عشق خادع كريمة حمادة ج2

_ تخيلى زعلانة عشان عمر مش بيكلمنى
/ لا دا بجد؟ وزعلانة ليه يا ست رغد
_ مش عارفه. بس مفتقدة اتصالاته، كلامه، حنيته عليا، واهتمامه الزايد
/ اتعلقتى بيه يا رغد … حبيتى اهتمامه بيكى وحبه اللى كان بيعمل أقصى ما عنده عشان يبنهولك
_ معقول؟
/ ارجوكى يا رغد حاولى ترجعى عن اللى بتفكرى فيه … رغد انا بحبك اوى صدقينى عايزاكى تعيشى حياتك بهدوء وسلام، امان وحب واهتمام بجد مش مزيف، عايزة رغد تكون ام حنونة وطيبة وتحب ولادها وتحببهم فى بعض. عمر هو اللى هيساعدك تعيشى دا كله يا رغد صدقينى مش جاسم
” نزلت دموعها بصمت وكلام صاحبتها اثر فيها اوى … كانت فى يوم تتمنى فعلا انها تعيش الحياة دى … لما اتعرفت على جاسم اتخيلتها معاه ورسمت حياتهم سوا زى ما هى عايزة … بس كل دا اتهد لما ياسين عرف بعلاقتهم ولغاية دلوقتى مش فاهمة ليه رفضه أو ليه بيكرهه. جات على بالها ذكرى اول مرة تشوف فيها عمر.
/ انت بقى عريس الغفلة
_ للاسف … اه
/ طب اسمع بقى. انت هتطلع تقولهم مفيش نصيب بينا ومش موافق
_ طب ما تقوليلهم انت. بتدبيسها فيا انا ليه يعنى
/ عشان هما مش راضيين يسمعوا منى وغصبونى عليك، فقولهم انت احسن
_ بس أنا عايز اتجوزك يا رغد
/ هتقبل على نفسك تتجوز واحدة غصب عنها
_ لا يا رغد مقبلش. بس يحتم عليا انى اساعدك تنجدى بنفسك من الغرق اللى انتى فيه دا … نجاتك مش مع جاسم يا رغد
/ انت تعرف جاسم منين؟ انطق
_ انا اللى قولت لياسين على علاقتكم … انا اعرف جاسم اكتر منك هو شخص مش يستاهلك اصلا … جاسم مش هو الحب اللى بتدورى عليه يا رغد صدقينى.
” رجعت من ذاكرتها على صوت صاحبتها وهى بتناديها … مسحت دموعها وقالت:
كل الكلام دا كذب. رغد واحلامها اندفنوا من زمان. دلوقتى فى رغد المكسورة والضعيفة. ومتخافيش انا مش مرتاحة اصلا فى اللى بعمله دا … بس شيطان الانتقام عامينى … عامينى ومتوهنى وحابسنى جواه ومفيش منه خروج
/ لا يا رغد فى خروج وهو عمر، حاولى تسمعيه، اديله فرصة واحدة بس يوريكى قد ايه انتى تستحقى تعيشى … رغد اقعدى مع نفسك وقارنى عمر بجاسم كدا، والله ما هتلاقى غير أن الفايز هو عمر بس.
” قفلت معاها رغد وفكرت فى كلامها … حاولت فعلا تقارن بينهم. عمر كان بيهتم بيها ويحاول بضحكها. كان بيجبلها هدايا ويقترح عليها يخرجوا مع بعض … سمع منها كلام كتير جارح ومع ذلك عمره ما رد عليها بكلمة لا دا كان بيسبها ويمشى وفى الاخر يرجع يقولها مش زعلان منك عشان خاطر حبى ليكى هستحمل لغاية ما تبقى ليا بكلك يا رغد.قارنته مع جاسم اللى عمره ما حسسها بقيمتها اوى، كان ساعات بيقلل منها وبعدين يرجع يقولها اصل خايف عليكى وبحبك، دايما كان بيهملها وميعبرهاش عكس عمر تماما
بكت بصمت وحاولت تكتم صوت عياطها عشان محدش يسمعها … كان نفسها يبقى موجود زى كل مرة ويحضنها يهون عليها … وكأن حس بيها حتى وهو بعيد.سمعت دقات رنة فونها وكان المتصل عمر … ردت وهى بتترعش ومتكلمتش وسمعته هو:
رغد.انا انا متصل عشان يعنى. رغد انتى سمعانى
” شهقت بعنف وقفلت فى وشه وفضلت تعيط جامد … دقيقة وجاتها رسالة. معبرتهاش لكن مع تكرار وصول الرسايل، مسحت دموعها وفتحتهم، كانو تلات مسجات ريكورد من عمر، فتحت اول واحد:
معرفش ليه جيتى على بالى وحبيت اتصل بيكى، رغم انى وعدتك مش هخليكى تسمعى صوتى تانى يا رغد
_ سمعت صوت شهقتك فى الاخر … على قد خوفى عليكى، بس حاسس انى مبسوط عشان بتعيطى حتى لو بسببى بس المهم متكتميش جواكى يا رغد
_ وفى اخر مسج بقولك، متخافيش يا رغد انا هطلقك زى وعدتك عشان تخلصى منى. بس لو حبيبتى نبدا فرصة جديدة انا مستعد يا رغد.
” ابتسمت غصب عنها من كلامه وقلبها بيدق … مسحت دموعها واخدت قرار فى نفسها وعزمت على تنفيذه.
_______
” تلات ايام. تلات ايام ما بين معالجة الروح من تانى بعد خذلانها. تلات ايام كانت بتحاول ترجع ضحكتها من تانى وترجع نفسها القديمة وبرائتها … كانت بتشغل نفسها بشغلها الاون لاين، تهلك نفسها فى هوايتها المفضلة وهو المطبخ. تلات ايام كانت كل ما تاجى تنام تحاول تكتم صوت عياطها وهى بتفتكر كل اللى مرت بيه … تلات ايام وهى بتكذب على أهلها أنها كويسة وبخير ومبسوطة وعايشة حياتها عشان بس متقلقهمش عليها.
” تلات ايام كان بيحاول يقسى على نفسه جامد … تلات ايام مكانش بينام كويس ولا بيرتاح وهو عارف أنه ظلم واحدة ومش اى واحدة دى حبيبته. تلات ايام كان بيفكر ازاى يرجعها ليه من تانى … تلات ايام كان يفتح فونه على صورهم سوا وصورها بالتحديد والألم بينهش فى قلبه على كل اللى عمله فيها … كان تايه، متشرد، مش لاقى نفسه من غيرها. قرر الرجوع وهو خايف من مواجهتها. قرر يرجع يحاول معاها بكل الطرق أنها تسامحه وتسمحله بفرصة تانية يداوو جروح بعض. أو يداوى هو جروحها اللى كان السبب الرئيسي فيها.
” كانت بتغير هدومها فى الاوضة وبتستعد للخروج عشان تروح لشغلها. الدراسة ابتدت ومهنتها تحتم عليها انها تفوق لنفسها وبس. مهنتها اللى عملت الكتير عشان توصلها.
نزلت وقالت لحنان انها ماشية. خرجت للجنينة ووقفت بصدمة لما لقيته واقف قدامها … لأول مرة تشهد حالة ياسين وهو كدا. وشه دبلان، باين عليه الإرهاق والتعب.
قرب منها بخطى مبعثرة وهو خايف من جواها أنها تصده، لا هو متاكد انها هترفضه. بس كان بيمنى نفسه أنه يحصل العكس … اخد نفس عميق وهو مركز فى عيونها وقال: ازيك يا ملك
” استغربت من نبرته الهادية. لا دى نبرة غريبة عنها، نبرة حزينة خجولة. ردت باستغراب: انت رجعت من السفر امتى. مش قولت انك مش هتيجى دلوقتى
_ مدايقة عشان رجعت بدرى يا ملك؟
ملك بجمود: مش فارقة معايا، ترجع زى ما تحب
” مسك ايدها وهى استغربت من دا … قربها من قلبه وحطها عليه، ابتسم وقال:
قلبى مستحملش يبعد عنك يا ملك … مقدرش يقاوم غيابك اكتر من كدا … قلبى راجع وهو ندمان وخجلان منك يا ملوك. راجع وهو عايز منك فرصة تانية … فرصة تانية بس عشان يقدر يصلح كل حاجة.
” بصتله بشرود وبدون رد عليه … فلتت أيدها منه بهدوء وسابته ومشيت وهو غمض عيونه بالم.
“ده موضوع انتهى يعني … وكانت قصه ونسيتها
صحيت من النوم وانا مرتاح … قطعت صورنا ورميتها
فراقك من نهايه الناس … ولا اخر الحياه ف عيني … ولو قلتي ف يوم نرجع هقولك كان ع عيني”
: انت فين يا جاسم، مبتردش عليا ليه ومتجاهلنى
/ مكنتش فاضى يا رغد فى ايه لدا كله
: فى ايه؟ فى انك واحد مهمل وبارد يا جاسم. فى انك سايبنى ومبتسألش عليا ولا مهتم بحالى كمان
/ وطى صوتك يا رغد احسنلك. بقولك مكنتش فاضى، ايه اعملك ايه يعنى
: لا ولا حاجة يا جاسم. ولا حاجة
/ اوف. متزعليش يا رغد، بس يا حبيبتى انا بشتغل كتير اليومين دول عشان اقدر اوفرلك عيشة كويسة بعدين واقدر احط عينى فى عين اخوكى
: بجد يا جاسم؟ بجد بتحاول تعمل اى حاجة عشان ابقى ليك
/ اكيد يا رغد يا حبيبتى … يلا هقفل دلوقتى عشان اكمل شغل: ماشى سلام
” قفلت معاه وابتسمت بفرحة … مسكينة هى فاكرة أن الحياة هتضحكلها خلاص. مسكينة وهى فاكرة إن الحب هيطرق بابها … مسكينة وهى متعرفش أنها بتقع فى مستنقع كبير ملهوش منجأ … مسكينة وهى متعرفش أن الامان مع شخص تانى ضيعته بايدها
_____
_ مساء الخير يا ماما
/ مساء النور يا ملوك. اخبار اول يوم كلية ايه بقى
_ والله يا ماما تعبت اوى النهاردة. شرحت اربع محاضرات ورا لبعض لأربع دفع
/ ربنا يعينك يا حبيبتى. تحبى اخلى صفية تحضرلك الاكل
_ لا انا جعانة نوم اكتر. هطلع اريح شوية وبعدين هنزل اقعد معاكى ونسهر يا جميل بكرة مش رايحة الكلية
/ تمام يا حبيبتى … احم ملك
_ نعم يا ماما
/ ياسين فوق يا ملك
” بصتلها بهدوء وابتسمت بتكلف. كل خطوة كانت بتخطيها على السلم كانت كأنها بتجرها للموت … احساس الخوف كان مسيطر عليه منه … استغربت اوى أنها خايفة من ياسين. ياسين اللى كان امانها وحب حياتها. قفت قصاد الباب واخدت نفس عميق ومسكت الاوكرة ودخلت.
كان نايم على السرير وحاطط دراعه على عيونه. اول ما حس بفتحة الباب بعدها وفتح عيونه. اول ما لقيها ملك اتنفض من مكانه وراحلها وقف قصادها وقال بلهفة: حمدالله على سلامتك يا ملوك
ملك بهدوء: الله يسلمك
ياسين بشوق: وحشتينى يا ملك … وحشتينى اوى اوى
” استغربت منه ومن كلامه. كلامه الحنين اللى كان بيقولولها زمان … بس دلوقتى حاولت تكبت احساسها بنفس اللهفة ليه وبينت الجمود واللامبالاة وقالت: من امتى الكلام دا، لعبة جديدة ولا ايه
” حس بالحزن من كلامها وبلع غصته وقال: لا يا ملك مش لعبة جديدة ولا حاجة … انا بتكلم بكل صدق
” هزت راسها ببرود وقالت: اممم اممم طيب تمام ماشى. خير بقى عايز ايه ولا بتعمل ايه هنا فى اوضتى، مش المفروض اننا مقاطعين بعض ولا ايه
ياسين بالم: ملك
ملك بجمود: كابتن ياسين. انا جاية تعبانة من شغلى وحابة ارتاح معلش
: بس أنا عايز نتكلم يا ملك. ارجوكى
_ وانا قولت انى حابة انام يا كابتن. ايه حتى النوم هتمنعنى منه
: لا يا ملك مش همنعك. نامى وارتاحى براحتك بس لازم هنتكلم يا ملك
_ هبقى افكر. ممكن تتفضل
” ركز فى ملامحها اللى كانت دايما بتسحره وما زالت. بلع ريقه بتوتر وقرب منها حضنها على غفلة. اتيبست مكانها وحست بالصدمة … دفن وشه فى رقبتها وحست بدموعه بتبلل حجابها … اخد نفس عميق وقال: اه يا ملك اه. لو تعرفى حضنك كان ايه وحشنى
” رفعت ايديها الاتنين وكانت هتبادله الحضن بس وقفتها تانى ونزلتها. بعدته بهدوء وسابته ودخلت الحمام. اتنهد بضيق وخرج برة الاوضة.
” بصت لنفسها فى المراية بشرود … فتحت الحنفية وغسلت وشها بعنف عشان تمحى دموعها اللى بتنزل … هتفت لنفسها بجمود: لا يا ملك مش هنضعف تانى. مش هنحن تانى لا … حسيت بندمك يا ياسين حاسة بالوجع اللى بينغز قلبك دلوقتى … مش هسامحك بسهولة لا …
_______
/ ياسين
” وقف مكانه ولفلها بهدوء عكس الثورة إللى جواه والغضب من ناحيتها. قربت منه وقالت: ياسين انت ليه من سعة ما جيت مش بتكلمنى زى كل مرة
ياسين بجمود: وعايزانى اكلمك اقولك ايه
/ فى ايه يا ياسين، بتكلمنى بالطريقة دى ليه
_ روحى اوضتك يا رغد ونامى مش فاضيلك دلوقتى
/ الوقت لسة بدرى. ياسين انت زعلان منى فى حاجة أو انا عملت حاجة زعلتك منى طيب
_ وانتى عملتى حاجة مثلا وخايفة منى يا رغد
” اتوترت رغد وبلعت ريقها بخوف وقالت: لا. وانا هعمل ايه يعنى يا ياسين
_ تمام يا رغد تمام …. بتكلمى عمر
رغد بضيق: مش كتير. كل ما اجى أكلمه يقولى مش فاضى وشغل كتير وراه
_ لا ربنا معاه … ابقى خلى بالك منه يا رغد … عمر بيحبك اوى
/ وانا مبحبهوش يا ياسين وانت عارف كدا كويس
” بصلها بنظرة ثاقبة وقال وهو بيمشى: حبيه … حبيه يا رغد
” نفخت بضيق وتمتمت لنفسها: حاضر هبقى أحبه غصب عنى … لما يفضالى البيه من الشغل
: بتكلمى نفسك يا رغد
/ لا يا ماما متشغليش بالك
حنان: كلمتى عمر؟
رغد بزهق: هو خير يعنى بتسالونى عليه ليه، ما تكلموه انتو وتطمنوا انتو عليه بنفسكم بدل ما تسألونى انا
حنان بسخرية: اهدى يا رغد، اهدى يا حبيبتى خلاص. دا مجرد سؤال مش بقولك مثلا حياتك عاملة ايه مع عمر عشان عارفاها كويس
/ طب كويس أن حضرتك عرفاها، بتسالينى ليه بقى
حنان بغضب: عارفة يابت يا رغد لو ما لميتى نفسك واتعدلتى كدا وعاملتى جوزك باحترام، لهربيكى من اول وجديد.فاهمة
رغد بحنق: طيب طيب، فهمت خلاص
: روحى نامى يلا. امشى
” اتجهت رغد لاوضتها وهى بتنفخ بضيق … أما حنان حوقلت بقلة حيلة وهى كمان راحت لاوضتها تنام.
” أما عند ياسين فكان قاعد فى الجنينة وسرحان. مغلوب على أمره ومش عارف يعمل ايه … من ناحية حبيبته اللى ظلمها وجيه عليها من غير ما يسمعها، ومن ناحية تانية أخته اللى دمرت حياته ودمرت حياتها كمان … اتنهد بعمق وبصت للسما بشرود وتمنى أن كل حاجة تتحل وترجع احسن من الاول.
_________