عشق خادع كريمة حمادة ج2

_ اوووف … بتعمل ايه هنا ياسين فى اوضتى
: صباح الخير يا ملوك
_ صباح النور ياسيدى …خير على الصبح
: خير يا قلبى متقلقيش … حبيت أصبح عليكى بس
_ والله؟ ما كنت قولتها واحنا بنفطر تحت يعنى بدل الغلبة دى
: تؤ تؤ. فى اوضتنا احلى
_ اوووف. طب ممكن تخرج عشان عايزة اغير هدومى واروح الكلية
” قام من على السرير وقربلها وقال بابتسامة: لا ماهو مش هتروحى الكلية النهاردة للأسف
: ودا ليه إن شاءالله
_ عشان ببساطة اتصلت بيهم واخدتلك إذن اليوم كله
” هتفت بصدمة: نعم؟ انت ازاى تعمل كدا ومن غير ما ترجعلى كمان
” ربع ايديه على صدره وقال ببرود: مراتى … انا حر بقى اعمل اللى انا عايزه
ملك بحدة: لا انت مش حر فى حياتى يا ياسين … نسيت كلامك انك ملكش دخل بيا ولا حاجة تخصنى، رجعت فى كلامك ليه دلوقتى
” هز كتفه وقال: لا. طول ما انتى مراتى فأنا أعمل اللى عايزه
: عايز ايه يا ياسين بالظبط ومن الاخر كدا
” اتسعت ابتسامة ياسين وقال: عايز نخرج. نتكلم فى مكان لوحدنا
: وانا مش حابة لا أخرج ولا اتكلم مع حد
_ خلاص يبقى مفيش خروج من هنا تانى
: حلو، احبسنى يلا فى اوضة ضلمة تانى اليوم كله. يوم اتنين تلاتة اعمل اللى تريحه، بس برضو مش هخرج معاك
_ دا بجد يعنى؟ مش عايزة تخرجى معايا ليه
: عشان بفضلك بقى اهون ليا انى اقعد فى مكان لوحدى ومخيف احسن ما اكون قاعدة معاك انت فى مكان واحد
” ردها صدمه جدا مكانش متوقع أنه يوصلها لكدا هو فكر أنه هيعمل اى حاجة حتى لو بالغصب معاها بس المهم تسمعه وتقبل تديله فرصة تانية، ولكن ردها دا اوحله أنه الوصول لفرصة تانية هيبقى شىء مستحيل.
_ بقيتى بتخافى منى يا ملك
: يوووه هو انا كل شوية هعيد يعنى اه يا سيدى بقيت بخاف منك لا كمان بترعب، مبقتش احس معاك بالأمان خالص. ارتحت
” اتعصب من كلامها فقال بحدة: بس اسكتى يا ملك اسكتى … مش عايز اسمعك بتقولى كدا تانى انتى فاهمة
” ضحكت بعلو صوتها وقالت وهى لسة بتضحك: لا دا بجد.اه مش قادرة والله قلبى هيقف من الضحك. اومال عايزنى اقولك ايه يعنى. استنى مثلا عايز تسمع جملة حاضر يا ياسين موافقة نخرج ونتكلم وارجع اثق فيك من تانى صح. هو دا اللى عايز تسمعه
” فضل ساكت ومش عارف يرد بايه، يس هى كملت بنبرة غاضبة: اخرج برة يا ياسين. اخرج برة الاوضة دى ومتدخلهاش تانى لانى مش حابة اجتمع معاك فى مكان واحد خالص … برة
” بصلها بصة أخيرة غريبة بالنسبالها بس محبتش تهتم. خرج وقفل الباب جامد وراه … حاولت تتنفس بهدوء وتعدى نفسها من الحالة اللى صابتها. قعدت على السرير بإهمال وحطت أيدها على قلبها وقالت: متلومش عليا. لو عايز تحنله حنله بس أنا لأول مرة هسمع لعقلى. هسمعله لانى حاسة أن دى الراحة بالنسبالى.
_______
_ اهون ليا انى اقعد فى مكان لوحدى ومخيف احسن ما اكون قاعدة معاك انت
_ اه يا سيدى بقيت بخاف من لا كمان بترعب
_ مش حابة اجتمع معاك فى مكان واحد خالص
” كان كلامها بتردد بصدى صوت عالى وهو بيضرب فى كيس البوكسينج. كان حاسس الدنيا بتلف بيه ومش عارفلها نهاية … عندها حق فى كلمة قالتها، كنت عايزها تقولك موافقة يا ياسين على اللى انت عايزه مثلا
وقف لعب وهو بيتنفس بسرعة والعرق مالى وشه … اخد فوطة ومسح بيها العرق وشرب مية وعلى فجأة رمى الازازة فى الارض بغضب. سمع والدته بتنادى عليه فاخد نفس عميق ولبس التيشيرت وخرجلها. : نعم يا امى
حنان بقلق: ياسين
: فى ايه يا امى قلقانة كدا ليه
حنان بخوف: ياسين. م ملك
: مالها ملك يا امى اتكلمى
حنان بتوتر: ملك خرجت دلوقتى وهى متعصبة والحرس بيحاولوا يمنعوها برة
” اتنهد بضيق وطلع لبرة. لقيها بتزعق مع الحراس بعصبية: افتحوا الباب دا بقول وخلونى أخرج
/ اسف يا هانم بس مش بناخد الأوامر غير من ياسين بيه
ملك بغضب: وانا بقولكم افتحوا الباب دا فورا والا.
: والا ايه
” لفتله وبصتله بحدة وهو كمل بهدوء: والا ايه يا ملك. كملى
ملك بغضب شديد: خليهم يفتحوا الباب دا يا ياسين حالا
: وإن مفتحتهوش هتعملى ايه
” صرخت ملك بانهيار: افتح الباب دا يا ياسين … افتحه عايزة اطلع من هنا. انت ايه؟ ايه الجبروت اللى انت فيه دا
” اتقدملها ياسين ومسك أيدها بغضب جحيمى وشدها وراه … دخلها اوضتهم وقفل الباب عليهم وقال بحدة: حسك عينك يا ملك تزعقيلى كدا تانى قدام حد .. انتى فاهمة
ملك بسخرية : ايه مشاعرك انجرحت قدامهم عشان زعقت فى وشك .. اومال لو عرفوا أن البيه بتاعهم حبسنى فى اوضة ضلمة ، سابنى فى ليلة فرحى وقالى كلام جارح و و و … هامك كرامتك قدام الحرس ومش هامك انا واللى عملته فيا يا اخى
ياسين بصراخ : بس كفايا كفايا .. انا عارف انى غلطت واوى كمان .. انا بحاول اصلح كل حاجة .. بحاول ارجع حياتنا .. عايز احكيلك بس انتى مش مديانى فرصة
” اتشنج وشها وقالت باستنكار : فرصة؟ انت عايز منى فرصة تانية ؟ طب ازاى وليه اصلا .. اديك فرصة تانية على ايه .. دانت قلبت ليلة فرحنا اللى كنا مستنيينها بقالنا كتير لليلة سودا .. قولتلى كلام حرفيا كسر قلبى لمليون حتة .. بتلقح بكلام انى خونتك وخدعتك وانى مستهلش منك الحب .. مدتنيش فرصة اسمع منك كان يمكن يبقى فى فرصة تانية لو ساعتها ريحتنى وحكتلى بس انت اخترت الهروب وسافرت .. رجعلى بعد تلات ايام وعايزنى اديلك فرصة تانية .. انا ملحقتش اداوى جروحى منك اصلا يا ياسين عشان اديك فرصة تانية
: عايزك تدينى فرصة اصلح دا كله يا ملك .. فرصة واحدة اثبتلك انى اتغيرت .. ملك انا مكرهتكيش معرفتش اصلا اكرهك صدقينى معرفتش .. بس ارجوكى ادينى فرصة تانية اعوضك عن دا كله
” خلص كلامه والاتنين فضلوا باصين لبعض .. هو بيتنفس بصعوبة وبيحاول يستعطفها … وهى مش فاهمة ايه اللى بيحصل معاها ولا عارفة تعمل ايه ..
“ثمّ إنك نزعت الحب العميق الذي كان بقلبي لك، بنفسك ورغبتك وعدت غريبًا وكأنك لم تكن”
” كل محاولة بيعملها معاها بائت بالفشل … مستسلمش ولا مرة … بيعمل اى حاجة تخطر على باله ممكن تخليها تسمعه بيوصلها الكلية غصب عنها ويروح يجيبها برضو بس المهم تبقى جنبه .. بتصده كل مرة وتقفل الباب فى وشه ..
_ كفاية يا ياسين .. ارجوك كفاية لغاية كدا وسيبنى على راحتى
: لا مش هسيبك يا ملك .. ملك انتى لازم تسمعينى ارجوكى
_ قولتلك مش عايزة اسمعك افهم بقى ، سيبنى فى حالى ارجوك
: ارجوكى انتى يا ملك .. اسمعينى ولو لمرة واحدة
” اتنهدت بضيق وقالت : اووف ، تمام يا ياسين اتفضل اتكلم انا سمعاك
” ابتسم بفرحة ومسك أيدها وقال :
انا اسف .. حقك عليا وعلى عينى يا نور عينى .. صدقينى ندمت على كل حرف قولتهولك وجرحك منى … انا بحبك يا ملك لغاية اللحظة دى وعمرى ما كرهتك صدقينى والله .. خلينى اعوضك يا ملك وننسى اللى فات ارجوكى
_ لعبة جديدة دى ياسين ؟
” اختفت ابتسامته وهى كملت بابتسامة بنبرة حزينة أو غريبة بالنسباله : لعبة جديدة .. تمثيلية جديدة .. يلا نمثل الحب والعشق والحنية والأمان على ملك تانى يلا .. وبعدها بفترة فى ليلة مهمة تكون ناوى تطلعنى فيها لسابع سما .. وبكلمة منك تنزلنى لسابع ارض .. ماهو انا فار لتجاربك دى معايا .. طب قولى ايه سبب دا كله ويمكن يطلع تافه وابقى افكر اديك فرصة تانية واسامحك ونرجع المية لمجاريها ونعيش فى تبات ونبات ونسقف بفرحة بقى … مش هو دا الفيلم الجديد يا ياسين
” مسح على وشه بتعب من كلامها وهى لسة بتبصله بنفس النظرة .. بصلها وهو بيحاول يكبت دموعه وقال بالم : انا بس كنت عايز فرصة تانية يا ملك
” ولتانى مرة بتبتسم بخفوت ودموعها نزلت غصب عنها وسابته ومشيت : “راجع بتقولى اللى ما بينا وبتسأل ليه ماكملناش إسأل روحك مين استنى ومين استغنى وباع ببلاش ردى عليك مابقاش حايفيدك ضعت وضيعتنى من ايدك ياخسارة بتيجى الحاجه لما الواحد ما يعوزهاش”
___________
/ بقالى فترة ملاحظة انك متغير مع اختك يا ياسين ، ليه كدا
ياسين بتعب : مش حابب اتكلم دلوقتى يا امى
عمر بقلق : هو فى حاجة يا ياسين .. انت كويس حاسك تعبان
ياسين : لا متقلقش انا كويس .. احم عمر
عمر : نعم
ياسين بتوتر : عملت ايه فى شغل فرع دبى
عمر بصدق : متقلقش يا ياسين خلصته كله .. خليك معتمد عليا
ياسين : وانا واثق فيك يا عمر
/ ياسين
ياسين بجمود: خير
رغد بحزن : ياسين انت ليه بتعاملنى كدا .. ليه بتبعد عنى ومش بتكلمنى زى الاول .. هو انا عملت ايه طيب
ياسين ببرود : خليكى بعيد عنى بس
حنان بزعيق : فى ايه ياسين .. ما تقولنا حصل منها ايه لدا كله مخليك تعاملها كدا
” مقدرش ياسين يتحكم فى عصبيته اكتر من كدا واستغل أن ملك برة فى شغلها وانفجر بيهم كلهم وقال : فى أن الهانم عشان تنتقم منى لانى موافقتش على جوازها من جاسم .. زورت صور لعمر وملك أنهم على علاقة ببعض .. لا وكمان مسكتتش وسمعتنى صوت لملك وهى بتكلم عمر وبتقوله أنها مش بتحبنى وانها اتجوزتنى عشان تبقى جنب عمر .. كمية تسجيلات وصور مزيفين خلتهم دمروا حياتى وحياة بنت ملهاش ذنب وكسرتها بأبشع الكلام والطرق .. خلتنى كدبت البنت الوحيدة اللى بحبها وصدقت فيها أنها خاينة ومخادعة ..
” انتهى ياسين من كلامه والصدمة حليفتهم .. قبل ما اى حد ينطق بكلمة كلهم سمعوا صوت حاجة بتتكسر … بصو وراهم بصدمة وعيونهم وسعت لاخرها اول ما شافوها واقفة قدامهم..
ياسين بصدمة : ملك
…
بكم الطيارة دى لو سمحت
/ 3000 يا فندم
_ امممم. ماشى ممكن تلفهالى كويس لو سمحت
/ حاضر
” خلينى اسمعه افهم ليه عمل كدا هحاول اديله فرصة ولنفسى بس بعد ما اعاقبه مشكلة قلبى أنه خايف. خايف يديله الامان تانى ويرجع يخذلنى من تانى هشتريله الطيارة دى كبداية صلح بعد ما اعرف كل حاجة مع إن المفروض هو اللى يصالحنى ويجبلى هدية بس حاسة انى كدا مبسوطة دايما بابا كان يقولى حتى لو احنا اللى زعلانين من الشخص وحاول أنه يصلح الأمور بينا مفهاش حاجة لو احنا كمان حاولنا نصلح لأن ربنا هيحبنا ويبقى مبسوط مننا
اخدت الهدية واتجهت للبيت وصلت ونزلت من العربية واخدت نفس عميق ودخلت وانا بحاول ارسم ابتسامة جميلة. سمعت صوت دوشة واستغربت. ومع اول خطوة للبيت سمعت صوت كسرة قلبى بالكلام اللى بيتقال. والطيارة وقعت من ايدى واتهشمت على مية حتة.
ياسين بصدمة: ملك
” اتقدمت ليهم وهى بتجر رجلها بالعافية، نفسها بيضيق اوى ودموعها اللى بتنزل بغزارة وقالت برعشة: ايه. اللى. سمعته دا، انت. انت فعلا. لا استنى اكيد بتهزر … فهمت غلط صح
” ياسين بلع ريقه بصعوبة وقال: ملك اسمعينى ارجوكى
: يلا انا سمعاك. اتكلم قول … قول أن اللى سمعته دا غلط ومش حقيقى. يلا اتكلم
_ ملك أنا …
” زاحته بايديها الاتنين بقوة وهو اترد لورا وبصلها بصدمة حقيقية، صرخت بانهيار وقالت: ملك ايه … انت ايه يا اخى حرام عليك تعمل فيا كدا … ازاى ياربى ازاااى … انت شكيت فيا انا. شكيت انى على علاقة بجوز اختك وبخدعك وبخونك … يا الله. يا الله. اقول ايه بس يارب … شوية صور وكم تسجيل يخلوك تعمل فيا كدا … يا اخى دانا كنت بقولك انى بثق فيك اكتر من روحى … كنت بقولك انت أمانى يا ياسين … سلمتك نفسى وحياتى وانا مغمضة عينى. وانت … انت تعمل فيا كدا انا.
ياسين بوجع: ملك ارجوكى اهدى
ملك بانهيار هيستيرى: بس بس متقوليش اهدى … انا قلبى وجعنى اوى دلوقتى اوى. كل لحظة كنت بقولك فيها انا بكرهك يا ياسين كنت بصرخ من جوايا واقول لا لسة بحبك، كنت بكدب على نفسى وأقسى عليها عشان مضعفش لحبى ليك. بس دلوقتى قلبى دا لو هيفضل طول عمره يحنلك هدوس عليه الف مرة عشان انساك
حنان بدموع واسف: ملك يا حبيبتى اهدى عشان خاطرى. اكيد فى حاجة غلط. صح ياسين اتكلم يابنى ارجوك
” بص ياسين لرغد لقيها بتعيط بصمت وبتترعش مكانها. حول نظره لعمر لقيه واقف جامد وملامحه هتنفجر من الغضب ولأنه اتوجع زيه كان حاسس بالبركان اللى بيثور جواه. خرج فونه واتصل على حد وقاله: هات الملف اللى معاك دلوقتى
” كانت عينيها مثبتة عليه بكره شديد.مكانش قادر يتحمل النظرة دى منها … وبعد دقايق دخل حد من الحرس واداله الملف، فتحه وخرج اللى جواه ورمى الصور فى وش رغد وقال: كنتى عايزة تنتقمى منى صح. اهنيكى يا رغد حققتى انتقامك
” شهقت بعنف وحطت أيدها على وشها وعيطت جامد … اتقدمت ملك ناحية الصور ومسكتها بايد بتترعش. مسكت صورتين مختلفتين صورة ليها وصورة لواحدة تانية. وفى نفس اللحظة انحنى عمر واخد الصور وبصلها بصدمة. دموعه نزلت ومسح عليها بشوق ووجع وقال: ليه يا رغد ليه كدا، ملقتيش غير الطريقة دى وتخلصى منى بيها ليه
” زعق فى اخر كلمة وكمل بغضب: انتى عارفة دى مين. دى اختى … اختى يا رغد اختى … اختى اللى اتحرمت منها بقالى سنين ولسة بحاول اتعافى من فراقها يا رغد … ازاى قدرتى تعملى شىء قذر زى كدا
رغد بعياط: والله ما اعرف انها اختك والله ما كنت اعرف
” ضربها عمر بقلم وقال بحدة: مكنتش اعرف انك واحدة قذرة وسيئة اوى كدا عشان واحد من نفس عينتك تعملى دا كله تدمرى حياة اخوكى وتقهرينى على اختى عشان تنتقمى مننا
” انفجرت رغد فيهم وقالت: أيوة واعمل اكتر كمان … انتو اللى دمرتونى … ياسين طول عمره جامد معايا. متعمليش دى يا رغد.متلبسيش دى يا رغد.متكلميش دا يا رغد.مفيش جواز من جاسم ابدا يا رغد وجبرنى عليك … وانت يا عمر. انا اللى روحت قولتله على علاقتى بجاسم. وافقت انك تتجوزنى رغم انك عارف انى بحب جاسم … انتو هدتونى ودمرتونى اكتر
” قامت ملك وقالتلها بالم: طب وانا عملتلك ايه. انا اذيتك فى ايه يا رغد.انا بعدت عنك اول ما حسيت انك مش طيقانى … عملتلك ايه أنا عشان تعملى فيا كدا يا رغد
رغد بجمود وغل: ذنبك أن ياسين بيحبك مكنتش قادرة اشوف ياسين مبسوط معاكي ةبيحبك ةانا بتقهر على الشخص اللي حبيته
عمر بحدة : كفايى بقى اصحي من الوهم اللي انتي فيه دا جاسم جاسم جاسم ، جاسم ده هو اللي بيخدعك أصلا جاسم ده مبيحبكيش يا رغد ده بيلعب بيكي وبيستغلك علشان فلوسك
/ انت بتقول ايه انت بتكذب عليا صح
ياسين بجمود: لا مبيكذبش يا رغد
/ وايه دليلكم على الكلام دا ها
حنان بغضب: كمان عايزة دليل. انتى عامية للدراجاتى يعنى
” بص عمر لملك لقيها ساكتة بطريقة مريبة. باصة للصور بشرود وبتسمع فى التسجيل مع نفسها. اتقدم منها وقعد على ركبته وبلع ريقه بتوتر وقال بأسف: انا اسف ليكى يا ملك. حقيقى اسف اوى. نصيبنا أننا وقعنا مع اكتر اتنين حبيناهم واتأذينا منهم. دى اختى يا ملك ماتت من ٥ سنين والصور دى كانت اخر حاجة بتجمعنا ببعض مش عارف ازاى حصلت عليها وعملت كدا. بتمنى انك تلاقى العوض بعيد عن هنا يا ملك. اتمنى
” وقام ووقف قصاد رغد وبصلها بكره لأول مرة وقال: حاولت معاكى كتير يا رغد بس طلعتى متستهليش ربع المحاولات دى … انتى طالق يا رغد طالق طالق. دا اقسى عقاب ليكى منى واتمنى مشوفش وشك تانى قدامى
حنان بدموع: عمر يابنى
عمر: كنتى امى فعلا وانا مش زعلان منك ابدا. عن اذنكم
” مشى عمر من قدامهم بقلب مكسور بعد ما جمع صوره هو واخته واخدهم … بصت لاثره بصدمة وكلمة طالق بتتردد جواها … قلبها وجعها بطريقة رهيبة اول ما مشى وكأنها استوعبت دلوقتى رحيل عمر فعلا.
” قامت ملك بهدوء وطلعت لفوق وعيون ياسين مرقباها … دخلت الاوضة وسابت الباب مفتوح. وقفت فى نصها وحست بيه وهو واقف وراها وقالت بنبرة خالية من اى شعور: بتحبنى يا ياسين أيوة بحبك يا ملك وطلعت مش بتحبنى … هتحسسنى بالأمان يا ياسين، هكون امانك وضلك يا ملك وطلعت ولا امان ولا ضل …. اوعى تجرحنى يا ياسين وجرحتنى … اوعى فى يوم تخلينى اكرهك يا ياسين وكرهتك … يااااه دا الحب طلع اكبر وهم فى الدنيا دى كلها
” لفتله وهى على وشها ابتسامة غريبة وجعت قلبه اكتر وقالت: مبسوط. لا بجد مبسوط يا ياسين بعد اللى عملته، جاوبنى يلا
ياسين بالم: والله ندمت والله يا ملك لسة بعشقك، قبل ما اقسى عليكى كنت بقسى على نفسى قبلك، ملك انا كنتى معمى. كنت حاسس بتوهان من الصور والتسجيل، صدقينى الشيطان عمى عيونى عن الحقيقة، مكنتش عارف اعمل ايه
” انفجرت فى وشه بانهيار: كنت جيت سالتنى. كنت جيت قولتلى يا ملك انا شوفت كذا وسمعت كذا. كنا روحنا لاى حد بتاع فوتوشوب وكنا هنتاكدد أنه كله كذب فى كذب … انت عارف اثبتلى ايه اثبتلى انك محبتنيش يا ياسين
_ لا لا والله العظيم بحبك يا ملك
ملك بالم: اللى بيحب عمره ما بيئذى حبيبه … وانت مش بس اذتنى انت كسرتنى بجد يا ياسين دانا كنت جيبالك هدية … هدية عشان نبدا بيها الفرصة الجديدة اللى انت عايزها بس ضيعتها. ضيعتها يا ياسين. ضيعتها