رواية نور (الفصل الأول إلى السادس عشر) بقلم الكاتبة مروة جمال
نور : لا متخافش
عمر : عموماً يا ستي دي نشاطتنا وعلى قد ما وقتك يسمح إحنا بنتجمع هنا وبنحدد كل واحد حينزل فين وحيعمل إيه
نور : لا بقولك إه أنا عايزاك تتبناني إعتبرني تلميذتك الخايبة حاروح معاك واتعلم منك بتعمل إيه
إبتسم عمر لها وتابع : حاضر يا ستي بس أنا متعب ومضيع وقتي في الكلام ده
نور : خلاص يا سيدي ضيعلي وقتي أنا كمان في الكلام ده
لاحظت نور إبتسامة عمر كانت إبتسامة جميلة صادقة خالية من السخرية من الأفكار كانت نقية إبتسامة لم تعهدها نور مع أدهم كانت بداية لأشياء كثيرة لم تعهدها نور مع أدهم ………….
الفصل الثامن
كانت دعاء في غرفتها عندما سمعت طرقاً خفيفاً على الباب
دعاء : أدخل
أحمد : إزيك يا موس
دعاء : لا مش قوي كده
أحمد : بطلي دح بقه
دعاء : بالذمة في أخ يقر على أخته حبيبته الزمن بقى وحش قوي
أحمد : عاملة إيه في المذاكرة
دعاء : تمام
أحمد : مركزة يعني
دعاء : أيوة مركزة ليه بتسأل
أحمد : أنا قلت جايز مشغولة بمشكلة صاحبتك وبتسرحي بقه قدام الكتب
دعاء : لا متخافش عليا
أحمد : هي كان مالها صحيح
دعاء : مين
أحمد : نور مش كانت عندك وبتعيط
دعاء : اه إنت مش داخل تطمن عليا بقه إنت جاي تسأل عن نور
أحمد : لا أنا بطمن عليكي بس إفتكرت موضوعها دلوقتي
دعاء : لا والله
أحمد : اه والله
دعاء : عادي يا أحمد كانت متخانقة مع مامتها
احمد : اممممممممم أصل شكلها كان يخض بصراحة
نظرت دعاء لأخيها وهي تحدث نفسها : اه يا أحمد بلاش نور بلاش تتعلق بنور ……..نور دلوقتي مش عارفه مصلحتها وبتتصرف تصرفات بتضرها وممكن تضر أي حد يتعلق بيها
أحمد : خلاص بقه أسيبك تكملي مذاكرة
دعاء : ماشي يا حبيبي تصبح على خير
أحمد : وإنتي من اهله
مرت الأيام كانت دعاء تتعمد عدم الحديث مع نور عن حكايتها مع عمر أو بمعني أصح خطتها ونور كانت تعلم أن دعاء غير راضية عن ما يحدث فلم تفتح الحديث هي الأخرى وأدهم إختفى علمت نور بعد ذلك أنه سافر مع أصدقاءه لقضاء عطلة سريعة في شرم الشيخ ……….في تلك الأثناء توطدت علاقة نور بعمر وبدأت مشاركته في نشاطاته الخيرية لتدخل عالم جديداً وتعرف رجلاً لم تعهده من قبل ………….
عمر : النهارده حاروح دار للأيتام يا نور بس الأطفال هناك قريبين قوي من قلبي بحس إنهم ولادي أنا بروح كثير ممكن كل يوم لما باقدر تحبي تيجي
نور : أحب طبعاً أنا من ساعة ما إشتركت حاسه إني معملتش حاجه مفيدة
عمر : معلش أنا إتلخمت في الشغل الأسبوع اللي فات وإنتي قلتي حابه تكوني معايا لكن في ناس من زمايلنا راحوا كذا مكان
نور : لا زي ما قلتلك إعتبرني تلميذتك الخايبة لغاية بس ما أتشجع وتلاقيني منتشرة في كل حته لوحدي
عمر : خلاص تمام ده العنوان انا حاكون هناك عالساعة 5 وبكرة أجازة حاروح من بدري على 10الصبح كده شوفي المعاد اللي يناسبك
نور : النهارده تمام بس قولي إيه حكاية الشغل دي إنت بتشتغل
عمر : اه في صيدلية دكتور جاري يعني منها شغل ومنها بتعلم منه
نور : واو أنا مكنتش أعرف إلا سوبر مان على فكرة بتجيب وقت لده كله منين
عمر : الله يخليكي …………لو نظمتي وقتك حتلاقي نفسك تقدري تعملي زيي
