المستحيل بقلم شاهندة
بس يابنت أنا خالته ومن حقي أسأله وبعدين أنا أم وعارفة ان أمنية أي أم تشوف أحفادها ولو سيبنالكم السايب في السايب هنموت من غير مانشوف أحفاد.
ضحكت منيرة قائلة: يسلم لسانك يانبيلة.
مال أدهم علي أذن خالد يقول بهمس مرح: رد يافالح، خالتك وعمتي اتفقوا عليك وهتدخل عش الزوجية ياحبيبي.
مستحيل.
قالها بدوره بهمس قبل أن يقول لنبيلة: بصراحة ياخالتي، اللي اتجوزوا سدوا نفسي عن الجواز وحسيت انه شراكة فاشلة فخليني في الشراكة الناجحة. صحيح ياأدهم الشركة عاملة ايه في غيابي؟
ابتسم الجميع بينما أدركت نبيلة انه يتهرب لذا تركت الأمر مؤقتا، اعتدل أدهم قائلا بجدية تعجبت لها هند التي تراه يتمتع بوجوه عديدة وكأن مبدأه لكل مقام مقال: كانت الأمور ماشية زي الفل لحد النهاردة، مصممة أزياء الشركة وهي جاية تمضي العقد طلبت نص مليون جنيه زيادة وطبعا موافقتش فبكل وقاحة قدمت استقالتها وسابت الشركة. عرفت بعدها ان جالها عرض من المنافسين لينا في السوق زي ماكنت شاكك وعشان كدة كانت بتطلب بقلب جامد.
قالت نبيلة بدهشة: هم المصممين بياخدوا كل الفلوس دي؟
قال أدهم: وأكتر لإن مصممة أزياء اي دار أزياء بتبقي هي أساس نجاحهم بأفكارها وابداعها.
قالت منيرة: ولما انت كنت شاكك في انها جالها عرض من المنافسين مديتلهاش الفلوس اللي طلبتها ليه ياأدهم؟
قال خالد: أدهم معاه حق ياماما، مادام عملت كدة يبقي كان سهل قوي يشتروها وساعتها هياخدوا منها التصميمات وينزلوا زيها في السوق بسعر أرخص والمجموعة تخسر.
قالت منيرة: طب والحل؟
قال أدهم وهو يهز كتفيه: مفيش قدامنا غير التعاقد مع مصممة تانية بس نلاقي فين بسرعة مصممة موهوبة وتكون أمينة في نفس الوقت؟
موجودة.
التفت الجميع إلى صفية بينما هزت لها هند رأسها نهيا، فقطبوا جبينهم في حيرة ليقول خالد: هي مين دي ياآنسة صفية؟
المصممة اللي بتدوروا عليها. قدامكم أهي.
أشارت لهند التي احمر وجهها من تسلط النظرات عليها بينما تقول صفية: موهوبة جدا ومظنش هتلاقوا أأمن منها علي شغلكم.
قال خالد: الكلام ده بجد ياهند؟ بتعرفي تصممي أزياء؟
قالت نبيلة بفخر: بتعرف. دي أستاذة وياما قلتلها تفتح محل بس هي اللي مكانتش بترضي، دي حتى هي اللي صممت فستان فرح صفية ونفذته في يومين…
