لفت انتباه بقلم امينة الريحاني ج 1

ريم: وليه متجوزتهاش؟

ماجد: لانها سافرت مع باباها لانه شغال فى الخارجية وكانت لازم تسافر معاه لكن قبل ما تسافر وعدتها انى هستناها لما ترجع وانى مش هحب ولا اشوف واحدة غيرها

ريم بوجع: وايه الى حصل بعد كده؟

ماجد: فضلت محافظ على وعدى ليها بالرغم انها غابت عنى اربع سنين مقدرتش اشوف فيهم واحدة غيرها لحد ما ظهرتى انتى فى حياتى حسيت ساعتها انك بتخطفينى كل يوم بتشد ليكى اكتر من اليوم الى قبله بقى كل تفكيرى معاكى مشاعرى كلها بقت ريحالك بقيتى فعلا محتلة كل مشاعرى وتفكيرى وفى اللحظة دى حسيت انى لو ضعفت واستسلمت لمشاعرى ليكى هبقى بخونها وبخلف وعدى ليها مقدرتش اكون خاين يا ريم مقدرتش حتى لو كان ده هيعذبنى ببعدك عنى ويوجعنى كنت مضطر ابعدك عنى عشان مضعفش ادام حبك

ريم: وايه الى خلاك رجعت تقرب تانى يا ماجد؟

ماجد: عرفت بعدها انها اتخطبت لواحد بن صاحب باباها لانه احسن منى ماديا واجتماعيا مزعلتش بالعكس ارتحت لان احساسى بالذنب من ناحيتها ساعتها انتهى وقررت اروح لحبيبتى الى ملكت قلبى وعقلى وكل مشاعرى قررت ارجعلك انتى يا ريم

ريم ضحكت بوجع: يعنى انت جيتلى بس عشان هى سابتك يعنى انا كنت بديل مش اكتر

ماجد: عمرك ما كنتى بديل لحد يا ريم بالعكس انا لو كنت اتمسكت بسهى فى الوقت ده رغم حبى ليكى فده عشان كلمة ادتهالها وانا متعودتش ارجع فى كلمتى يا ريم بس صدقينى انا بحبك انتى ومفيش حد فى قلبى غيرك انتى فعلا الوحيدة الى ملكت قلبى ومشاعرى كلها هتصدقينى لو قلتلك ان حتى مشاعرى لسهى وحبى ليها مكنش بنفس الشوق والحرارة الى عايشهم معاكى

ريم بصاله بعدم تصديق: سهى دى الى قبلناها دلوقتى مش كده؟

ماجد: اه يا ريم هى

ريم بصاله وساكتة

ماجد: ساكتة ليه يا ريم

ريم: مش عارفة اقول ايه ……يعنى انا لو مكنتش حبيتك من غير ما اعرف بوجود سهى فى حياتك ولو مكنتش حاولت الفت انتباهك لحبى كان زمانك لسه بتحبها ويمكن كان زمانكم اتجوزتوا

ماجد: بصى يا ريم سهى كده كده بوجودك او من غير انا مكنتش هكمل معاها بعد ما باعتنى عشان اول واحد شافته مناسب . تانى حاجة حتى لو مكنتيش حاولتى تلفتى انتباهى وحتى لو مكنتيش جتيلى العيادة خالص احنا كان لينا نصيب نبقى مع بعض واكيد ربنا كان هيجمعنا باى طريقة وتحت اى ظروف طالما نصيبنا مع بعض