ست البنات لقلم نهى مجدي ج1

فتحت الباب بسرعه لأجد عمر امامى مرتديا بنطالا زيتى اللون وقميصا ابيض اللون ذو الياقات العريضه فأضاف وسامه لوسامته . لم ادرى ماافعل وانا بهيئتى تلك ولكنه اشاح نظره بعيدا حتى استدركت امرى وركضت لغرفتى ابدل ملابسي

بعد دقائق خرجت له متلهفه ان اسئله ان اصاب تميم سوء ولكننى وجدته دخل وجلس على المقعد واورب الباب خلفه حتى كاد ان ينغلق وكانت ملامحه هادئه لاتوتر فيها . سئلته بقلق

– تميم كوي

ابتسم وأجاب

– كويس جدا ماما قربت تأكله محشي

ضحكت لدعابته تلك وعندما رئيته يضحك نسيت مافعله فى الصباح . جلست على المقعد المقابل وانتظرت ان يبدء حديثه وبالفعل بدئه بوضوح

– طه اخوكى اتصل بيا من شويه

ارتجفت قلبى ان تكون امى اخبرته بما حدثتها به فسئلته بسرعه

– ليه خير ؟

اجاب بهدوء

– بيقول ان المدرس بتاعك اتصل بيه وطلب منه انك تكملى دراستك وطبعا طه كلمنى بما انى …

قالها وصمت ثم استطرد محاولا استبدال تلك الكلمه التى لا معنى لها الان

– بما انى مكان عابد الله يرحمه

تفهمت جملته جيدا ولم اعقب فسئلنى

– ايه رأيك فى الكلام دا

صمت لبرهه ثم اجبته بخفوت

– انا مش هكمل خلاص كفايه اللى درسته . انا كفايه عليا تربيه تميم

لشده غرابتى استكمل هوا وكأنه يتحدث بلسانى

– لو كان على تميم ماما ووفاء هيساعدوكى فى تربيته والوقت اللى هيكون عندك امتحانات هيكون معاهم وتقدرى توفقى بينه وبين دراسته

اتسعت ابتسامتى وانفرجت اساريري غير مصدقه مااسمع

– يعنى انت موافق انى اكمل

قالها بسرعه وبدون تفكير

– طبعا هوا فيه احسن من ان الانسان يطور من نفسه . انا ياما اتحايلت على داليا تكمل بعد الدبلوم وموافقتش

سئلته بحرج

– يعنى مش هتضايق لو بقيت …. يعنى …. اقصد

تفهم عمر مقصدى وأكمل هوا

– تقصدى لو بقيتى احسن منى ومعاكى شهاده وانا لا

استدركت حديثة بسرعه محاوله تخفيف حده الجمله ولكن اشار لى عمر ان اوفر على نفسي عناء التفسير واكمل

– انا سبت التعليم برغبتى ومبسوط باللى وصلتله واتمنى لتميم ان امه تبقي احسن واحده فى العالم علشان يبقي فخور بيها

كانت كلماته بمثابه رقائق الثلج الذى يتساقط على جسد محموم وكأن روحى عادت لجسدى ودب الامل فى اوصالى دفعه واحده فكانت ابتسامتى لااراديه تسكن فمى حتى نهض عمر من مجلسه وقد اوصل رسالته

– انا قولت لطه يبلغ المدرس بموافقتنا واتمنى انك متخزلنيش