انا همشى مع انى مش عايزة اسيبك بس مستنيكى ياوردة وقلب عمار

بعدين ملس على وشها وعدل حجابها ايوة كده مظبوط اصل انا بغير عليكى من اى حد ورد بتاعت عمار وبس
قبلها على جبهتها وتحشرج صوته كانما يمنع دموعه من النزول مع السلامة ياملاكى هرجعلك تانى

وخرج بمجرد خروجه خرجت دمعة يتيمة من عينيها تبث شوقها له

ّّّّّّّّّّّّّّّّّّّّّّّّّّ
ّّّّّّّّّّّّّّّّّّّّّّّّّّ

عمار راح البيت علشان يغير هدومه بعد لما صلى شوية فى المسجد لقى ابو عمرو باين عليه الحزن
عمار باستغراب: فى ايه ياعمى خير ان شاء الله

ابو عمرو بحزن: ام عمرو تعيش انت ياابنى
عمار بتعاطف: انا لله وانا اليه راجعون البقاء لله

ابو عمرو: ونعم بالله
عمار: وعمرو فين دلوقتى زمانه زعلان

ابو عمرو: عمرو نايم لانه فضل يعيط كتير وما صدقت راح فى النوم
عمار: لا اله الا الله عن اذنك ياعمى هروح اغير هدومى وارجع على طول

ابو عمرو : اتفضل يابنى

عمار طالع على السلم وفجأة افتكر حاجة: وازاى الحاجة دى تاهت على باله
قال فى سره سامحينى ياورد اتاخرت كتير بس والله مش بايدى ونزل لابو عمرو وقرر يفاتحه فى الموضوع خلاص مش قدامى غير الحل ده

عمار ينهج: عمى ياعمى حضرتك دفنت ام عمرو
ابو عمرو باستغراب: لأ يابنى لسه

عمار بارتباك: بص ياعمى انا هطلب منك طلب وربنا يشهد انى لو مش مضطر عمرى ماهطلبه منك
ابو عمرو: اتفضل يابنى ده انت جمايلك مغرقانا

عمار: لا ياعمى الموضوع ده ملوش دخل باى حاجة تانية بينا يعنى لو رفضت هحترم قرارك
ابو عمرو: خير يابنى خوفتنى

عمار: انا عايز اطلب منك ان حضرتك تتبرع بقلب ام عمرو ولو طلع متوافق مع انسجة ورد هتعيش ان شاء الله
ابو عمرو بتردد: بس يابنى ده هيكون فى تشريح وانا عقلى مايستحملش انى اتخيلها بالمنظر ده انا اسف يابنى

عمار مش ألح عليه نزل رايه بحزن وتنهد: خلاص ياعمى خير ان شاء الله ولا يهمك واستدار ليمشى

عمرو: استنى يا ابيه
عمار بص ليه
عمرو ببكاء علشان خاطرى يابابا ادى قلب ماما لابلة ورد انا بحبها اد ماما بالظبط دى جبتلى كتب وهدوم للمدرسة وبتحبنا كفاية ان قلب ماما هيبقى عايش فيها يعنى ماما مش هتبقى ماتت وقلبها هيفضل يدق الله يخليك يابابا وافق علشان خاطرى انا بحب أبلة ورد اوى

ابو عمرو صعب عليه ابنه وكمان حال عمار وعزم فى قلبه انه صدقة للمرحومة: خلاص يااستاذ عمار انا موافق

عمار عادت البسمة ليه وحضنه هو وعمرو: صدقنى ياعمى ده جميل عمرى ماهنساه
ابو عمرو: جميل ايه بس انت زى ابنى والست ورد كمان بنتى

عمار اول حاجة عملها راح جرى على المسجد وصلى ركعتين شكر لربنا
صدقت ياربى ومن يتق الله يجعل له مخرجا ويرزقه من حيث لايحتسب

ازرع جميلا ولو في غير موضعه …………….فلن يضيع جميل أينما صنع
إن الجميـــــــل إذا طال الزمان به …………….فليس يحصده إلا الذي زرع

ّّّّّّّّّّّّّّّّّّّّّّّ
ّّّّّّّّّّّّّّّّّّّّّّّّّّّّ

الدكتور: هنشوف دلوقتى اذا كانت الانسجة هتتوافق ولا لا وان شاء الله خير
الجميع : يارب

فرحة : انا خايفة اوى يابدر مرعوبة
بدر : ان شاء الله الانسجة هتتوافق وهترجع ليكم من تانى
فرحة: يارب يابدر يارب

جه الدكتور والبسمه على وشه : ان شاء الله العملية هتتم بنجاح دعواتكم معانا
هلل الجميع وحمد الله ثم دخل الدكتور الى العمليات

مرت اللحظات كالسنين ثقيلة وبطيئة بعد 3 ساعات خرج الدكتور
كله جرى عليه وعمار قال بلهفة : خير يا دكتور طمنا

الدكتور ويمسح العرق من على وجهه: الحمد لله العملية عدت على خير ولو ال24 ساعة دول عدوا على خير كل حاجة هتبقى تمام بس ممنوع الزيارة دلوقتى

الجميع: الحمد لله الحمد لله
وعمار نزل على مسجد المستشفى وفضل يصلى ويدعى ربنا ان كل حاجة تبقى تمام وتقوم بالسلامة

:::::::::::::::::::::::::::::::::::::::::::::::::: ::

عمار يتأملها بشوق جارف ولا ينطق بشىء
ورد توردت وجنتيها: ايه ياحبيبى بتبصلى كده ليه من ساعة ماجيت وانت ماتكلمتش
عمار مطبقا على يديها: اوووش انا عايز اتاملك وبس وحشتنى عيونك اوى ووحشتنى كلمة حبيبى لما بتطلع منك كلك على بعضك وحشتينى

ورد رفعت ايديها ولمست وجهه: عمار انت متغير اوى انت مكنتش واخد بالك من نفسك صح
عمار: محدش بيهتم بيا غيرك انا من غيرك واحد تانى

قطع كلامهم تخبيط على الباب وكانت الممرضة جايبة ولادهم عمار اخدهم
بصى حبايب قلبى حلوين ازاى

ورد مدت ايديها بشوق وحنين: جيبهم ياعمار نفسى اشم ريحيتهم نفسى اخدهم فى خضنى
الله حلوين اوى تبارك الله أحسن الخالقين

عمار بمرح: بس انتى خالفتى الاتفاق مش قلنا البنت عايزها شبهك
ورد: ههههههههه ده انا مبسوطة اوى لانها خدت لون عينيك وحضنتهم يااااااااااه وحشتونى اوى ياحبايب ماما وانتو ماما وحشتكم ولا لا

عمار ضمهم جميعا : ربنا يخليكوا ليا بحبكم يا اطفالى التلاتة
ورد تقوس شفتيها كالاطفال: ايه ده هو انا طفلة ياعمار

عمار بحب كبير: واحلى طفلة انتى ياقلبى بريئة زى الاطفال وقلبك ابيض زيهم بالظبط بحبك اوى ياطفلتى ويا زوجتى ويا كل حاجة ليا

ورد: وانا كم
قطع عليهم بكاء الطفلين

عمار بغيظ: ايه ده هو انتو هتبدأوا تقطعوا عليا من دلوقتى
ورد: هههههههههههههههههههههه
:::::::::::::::::::::::::::::::::::::::::::::::::: :

مرت الشهور و السنين كلمح البصر

فاطمة بسعادة: انا نجحت يا أبى الحمد لله بامتياز
عمار و ورد : اللهم لك الحمد الحمد لله

عمار وورد حضنوها سوا: مبروك ياقلبى
ياسر جه وفى ايده تفاحة بياكلها قال وبقه مليان: ايه وانا ماليش من الحب جانب ولا انا وقعت من قعر القفة
ده انا لما انجح بتعملولى عزا وجو حزاينى كده

عمار مسكه من ودنه بهزار: ناجح ب 80 %
ياسر: ياأبى بس سيب ودنى علشان نعرف نتكلم ايوا ايوا كده شطور ياعمو وبعدين مانت عارف انا مليش فى الدراسة ده كرم من ربنا على فكرة انى بجيب المجموع ده مش من مجهودى ولا حاجة

ورد بحنية: اهم حاجة انك مارست الحاجة اللى بتحبها وبتأدى رسالتك
ياسر بجدية: الحمد لله انا ميولى تقنية شوية تعرفى ياأمى انا بشتغل على برنامج بيمكن مستعملين النت انهم يتصفحوا براحتهم بدون وجود اى صفحات مخلة وكمان برنامج الاباء والامهات يقدروا من خلاله انهم يعرفوا اولادهم بيعملوا ايه على النت وازاى يتابعوهم غير انى الحمد لله ربنا وفقنى وهكرت مواقع مسيئة كتير وقفلتها بس شخصيتى مجهولة لحد دلوقتى الحمد لله

عمار بفخر: جزاك الله خيرا يا حبيبى انت كده بتدفع مضرة كبيرة عن المسلمين وباب الفتن كل مدى بيزيد
فاطمة: ربنا يثبت قلوبنا على دينه
الجميع آمين

ياسر يحتضن اخته: وبمناسبة ان فوفو حبيبة قلبى نجحت وعلت راسنا انا هفسحها النهاردة فسحة عمرها ماهتنساها

فاطمة بسعادة: بجد يا ياسر
ياسر بمحبة اخويا: بجد يا عيون ياسر يلا ياقلبى روحى غيرى هدومك وانا مستنيكى
فاطمة تجرى: فوريرة وانا هنا

ورد: انا مبسوطة بيك اوى ياحبيبى لانك مصاحب اختك ومش بتخبوا عن بعض حاجة
ياسر بجدية: ياأمى الزمن بتغير فاطمة دى بنتى الصغيرة قبل ماتكون اختى لازم اكون مصاحبها علشان املى الفراغ اللى بيبقى فى فترة الطفولة والشباب والحمد لله ربنا حافظها وحضراتكم كمان مش مقصرين ربيتونا احسن تربية

عمار: ربنا يحرسكم وينفع بيكم
ياسر وورد:آمين يارب

جت فاطمة وقبلوا ايادى ورد وعمار وخرجوا

ورد بارتياح: الحمد لله انا كنت خايفة اننا منقدرش نربيهم التربية الصحيحة بس الحمد لله ربنا وفقنا
عمار وقد ظهر بعض الشعر الابيض فى راسه وزاده وقار قال بحب: الحمد لله وده بفضل وجودك وسطينا بعد ربنا ثم قبل يديها

ورد بحب تركت اصابعها لتتخلل بين شعيرات رأسه: هههههههه الشعر الابيض ظهر ياحبيبى
عمار هههههههههه شوفتى العيال شيبونا

ورد تضع رأسها على صدره: انت فى عينى احلى واحد فى الدنيا حتى وانت شايب يا أحلى قدر فى حياتى
:::::::::::::::::::::::::::::::::::::

فرحة خلفت سارة بعد حسن بسنتين وكالعادة كانت فى الفترة دى مطفشة بدر بالوحم بتاعها وحسن كان بيحب كتير جوز خالته عمار وكان بيتعلم منه حاجات كتير اما سارة فعنادها اسوأ حاجة فيها نسخة من فرحة وهى وياسر ابن خالتها لو اجتمعوا فى مكان مع بعض بيحصل حريقة لانها وهى صغيرة كان بيحب يستفزها بس لما كبرت كلامه معاها قل علشان يسدوا باب الشيطان بس هتعمل ايه بتحبه وهو كمان بيحبها بس مستنى لما يأمن مستقبله ويبنى نفسه بنفسه وجابت اجندة وكتبت فيها كل حاجة كانت عايزة تقولها ليه وكالعادة بدل ماتكتب عن حبها ليه بتكتب عن المقالب اللى هتعملها فيه لما يتجوزوا ان شاء الله (خخخخخ تفكير اجرامى زى امها )

بدر: انا عايز اجوز العيال دول بقى علشان نطلع رحلة مع بعض ونتفسح شوية
فرحة : بجد ياحبيبى

بدر: بجد ياروحى بقولك ايه

فرحة: نعم

بدر: ماتيجى نلعب دور بلايستيشن

فرحة بمكر: واللى ينغلب

بدر بزهق: عارف هيغسل المواعين انا مش عارف انتى طالعة استغلالية لمين
فرحة: ليك طبعا ياحبيبى يلا بقى علشان عايزة انام وراك مواعين

بدر بغيظ: كأنك واثقة انك هتكسبى

فرحة بزهو: طبعا وده فيه شك
ولعبوا فعلا وكالعادة فازت فرحة بس مش شطارة منها لا فكت الجاكات وخلت جاك بدر اللى بيلعب بيه بيعلق

بدر يتأفف: اووف مش عارف انتى بتكسبى ازاى انا لما بلعب حد بكسبه من اول جولة
فرحة بكبرياء: قدرات دى قدرات يابنى يلا سلام ياحبى مش هعطلك على المواعين

:::::::::::::::::::::::::::::::::::

كانوا على الكورنيش
فاطمة بحب: تسلملى يا أحلى اخ فى الدنيا

ياسر ممسكا بيدها: اى حاجة نفسك فيها قوليلى
فاطمة : انت مبتخليش فى نفسى حاجة ربنا يخليك ليا

احمد ابن ياسر وحبيبة وكمان اخو فاطمة من الرضاعة: يانهار اسوح تعالى يام اسماعين شوفى اللى بيحصل ياخسارة شرفنا اللى راح فى الطين ماشية مع ولد من ورا ضهرى وقال وهو بيشمر ايده بحركة مسرحية لازم اغسل تارى بيدى

فاطمة: هههههههههههههههههههههههه ايه ياحمد انت السلكين بتوعك علطول شابكين فى بعض
ياسر حط ايد على بقى احمد: ايه انت رغاى اوى لوك لوك لوك

احمد : اوعى ياعم بوظت اللحية ايه ده مش ده حسن ونادوا عليه
فاطمة قلبها دق كالعادة لما يتنظق اسم حسن قدامها

حسن: السلام عليكم
الجميع : وعليكم السلام

حسن بحب يحاول ان يداريه : مبروك يافاطمة
فاطمة بخجل: الله يبارك فيك ياحسن وانت كمان مبروك هتخلص طب قريب

حسن : الله يبارك فيكى وبعدين احمد قال: انت كنت رايح فين يابو حميد
حسن: كنت رايح المكتبة كنت عايز شوية كتب كده

احمد بيحب يستفز حسن لانه عارف انه بيغير على فاطمة حتى منه حط كتافه على فاطمة: الله سبحان الله دى فوفو حبيبة قلبى كانت رايحة هناك برضو
فاطمة باستغراب امتى ده : انا مقلتش

احمد قاطعها: ههششش ايه ياحبيبتى نسيتى مش كنتى بتقولى ياميدو ياقلبى انا عايزة اروح الكتبة ضرورى

حسن زفر بغيظ وقلبه بياكله من الغيرة وازاى مش يغير عليها واول دقة قلب كانت ليها وافتكر لما كان مرة راجع من المدرسة ولقى فاطمة واقفة مستنية الباص وكان الجو شتا راح ليها بس وهو ماشى اتزحلق ومسك فى الشجرة علشان مش يقع وايده اتجرحت

فاطمة جريت عليه : حسن اتعورت
حسن خبى ايده وراه ” لا مش اعورت ا نتى واقفة هنا ليه
فاطمة ببكاء: الباص اتاخر وانا مش هعرف اروح لوحدى وانا خايفة اوى

حسن بحنية خلع الكاب بتاعه ولبسه ليها: خلى دى على راسك علشان المطرة وكمان خدى دى علشان مش تتعبى ولف الكوفية حوالين رقبتها

فاطمة : وانت ياحسن كده هتبقى تعبان وهتاخد حقنة
حسن: متخافيش انا معايا عجلتى هروح على طول بس هستنى معاكى لحد لما الباص ييجى

فاطمة خدت بالها انه اتعور فى ايده مسكتها قالت وهى بتعيط : بص ياحسن انت اتعورت
وطلعت منديلها ومسحت الدم من على ايده وباست مكان الجرح

بصت ليه وهى بتضحك: كده مش هتوجعك وهتخف بابا لما حاجة توجعنى بيبوسها وبيقولى هتخف على طول

اما حسن اول لما فاطمة باسته قلبه فضل يدق لان فترة مراهقته كانت بدأت ونضجه زاد
قطع عليه صوت فرحة لما الباص جه : حسن الباص جه مع السلامة ابقى تعالى عندنا علشان نلعب مع بعض واوريك رسمتى الجديدة

حسن بابتسامة: ماشى هبقى اجى مع ماما وبابا
وكانت دى اول دقة من قلب حسن واول حب طفولى برىء كبر مع الزمن ومحدش يعرف بيه غير ربه وعمار

قطع عليه صوت ياسر: ايه ياسحس انت رحت فين
حسن ابتسم: ياعم انا هنا اهو هروح فين يعنى مبروك مرة تانية لفاطمة هستأذن انا بقى علشان ورايا كام مشوار
ومشى حسن لانه لو قعد اكتر حاسس انه هيتفضح وكله هيعرف انه بيحب فاطمة