رواية غلطة مدفوعة الثمن

محمود طلع شقته وقبل مايفتح سمع نوال بتقول وهى بتضحك على اخرها : بس براوة عليكى يابت يافاتن عرفتى ازاى تحرقى دمها ، قال وعاملة نفسك البت الطيبة الحنينة صاحبة الواجب اللى عاوزة تساعد الكل

فاتن بمكر : انا لو عليا كنت قلت وعملت اكتر من كده ، لولا بس ان حسام قاللى على حلفان عم محمود امبارح وانه كان هيطلقك بسبب المعوقة بنت اخوه

نوال بغل : وهو انتى فاكرة انى خفت كده واللا رجعت فى كلامى ، انا بس بماين عشان اهدى اللعب حبة ، لكن انا مصممة ان بنت سهام ماتفضلش على ذمة ابنى ابدا

فى اللحظة دى محمود فتح الباب وقال : انتى اللى مش هتباتى على ذمتى ولا فى البيت ده يانوال ، تلمى هدومك وتمشى مع بنت اختك ، انتى طالق وانا اكراما لعشرة السنين هسيبك تطلعى من هنا وانتى واخدة اللى انتى عاوزاه لو فضلتى بادبك لحد ماتمشى ، انما لو حصل وفكرتى تعملى اى دوشة قبل ماتمشى هتشوفى منى انتى وبنت اختك العقربة اللى عمرك ماشفتيه ولا توقعتى انك تشوفيه فى يوم منى

نوال كانت بتسمع محمود وهى مصدومة ومش مصدقة ان كل ده حصل وفى لحظة ، واللى كانت عاوزة تعمله فى ليلى اتعمل فيها فى غمضة عين فقالت : انت بتطلقنى بعد العشرة دى كلها يامحمود ، للدرجة دى انا مسواش عندك حاجة

محمود : انا صابر عليكى العمر ده كله وعمال اقول ياواد اصبر ، يا واد مسيرها تعقل ، ياواد لما تكبر هتحترم سنها ، ويوم بعد يوم وانتى كل مابتكبرى كل مابتخرفى ، لا عاملة احترام ليا ولا لعيالى ولا اهلى اللى معشراهم طول عمرك

نوال : كل ده عشان مش عاوزة ابنى يتجوز واحدة ناقصة

محمود سكت وقرب من نوال ووقف قدامها بجمود ومرة واحدة ضربها بالقلم وقاللها : حذرتك قبل كده ستين مرة انك تقولى الكلمة دى على ليلى ، ليلى مش ناقصة ولو فى حد ناقص يبقى انتى يانوال ، انتى اللى ناقصة عقل وقلب

نوال لما القلم نزل على وشها شهقت من الصدمة والوجع فى نفس الوقت ، دى اول مرة محمود يمد ايده عليها فى عمرهم كله

محمود بصلها وهى لسه واقفة بصدمتها وقاللها : انا نازل اقعد مع امى تحت ، وانتى قدامك ساعة زمن تلمى حاجتك وتمشى من هنا ، على الله المح طرف توبك وانتى ماشية او تفكرى تعدى على حسن واللا على امى

وسابها ومشى ، واول ماخرج نوال قعدت على الارض وقعدت تلطم على وشها وهى مش مستوعبة اللى حصل ، كل حاجة ضاعت فى غمضة عين ، اتطلقت وانطردت من بيتها ، ومابقالهاش لامكان ولا اى حاجة وعمالة تقول بصوت واطى : كل حاجة راحت

فاتن قعدت جنبها تحاول تهديها وقالت لها : بس ياخالتى ، بطلى اللى بتعمليه ده ، انا هكلم حسام يتصرف

نوال انتبهتلها وقالتها : اوعى ، ده حسام بالذات قاللى لو طلقك ماليش دعوة

وبعدين فجأة قامت وقفت وهى بتقول : انا هخليك تندم يامحمود على اللى عملته ده ، ودخلت على اوضتها فتحت الدولاب وجابت شنطة سفر كبيرة من اوضة حسام وحطت فيها كل دهبها وشوية من هدومها ، وفتحت دولاب محمود واللى كان شايل فيه شنطة فيها مبلغ كبير جدا اكتر من ربع مليون جنية كان المفروض هيندفع تمن بضاعة جايبينها للمحلات وكان هيروح مع محمد يدفعوها تانى يوم بالليل للعميل بتاعهم ، بالاضافة لاوراق شغل مهمة ، نوال اخدت الشنطة كلها على بعضها وحطتها فى شنطتها وقفلتها وغيرت هدومها وقالت بغل : ياللا بينا وهو اللى هييجى يحفى ورايا عشان ارجعله ابن هداية وساعتها ابقى ارجعله بشروطى

ونزلوا هما الاتنين خرجوا برة البيت من غير ماحد يشوفهم وركبوا تاكسى وراحوا بيه على بيت ابتسام

…………………..

بعد فترة حسام قام استأذن من جدته انه هيطلع يجيب حاجة من شقتهم ويرجعلها تانى ، فمحمود اللى كان قاعد وسطهم وهو ساكت من ساعة مانزل وماكانش بيتكلم الا لو حد وجه له كلام قال : خدنى معاك ياحسام احسن حاسس انى عاوز انام شوية

محمد : صدقت يامحمود ، الرقاق خلى الواحد تقل ، اطلع انت بقى وانا هدخل اصلى المغرب وهنام بعد صلاة العشا فورا

محمود : ماشى ، ياللا تصبحوا على خير

طلع محمود وحسام واللى اول ماطلع كان هيرن الجرس لكن محمود قاله: ماحدش جوه ياحسام ، طلع مفتاحك وافتح على طول

حسام استغرب جدا لكن عمل زى ما ابوه قال واول مادخلوا حسام قاله : اومال ماما راحت فين هى وفاتن

محمود وهو بيتنهد وباصص فى الارض : انا طلقت امك وخليتها لمت حاجتها ومشيت

حسام رغم انه كان متوقع ان ده يحصل بين اى لحظة والتانية الا انه برضه انصدم من كون ان امه تطلق فى سن زى سنها ، بص لابوه بحزن وقاله : ايه اللى حصل

محمود حكى لحسام اللى حصل بالظبط ، وبعدين قاله : انا حذرتها كتير وكنت فاكر انها هتهمد وتسيب اخوك وبنت عمك فى حالهم لما تشوف اخوك مبسوط وسعيد فى حياته ، لكن اكتشفت انها كانت كل ماتشوف سعادتهم كانت نارها بتقيد بزيادة وغلها كان بياكل فيها من جوة ، هى حصلت انها تدخل العقربة بنت اختها فى حاجة زى دى وتتفق معاها انهم يضايقوا ليلى ويلقحوا عليها بالكلام اللى زى السم كل ساعة والتانية

حسام سكت شوية وبعدين قال : انت بتتكلم صح يابابا ، ماما غلطت وغلطة كبيرة كمان ، لكن ماتوصلش ابدا للطلاق

محمود بغضب : كنت عاوزنى اعمل ايه يعنى ، اشحال ان ماكنتش لسه محذرها امبارح قدامك وهى ودن من طين وودن من عجين

حسام : طب تفتكر ان حسن لما يعرف ان امه اتطلقت بسبب مراته هيبقى ايه رد فعله

ولما عمى ومراته يعرفوا ، بلاش …..لما ليلى تعرف انك طلقت ماما عشان خاطرها هيبقى احساسها ايه

محمود : بس انا ماطلقتهاش بسبب ليلى ، انا طلقتها بسبب عمايلها

حسام : دى قناعتك الشخصية ، لكن انا متاكد ان ماما هتوصل للكل ان ليلى هى سبب طلاقك ليها وساعتها كلامها فعلا هياذى ليلى يابابا ومش هيبقى فى ايدنا اى وسيلة اننا نمنع ماما بيها

محمود بتنهيدة : يعنى عاوزنى اعمل ايه دلوقتى ، خلاص اللى حصل حصل

حسام : استهدى بالله بس كده وان شاء الله خير ، سيبها يومين كده على ما النفوس تهدى وبعد كده يحلها المولى بمشيئته

محمود قام وراح مكان اوضته وهو بيقول : اللى فيه الخير يقدمه ربنا يابنى

محمود دخل اوضته ومافيش ثوانى وحسام لقى ابوه خارج بسرعة من الاوضة وهو بيقول : سرقتنى ….سرقتنى ياحسام سرقتنى

حسام بخضة : مين دى يا بابا اللى سرقتك

محمود وهو بيرمى نفسه على الكنبة وهو ماسك صدره : امك سرقت الشنطة اللى كان فيها ال ٣٠٠ الف جنية والعقود بتاعة عملية بكرة ، خدتها وهى ماشية وهى عارفة انها مش فلوسى

حسام بص لقى ابوه بيقع على الارض وهو وشه غرقان من العرق وبيتوجع من صدره ، طلب الاسعاف اللى جت بسرعة ونقلوه على المستشفى ، والدكاترة دخلوه على الرعاية وقالوا انه اتعرض لذبحة قلبية حادة ، لكن اسعفوه والدكاتره طمنوهم ان حالته بقت مستقرة لكن لازم يفضل معاهم لتانى يوم على الاقل

سابوه فى الرعاية وروحوا كلهم ولما سالوا على نوال حسام قاللهم انها راحت مع فاتن عشان خالته تعبت فجأة وانه مارضيش يكلمها عشان مايخضهاش

كلهم روحوا على البيت لكن حسام قاللهم انه عنده مشوار مهم وراح على بيت خالته ولما رن الجرس فتحتله ناهد

ناهد : اهلا ياحسام ، اتفضل

حسام : ازيك ياناهد ، اخبارك ايه

ناهد : الحمدلله ، لو عاوز خالتى ، هى موجودة جوة فى اوضة ماما ومعاها ماما وفاتن

حسام : عاجبك اللى حصل ده ياناهد ، شفتى بعد العمر ده كله

ناهد : ماتزعلش منى ياحسام ، باباك مش غلطان

حسام ابتسم وقاللها : كنت متاكد ان ده رايك

ناهد : انا متاسفة ياحسام ماتزعلش منى بس ….

حسام : وهزعل ليه اذا كان رايك من رايى

ناهد باستغراب : يعنى ايه

حسام راح ناحية اوضة خالته وهو بيقول : هتعرفى دلوقتى