خداع انثى الجزء الثاني

نظر لها نظره مطوله وقال
مدحت :- انا عايز اعرف كل تحركات رائد ايه عايز اعرف بيكلم مين بيروح فين بيعمل ايه وهو فى المكتب كل حركه هو بيعملها

حدقة به بصدمه وقالت
رقيه :- حضرتك عايزنى اتجسس على ابنك وانقلك أخباره

أومأ رأسه بالتأكيد وقال
مدحت :- ايوه عايز اعرف كل حاجه بتحصل من ورايا

حركت رأسها بالرفض وقالت
رقيه :- انا مستحيل اعمل كده حضرتك

نظر لها بغضب وقال
مدحت :- انتى وافقتى انك تساعدينى يبقى تعملى زى ما اقولك من غير ولا كلمه

ردت عليه بضيق وقالت بنبره مختنقه
رقيه :- انا فعلا وافقت أن اساعدك بس اساعدك أن اضايقه امنعه بطريقتى أن يعمل حاجه غلط مع واحده بس مش لدرجة اتجسس عليه وانقلك أخباره أنا مستحيل اعمل كده لا دينى ولا اخلاقى يسمحوا ليا اكون كده انا اسفه انا مضطره انسحب خالص من حياتكم ومن مساعدتى لحضرتك

هاب واقفا وهدر بها بغضب وقال
مدحت :- مش بمزاجك ترفضى دلوقتى انتى هتتفذى اللى بقولك عليه بالحرف الواحد احسن اقسم بالله اوديكى انتى وعيلتك كلها وراه الشمس

نظرت له بدموع وقالت
رقيه :- حضرتك ليه بتعمل فيا كده ده جزاتى علشان وافقت اساعدك انا عملت كده علشان حبيتكم بجد وعلشان انتوا دخلتونى بيتكم و اعتبرتونى زى بنتكم بس حضرتك اتغيرت كتير اوى وبقيت اخاف منك بجد

رد عليها بعدم اهتمام وقال
مدحت :- انا عندى مصلحة ابنى اهم من اى شئ صحيح انا دخلتك بيتي واعتبرتك بنتى ومازالت بعتبرك بنتى بس طبعا انتى ملزومه تنفذى اللى بقولك عليه علشان مصلحة رائد وعلشان خاطر الفلوس اللى دفعتها فيكى

نظرت له بصدمه وقالت بعدم فهم
رقيه :- الفلوس اللى دفعتها فيا تقصد ايه !!

رد عليها بتوضيح وقال
مدحت :- ايوه انا دفعت لاخوكى الكبير فلوس علشان يبعد عنك ويسيبك فى حالك ولو مكنتش عملت كده كان زمانك دلوقتى متجوزه الراجل العجوز اللى اكبر من ابوكى

حركت رأسها بالرفض وقالت
رقيه :- مستحيل ده يكون حصل ليه عملت كده ليه اشتريتنى ودفعت فيا التمن زى غيرك ليه

رد عليها وقال بعدم اهتمام
مدحت :- انا قولتلك قبل كده مستعد اعمل اى حاجه علشان مصلحة ابنى

نظرت له بدموع وقالت
رقيه :- ومصلحة ابنك انك تتجسس عليه مصلحة ابنك فى انك تغشه وتضحك عليه انا اه معترضه على أفعال رائد ومش عجبنى اللى هو فيه بس مش لدرجة انقلك أخباره