للنصيب رأي اخر بقلم لوليتا ج3

للنصيب رأي أخر《جمود أنثى》
الحلقة ( ٢٥ )…
فى المزرعه…..
وائل صحى من النوم واخد شاور وظبت نفسه ونزل يتمم على كل حاجه موجوده وتمام… هو بقى عنده خلفيه نهى وأهلها بيحبوا إيه، و بيعملوا ايه فى العزومات… فهو قالهم مايجبوش معاهم اى حاجه زياده غير الحاجات إللى هو بيحب ياكلها من إيديهم زى الرز والتورته إللى منى بتعملها….
الساعات مرت عليه كأنها سنين…. كل حاجه معاهم وحشاه… وحشه قعدته فى وسطيهم… وحشه ضحكه وهزاره ولعبه مع ندى… و وحشته أوى نهى وهزارهم وغلاستهم مع بعض… بالرغم إنه كان بيكلمها كل يوم ويرخموا ويغلسوا على بعض… بس وهى قدامه…. الموضوع بيبقى مختلف….حاجه تانيه خااالص….
كان بيتخيل ملامحها وهى مكشره او متنرفزه، أو هى بترخم عليه… والأهم وهى بتضحك من قلبها… كان مشتاق لنظرة و إبتسامة عنيها… وكمان للتحديات إللى كانت بينهم…..
نهى كانت فى العربيه مع كريم و منى وأحلام…. كانت سرحانه مع نفسها… خايفه ومتوتره لما تقابله وتشوفه… مش عارفه ممكن تتصرف معاه ازاي… بالرغم إنهم بيتكلموا فى التليفون إلا إنها خايفه لما يتقابلوا و يبقوا قصاد بعض…
كريم قابل سامى فى الطريق و ندى اصرت إنها تركب مع ملك ويمنى، ونهى سابتها تركب معاهم….
بعد مسافه مش طويله أوى قابلوا فادى ومصطفى على الطريق وطلعوا ورا بعض بالعربيه….
فادى دخل الأول بعربيته لأنه كان سابقهم فى الطريق….
وائل خرج وهو مشتاق ليهم وكله لهفه وشوق لندى وإللى أخدت قلبه وعقله….
فادى نزل من عربيته وسلم عليه هو و منار وأولاده.. وعلى سامى وجماعته، وندى أول ما شافته، جريت عليه بمنتهى العفويه و البراءه، وهو ما صدق اخدها فى حضنه وشالها ولف بيها كانت وحشاه أوى وكأنه بيخبى نفسه فيها… هو إللى كان محتاج الحضن ده مش هى…. ندى فضلت ماسكه فيه مش عايزه تسيبه وهو كمان كأنه ما صدق وفضل شايلها وبيسألها بحب: أمال مامى فين؟؟؟؟؟
ندى: مع كريم وناناه فى العربيه….
مصطفى و رنا نزلوا من عربيتهم، و وائل إتفاجأ بجيهان نزلت من العربيه ومدت إيديها وبإبتسامه: إزيك يا وائل!!! أخبارك إيه… مفاجأه… مش كده؟؟؟؟ بس يا رب تكون مفاجأه حلوه….
وائل إرتبك واتوتر لأنه مكانش عامل حسابه ولا تخيل إن جيهان هتيجى معاهم… بس كان مضطر يبين لهم انه عادى… فسلم عليها بإقتضاب: أهلا وسهلا بيكى…. شرفتينى
جيهان بإبتسامه: ده شئ يسعدنى يا وائل…
ندى نزلت من إيد وائل وراحت مع ميرا وملك عشان يلعبوا جوه….
وائل كان مترقب نزول منى وأحلام و نهى إللى كانت متوتره وماكنتش عايزه تنزل أصلا من العربيه….
وائل راح لكريم وسلم عليه وعلى منى وأحلام.. بالايد… و أخيرا عينه جت على آخر واحده نزلت من العربيه إللى كان مشتاقلها أوى ومشتاق لعنيها إللى خفياهم بنظارتها السوده.. وبإبتسامه ملت وشه كله وبيمد إيده وهو متغاظ إنه مش عارف يشوف عنيها: إزيك يا نهى…. نورتى بيتى المتواضع…
نهى إتحرجت منه أوى لما مد إيده، ومدت إيديها بتوتر وهى مبتسمه: حمد الله على السلامه يا باشمهندس… البيت منور بأصحابه…
نهى إتوترت من سلام وائل ليها إللى كان بيضغط على إيديها لدرجه إنها إستسلمت لضغطته دى وبتحاول تشيل إيديها منه بالراحه وهو بيضغط أكتر و مش عايز يسبها… فنهى راحت ضغطت هى كمان على إيده يمكن يحس إنهم مش لوحدهم، فهو إبتسم وشال إيده….
نهى إستغربت أوى من وجود جيهان معاهم هى ما تعرفهاش… بس عرفت بعد كده إنها أخت مصطفى لما سألت منى عليها…
نزلوا الشنط ووائل بياخد منهم الحاجه ودخلوا كلهم على جوه فى الجنينه….
الاطفال بيجروا وفرحنين بالجو والمكان… قعدوا شويه يرغوا ويهزروا و وائل بيسألهم: مين عايز يركب خيل؟؟؟
سامى بهزار: أنا ماكنتش عامل حسابى على موضوع الخيل ده… لأ بلاش أنا…
وائل بضحك: يا باشا ولا يهمك… أنت قدها وقدود… ومش هقولك تعالى نتسابق… ما تخفش…
كريم و سامى و مصطفى، و فادى، و رنا وريم وجيهان راحوا معاه، منى وسالى وأحلام ومنار فضلوا قاعدين ونهى كمان مردتش تروح معاهم…
ندى وميرا و ملك و يمنى بقوا مبسوطين أوى وندى صممت إنها تركب الحصان الصغير…
فعلا السايس ركبها هى وميرا…
والباقى دخلوا الاسطبل وبيتفرجوا على الخيل… وائل ما اخدش باله ان نهى مارحتش معاهم غير لما دخل الاسطبل ولقاها مش موجوده… أستغرب أوى، و أتضايق من تصرفها، بس ما كنش ينفع يرجعلها تانى ويسألها هى ليه ما جتش معاهم… وائل قالهم على اسامى الخيول بتاعته، واقنعهم انهم يجربوا ويركبوا الخيل، وسأل البنات، ووافقوا هم كمان وائل فك الخيل إللى هم هيركبوه، بس جيهان لقت وائل فك كل الخيل ماعدا مهره، فقالتله: الحصان ده شكله حلوه أوى… انا كنت عايزه اركبها…
وائل بهدوء: مش هينفع تركيبها…عشان دى مش متروضه وممكن توقعى منها…
جيهان بتحاول تفتح معاه كلام وتبينله إنها مش بسهوله تقع او تخسر: ما يقع إلا الشاطر يا باشمهندس، ولا إيه؟؟؟
وائل كان محتفظ بمهره لنهى، كان عنده إحساس إن ما ينفعش حد يركبها او يروضها غيرها… هى لنهى وبس… فرد عليها بخبث وهو أصلا متضايق إنها جت معاهم: ممكن الشاطر إللى يقع مايعرفش يقوم من واقعتوا تانى… وخصوصا لو كانت واقعته من حصان….
جيهان سكتت، ووائل خرج مع السايس بباقى الخيل وكل واحد فيهم ركب فرسه وبيتمشى بيه…
منى إستغربت نهى إنها مردتش تروح معاهم، فسألتها بصوت واطى عشان محدش يسمعهم: نهى! ليه ماروحتيش معاهم وانت اصلا بتحبى الخيل؟؟؟
نهى بضيقه: مش عارفه يا ماما ليه عملت كده، بس حاسه إنى مش مستعده انى اركب خيل دلوقتى… يمكن كمان شويه….
منى سكتت بس من جواها مش مرتاحه لرد نهى….
نهى كانت عنيها من الوقت للتانى على ندى، عشان كانت خايفه عليها وخصوصا إنها اول مره تركب خيل….
عدى شويه وقت ونهى زهقت من القعده وقررت تتمشى شويه…
فضلت تتمشى لغايه ما راحت عند الاسطبل، لقت مهره موجوده ومافيش حد معاها… قلعت نظارتها الشمس، وإبتسمت أوى وقربت منها وقالتلها: جومانه!!!! أنتى شبه الجومانه أوى….
فى الأول مهره عملت صوت وكانت بدأت تتمرد.. نهى فضلت تبص يمين وشمال لغاية ما لقت كيس فيه سكر نبات فأخدت شويه فى إيديها وحاولت تأكل مهره وهى بتحاول تحط إيديها عليها عشان تطمنها…. لحظات عدت ومهره بدأت تهدى وتقرب من نهى وتاكل السكر إللى فى إيديها…
نهى بتطبطب عليها وبتكلمها كأنها فهماها: اشششش….. أهدى يا جومانه… أهدى… متخافيش…
فجأه نهى سمعت صوته وهو بيقولها بمنتهى الهدوء: جومانه!!!! مين جومانه؟؟؟؟
نهى ما كنتش عارفه ان وائل موجود، وسمعها وهى بتكلم مهره…..
نهى إبتسمت وحطت إيدها على رأس مهره، مع إستغراب وائل أوى ان مهره سابت نهى تحط إيدها عليها من غير ما تزمجر ولا حاجه… واستغرب أكتر من الاسم إللى نهى قالته… فقرب منها وسألها تانى بإهتمام: نهى! إنتى ناديتيها بإيه؟؟؟؟
نهى بصتله بنظره خلته سرح فى عنيها وإبتسامة عنيها إللى كانت وحشاه أوى وكان متغاظ منها إنها منعاه انه يشفها من ساعة ما وصلت…
نهى بإبتسامه هاديه: جومانه!!!! حاسه كأنى واقفه قدام الجومانه….
وائل بلع ريقه بالعافيه وهو مبتسم أوى وهى بعدت عنيها عنه لما لاحظت نظرته دى…
وائل فاق من إللى هو فيه لما هى بعدت عنيها عنه ورجع سألها تانى: مين جومانه؟؟؟
نهى بصتله بإبتسامه هادية وحب:فرسه من فرس روايه أوبال….
وائل بصلها بمنتهى الرقه: تعرفى إنه لايق عليها إسم جومانه… احلى من إسم مهره….وائل غمض عنيه وأبتسم أوى وبعدين فتحهم وبص على الفرسه بتاعته: أنا هغير إسمها من مهره لجومانه…
الفرسه اول ما سمعت الإسم هزت رأسها بطريقه الموافقه…
نهى بصت للجومانه وهى مبتسمه وساكته…وائل أستغرب من الجومانه عملته، فإبتسم أوى: شكل الإسم عجبها…
وائل بص لنهى وقالها بعتاب محب: مجتيش معانا ليه؟؟؟ ليه فضلتى قعده هناك؟؟؟
نهى بهدوء وهى بصه لجومانه: معرفش… يمكن مكنتش مستعده انى اركب خيل….
وائل قرب منها: طيب ودلوقتي…
نهى بهدوء اكتر من الأول: بردوا مش هينفع….
وائل إتفاجأ أوى برفضها رغم انه عارف كويس إنها بتحب الخيل فسألها بإستغراب: ليه يا نهى ؟؟؟
نهى بصت لجومانه ورجعت بصتله: عشان هى مش هتسمح لحد إنه يركبها….
وائل ضحك بعلو صوته كله،لدرجه أن جيهان سمعته وهى بتدور عليه… وعرفت أنه فى الاسطبل وهى داخله شافته واقف مع نهى وبيتكلموا… لفت نظرها قربهم من بعض فحبت تعرف هم بيتكلموا فى إيه… فقربت منهم من غير ما هم ياخدوا بالهم، وهى بتسمعهم بتركيز…
وائل هدى شويه من ضحكه: اه يانى منك…. وأنا إللى كنت فاكر نفسى مجنون… طلعت مش لوحدى…
نهى إتغاظت لإنها عرفت انه بيلمح عليها إنها كمان مجنونه… فجزت على سنانها وقالت بغيظ: مين دى بقى إللى مجنونه زيك؟؟؟ تقصدنى أنا!! صح؟؟؟
وائل إبتسم وحط إيده على إيديها وشبك صوابعه مع صوابعها عشان ماتعرفش تشيل إيديها منه… وهى إرتبكت واتوترت أكتر وهو بيقولها بهمس ونظره الشوق فى عنيه: أنتى مجنونتى أنا… وبعشق نرفزتك وغلاستك وراخمتك وعصبيتك، يا مجنونة قلبى….
نهى سرحت فى كلامه ونظره عنيه إللى سحرتها وبقت مش عارفه ترفع عنيها من عنيه، وهو بيقرب منها شويه شويه… لغاية ما جومانه زمجرت وهم فاقوا على صوتها…
نهى بعدت شويه وحاولت تشيل إيديها وهو لسه ماسكها بغلاسه: اححم! خلاص لو جومانه موافقه… انا كمان موافقه.. بس سيب إيدى…
وائل إبتسم بحب: ماشى يا مجنونة قلبى…
وائل أبتدى يفك جومانه ويجهزها عشان نهى تركبها….
كل إللى حصل ده كان قدام جيهان إللى اتنرفزت و اتضايقت من كلامهم وتصرفاتهم مع بعض، واتغاظت أكتر لما وائل فك جومانة عشان خاطر نهى…. خرجت من الاسطبل قبل ما هم يخرجوا، وراحت عند رنا وسألتها عن نهى وعلاقتها بوائل إيه… بس هى ما قالتلهاش على إللى حصل فى الاسطبل….
شويه ونهى ركبت جومانه، و وائل جنبها بياخد باله منها عشان لو جومانه عملت حاجه يلحق نهى…..
وائل مكنش متفاجأ ان نهى و جومانه انسجموا مع بعض، لأنه عارف شخصية نهى عامله إزاى…..
كلهم لعبوا وهزروا شويه… وبعدين راحوا يحضروا الأكل والشوى…
وائل و سامى وكريم ومصطفى بيشوا مع بعض…. ونهى وجيهان و رنا و ريم بيجهزوا السفره والذى منه….
الرجاله خلصوا شوى وبيحطوه على السفره، وكلهم قعدوا، ونهى بتطلع الرز بتاعها وبتفضيه فى الأطباق، اتفاجأوا كلهم بجيهان بتقول: وائل! أنا عملتلك الرز إللى انت بتحبه…. صنع إيديا….
نهى بصت لوائل إللى هو كمان بصلها بذهول، و بيقولها بعنيه: لأ… لأ… بس نهى ظهرت على عنيها نظره غضب هو شافها ولاحظها…وبسرعه بعدت عنيها عنه…
كل إللى كان موجود إستغرب تصرف جيهان… ماعدا منار و ريم و رنا لأنهم كانوا متفقين مع بعض….
وائل بتوتر: شكرا يا جيهان… تعبتى نفسك…. مكنش ليه لزوم لده…
جيهان بإبتسامه: ولا تعب ولا حاجه يا وائل…. معقول يبقى الرز بتاعى يعجبك وماعملهوش…. طبعا مش معقول….
وائل بلع ريقه بالعافيه وبتوتر وهو بيبص لنهى إلى لقاها مش بتبص ناحيته خالص وهى عماله تحط باقى الأكل والرز بتاعها…
جيهان لقت نهى بتحط الرز فإبتسمت بتهكم: إيه ده!! أنتى عامله رز بالكارى زيى….
نهى بصتلها بإبتسامه هاديه: لو كنت اعرف إنك هتعمليه مكنتش عملته…
جيهان بتحاول تستفز نهى: وماله… مايجراش حاجه… هم يدوقوا الأتنين ويقارنوا بينهم، ونشوف مين إللى الرز بتاعه أحلى من التانى…..
وائل ساكت بس متغاظ ومتضايق من كلام جيهان… بس مش عارف يرد إزاى…
منى اتضايقت هى وأحلام وسالى و سامى من كلامها… وبردوا مش عارفين يقولو إيه…
نهى قعدت مكانها وهى مبتسمه أوى لدرجه ان إبتسامتها استفزت جيهان وهى بترد عليها: حبيبتى مافيش وجه مقارنه أصلا… نهى بتكمل بهدوء: لازم يكون عندك ثقه فى نفسك أكتر من كده… ومش طبق رز هو إللى هيثبت إن اكلك أحلى او أوحش… نهى بتهكم: خلى عندك ثقه فى نفسك أكتر من كده يا جيهان…
كلهم ساكتين ومحدش قدر يتكلم او يفتح بقه من كلام نهى… بس وائل إبتسم أوى من رد نهى على جيهان، إلى اتغاظت أوى وردت على نهى بتهكم: اممم! شكلك كده محاميه… صح!!!!
نهى بصتلها بقوه وثبات وتحدى: محاميه وافتخر…
جيهان بستهزاء: اه عشان كده….
نهى بإستغراب: عشان كده إيه؟؟؟
جيهان بصتلها وبتحاول تستفزها أكتر: كلامك سورى يعنى، بس مفتقد للرقه… تحسى كأنه… سورى يعنى… دبش….
نهى بغيظ أوى منها، بس بستهزاء: لما تكونى دبش احسن ما تكونى عيوطه، لما جوزك يتخانق معاكى و تفضلى تعيطى وتشتكيه لأهله والأهلك… هيقول عليكى مش عارف إيه…. لكن لو انتى دبش هو هيضرب وانتى تضربى، والخسران يغسل المواعين…..
وائل ماقدرش يمسك نفسه أكتر من كده… وانفجر من الضحك هو و سامى وكريم….
منى وأحلام وسالى ضحكوا بس بصوت واطى… ومنار و رنا و ريم وجيهان متغاظين من كلام نهى، و فادى رد عليها بنرفزه وعصبيه: نهى! جيهان ما تقصدش حاجه….
كلهم سكتوا بعد ما كانوا بيضحكوا… و منى بصت لفادى بإستغراب أنه إزاى يقول كده لنهى رغم أن جيهان هى إللى بدأت الأول… فمنى لسه هترد لقت نهى سبقتها بالرد وهى مبتسمه بتهكم، وبترد بثبات لفادى: وانا كمان ماقصدش… نهى بصت لجيهان وهى بتكمل كلامها: بس يا ريت يا جيهان تحاسبى على كلامك تانى وماتنسيش إن… نهى بصت لرنا: إن مرات اخوكي محاميه… نهى رجعت بصت لفادى: إللى هى تبقى بنت حضرتك يا اونكل فادى…
حالة صمت غير عاديه مرت عليهم من غير ماحد قدر أنه يقطعه…. شويه و وائل قطع الصمت ده بتوتر: اا! يا جماعه الأكل برد يلا بسم الله….
ابتدوا ياكلوا، و سامى و وائل بيحاولوا يقطعوا الصمت ده من فتره للتانيه…
وائل كان متضايق أوى من كلام جيهان وكمان رد فادى لنهى، لأنه شايف إنها مش غلطانه فى ردها على جيهان… وفى نفس الوقت حس ان جيهان عايزه تثبت لنهى ان وائل عجبه أكلها هى، فوائل أخد طبق رز من إللى نهى عملاه.. وأكل اول معلقه وبعدين بصلها بحب: امممم! تسلم إيدك يا نهى… الرز تحفه…كل مره أحلى من المره إللى قبلها…
نهى بصتله بنظره وجعت قلبه أوى… كانت نظرة لوم وعتاب.. وزعل… نهى أكتفت بالرد عليه بإبتسامه حزينه، وهزت رأسها…
وائل أتوجع أوى من نظرتها وعتابها ده..وبقى مش عارف يعمل إيه أو يتصرف إزاى….
وائل بيحاول يخطف نظرة من وقت للتانى لنهى، بس هى مش بتديله فرصه ان عنيهم يتقابلوا…
جيهان إتغاظت أكتر من نهى وخصوصا لما وائل أكل من الرز بتاعها وشكر فيه قدام الكل…
وقت الأكل عدى عليهم وهو دمه تقيل أوى من إللى حصل فيه… شويه ولموا الأكل… وبيعملوا الشاى… و منى أخدت نهى بعيد عشان تعرف تتكلم معاها…
منى بضيقه: إيه إللى حصل ده!!! ممكن تفهمينى؟؟؟
نهى بغيظ: ماما… كل إللى حصل حصل قدامك… و شوفتى بنفسك رد اونكل فادى كان عامل إزاى…. وأنا مش قادره أفهم… جيهان ملها ومالى…. بتعمل معايا كده ليه؟؟؟
منى بإستغراب: أنا كمان معرفش ليه هى بتعمل كده معاكى… بس من الواضح إنها تعرف وائل… وعشان كده بتحاول تستفزك قدامه…
نهى بإنتباه: إيه تعرفه!!! نهى إتغاظت واتضايقت لما منى قالتلها إنهم يعرفوا بعض… وفكرت شويه بينها وبين نفسها وقالت لنفسها: أكيد فعلا يعرفوا بعض… عشان عملتله الرز إللى بيحبه… نهى بغيظ قالت بصوت عالى، و منى جنبها: طيب ليه هو طلب منى أعمله الرز ما دام هى جايه، وأكيد عارف إنها كمان هتعملهوله؟؟؟
منى بتنبيه عليها: نهى! ماتخليهاش تخرجك عن شعورك قدامه… هى دلوقتى هتحاول تردلك إللى أنتى عملتيه فيها قدامنا… خالى بالك…
نهى إبتسمت بتهكم وتحدى: ماشى يا جيهان… إما وريتك ما بقاش انا نهى….
نهى و منى رجعوا على التربيزه وقعدوا وسطيهم… وهى كانت عملالهم شاى وأدت كل واحد كبايته وهى بتقدم لوائل كوبيته كانت بصه فى الارض بحيث أن عنيهم ماتجيش فى عيون بعض، وائل أخد كوبيته وهو متغاظ اوى منها بس مش قادر يتكلم ولا يقولها أى كلمه و من الوقت للتانى بيحاول يلفت نظرها عشان تبصله لأنه مش عارف يقعد معاها لوحديهم او يتكلم معاها و كلهم قاعدين مع بعض بس مافيش فرصه لوائل ونهى إنهم يتكلموا….
جيهان متغاظه ومفقوعه من إللى حصل من نهى وحلفت لتاخد بتارها قدامهم…
فادى متضايق من رد نهى لجيهان… رغم أنه عارف إنها غلطانه بس رد نهى عليه وهى بتحاول تفكره ان بنته هى كمان محاميه و ماينفعش ان جيهان تسخر او تقلل من شأن رنا او نهى… وانت كمان بتدافع عنها… ده غلط… هو متضايق، و حاسس ان جيهان ضيفه و ماينفعش نهى تتعامل معاها بالشكل ده… بس كمان اتغاظ أوى إن نهى ماعملتش اعتبار ليه ولا لأى حد موجود… وده ضايقه أكتر…
نهى كانت قاعده قصاد وائل وهو بيشرب الشاى وعينه عليها وعلى ملامحها اللى وحشاه وهى وماسكه تليفونها فجاة إبتسمت أوى لما لقت الفويس على الواتس حطت الهاند فرى بسرعه عشان تسمع اغنيه كل يوم…و إتفاجئت بأغنيه حماقى” يانا يا أنت”… بقت متنحه بس من غير ما تبص عليه، وأول ما جه كوبليه” سنه سنتين عشره مفيش فايده، قريب ولا بعيد ناري قايده، هتبعد اكتر كان غيرك اشطر
اشواقي مش بتقل دي زايده”
نهى بصت لوائل بإستغراب، اللى إتفاجئت بيه أنه بيبصلها بإبتسامه و قوه أول ما عنيهم جت فعيون بعض وهو رفع حواجبه وإبتسامه تحدى ظهرت على شفايفه وهو بيرفع كوباية الشاى و عشان يشربها…
نهى نظرتها قلبت لنظره الشك و إتغاظت أوى لما لقته بيبصلها بنظره التحدى وقامت بسرعه من مكانها و بعدت شويه عنهم عشان تهرب من نظرته دى، وهى خلاص على أخرها منه ونفسها لو تضربه…..
جيهان كانت متغاظه منهم وهى شايفه نظرتهم لبعض وخصوصا لما نهى قامت و وائل فضل يتابعها بعينه وهى واقفه بعيد
فجيهان قالتلهم عشان تبعد نظره عنها: مين يشرب قهوه؟؟؟
فادى و مصطفى و سامى منار و رنا وافقوا… ووائل ما ردش عليها، لأنه كان مخنوق ومتضايق من وجودها وكمان من إللى هى عملته، وخصوصا حس ان نهى متجنباه بسببها، ومش عارف يتكلم ولايشرحلها حاجه…
جيهان عملتلهم قهوه، بس عملت حساب وائل ونهى… فقربت من وائل وبتديله القهوة بتاعته، وهو أستغرب تصرفها فرد بغيظ: شكرا… بس ما طلبتش قهوه….
جيهان بإبتسامه: معقول هتكسف إيدى يا وائل… مايصحش….
وائل بص لنهى إللى كانت لسه راجعه وقعدت مكانها قصاده و لاقاها لسه ماسكه تليفونها بس شالت الهند فرى بعد ما سمعت الاغنيه و هى لسه على وضعها مش بتبص ناحيته خالص و متجاهلا تماما ولا بتديله اى إهتمام….. فمن غيظه منها أخد من جيهان القهوه وبإبتسامه مقتضبة: شكرا….
جيهان إبتسمت… واخدت فنجان تانى وراحت لنهى وهى بتقولها بإبتسامه: نهى انا عملتلك قهوه عشان تظبت دماغك…
نهى رفعت عنيها ليها وقالتلها بإبتسامه مقتضبه: مش عايزه قهوه… تعبتى نفسك على الفاضي…
جيهان بهدوء وزعل مصطنع: اعتبريها قهوة تصالح… ماتكسفيش إيدى…
نهى لسه هترد لقت جيهان وقعت فنجان القهوة عليها وهى سخنه….
نهى شهقت من سخونية القهوه لما ادلقت علي جسمها وهدومها… بس ما قدرتش تصرخ…حطت إيديها على بقها و إتأوت جامد بس من غير ما تطلع صوت…
جيهان بسرعه مسكت كوباية مياه ودلقتها على نهى مكان القهوه إللى ادلقت عشان تبهدل هدومها أكتر من الاول، و بزعل مصطنع: اه سورى يا نهى والله ماكنش قصدى… أنا كنت فكراكى مسكتى الفنجان… انا بجد اسفه….
وائل كان بيشرب قهوته وشرق لما شاف القهوة اتدلقت على نهى وقام بسرعه عليها… وبص لجيهان بكل غل وغضب…
منى كمان بصتلها بغيظ، بس ما قدرتش تتكلم عشان عارفه إن جيهان متعمده تعمل كده قدام وائل….
رنا و ريم ومنار بيحاول يهدوا إللى حصل….
منار ببرود: معلش يا نهى! جيهان ما كنتش تقصد… ما تزعليش منها….
نهى كانت باصه فى الأرض وغمضت عنيها من الوجع إللى كان ماليها…. وجع جسمها إللى ادلق عليه قهوة سخنه، و وجع قلبها من وائل إللى مش عارفه ليه هى زعلانه منه وغيرتها عليه إللى اعترفت بيها لنفسها لما تخيلت أن وائل يعرف جيهان، ولا صراع جيهان معاها إللى هى ما تعرفش سببه إيه…هى مش عارفه إيه إللى واجعها بالظبط… ولو هى ردت علي جيهان… هتبقى عملت إللى جيهان عايزاه….
نهى رفعت وشها وهى ماسكه دموعها بالعافيه: أكيد مش قصدها يا طنط… ولا يهمك يا جيهان…. حصل خير….
جيهان إبتسمت إبتسامه نصر…
وائل كان متضايق و متغاظ ومخنوق أوى من جيهان لأنه عارف ومتأكد إنها متعمده تعمل كده فى نهى…. وكمان كان موجوع من إللى حصل معاها.. وأتضايق أكتر لأنه عارف كويس ان نهى مش هينفع تقعد قدامهم بهدوم مبلوله.، فقالها بوجع وحزن: نهى! اطلعى اوضتى فوق، وغيرى هدومك ، وشوفى اى حاجه ممكن تكون مناسبه ليكى… مش هينفع تقعدى بالشكل ده… وكمان فى عندى مرهم للحروق…وائل وجه كلامه لمنى: لو سامحتى يا مدام منى اطلعى معاها عشان هى توافق…
منى هزت دماغها بالموافقه وطلعت هى ونهى على فوق…
جيهان قعدت مبسوطه ومبتسمه من إللى هى عملته…. ووائل بيبصلها بغضب وغيظ ونفسه لو يطول رقبتها…
فادى بص لمنار بغضب وفهم ان جيهان كانت متعمده إنها تتصرف مع نهى بالشكل ده… بس ماعرفش يتكلم ولا يقول حاجه….
سامى وأحلام وسالى وكريم اتضيقوا هم كمان وهم مش فاهمين ليه جيهان بتعمل كده… وليه الحرب البارده دى بينها وبين نهى…..
نهى طلعت مع منى أوضت وائل، وهم متضايقين من إللى حصل ده…
منى بحزن: معلش يا نهى… انا قولتلك إنها هترد على إللى حصل….
نهى بغضب ونرفزه: تقوم تعمل كده… عارفه يا ماما، كان هاين عليا امسكها من شعرها واجبها تحت رجلى واديها قلمين على وشها… نهى سكتت شويه وبعدين إبتسمت نص إبتسامه: بس والله لهردهالها بطريقتى… إما خليت إللى حصل ده يتقلب عليها مابقاش أنا…..
منى بزعل: أهدى يا نهى وبلاش تعملى حاجه تندمى عليها بعدين…. الحاجات إللى زى دى ما ينفعش تترد بنرفزه ولا عصبيه….
نهى بإبتسامه مكر: ما تقلقيش يا ماما… إللى زى جيهان دى ماينفعش معاها غير اللعب على الهادى…. نهى بإبتسامه:هنشوف يا جيهان….
منى بصتلها، وهى مش فاهمه ولا عارفه هى بتفكر إزاى او ناويه على إيه…
نهى دورت فى الأدراج على المرهم الحروق لقته ودهنت بيه مكان القهوه… وفتحت دولابه وبقت مش عارفه هتلبس إيه ولا هتعمل إيه… دورت حواليها لقت تيشرت أسود محطوت على الكرسى، فضلت تبص عليه كتير أوى ومره واحده انفجرت من الضحك… لدرجه إن منى إستغربت أوى تصرفها ده، وسألتها بإستغراب: فى إيه يا نهى!!! مالك بتضحكى كده ليه؟؟؟
نهى وهى بتمسح دموعها من كتر الضحك: ولا حاجه يا ماما…. بس إفتكرت حاجه كده…. ما تقلقيش عليا….
منى بإهتمام: طيب هتلبسى إيه دلوقتى؟؟؟
نهى بإبتسامه: أنا هتصرف ما تقلقيش…
نهى فتحت درفه من دولابه كانت البدل بتاعته متعلقه وفى وسط البدل لقت فستان أسود متعلق ومحطوت فى الكيس بتاعه الشفاف…. نهى عجبها ذوقه جدا لأنه فعلا كان شيك وتحفه… بس فى نفس الوقت إستغربت أوى وجود فستان فى دولابه ووسط هدومه… اتضايقت أوى وقفلت الدولاب بسرعه وهى متغاظه ومتضايقه أوى… فتحت درفه تانيه لقت قمصان…
نهى كانت لابسه كاجول وبنطلون جينز، والقهوه اتدلقت على الهدوم من فوق فنهى يدوب هتغير البلوزه بتاعتها بس…
منى إبتسمت: كويس إن القهوه ما اتدلقتش على البنطلون….
نهى بإبتسامه: الحمد لله رب العالمين… ربنا عالم بحالى…..
نهى لبست وظبتت نفسها و الحجاب بتاعها وقالت لنفسها بإبتسامه: إما وريتك يا جيهان… مابقاش أنا نهى….
منى إبتسمت أوى لان اللبس إللى نهى لبسته كان لايق عليها، و مخلى شكلها كاجول عن الأول…
تحت فى الجنينه…..
مصطفى أتضايق من تصرفات جيهان مع نهى، وهو زيه زيهم مش فاهم ليه جيهان بتعمل كده… شويه وراح لجيهان وطلب منها إنها تقوم معاه…
فعلا جيهان قامت وراحت مع مصطفى بعيد شويه عشان يعرفوا يتكلموا…
مصطفى بغضب: ممكن أعرف إيه إللى سيادتك بتهببيه ده!!! إزاى تدلوقى على نهى القهوه بالشكل ده؟؟؟
جيهان بكل برود: مصطفى… خليك فحالك وملكش دعوه باللى بعمله…. انا عارفه كويس انا بعمل إيه… جيهان والغضب متملك منها: أنا مش هسكت على إللى اتعمل فيا.. ولازم اخد حقى… جيهان وبتحدى: و وائل ده حقى… مش هسمحلها تاخده منى… وياريت تخليك بره الموضوع ده يا مصطفى…. جيهان بتحذير: و ماتنساش إنى أختك الكبيره…. فاهم…
مصطفى سكت ومردش عليها… وسابها ومشى، وهى راحت قعدت مكانها…
وائل كان قاعد متغاظ أوى من جيهان وتصرفاتها وكان بيتجنب الكلام معاها… وكان متضايق ومخنوق انه مش عارف يتكلم مع نهى ولا لاقى فرصه أنه يشرحلها موضوع جيهان، كان قاعد مع سامى وكريم، وبيتكلموا…شويه و منى نزلتلهم لوحدها… وائل إستغرب من نزول لوحدها فسألها بجديه: مدام منى ! نهى عامله إيه دلوقتى…
منى بهدوء: الحمد لله… أحسن شويه… هى دهنت المرهم إللى قولتلنا عليه… وهى جايه ورايا… منى بكسوف: معلش يا وائل إحنا عملنالك قلق و إزعاج.. واخدنا لبس من عندك…
وائل بزعل: متقوليش كده يا مدام منى… فداها اى حاجه… المهم إنها تكون كويسه وبخير…
منى إبتسمت وسكتت….
لحظات عددت… و وائل تنح لما شاف نهى وإبتسم أوى لدرجه إن إبتسامته لفتت نظر جيهان إللى بتلقائية بصت ما كان وائل ما بيبص ومتنح ومبتسم …. جيهان إتغاظت من منظر نهى وشكلها وإنها عجبت وائل أكتر…
نهى لبست التيشرت الأسود وعليه قميص أبيض، بس سابت كام زرار مفتوح من فوق عشان التيشرت يبان، وقفلت باقى الزراير، ودخلت باقى القميص جوه البنطلون …شكلها لفت نظره جامد….
نهى دخلت عليهم بإحراج واضطرت تبص لوائل: اححم! سورى يا باشمهندس! بس ملاقتش حاجه تناسبنى غير كده….
وائل بإبتسامه ملت وشه كله: ولا يهمك… المهم إنك كويسه وبخير…
وائل كان نفسه يقولها كلام كتير أوى… ان البس لايق عليها جدا ومحليها أكتر… وخصوصا إنها مظبطاه وشكلها كله على بعضه حلوه…
نهى إتحرجت وقعدت… بس لاحظت أن وائل كل شويه يبصلها وهو مبتسم وكأنه هياكلها بعنيه… فهى حبت تهرب من نظرته دى فقالتلهم: أنا هعمل نسكافيه… حد يشرب معايا؟؟؟؟
وائل إبتسم أوى و بتلقائيه: نسكافيه بقلب على الوش؟؟؟؟؟
منى وأحلام ومنار و رنا و ريم، بصوله أوى بإستغراب وذهول ، وجيهان بصت عليهم لقيتهم بيبصوا لوائل وهى مش فاهمه هم بيبصوله كده ليه… ونهى بصتله وتنحت، وهو إستوعب نظرتهم دى، فصحح بإحراج: اححم.. ااا! قصدى… بإبتسامه على الوش؟؟؟؟
نهى إبتسمت بإحراج: اه ! بإبتسامه على الوش…..
وائل حط إيده على شعره بإحراج ودور وشه الناحية التانيه…
منى و أحلام و سامى طلبوا شاى… والباقى طلب نسكافيه….
نهى راحت على المطبخ عشان تعملهم الشاى والنسكافيه….
شويه ووائل بقى مش عارف يقعد على بعضه وصمم إنه يدخل لنهى المطبخ عشان يعرف يكلمها بس مش عارف يدخلها بحجه إيه… شويه وخطرت فى باله فكره..
وائل قام مره واحده وقالهم:…..