عشق خادع كريمة حمادة ج2

/ طب بالله عليك فى حد يسيب القمر دا برضو
_ مغرورة اوى انتى يا روفان والله
/ انا يابنى؟ شكرا على ثقتك الغالية دى والله
” ابتسم بجانبية وهو باصص للبحر وقال: مين كان يصدق انى هقابل حد من عيلتى تانى بعد السنين دى كلها … لا كمان وتطلع انتى
/ الله طب وليه الغلط دا بقى يا خويا
_ الا انتى اتخزوقتى ازاى يا روفان صحيح
/ لا انا اللى خزوقته مش هو اللى خزوقنى
_ تصدقى توقعت. من شكلك قولت انك مش سالكة اصلا
/ حبيبى تسلم والله …. بص يا سيدى انا اصلا ولا كنت عايزة اتجوز ولا نيلة، حتى لما حكولى عنك وكانوا يحاولوا أنهم يخلونى استناك على اساس انك هترجع وكدا مكنتش برضو بسمع كلامهم … انا بت عشوائية شوية وغريبة الأطوار … كنت مجنانهم ومطلعة عينهم بتصرفاتى الطايشة … وجدك لما ربنا هداه وسابلى حرية الاختيار … اتقدملى واحد وافقت عليه عشان اثبتلهم إن مفيش حاجة بتقف على حد … بس هو طلع غبى وفاكرنى بت طيبة وغلبانة وكان هيضحك عليا بس كشفته
_ وعملتى معاه ايه بقى
” غمزت روفان بشقاوة وقالت: اثبتله فعلا انى طيبة وغلبانة
” ضحك عليها عمر بغلب وقال: انتى مشكلة فعلا والله
/ طب مش هتحكيلى بقى ايه قصتك انت
عمر بسخرية: باختصار. حبيت واحدة وحاولت معاها كتير وقدمتلها كل حاجة … بس طلعت من النوع اللى تاخد ومتديش … وكسرت بخاطرى والله يا روفان
روفان بحزن: طب خلاص متزعلش إن شاءالله ربنا يعوضك يابنى ببنت الحلال يارب وينور طريقك يا ضنايا
عمر بغلب: يابنتى بس بقى. ايه طريقة جدتى دى
روفان: اضحك يابنى وفرفش كدا محدش واخد منها حاجه والله
” اومأ بشرود مع ابتسامة بسيطة وقال: فعلا. محدش واخد منها حاجه
روفان: انا مقدرة حزنك والله وكل حاجة … ايه بقى مش هنقوم ناكل ولا ايه
” زقها عمر بخفة وقال بحنق: قومى يا روفان من هنا. بنت فصيلة
/ ما براحة يسطا بدل ما اقل منك قدام الأجانب، الله
” ضحك عليها بيأس وهى شاركته الضحك … صوت ضحكهم بيعلى ويعلى وكل اللى رايح وجاى بيبص عليهم. امواج البحر وصوتها العالى. رفرفة الطيور والهوا الشديد … جو كان كفيل أنه يطبطب على قلوبهم بهداوة
________
/ ماما
” قالتها رغد بحزن وهى واقفة قدام والدتها. رفعت حنان عيونها ليها وبصتلها بحيرة وغضب وتعب منها. عيطت رغد وقعدت على ركبتها ودفنت وشها فى حضن حنان وقالت: عاقبينى يا ماما. عاتبينى يا ماما. وازعلى منى. بس بالله عليكى ما تسبينى … سامحيني يا ماما ارجوكى … والله كنت غافلة ومغفلة. كنت تايهة يا ماما والله. بس متسبنيش. ساعدينى اتعالج وأخف. ساعدينى ابقى رغد تانية خالص
حنان بوهن: ياسين وملك اتطلقوا يا رغد
” رفعت وشها بصدمة وقالت: لا … مينفعش يتطلقوا. لا مستحيل يحصل كدا … ياسين وملك بيحبوا بعض اوى. ليه اتطلقوا ليه
حنان بسخرية: كنتى عايزاهم يعملوا ايه … كنتى عايزة ملك تقبل تعيش معاه تانى بعد اللى عملتوه فيها. ومين يمحى دا كله من جواها… طول ما انتو قصادها هى عمرها ما هتنسى ولا تتعافى من قرفكم عليها.
رغد ببكاء هيستيرى: انا أسفة والله اسفة. عارفة أنه أسفى مش هيعمل حاجة. بس والله ندمانة اوى يا ماما. والله ندمت
” قامت حنان وابتسمت بسخرية وتعب وقالت: ما كلنا بنندم بعدين … بس يفيد بايه الندم بعد فوات الاوان …. لو عايزة تتعالجى يبقى تتعالجى عشان نفسك مش عشانا يا رغد … ومتخافيش قلبى مش هيطاوعنى اسيب بنتى لوحدها
” اترمت رغد فى حضنها وعيطت جامد.طبطبت عليها حنان بهدوء ووجع عليها وليها … دعت ربها أنه يعوض ملك ويصلح حال ولادها.
________
“بعد سنين ليست بطويلة ”
_ قولى لبابا يا حبيبتى انك عايزة تاكلى دوناتس: بابا. مامى عايزة تاكل دوناتس
_ يا هبلة انتى اللى عايزة تاكلى مش انا: بس أنا مش جعانة يا مامى
/ خلاص يا عسل منك ليها ولا انتى ولا هى هتاكلوا. تمام يا رغد
رغد بتذمر: بس أنا عايزة دوناتس يا كريم
كريم بحنية: يا حبيبتى مش الدكتورة قالتلتنا نبطل سكريات دلوقتى على الأقل لغاية ما تولدى
_ طب واحدة بس يا كريم. عشان خاطرى
: وانا كمان يا بابى عايزة دوناتس زى مامى. بليييز
كريم بقلة حيلة: حاضر يا حبيبتى. هجبلكم دوناتس وامرى لله
رغد بحب: تسلم يا حبيبى. ربنا يديمك لينا دايما
” شال كريم بنته “حنين” ومسك ايد رغد ومشى بيهم … بصتله بابتسامة محبة وقالت لنفسها: كملت علاجى وكانت ماما بتساندنى. طلعت فى حاجات كتيرة فهماها غلط. فهمت انى انا اللى كنت ببعد من ياسين. فهمت أن الحب مع شخص تحس معاه بالأمان مش الخوف … ومكدبش عليكم. اخدت فترة كبيرة افكر فى عمر. كان ياجى على بالى كتير … كنت بتصل بيه كتير عشان اعتذرله … منساش اليوم اللى رد عليا فيه:
عمر ازيك. انا رغد
_ بخير الحمدلله، انتى كويسة
رغد بحزن: عمر انا. انا اسفة على كل اللى عملته معاك. انا عارفة أن فكرة الرجوع بينا مستحيلة بالنسبالك. بس كل اللى طلباه انك تسامحنى يا عمر. بالله عليك تسامحنى
_ ممكن تهدى ومتعيطيش … اولا يا رغد انا سامحتك مع نفسى من بدرى، وانتى كمان سامحينى انى فرضت نفسى عليكى من الاول.
: لا لا يا عمر. انت كان معاك حق فى كل حاجة بتعملها معايا، بس أنا اللى كنت مغفلة عن دا كله
_ حصل خير يا رغد وأتمنى أن ربنا يعوضك وتعيشى حياتك من جديد
: شكرا يا عمر. شكرا اوى
” مكالمته على ما قد كان نفسى يقولك هديكى فرصة تانية يا رغد بس ريحتنى. فضلت أعانى كتير من بعده. حاولت اصلح علاقتى بياسين ودى كانت اصعب فترة تمر عليا:
بالله عليك وحياة ماما وبابا يا ياسين لتسامحنى
: وهترجعيلى ملك … قوليلى لو سامحتك ملك هترجعلى طيب
_ والله مستعدة اروحلها واعتذرلها. مستعدة ابوس رجلها عشان تسامحنى … بس كفاية قسوة عليا لغاية كدا يا ياسين. مش عايزة اموت وانا لوحدى ارجوك
” ساعتها فضلت اعيط جامد.محستش بنفسى غير وانا فى حضنه وبيطبطب عليا رغم الوجع اللى كان فيه … مش عارفه ازاى وامتى ولا ايه اللى حصل بعدين عشان الاقى كريم دخل حياتى. كريم اللى كان عوضى من ربنا. كريم اللى محبش يسمع عن اى حاجة كانت ماضى وتخصنى. كريم اللى دوقت معاه حب وحنية واهتمام وامان. وحبيته. اصل مين ميحبش كريم يعنى. وكانت ثمرة حبنا هى بنتنا حنين واغلى ما لينا … ودلوقتى اقدر اقول ان ربنا فعلا عوضنى بعيلتى الصغيرة والحمد لله.
/ هييي يا رغد.مالك سرحانة كدا
رغد بابتسامة: سرحانة فيك يا روحى
/ طب اتلمى دلوقتى عشان احنا مش فى بيتنا: طب ما يلا نروح بيتنا
/ مش قدام البنت يا عسل، كدا هتفتحى عينيها على حاجات غلط: انت فهمت ايه يا كيمو … انا اقصد يلا بيتنا عشان عايزة انام انا والبيبى اللى جوايا دا
/ لئيمة والله … بس عسلية اقسم بالله
” بصتله بابتسامة محبة. وبعدين بصت لبنتها بحب. غمضت عيونها براحة وحمدت ربها على أنه خلاها تعيش لغاية اليوم دا ومحرمهاش من الاحساس الجميل اللى حساه دلوقتى.
______
_ هات 150 جنيه عشان عايزة اعمل كيكة يا اخ عمر
: لا مش هديكى لا
_ شالله يخليك عايزة اعمل كيكة
: وتبوظيها ونرميها بعدين صح
_ لا ما أنا جبت الطريقة الصحيحة للكيكة متخافش
: اطلبيها اونلاين ارحم يا روفان
_ يعنى معنعملشى كيكة: لااا
: طب تمام. حور مالك. تعالوا يا ولاد
حور/ مالك : نعم يا ماما
” برقتلهم بتحذير وقالت: مش انتو عايزين تاكلوا كيكة دلوقتى يا حبايبى
الولاد: اه يا ماما
_ طب بابا مش راضى يدينى فلوس اعملكم كيكة
حور ببراءة: ممكن يا عمورى تدى لماما فلوس تعملنا كيكة
مالك: اه ياريت يا بابا
عمر بضحك: مخوفة العيال منك يا روفان … طب ايه رايكم يا حبايبى اعزمكم على كيك بالشوكولاتة فى الملاهى ونلعب بالالعاب
” سقفوا الولاد بفرحة وجريوا على اوضهم عشان يجهزوا … بصت روفان لعمر بغيظ وهو شدها ليه وقعدها على رجله وقال بعبث: مفيش داعى تعملى كيكة كل شوية يا روحى. كدا كدا انتى كيكة لوحدك ومستمتع بيها
” حاوطت رقبته بدراعها وقالت بنبرة دغدغت قلبه: والله يا عمورى لو انا الكيكة فأنت الشاى بلبن اللى بحبه
عمر بضحك: حتى غزلك غريب زيك يا بنتى … يلا روحى البسى مع العيال عشان نخرج
” قامت روفان وجريت للولاد بحماس … ابتسم عمر بخفوت: روفان. قدرت بعفويتها وعشوائيتها تنسينى رغد.واحدة واحدة لقيتنى بتعلق بيها. خلت قلبى يرجع يحب من تانى. مهما احكى عنها الكلام مش هيكفيها والله … بس أنا عايز اقول. انى لما حبيت فعلا ودوقت طعم الحب. فكان الحب روفان.
: بتفكر فيا صح
” ابتسم بحب وقال: وانا عقلى لاقى غيرك عشان يفكر فيها
: ابو العيال اللى مثبتنى دايما والله
” ضحك بخفة ومسك أيدها وباسها وقال: وابو العيال بيعشق واحدة اسمها روفان يا. ام العيال
: بحبك والله يابنى
_______