سبر اغوار قلبي بقلم نورهان سامي ج2
ذهبت إلى غرفته كى تخبره بأن الغداء جاهز و لكنها وجدته يتشاجر مع لميس فى الهاتف كالعادة .. دقت على الباب لعلها تنهى هذا الشجار .. نظر لها مروان بضيق ثم أغلق الخط بوجه لميس و ألقى الهاتف بعيداً و قال لها و عروق رقبته بارزة و تكاد تنفجر من الغضب و أذنه و وجهه متلونان بالأحمر القانى : فى حاجة يا ماما ؟
أقتربت منه أمه و جلست بجانبه و قالت بعتاب : ينفع كده.. ينفع اللى بتعمله فى نفسك و فيها ده .. ثم أردفت بحزن : فضلت تتعصب تتعصب و تاخد كل حاجة على أعصابك لحد ما جالك الضغط و السكر .. و بتاخذ أدوية أد كده .. هتفضل تعصب نفسك لحد أمتى !! .. لحد ما العصبية تجيب أجلك خالص .. يا أبنى حرام عليك نفسك و البنت اللى دايبة فيك اللى معذبها معاك دى .. حرام عليك
نظر لها بضيق و قالت بعصبية : هى السبب بغبائها و عدم سمعانها لكلامى من أول مرة .. هى اللى ركبتنى أمراض الدنيا و مش هتستريح غير لما تشوفنى ميت قدمها
نظرت له هالة بضيق و قالت بجدية : بعيد الشر عليك .. ثم أردفت بعتاب : أهدى يا مروان .. أهدى حرام عليك نفسك
مروان بعصبية : ممكن تخرجى بره يا ماما و تسبينى لوحدى
فقدت هالة أعصابها عليه فقالت بحدة : لا مش هسيبك .. لازم تعرف أن عصبيتك دى قبل ما تبقى غلط عليك فهى غلط عليها هى كمان و بتأذيها .. اللى أنت بتعمله دة غلط يا مروان صدقنى غلط .. أنت بتكرها فيك .. كل يوم خناق خناق خناق .. مفيش يوم منيمتهاش غير و هى معيطة .. لازم كل يوم تنام معيطة و قلبها مجروح منك .. العصبية بتاعتك دى بقت لا تحتمل بجد .. أنت هتموت بسبب عصبيتك و قبل ما أنت تموت هى هتتجن من كتر اللى بتعمله فيها .. حرام عليك يا أخى أرحمها .. هيجى يوم و تكرهك و تلعنك فيه .. ذنبها أيه فى العذاب اللى بتتعذبه ده .. ذنبها أنها بتحبك .. دة أنت بتتخانق معاها كل يوم و أنتو بعيد عن بعض أمال لما تبقوا تحت سقف واحد هتعملوا أيه ؟؟ قولى هتعملوا أيه ؟؟ و كل خناقاتك معاها على حاجات تافهة .. عارف لو مكنتش حاجات تافهة كنا قلنا ماشى .. و هى .. هى بتحاول بشى الطرق أنها تريحك و تسمع كلامك بس مش بتلاقى منك غير زعيق و عصبية .. صدقنى مش هتقدر تستحمل كتير .. فوق بقى فوق من اللى أنت فيه ده .. ثم أردفت بهدوء : لو حاسس أن أعصابك تعبانة و محتاج تروح لدكتور نفسى .. روح يا مروان .. روح قبل ما تضيع منى و تضيع بنت عمك معاك
