رواية جاري سداد الدين بقلم دفنا عمر ج 1
_ معلش يا أحمد، بكره الأمور تهدى وهي اللي هتصالحك.. عموما هتصل بيها عشان تجي بسرعة، وأنت انزل لشغلك، وبكره من النجمة هكون عند ماما في دوري..!
أحمد: لا ياهند ماتجيش بكرة.. أنا هاخد دورك لأن عندي أجازة.. خليكي عشان جوزك مايضايقش منك، أنا عارف أنه بيعملك مشاكل.. صدقيني لو اقدر اخد ماما عندي واراعيها لوحدي كنت عملت كده، بس انتي عارفة ضيق البيت اللي يدوب واخدنا انا وعيالي ومراتي..!
_ ومين قالك إني هوافق إنك تشيل حملها لوحدك، دي أمي انا كمان ومستحيل اقصر معاها..!
وسيبك من عصام جوزي ومشاكله، يعمل اللي يعمله اديني متحملة وبعديله، وأنت كتر خيرك بتيجي من اخر الدنيا عشان تفضل معاها اليوم بتاعك، وفريال اللي جمب بيت ماما، لازم نفضل نتصل عليها عشان تتحرك وتروح، ربنا يهديها..!
أحمد: اللهم امين..اتصلي بيها بقي وأنا هروح اجهز عشان انزل لشغلي..!
أنهت محادثته ثم حدثت فريال هاتفيا تتعجلها الذهاب لوالدتهم وتجلس معها لليوم التالي گ المعتاد بين ثلاثتهم.. كلًا منهم يأخذ يومًا بليلة يراعي الأم ويشرف على طعامها ودوائها ونظافتها.. وضرورة تحريك جسدها من حين لأخر كما أوصى الطبيب!!
*******************************
فريال بتصنع: معلش يا رجاء يابنتي بتقل عليكي يا مرات ابني بس زي ما انتي شايفة صاحية تعبانة ومش قادرة انزل لماما في دوري انهاردة..!
رجاء بوداعة عكس ما تدمره في نفسها: ماتقوليش كده يا ماما فريال ، أنا هروح واخد بالي من جدتي ماتقلقيش هحطها في عيني!
بس انتي خدي بالك من علا و كرم ، انتي عارفاهم أشقية وممكن يأذوا نفسهم!
_ متخافيش دول روح تيتة هاخد بالي كويس!
بس خدي بالك أوعي أحمد ولا هند يعرفوا إني مش هناك وانتي مكاني.. وانا هتصل بهند من تليفوني عشان اطمنها إني قاعدة مع ماما..!
رجاء وداخلها يتهكم على تلك القاسية الجاحدة:
حاضر ياماما ماتقلقيش، محدش هيعرف إن أنا وعايدة سلفتي اللي بنروح مكانك!!
****************************
_الهدوم دي مش مكوية ليه ياهانم..! وفين باقي الشربات دي؟!
هند بهدوء: حاضر ياعصام، أنا كنت عاملة حسابي اكوي قمصانك كلها انهاردة واستغل إن مش هروح بكرة لماما، أحمد كتر خيره هيفضل معاها مكاني!
عصام بتهكم: لا والله كتر خيره.. ده بدال ما ياخدها هو بيته ويراعيها..!
هند بضيق: ليه إن شاء الله ، هي ماما عندها أحمد وبس، من حقي انا وفريال نشارك في رعايتها.. دي أمنا وياما تعبت علينا..!
ضحك بسخريةً: اختك لو تطول ماتروحش مش هتروح، دي مابتتحملش تبعد عن أحفادها..!
