رواية جاري سداد الدين بقلم دفنا عمر الجزء الثاني

الفصل الرابع ------------ آن آوان غمسك بين الضلوع وضي الأحداق.. فلن تعودي يا أمي ثانيًا فريسة الغيلان.. -------------- لا يعرف أحمد لما لم تأتي هند! ولكن لن يلومها، هي بالنهاية زوجة وأمرها ليس بيدها.. ربما عليه أن يُعد نفسه ليكون المسؤل الوحيد عن والدته.. لن يتركها بعد الآن .. ولن يؤذيها احدا وهو حيُ يرزق!! ذهب لبيته وراح يرتب غرفته الخاصة باهتمام شديد! فوجئت زوجته يمنى بما يفعل فتساألت: في أيه ياأحمد.. جيت بدري ليه وبتعمل أيه في الأوضة بتاعتنا مش فاهمة! أجاب دون أن يتوقف عن ما يفعل: بجهزها لأمي.. لأنها هتعيش معايا هنا بعد كده! هتفت مندهشة: تعيش معانا؟؟ مش فاهمة طب ليه ياأحمد وانا وانت هنام فين؟ مش شايف إنك لازم توضحلي الأمور شوية؟ ترك مايفعل وتوجه قُبالتها يطالعها بعزمٍ وقوة هاتفًا: أسمعي مني الكلمتين دول يابنت الناس.. والقرار ليكي بعد كده.. أمي هتعيش معايا هنا لحد اخر يوم في عمري مش هفرط فيها.. وانتي هتنامي في أوضة الولاد، وانا هبقي هنا معاها.. ولو خايفة تاخد من "أوتك" أنتي وعيالك، متخافيش ربنا يقدرني ما اقصرش ناحيتكم.. وامي ليها معاش الحمد لله بيكفي علاجها ولوازمها.. يعني محدش بيمن عليها بحاجة وعايشة في خير ابويا الله يرحمه.. وانتي ياتتحملي الوضع ده معايا وترضي، يا أما شوفي راحتك فين.. لكن امي خط أحمر يا يمنى ومش هتخلى عنها..! ألقى عليها ما لديه، ثم استأنف ترتيب الغرفة دون أن يتفوه بكلمة واحدة او يخبرها بشيء..! أما هي فظلت حائرة! ماذا حدث كي يأخذ قرار گ هذا.. البيت الضيق يكاد يساعهما بأولادهما الثلاث! كيف سيستقيم الحال! ولكن ماذا تفعل.. هل تلومه علي بره لأمه.. لا والله لن تحمل نفسها هذا الذنب العظيم.. حسنًا ستشاركه العبء! لن تتخلى عنه بظروفه الصعبة.. ولا تنكر أنه ازداد بنظرها قيمة وشأن.. الرجل الذي ينحني ظهره ليحمل أمه دون كلل.. هو خير سند لها ولأولادها بعد الله!!! شرعت بمساعدته فأوقفها هاتفا بحدة: من فضلك.. ماتعمليش حاجة، أنا اللي هعمل، وبعدين هروح اجيب أمي، مش عايز اي حد يكون له فضل عليها غير ولادها..! أشارت لصدرها بذهول: حتى أنا يا أحمد؟!!!! اجاب بحزم: أنتي أو غيرك! مافيش حد هيخدمها..! وانتهي من تنظيم غرفته وذهب ليُحضر والدته! ********************************** تعج المقهى بضوضاء وثرثرة من حوله، وصوت الشاب الصغير يصدح ملبيًا طلبات زبائنه بصوت مرتفع يكاد يصيبه بالصمم!! بينما هو جالس على إحدى مقاعدها المتهالكة بركنِ ما..! لم يؤرقه صخبهم كما يدميه صخب روحه وعقله الناهر لحكمه القاسي على زوجته.. لم يكن عليه التفوه بكلمة الفراق التي تهز عرش الرحمن.. أين أولاده من حسبته الأنانية تلك!!!! ولكن عاد صوت غضبه يسيطر على ضميره معللًا: وأنا فين حقي اللي أهملته؟ اشتهيت ألاقيها مستنياني ومشتقالي، نسيتني وبقيت أخر اهتمامتها.! _ مالك ياعصام؟ التفت لصديقه المقابل لمقعده وهو يرتشف من مشروبه بتروي!..ولأنه ليس من ذاك النوع الثرثار عن تفاصيل أموره الحياتية، أكتفى بتنهيدة عبرت عن ضيقه! وهتف: شوية مشاكل في البيت يا عادل! صمت منتظرًا منه إجابة أوضح، فلم يزد عصام حرفًا فهتف الأخر: يعني مش عايز تحكيلي مشكلتك" _ معلش ياعادل انت عارف مابحبش اتكلم في أموري الشخصية.. أهي مشاكل زي اي بيت!!! لم يجد عادل ما يقول سوى بعض العبارات المواسية والنصائح العامة عن مشاكل الحياة التي لابد من وجودها.. أما عصام فضاق صدره أكثر واستأذن بالذهاب، وراح يتجول، ولا يعرف أين تأخذه قدماه، وعقله شارد بما حدث متسائلا داخله، هل ستفعلها هند وتعصاه ويقع يمينه ويفترقا بتلك السهولة.. هل ستضحي به وبأولادهما وبيتها واستقرارها معه!! لا .. لن تفعلها .. لن تتركه!!!! ندت عنه تنهيدة مشبعة بمشاعر كثيرة.. غضب وضيق وندم وحزن وشوق.. يعترف أنه يحب زوجته التي أرتبط بها عن حب حقيقي بفترة الجامعة ولم يتمني غيرها أما لأولاده.. ولكن هو رجل يصيبه إهمالها بالفطور والغضب، لا يريد أن ينجذب لأخرى، يريدها أن تغنيه عن كل نساء العالم حوله.. ولكن هند تزيد إهمال لنفسها وله، فبات لقائهما الحميمي شيئا روتيني دون مشاعر منها .. أين اللهفة والحب بينهما..! نعم كان عنيف معها تلك المرة، ولم تكن رغبة فيها بقدر ما كان عقاب لها حتى تفيق.. ولكن خرج الأمر عن سيطرته وقذف يمين طلاقها وغادر..! يترنح بين لوم نفسه وغضب قلبه ولا يعرف ما يفعل! سيعود الآن! فإن وجدها لم تعصي كلمته وتغادر البيت سيعرف أنها مازالت باقية عليه وحكمت العقل بأمرهما.. أما إن غادرت، فلن يسامحها وستكون هي من خطت نهايتهما معًا ولن يلومه أحدًا بعد ذلك!!! ******************************* أمام بناية والدته! _ استناني هنا يا اسطى دقايق وهنزلك! سواق سيارة الأجرة: علي راحتك يا باشا.. مستنيك، ولو أي مساعدة انا في الخدمة يا هندزة! _ شكرا يا اسطى كتر خيرك!!! حرك مقبض الباب ليعبر داخل منزل والدته حتى يذهب بها إلي بيته، وما أن دخل غرفتها حتي بوغت بما رآى ولم يتوقعه! هند؟!!! هتف بأسمها متعجبًا من وجودها بهذا التوقيت! فقد ظنها لن تأتي! _أيه اللي جابك دلوقت؟ أنا قلت خلاص مش هتيجي وجوزك منعك!.. ثم حادت عيناه قليلا جوارها، فلمح حقيبة سفر صغيرة، فقطب جبينه هاتفا: ممكن افهم حصل معاكي أيه ياهند وخلاكي تيجي بشنطة هدومك؟ أجابت بهدوء عجيب وهي تمشط شعر والدتها بعد أن حممتها وابدلت ملابسها بأخرى نظيفة: أيه يا أحمد مش عايزني اجي لأمي ولا أيه؟ تحير من جمود وجهها ونظرتها الغريبة، ماذا حدث! فترجم حيرته بسؤال: أنتي اتخانقتي مع جوزك ياهند؟ ماكانش عايزك تيجي صح؟ طب جيتي ليه يابنت الناس؟!!!! جلست تحت قدمي والدتها ارضًا بعد أن صنعت لها ضفيرة جمعت بها خصلات شعرها الفضية القليلة، هاتفة بنظرة استجلبت بها ذكريات بعيدة: _فاكر يا أحمد لما أعمامي عرضوا يساعدوا أمي ماديا ويتكفلوا بينا بعد م*و*ت بابا وهي رفضت تمد ايدها وقالت إن محدش هيكسر عين ولادها بقرش، وبقيت تشتغل على مكنة خياطة مع معاش بابا عشان تكفي لوازمنا، وفاكر واحنا صغيرين لما بابا اتوفى وكانت في عز شبابها وفضل يجيلها عرسان أشكال والوان وهي رفضت علشاننا..! وفاكر لما رجلي اتكسرت وانا بلعب على سلم العمارة واتجبست واتمنعت من الحركة أسابيع! كانت ماما بتشيلني تدخلني الحمام وتحميني وتغيرلي وتسرحني، وفي نفس الوقت بتعمل شغل البيت وبتراعي باقي اخواتي! وفاكر لما انت جالك حُمى شديدة جدا وفضلت ماما أيام وليالي تنام تخاطيف وهي بتعملك كمادات مع العلاج لحد ما خفيت.. حاجات كتير أوي ماما عملتها لينا بس مش هقدر افتكرها كلها، وكبرنا ومحدش في الدنيا له فضل علينا بحاجة والناس لدلوقتي بتحلف بصلابتها وعزة نفسها..! نظرت لشقيقها فوجدت عيناه تنزف دموع بصمت وهو يتذكر معها ما قاسته امه العظيمة، كي تكفيهم شر الحاجة" واصلت هند: تفتكر أمي ماتستاهلش مننا تضحية مهما كانت كبيرة؟ ثم نهضت وعانقت والدتها الباكية بصمت من حديثها ابنتها.. وقد بدأ صوت هند بالأنهيار: كله يهون فداكي يا أمي.. كله رخيص تحت رجليكي .. وأخيرًا اطلقت العنان لكل مشاعرها المقهورة الحزينة التي تفجرت داخلها .. ولم تعد تقوى على الكتمان! ضمها أحمد إليه لتفرغ دموعها على صدره الصلب الذي سيظل حصنها الحامي حتى وإن تزوجت وأصبح لها رجلا يرعاها.. هي شقيقته القريبة لقلبه، ويتألم لحزنها الذي يتجلى بأقسى صوره عليها الآن .. يبدو أن الأمر ازداد سوء بينها وبين زوجها.. وهو لن يترك حياتها تفشل وتخسر بيتها واستقرارها..وهذا ما أشعل عزمه أكثر على التكفل وحده برعاية والدته! قبل رأسها هاتفا: كفاية ياهند عشان خاطري.. حصل أيه بس لده كله، ياستي لو على ماما ورعايتها، خلاص اطمني أتحلت، ومش هتقلقي عليها بعد كده وتفوقي لجوزك وعيالك! رمقته هند بحيرة: حل ايه يا أحمد؟! أجاب بابتسامة حقيقية وهو يجفف بقايا دموعها: أنا جاي اخد ماما لبيتي ياهند .. هتعيش معايا وأنا اللي هرعاها وانتي كل اما يكون عندك وقت استأذني جوزك وتعالي شوفيها براحتك.. يعني ياستي اترحمتي من المواصلات رايح جاي وانتي بتجري عشان تلحقي دورك معاها..! حاوطت والدتها بتملك هاتفة: مش هيحصل، مش هتاخد ماما عندك، أنا هفضل معاها مش همشي! قال بدهشة، وهو الذي ظن أنه يقدم حلًا لمشاكلها هي وزوجها: يعني أيه مش هتمشي ياهند، هتسيبي بيت جوزك وولادك وتفضلي هنا ازاي!! _ مبقاش جوزي خلاص! انتفض داخله واضيقت حدقتاه مرددا جملتها بذهول: مبقاش جوزك؟؟؟ هند حصل أيه فهميني؟! بطلي ألغاز في كلامك، لو كنتم اتخانقتوا ، بسيطة أنا هوديكي عنده وهو اما يعرف أن ماما هتعيش عندي خلاص هيهدى وهتتحل مشاكلكم!!!! نظرت له والقت مالديها دون تباطؤ: عصام طلقني يا أحمد!!! *************************** واقفا أمام باب منزله مترددًا، وكفه قابضًا على مفتاحه.. خائفًا إن عبر ولم يجدها..! هل ستتركه، ألن تتحمل حماقاته كما تفعل دومًا..! هل ستقابل قرار لم يقصد إصداره بقبول حكم فراقهما دون جدال.. أو عتاب.. أو غضب .. أي شيء يوصل لهدنة تقيه شر بعدها وفراقها عنه..! لا مفر ياعصام.. يجب أن تعبر لتتبين نتيجة تهورك! ادار مفتاحه وعبر! هدوء شديد يصبغ أجواء مسكنه! أين صخب أولاده وهم يتنازعون على ألعابهما. أين صوت اصطكاك جلي صحونها وهي تحضر العشاء.. وصوتها الصادح وهي تقول من بعيد حين تشعر بقدومه: "أنت جيت ياعصام! " _ ها أنا أتيت يا هند..أين أنتي إذًا..! هكذا أجاب صوت أفكاره! دارت عيناه بكل زوايا منزله الخالي..ذهب وتفقد أطفاله فوجدهما بغفوتهما غارقين.. أحكم عليهما الغطاء، وتوجه لغرفته فأدرك قرارها القاسي .. تركته الحمقاء! أشتعل بروحه شعور الغضب والنقمة عليها .. لما ضحت به بسهولة، لما لم تنتظر وتخاصمه وتمتنع عن محاكاته لكن تظل حوله وكان حتما سيراضيها بطريقة ما..! أشتدت ضمة قبضته حتى كادت اصابعه تتآذى!! وهتف لنفسه متوعدًا : حاضر ياهند.. أنا هعرف إزاي أعاقبك! *************************** _ إزاي يعمل كده المجنون ده .. يطلقك عشان سبب زي ده .. واضح أنه اتمرع وفاكر إن محدش هيقدر عليه، وانشغالي مع أمي نساه إني موجود!! بس أنا هعرف ازاي اربيه!! أنا هروح و...... . قاطعته بتوسل: أبوس إيدك ماتروحش ولا تتدخل بنا أرجوك.. أحنا هنحل أمورنا سوا، وأنا لو عصام جه دلوقتي يقولي ارجعي مش هرجع.. أنا تعبانة أوي يا احمد.. تعبانة ومضغوطة ونفسي ارتاح سبني شوية مع نفسي ، وماتحملش هم ماما، أنا خلاص معاها، روح لعيالك ومراتك وشغلك، وعدي في الوقت اللي يتيسر ليك!! وسيب كل حاجة للأيام.. يمكن اللي حصل بيني وبين عصام خير! ثم رمقت والدتها بحنان هاتفة: مش دي كلمة ماما لينا دايما.. في كل حاجة تحصل كانت تبتسم وتقول لعله خير! _ طيب والولاد يا هند! هتقدري تبعدي عن ولادك؟ إجابت بحزن: اطمن! عصام مايعرفش يشيل مسؤليتهم لوحده، وبعدين خليه يجرب يكون مكاني، يمكن وقتها بس يفهم ويقدر اللي كنت بعمله وهو بيستهين بيه!! أدرك ما ترمي إليه، ربما لديها كل الحق، زوجها گ رجال كثيرين لا يدركون قيمة ما تصنعه زوجاتهم ويستهينوا بما يفعلون.. ويبخسوا أهمية وقيمة دورهم في كل شيء.. هو اختبار يستحق ذاك الأحمق أن يقوده بمفرده تلك المرة.. فليصمد إن استطاع!! قاطعت شروده هند: _ بس ايه سبب قرارك المفاجيء إنك تاخد ماما عندك يا احمد؟ كنت دايما تقولي بيتك ضيق وظروفك ماتسمحش تاخدها هناك!! كيف يخبرها بسبب قراره.. هل يفضح عقوق شقيقتهما الكبرى؟! وكيف تبعث زوجات ابنائها لينوبوا عنها .. وأنه أكتشف سرقتهما لاغراض والدتهم! لا .. لن يخبرها عن تقصير فريال أو يهتك سترها أمام شقيقتها الصغرى! نفض عنه الشرود متمتما: راجعت نفسي وحسيت إن أمي المفروض تكون مسؤليتي لوحدي يا هند، انتي وعصام دايما في مشاكل، وادي النتيجة اللي خوفت منها..! وفريال وزنها تقيل وبردو مش صغيرة عشان تراعي والدتها، أنا اللي لازم أشيل أمي ومافرطش فيها.. وانا عند قراري، مجرد ما ينصلح حالك مع جوزك وترجعيله، هاخد أمي تعيش معايا..! ربتت هند على كتفه هاتفة بحنان : طول عمرك جدع وحنين وراجل يا أحمد .. عموما سيب كل حاجة لوقتها، أنا معاك وأيدي بإيدك.. هنراعي ماما سوا قد مانقدر! أحتواها بين ذراعيه، لتعلم أنه أيضًا معها ويدعمها فيما تفعل.. فمن يدري بما تحمله لنا المقادير.. لعله خير! ************************** تراقب والدة زوجها " فريال " وهي تحدث شقيقتها هاتفيًا باهتمام شديد.. وتتصنت بتركيز علها تلتقط أي كلمة توشي بأن يكون الخال أحمد كشف أمرها هي وعايدة أمام الجميع، وفضح سرقاتهما لأغراض الجدة فاطمة! ولكنها سمعتها تقول متعجبة: _ أنتي بتقولي أيه ياهند! هتعتني بماما من هنا ورايح؟! غريبة! طب وبيتك وولادك هتعملي فيهم أيه؟! هند بصوت حزين تسري ذبذبته عبر الهاتف: قولتلك يافريال أنا قاعدة شوية مع ماما، يعني ماتحمليش هم مجيتك. وقت ماتخلصي اللي وراكي ابقي عدي عليا وشوفيها، حبيت بس اعرفك! شعرت فريال أن شقيقتها ربما تعاني هم كبير ينضح من صوتها: مالك ياهند؟ حصل حاجة بينك أنتي وجوزك؟!! لا تريد حديثًا أو شكوى لغير الله ، فأجابت باقتضاب: مافيش .. أمور عادية ماتشغليش بالك.. يلا هسيبك. عشان جه وقت علاج ماما وفطارها..! أغلقت الهاتف بشرود، فهتفت رجاء متسائلة بخبث: مالك ياماما فريال، وشك مضايق من وقت ما اتكلمتي في التليفون، أنا سمعتك بتكلمي اختك، حصل حاجة؟ أجابت بعين غائمة: معرفش، بس هند هتفضل هي مع ماما وبتقول مافيش داعي إني أجي! فرحة أصابت قلب رجاء ، ولكن تداركت أمرها متمتمة بضيق مصطنع: ليه كده بس! ده أنا قلت هحضر نفسي عشان اروح أخد مكانك واعتني بجدتي فاطمة! فريال: خلاص مافيش داعي.! اعمليلي شاي يا رجاء حاسة دماغي مش مظبوطة! بلهفة كاذبة: يالهوي سلامتك يا أمي.. من عيني هعملك أحلى كوباية شاي!!! ................................. عايدة: أنتي بتتكلمي جد يابت يارجاء؟! يعني خلاص اترحمنا من تمريض الكركوبة أمهم وهناخد إفراج من تمريضها؟! أجابت: بقولك سمعاها بودني بتقولها في التليفون كده، وسألتها واتأكدت! بس صعبان عليا الحاجات اللي كنا بناخدها ونستفيد منها.. ده انا وفرت قرشين حلوين ودخلت جمعية وقربت اقبضها..! _ وأنا كمان دكنت مبلغ مش بطال من ورى جوزي، بس مش مهم كفاية هنفوق من خدمتها، هو أحنا كنا خدامين عندهم..كفاية بيوتنا وعيالنا علينا..! _ على رأيك يا عايدة.. اخيرا هنلاقي وقت وانزاحت مسؤليتها عننا..! ********************** _انت جننت .. طلقت مراتك ياعصام؟؟؟؟ _ هي السبب يا ماما، اهملتني واهملت البيت والولاد ومش بقيت الاقيها غير تعبانة أو نايمة .. نسيت إن ليها راجل محتاج مراته تهتم بيه وبطلباته! _ تقوم تطلقها ياعصام؟ ياخسارة تربيتي فيك! بتتخلى عنها في المحنة يا ابني! دي مسكينة، ملحقتش تفوق من حزنها على اختها اللي ماتت، وحصل اللي حصل لأمها ومابقيتش بتعرف حتى تقضي حاجتها زي البشر!! ليه كده ياعصام.. ليه تخرب بيتك بأيدك يابني ليه؟!!! _ وانتي ليه بتدافعي عنها وانا ذنبي أيه في كل ده.. انا ماقولتش ماتروحش بس الضغط كله عليها، اختها فريال بتستعبط وتتمارض .. وكتير هي بتاخد يومها وانا زهقت يا امي عايز ادخل الاقيها مستنياني زي زمان.. عايز احس انها موجودة مش الفراغ اللي انا حاسس بيه ده! _ طب دلوقتي هتعمل أيه هتسيبها من غير ماتحاول تصلح اللي عملته؟ _ معرفش يا أمي، أنا مصدوم، كان لازم ماتنزلش من البيت وتكسر كلامي، لكن دي كأنها ماصدقت انطقها واخدت بعضها ونزلت وباعتني! نظرت له وهي تهز رأسها ضيقا، وهتفت: طب هتعمل أيه مع ولادك محمد وحنان؟! دول لسه صغيرين ومحتاجين امهم تراعيهم، كان لازم تفكر فيهم قبل ما تتهور بالشكل ده! تمتم بحنق: وهي ليه مافكرتش فيهم قبل ما تكسر كلامي وتسيب البيت؟! _ أنت الراجل والقرار في ايدك، كان لازم تتحكم في لسانك وماتقولش كلمة تهدم بيها بيتك يا ابني! نهايته اللي حصل حصل .. يمكن تكونوا محتاجين البعد شوية وكل واحد فيكم يعيد حساباته من تاني!! *********************** _عملتلك عشا خفيف وكوباية لبن.. أنت ما أكلتش حاجة طول اليوم يا أحمد! " _ ماليش نفس يا يمنى! أحتوت كفه بيديها هاتفة: فهمني بس حصل أيه معاك وليه ماجبتش والدتك زي ما قلت، فضفض وماتكتمش جواك يا أحمد أنا مراتك وأكتر واحدة هتخفف عنك بس أشركني في همك! ثم اغرورقت عيناها: ما تبعدنيش كده كأني غريبة عنك أنا معملتش حاجة تزعلك ومش قادرة اشوفك مهموم وحتى مش عارفة السبب!! لم يحتمل بكائها، فضمها إليه وأراح رأسه على كتفيها مربتًا على ظهرها دون حديث، فبادلته العناق بصمت لتعطيه هو مبادرة المصارحة بما يخفيه، فغمغم بصوت خفيض: سامحيني يا يمنى عشان اتعصبت عليكي قبل ما اخرج! ابتسمت بحنان وهي تداعب خصلات شعره : ولا يهمك، لو أنا مش هتحملك وقت ضيقك مين يتحملك! صمت مرة أخرى ثم تفوه قائلا: حاسس إني قصرت مع أمي يا يمنى.. كان لازم تفضل قصاد عيني و اراعيها أكتر من كده! وما اسمحش بحد يأذيها ابدًا فتسائلت: ومين أذاها يا أحمد؟ كلكم بتراعوها، أنت وهند وفريال..! لم يتفوه بشيء، ولن يفعل! ماذا يقول وكيف؟!! سيصبر حتى تعود هند لبيتها وينفذ قراره! والدته ستحيا في كنفه هو ولن يتركها لأحد.. ولولا رفض هند لمجيئها لبيته وإصرارها على المكوث معها ورعايتها هناك.. ما كان تركها.. ولكن ربما لم يحين الوقت بعد!! ************************ رواية جاري سداد الدين بقلم دفنا عمر الفصل الخامس ------------- كفاني منكَ تهكمًا وبخس لقيمتي وما أفعل. ها هم صغارك فليعلموا من بيننا فقير العطاء. ومن ستُنقش على محياه هزيمةً سوداء.. _______________ رنين مزعج شق سكون غرفته، فتململ بعبوس ومازالت أجفانه منغلقة فوق عيناه! يتحسس هاتفه بالجوار، ليوقف رنينه، عائدًا بكمل نومه الذي آتاه بصعوبة ليلة أمس، حين عاد ولم يجد زوجته هند في المنزل!! تكرر رنين الهاتف، فانتفض فجأة متذكرًا موعد ذهاب أولاده للمدرسة، فهب هاتفًا لنفسه: الولاد هتتأخر والأتوبيس خلاص جاي! أسرع ليغتسل سريعا، ثم ذهب لصغيريه يوقظهما : يلا يامحمد قوم يابطل فوق واتشطف عشان تروح مدرستك.. وانتي يا نونة قومي حبيبة بابا عشان باص المدرسة خلاص قرب يوصل.. فوقو ياولاد على ما اعملكم الفطار والسندويتسات! هتفت حنان: صباح الخير يا بابا، هو فين ماما ؟ فتبعها أخيها: ماما لسه مش جت من عند تيتة؟ حزن غزى روحه عندما تذكر ما حدث، وأنها ماعادت معهم! كيف سيتعامل مع أولاده فيما بعد؟ نفض عنه شروده، متمتما بابتسامة كاذبة: معلش ياحبايبي أنتوا عارفين تيتة تعبانة، وماما هتقعد معاها كام يوم لحد ماتخف شوية، وانا قلتلها إن محمد بقي راجل كبير وشاطر وحنان عسولة ومش هيتعبو بابا.. صح؟ هتف محمد ببراءة: أيوة أنا كبرت، بقى عندي تسع سنين ودول كتير أوي يا بابا..! ضحك عصام: هما دول كتير؟! ده أنا عايش بقالي كتير بقى على كده .. ثم قبل رأسه هاتفا: ربنا يباركلي فيك، وطبعا بطلي بقى راجل زي العسل .. يلا بقي أنت واختك روحوا اتشطفوا على ما احضرلكم الفطار. واللبن! هتفا سويا: حاضر يا بابا.. ثم هتف محمد لشقيقته: يلا يانونة أعملي زي ما ماما علمتك، تغسلي أسنانك وتتشطفي كويس وتلبسي الهدوم لوحدك..! حنان : أيوة بس ماما هيا اللي بتعرف تعملي ضفيرة حلوة في شعري.. هتعرف تعملهالي يابابا؟؟؟ لم يجربها يومًا.. كيف سيصنع للصغيرة چديلة مثل ما تفعل هند؟! يبدو أن الأختبارات ستتوالى عليه ولا يعرف فيما سيخفق بصنعه وما سيُصيب به..! أجاب الصغيرة: حاضر ياحبيبتي هعملك ضفيرة حلوة بس روحي الأول أعملي زي ما قالك محمد على ما أعمل أنا الفطار وسندوتشات المدرسة! واقفًا يتملكه الحيرة! بماذا يبدأ أولا ؟! هل يسلق البيض أم يسخن الخبز أم يعد مشروب اللبن الدافيء أم يجلي بعض الأكواب والصحون المتسخة التي سيحتاجها وهو يحضر فطور صغاره؟؟ لمحت عيناه مؤشر التوقيت فأدرك أن الوقت داهمه وهو حائرا فيما يبدأ.. وبالفعل وضع طنجرة صغيرة ليسلق البيض ثم أخرج الخبز ووضعه بالمايكرويف، وراح يحضر من الثلاجة بعض الجبن الذي يفضله محمد والمربى التي تعشقها حنان، ثم أخذ جولة رتب بها سريعا سفرتهم الصغيرة حتى يجد مساحة يضع بها أطباق الإفطار.. وما أن أنتهى حتى راح يحشو لهم أرغفة الخبر الأبيض الذي كاد أن يحترق لولا إنقاذه من حرارة الميكرويف.. والذي تزامن مع فوران الحليب فوق الموقد حين غفل عنه أثناء ترتيب السفرة المزدحمة ببقايا عشاء أمس!! أخيرًا أنتهت مهمته الأولى والشاقة من إعداد الإفطار، وتناوله مع صغيريه، وحان موعد اختباره الأصعب بصنع چديلة الصغيرة.. وإن خيروه بين إدارة شركة بكامل موظفيها ومهامها وبين صنع چديلة! سيفضل الخيار الأول..!" الوقت يمضي والفشل يصاحبه بهندمة خصلات الصغيرة التي تذمرت قائلة: _معقولة يا بابا مش عارف تضفرلي شعري زي ماما؟! فأجاب: عمري ما عملتها يا حنان.. بس أوعدك اتعلمها.. وعشان خاطر بابا هعملك شعرك ديل حصان انهاردة على ما اتعلم اعملهالك!! صدح صوت قدوم الباص المدرسي، فأسرع بتوصيلهما، ثم عاد يلتقط أنفاسه وكأنه عائدا من مباراة.. وحان وقت غسل صحون الإفطار وترتيب غرفة الصغار وغرفته بالطبع وتحضير ملابسه، وقبل كل هذا يجب أن يأخذ حماما دافئا حتى يهدأ توتره قليلا..ويذهب لعمله الذي تأخر عليه بالفعل!! ************************** _ ازيك يافريال عاملة أيه؟ تعالي خدي نفسك الأول من السلالم!! _اه والله ياهند خلاص نفسي اتقطع، معرفش ليه بقيت بتعب من أقل مجهود وبحس نفسي بيروح! هند بشفقة: معلش حبيبتي أدخلي لماما أطمني عليها وارتاحي جمبها وأنا هعملك حاجة تشربيها واجي! بعد برهة قصيرة عادت هند تحمل كوبين من عصير الليمون، وقدمت إحداهما لشقيقتها، ولاحظت أن والدتها تنظر بعيدا وكأنها لا تريد إبصار فريال فقالت: إيه ياحاجة فاطمة ماوحشتكيش فريال ولا أيه، دي بقالها كام يوم ماشافتكيش من وقت ما أنا جيت! لم يختلف حال فريال كثيرًا عن والدتها، هي الأخرى! تجنبت النظر إليها وكأن يُخجلها شيئًا ما، فهتفت هند: مالك انتي كمان يافريال، هو في حاجة؟ ليه قاعدة بعيد كده عن ماما.. ؟! هتفت بارتباك: لالا ابدا .. ابدا ياهند، انا قلت اريح في اقرب مكان وبعدين هقوم معاكي نحمي ماما ونغيرلها..! هند متذكرة شيئًا: فكرتيني صحيح، صابون ماما المعقم خلص، لازم أنزل أجيب غيره مع لوازم كده بسيطة وهاجي، خليكي أنتي مع ماما على ما ارجع، ومش هتأخر..! .................. ذهبت هند، فاقتربت فريال من والدتها وأمسكت كفها فأصدرت الأم همهمة غاضبة وارتعشت يدها معلنة رفضها لذاك القرب، فتركت فريال كفها وهتفت: أنتي زعلانة مني ياماما؟ عشان ماكنتش باجي؟ طب ما انا كنت ببعتلك رجاء وعايدة يراعوكي بدالي، انا كبرت وبقيت اتعب ومش هقدر اراعيكي زي هند واحمد!! ظلت الأم ترمقها بعداء وكأن مبررات فريال زادتها غضبًا ترجمته بهمهمة أخرى وهي تشيح بوجهها المستاء!! فتمتمت فريال: _ عندك حق .. حتى لو مش هقدر اخدمك كان المفروض أجي مع رجاء او عايدة واقعد معاكوا.. بس غصب عني أنا مابتحملش اشيل هم حد وخُلقي بيضيق، يمكن أكون أنانية بس أنا كده أعمل أيه، ومادام كنت ببعتلك اللي يخدمك بدالي زعلانة ليه؟ هما قصروا في طلباتك؟ دول بنات أصول وأكيد عاملوكي زي جددتهم واحسن!!! ابتسامة ساخرة حُفرت معالمها على وجه الأم! ألا تدري تلك الجاحدة أنها تركتها محاطة بعقربتين؟! تركتها تتجرع سموم قسوتهما في كل مرة وهي تشاهد أفعالهما وسرقاتهما لأشيائها دون قدرة على البوح أو الاعتراض، تركتها تعاني إهمالهما وسوء رعايتهما لها..! تتحدث وكأنها لم تفعل شيء! ليتها لم تأتي أو تتحدث! _ أنا جيت يافريال.. أتأخرت عليكم! _ لا ياهند ما اتأخرتيش! _ طب يلا بقى نحمي ماما بدري ونعمل الغدا عشان أحمد هايجي يتغدى معانا..! توترت هاتفة: معلش ياهند أنا هحمي ماما معاكي ونغيرلها وانزل أتغدا مع الولاد.. اصلهم هيعدوا عليا كل واحد بمراته وعياله.. بكرة هجيلك واقضي اليوم كله معاكي! هند بعتاب: كده يافريال! عايزة تمشي بسرعة وماتستنيش اخوكي.. دي حتى فرصة تتصافوا سوا، خصامكم طول يافريال والدنيا مش مستاهلة.. خليكي عشان. خاطري، وأحمد حنين أول ماهيشوفك هيفرح وهيكلمك هو.. ها قلت أيه؟؟؟ ترددت فريال.. هي تعلم أنه سيكون حتمًا غاضب لعلمه بمجيء رجاء بالمرة السابقة، وسيعنفها وهي لن تتحمل أو تنتظر أحتكاك يثمر مزيد من الجفاء بينهما، الأفضل أن تغادر قبل قدومه!! فهتفت بإصرار: معلش ياهند، مرة تاني والأيام. جاية كتير .. يلا عشان احمي ماما معاكي قبل ما أنزل!!! وغادرتها دون إنتظار، تاركة إياها تتسائل داخلها عن سبب الفجوة التي لا تزيدها الأيام إلا اتساعًا بين أحمد والأخت الكبرى! تنهدت وتمنت داخلها بصلاح الأمور!! *************** عادل: مش عوايدك تيجي متأخر ياعصام، ومالك جاي كده مش مصرح شعرك ومبهدل على غير العادة؟! أجابه بعبوس: مافيش وسبني في حالي الله يكرمك يا عادل، أنا مش عايز اتكلم! فهتف الأخير: الحق عليا، مش عاجبني حالك وعايز اطمن عليك ثم هتف مبدلًا الحديث: عليك. كام حصة أنهاردة؟! عصام بضجر: الجدول متروس انهاردة ومافيش حصة فاضية عندي! _ما أنا زيك، عندي حصص كتير، ودروس لأخر اليوم..! عصام: بس أنا بفكر اعتذر عن أخر كام حصة والغي الدروس! عادل بتساؤل: تعتذر؟ غريبة، عمرك ما سبت حصة أو درس ودايما كنت نشيط، أنت تعبان ياعصام؟؟؟؟ بادله نظرة صامتة دون إجابة.. فليت العله بجسده لكان أهون بكثير من ألم ينخر روحه نخرًا .. هناك عطب داخله ولا يعلم كيف الشفاء.. هل يتخلى عن غروره ويذهب ليعيدها؟ هل يغفر لها عصيانه؟! هل يقول لها فشلت بصنع ابسط الأشياء التي كنتِ تفعليها يوميًا بمنتهى السلاسة وبابتسامة راضية تزين شفتيكِ .. أم يخبرها أنه أشتاق لها؟؟؟ حقًا ي*ق*ت*له الشوق إليها، ولدفء وجودها حوله! _ هيييييي.. عصاااام بكلمك رد عليا، هتأجل كل الدروس ولا درس واحد؟! _ كل الدروس ياعادل، هخلص المدرسة وارجع البيت! _ خلاص يبقى هشوفك بالليل على القهوة! _ معتقدش هاجي، معلش سبني مع نفسي اليومين. دول ياعادل!!!!!! رمقه بتعجب! حاله الذي لا يسر منذ فترة! ويعلم أنه لن يتحدث بشيء! فليس من عادات صديقه الثرثرة بمشاكله الخاصة، حسنًا سينتظر حين يقرر هو البوح! ************************* _سرحانة في أيه ياهند؟! _ ابدا يا أحمد مافيش حاجة! أحاطها بذراعه متمتما : تحبي أروح اجيبلك الولاد منه .. أنا لحد دلوقتي ما ادخلتش عشان ده طلبك، بس أوعي ياهند تفتكري لحظة إنك لوحدك او مكسورة، أنا جمبك وأي حاجة عايزاها هعملها..! دفنت وجهها بصدره وذرفت دموعها بلوعة شوق لصغارها ولبيتها.. ولكن لا مفر من فراقهما، فأحيانًا نحتاج اتخاذ مواقف مؤلمة علها تداوي جروحًا وتخفف أوجاعًا وترمم أرواحًا تآكلت وخبأ رونقها..علها تحافط على بقايا عشقها القديم لزوجها.. فلو ضلت معه وتحملت أكثر ..لكانت بغضته وأنمحي داخلها كل حبه الذي لم يغادر حنايا قلبها لتلك اللحظة!! ولكن حين يقارن بعشقها الفطري لمن حملتها وهنًا على وهن.. يتضائل أي حب أمامها..! أحمد مطمئنًا: هند.. لو فاكره إني هروح اتخانق معاه تبقي غلطانة..صحيح انا مضايق منه وعايز اخنقه بأيدي عشان زعلك، بس لعيونك انتي والأولاد هكون هادي لدرجة البرود، وهحل المشكلة وارجعك معززة مكرمة بعد ما اخليه يعتذر ويراضيكي! كفكفت دموعها هاتفة: صدقني يا احمد أنا وعصام محتاجين البعد ده شوية عشان نحافظ على اللي باقي بنا.. عشان هو يفهم انا شايلة عنه أيه وبعمل أيه كل يوم وكل ساعة، ويجرب بنفسه المسؤلية اللي كان بيستهون بيها طول الوقت، وده من أسباب حزني منه .. عصام مش هيحس بيا إلا أما يكون في مكاني، وإن كان على الولاد فعلى عيني فراقهم والله، بس ده لمصلحتهم بعدين.. ماتحملش أنت همي، أهم حاجة ناخد بالنا من ماما ومانقصرش معاها.. وربنا يصلح الحال ويزيل الغمة إن شاء الله!!! *************************** عاد عصام عقب انقضاء عمله سريعًا، ليبدأ علي الفور بإعداد وليمة غداء مناسبة. لصغاره، بعد أن تحير كثيرًا فيما يفعل واستقر أخيرًا على صنع لحم مسلوق وبجانبه صينية بطاطس "أورنج" كما تسميها ابنته حنان..! "" بنتك عندها عمى ألوان ياعصام! "" ابتسم عندما لاح من عمق ذاكرته صوت هند الناعم وهي تسخر من إصرار صغيرتهما، أن البطاطس المطبوخة لونها برتقالي وليس أحمر!! صدح صوت الساعة المعلقة بحائط المطبخ، وعلم أنه لم يتبقى سوى القليل ويصلوا الصغار!! فأسرع بصنع الغداء ليكون جاهزًا عند قدومهما..! ........................ أثناء الغداء..! محمد: المستر سألنا سؤال في الحصة ومحدش عرفه بس أنا جاوبته يابابا وهو خلى كل زمايلي يصقفولي! حنان: وانا كراسة الرسم بتاعتي خلصت وعايزة غيرها وكمان ألون جديدة!! محمد: أيوة صح، المسطرة اتكسرت يابابا وعايز غيرها..! حنان: أنا اتخانقت مع سوسو صاحبتي عشان اتريقت على شعري لأنه كان منكوش وخاصمتها..! محمد: البنت دي وحشة يا نونة ماتكلميهاش تاني مادام اتريقت عليكي! صداع رهيب يكاد يشق رأسه نصفين وهو جالس بينهما يسمع ثرثرتهما التي لم تنقطع منذ قدومهما، عدم نومه أمس كما يجب وإرقاق عقله من التفكير ومجهوده بإعداد طعام لهما، جعله حقًا عاجز عن تحمل أي شيء أخر!!! گأنه أصبح آلة معطلة!!! محمد: بابا..حضرتك هتذاكرلي العربي زي ماما صح؟ أصلي ضعيف في النحو بس ماما بتعرف تفهمني! حنان: وأنا عايزك تذاكرلي الأنجليزي بتاع انهاردة يابابا .. وتساعدني في موضوع الرسم لأنه صعب.! أغمض عينه وأمسك جانبي رأسه بقوة عله يُخرس طرقات الألم التي تنغزه دون رحمة.. فلا مجال للراحة التي تمناها بعد الغداء.. يجب ألا يقصر مع صغاره، سيفعل ما كانت تفعله هند!! ويتمني النجاح! "" أنتي محسساني إنك ماسكة شئون دولة عظمى، ده حتة بيت وطفلين ياهانم، تعبانة في أيه بلاش دلع ستات!!! "" هاجمته ذكرى أخرى من ذكرياته الراكده بقاع عقله الباطن وهو يستجلب سخرية كلماته اللاذعة لزوجته وهو يقلل مما تفعله له ولصغاره!! شعوره بالحماقة والغباء الآن يكاد ي*ق*ت*له خجلًا من نفسه! _ حاضر يامحمد هذاكر معاك العربي، وبعدها هذاكر مع أختك الأنجليزي، واساعدها في الرسم!! وبدأ بأختبار جديد مع أطفاله، وبكل لحظة يزداد حنقًا وضيقًا من نفسه، كيف استهان بما تفعله هند بمفردها كل يوم! أما هو نفسه فقصة أخرى، فلم يذكر بعد عبئه هو وطلباته التي لا تنتهي منها.. وبعد كل تلك المعارك التي تقودها، يطلب منها الأهتمام والتزين والتصرف وكأنها لا تعاني من شيء!! تُري! هل نعت نفسه بضميره ثانيًا أم. تلك المرة الأولى التي يسُبُ فيها ذاته بأفظع اللعنات؟! ------------------------------ في منزل الأم فاطمة! _ عاملة أيه ياحجوجة.. طبعا البت هند واجعة دماغك طول اليوم رغي رغي صح .. ما أنا عارفها..! هند بضيق مصطنع: أنا رغاية يا ميدو.. ماشي! عقابًا ليك مش هتدوق الكنافة اللي عملتهالك مخصوص! أحمد بمزاح: يا بنتي أنا اصلا هاخد الصينية كلها وانا ماشي ليا أنا ويمنى والعيال! ضحكت هاتفة: بالهنا على قلوبكم ياحبيبي! أحمد مقبلا كف والدته: هروح اصلي المغرب واجيلك ياطمطم ثم غمز بعينه : ومش هتاكلي غير من أيد ميدو أنهاردة..! أبتسمت الأم برضا وفرحة شديدة.. فما عادت تقاسي مثل السابق بعد مكوث هند معها ومجيء أحمد يوميًا لرؤيتها.. ورغم قلقها على ابنتها وشعورها بأزمة تعصف باستقرارها، إلا أنها تطمئن لوجود أخيها.. فلن يسمح أحمد بفشل زواجها.. هي أكيدة من حكمته! انتفضت من شرودها على تساؤل أحمد بحاجبين مقطوبين: فين الخاتم بتاعك يا ماما؟؟؟؟؟ ------------------------------- جاري سداد الدين بقلم دفنا عمر الفصل السادس ------------ ما أقصى الحقائق حين يتساقط عنها رداء الكذب.. فتجد الدمع مجرد لمعة خبيثة في عين أدمنت المراوغة و الخداع.. ---------------- فين الخاتم بتاعك ياماما؟؟؟؟ راحت الأم تطالعه، والغضب يلوح بانعقاد حاجبيها ونظرتها القاسية محاولة إخباره بما لديها.. ولكن كيف والعجز يحجم صوتها الغير مسموع، همهمت فقط بحروف مبعثرة على أطراف شفتيها..! فنظر لشقيقته ينتظر منها توضيحًا، فهتفت هند: أنا كمان لاحظت اختفاء الخاتم ودورت عليه في كل مكان ممكن يكون وقع فيه، بس مالقيتش حاجة، فخمنت أنه يكون اتزحلق من ايدها وأحنا بنحميها مثلا ومحدش شافه! ده تفسيري الوحيد يا أحمد!! عاد بنظره لوالدته فكذبت عيناها تخمين هند البريئة، التي لا تدري ما يحدث، ولكن هو يعلم أين خاتمها ومن سارقه!! اندفع مغادرًا، وصوت هند خلفه يصدح بفزع: _ رايح فين يا أحمد فهمني حصل أيه.. أحمد، أحمد!! لم يجيب، وقدماه تقوده سريعًا إليها... فريال! نعم يعلم أنها لم تسرق، ولكن هي من أمنت دخول السارقات بكل يُسر، ليعبثوا بأشياء والدته دون رقيب.. وسيكون العقاب شديد لجميعهم! ************************ محمد: بابا لبس المدرسة بتاعي أنا وحنان كله مش نضيف.. ماما كانت بتغيرلنا اليونيفورم كل 3 أيام..! حنان: والشرابات كلها بقيت وحشة.. مش هينفع نروح المدرسة كده، سوسو بتتريق كل يوم عليا، مرة شعري المنكوش، ومره هدومي المكسرة محمد: أمتى ماما راجعة من عند تيتة يا بابا.. وحشتنا اوي.. وكمان هي اللي بتعرف تعملنا كل حاجة نفذت طاقة احتماله.. لم يعد قادرًا على تلبية طلباتهما التي لا تنتهي! خارت قواه، وأصبح مثلهما تمامًا مهمل غير مهندم وضاعت اناقته التي كانت تحتل الكثير من اهتماماته.. كما تبخر تركيزه الكامل بعمله، وهو الذي كان يتشدق مع اقرانه، أن المشاكل الشخصية، لا مجال لها بالعمل..! تنهد داخله بنفاذ صبر! فأصبح لا حيلة له..في استخدام تلك الآلة الأوتوماتيكية المعقدة التي يجهلها ولم يجربها يومًا..! أجاب الصغار: حاضر.. أنهاردة هرجع من شغلي بدري يا ولاد واغسل الهدوم كلها وبعدين هكويها..! ................. انقضى يوم عمله وعاد لمنزله ليقوم بغسل ملابسه هو واطفاله.. فوضع الكثير من الثياب دون مراعاة لفصل ألوانهما، فلا يجوز خلط سروال أسود مع قميص 👕 شديد البياض!!! لم ينتبه لجهله بتلك النقطة وبدأ تشغيل آلة الغسيل، ولم يدرك أنه قام بالضغط على الذر المخصص لتدفق المياة الساخنة، والتي لا تصلح سوى لملابسهم البيضاء، وتعد ج*ر*ي*مة لا تغتفر بحق قطع الملابس الملونة!!!! وحانت لحظة اكتشاف نتيجة جهله بإدارة آلة غسيل أوتوماتيكية.. فما أن ابصر الملابس حتى ادرك ج*ر*ي*م*ته! فلم يعد الأبيض بلونه الناصع.. ولم تعد الألون بنفس زهوتها.. بل ازدادت بهتان وربما قبحًا..! ما العمل أذًا ؟؟؟ لقد أفسد الملابس بشكل يُخجله أنه يريها لصغاره! وربما يحتاج شراء جديدة بدلًا منها..! قذف القطع أرضًا بغضب وقد فاض كيله من ذاك الحمل الذي اعترف أخيرًا أنه كبير عليه.. وقرر شيئًا ربما هو الحل الأمثل والوحيد الآن!!! ********************** تُصدر الأم فاطمة همهمة وتحاول قول شيء لأبنتها هند ولكن عاجزة عن التفوه بحرف، فلم تجد سوى منحها ابتسامة راضية مشجعة، وكأنها تواسيها.. هي حقًا قعيدة وتعجز عن النطق، ولكن قلبها وعقلها مازالو گ ردار يشعر بصغاره..! أما هند فترجمت جيدًا إشارات الأم ولكن راوغتها وهتفت بمرح مصطنع: إيه ياطمطم إنتي زهقتي مني عشان قاعدة معاكي كام يوم؟! أنا مصدقت ارتاح من زن عصام ومسؤلية عياله شوية، ويومين وهرجع ماتقلقيش عصام سمحلي بكدة يعني مافيش حاجة تقلق ياجميل.. ويلا بقى ياست الكل عشان اغديكي وتاخدي علاجك! شق الأجواء رنين الباب المتواصل، فهبت تتبين الطارق سريعًا وما أن فعلت حتى اندفع صغارها محمد وحنان يعانقانها بلهفة هاتفين: _وحشتينا يا ماما..كده سبتينا كل ده لوحدنا..! فبادلتهم عناق شديد الدفء والفرحة واللهفة، فكم اشتاقت وتمنت رؤيتهما.. ولم تنتبه بعد لعصام الواقف يطالعها بشوق، رغم أنه أتى من شدة حنقه وغضبه عليها وطوال الطريق يتخيل كيف سيلقي على مسامعها كلامه اللاذع! ولكن ما أن طالعها وابصر هزلان جسدها ونحوله، والسواد الذي استدار حول عيناها وشحوب وجهها.. حتى أشفق عليها ونغزه قلبه لأجلها.. هي أيضًا تعاني البعد مثله.. هو أكيد مما يحمله قلبها له، ولصغارهما بالطبع..! تنحنح لتلتفت له، وما أن فعلت حتى تلقت حزن مقلتيه القاتمة، فمنحته نظرة يمتزج بها العتاب والحزن، سطرتهم عيناها المنطفيء وهجها..! قاطع اتصال عيناهما القصير هتاف الصغير: تعالي يا نونة نروح نسلم على تيتة ونطمن عليها..! ذهبوا تاركين لهما المجال للحديث، الذي بادر به عصام: ممكن نتكلم شوية؟؟؟ أشارت له بالدخول دون النظر إليه أو التفوه بشيء! وقادته گ الضيف لحجرة أستقبال الأغراب، ولأنه مدرك تفاصيل المنزل وأين تقع الغرف، باغتها بجذبها عنوة لإحدى الغرف الجانبية واقحمها للداخل مغلقًا الباب خلفه صادمًا إياها بالجدار! باسطًا كفيه حولها گ حصار..! وهي مجرد معتقلة بين ذراعيه! فصعقت من تصرفه وجرآته وخافت من تهوره گلقائهما الأخير! فدفعته بعيدًا هاتفة بغضب تأجج بعيناها: أنت شكلك اتجننت وفقدت عقلك ياعصام.. لا المكان مناسب ولا حتى الظروف بقيت تسمح بأي حاجة بيني وبينك، حتى وقفتنا دي بقيت سرقة مش من حقك ولا هسمح بيها، ولو مش هتقول اللي جاي عشانه بإحترام وأدب.. يبقى اتفضل من غير مطرود! دارت عيناه بمعالم جسدها وجهها بشوق لم يخفيه مطلقًا هاتفا برفق: ليه وزنك نزل كده، انتي مش بتاكلي؟ اتسعت عيناها مذهولة! هل يسأل عن سوء حالتها وگأنه ليس بطرف فيها.. أيجهل الأسباب حقًا؟!.. إستفزها سؤاله فهتفت بتهكم شديد: لا ابدا ولا حاجة .. أنا بس جوزي عاملني بمنتهى الإهانة واتمنعت ازور أمي المريضة.! وفي الأخر اتهددت بالطلاق لو نزلت.. حاجات عبيطة ماتستحقش الزعل .. مش كده ياعصام؟؟؟؟ أجاب بغضب عصف بهدوءه السابق: ما كانش لازم تنزلي وتكسري كلامي ياهند.. لو كنت رجعت ولقيتك كنا هنتفادى وقوع يمين الطلاق اللي ما اقصدتش أقوله! من إمتى وأنتي بتعانديني وتتحديني كده؟! للدرجة دي مابقيتش مهم عندك أنا وولادك؟؟ قدرتي تسيبينا لوحدنا ياهند!! قدرتي؟!!! سالت دموعها الصامتة بغزارة وهو يعاتبها، متجاهلًا ما تعانيه.. فمازال م*و*ت شقيقتها الذي لم يمضي عليه العام، يأكل روحها ألمًا.. ويتجدد بأقسى صوره كلما رأت والدتها بحالتها العاجزة، أين دعمه الذي انتظرته.. كم تمنت أن يعطيها القوة بمؤازرته لها..! يريدها ببساطة أن تتقمص سعادة لا تملكها وترسم ابتسامة بخطوط كاذبة لم تتقنها بعد! أمتدت أصابعه تطارد سيل دموعها لتزيحها عن بشرتها الملساء بحنان، ثم أحاط وجهها براحتيه هاتفا: _ أنا بعترف إني ماشاركتش في حزنك زي ما اتمنيتي، لأني مابتحملش أعيش في بؤس، كنت دايما عايزك تبعدي كل مشاعرك السلبية عن حياتنا وتستقبليني بإبتسامة زي ما قلتي، أهتمي بأهلك ماشي، بس حسسيني بحبك ولهفتك عليا.. ! وبإهتمامك لأنه شيء أساسي عند أي راجل وطبيعة فيه.. ليه تخليني أسأل نفسي إنتي بتحبيني ولا لأ؟؟ ليه تضطريني احطك في اختبار بيني وبين نزولك من غير إذني.. لو كنتِ اختارتيني ياهند! كنت أنا اللي هوصلك بنفسي.. بس انتي خذلتيني وبعتيني، ما اهتمتيش حتى بولادك اللي سبتيهم! لو أنا أناني في نظرك ..فأنتي كمان أنانية في حبك لأهلك وفضلتيهم لأخر لحظة عليا.. وخذلتي الطفل اللي جوايا اللي راهن أنك مش هتقدري تبعدي عنه! وإن كنت أخر مرة عاملتك بعنف، فده كان مجرد تعبير عن حاجة تعباني، الراجل غير الست في كل حاجة، أنتي ممكن تبكي بسهولة وتفرغي اللي جواكي بشوية. دموع، لكن أنا هختلف.. ليه مابقتيش تفهميني؟! لم يزيدها عتابه سوى حزن وبكاء شديد جعل رأسها ينحني أمامه، فتلقاها على كتفه، وضمها إليه وربت على ظهرها برفق متمتمًا: _ أنا هسيبك ياهند لحد ما ترتاحي والثورة اللي جواكي تهدى.. ثم رفع وجهها بأنامله هاتفًا بحب : _ وبخصوص الطلاق، فأنا رديتك تاني بعد ما اتكلمت مع شيخ وقلتله إني ماكانش في نيتي أطلقك! ثم استطرد وحدقتاه تلتمع بعزم: وخليكي عارفة لحد ما أم*و*ت واندفن بقبري .. هتفضلي على ذمتي ياهند!! استعاذت من ذكره لل*م**وت وأحتضنته بلهفة وسعادة لأنه لم يتخلى عنها وأعادها لعصمته مرة أخرى، وأخيرًا يمنحها الدعم الذي كانت تتمناه وتريده! ................................. . حين يقترب منك شبح الفقد لشخص كنت تظن وجوده أمرًا مسلم به.. ينتابك الخوف، فتتمسك بطرف ثوبه گطفل يخشى فراق أمه..! هند غالية ولن يفارقها حتى تنقطع أنفاسه عن هذا العالم.. ربما لن تنتهي حماقاته معها.. ولكن يعد نفسه أن يحاول تحسين ذاته وتهذيبها.. هكذا أخبرها قبل أن يغادرها بقبلة عميقة محبة بين عينيها..! *********************** بثورة متأججة داخله عبر محيط بناية فريال مع أول خطوة له في محيطها، آتاه صوت إحدى العقربتين( رجاء) تصرخ بفزع: _ ألحقووووني يا ناااااااس، حماتي نفسها ضيق وبتقول كأن س*ك*ي*نة بتقطع قلبها وبتكح دم .. حد ينجدني بسرعة يا عاااااالم! ........................ .. بعد حوالي ساعتين! والجميع منتظر بردهة طويلة تنتهي بغرفة الفحص التي بها فريال! خالد بقلق: أنا مش فاهم حصل أيه في سواد الليل، ده انا فايت عليها أمبارح وكانت زي الفل يا عبد لله ومافيهاش الهوا..! أجاب شقيقه وعيناه مصوبة لباب الغرفة: ولا أنا فاهم حاجة.. فجأة كده تتعب بالشكل ده يا خالد.. ربنا يستر ويسلمها من كل شر..! أما أحمد! فملتزم الصمت منذ حضوره للمشفى مع شقيقته التي كانت بحالة أرجفت قلبه عليها، ونسى تماما ما أتى إليه، لم يتذكر غضب أو عتاب.. فقط يريد سلامتها..! لم يخبر هند بعد.. فضل أن يتبين وضع فريال أولًا! انفرج باب غرفة الطبيب، فعاجله عبد لله: _ خير يادكتور طمني الله لا يسيئك أمي مالها..! أجاب الطبيب المعالج بهدوء أعتادوا بتلك المواقف: الوالدة للأسف عندها إنسداد في شرايين القلب، وده يستدعي حلول فورية لأنقاذها.!وفي كذا خيار قدامنا خالد بوجهٍ شاحب: أيه هو ارجوك .. اعمل الصح لحالتها مش عايز أمي تروح مننا يادكتور؟ الطبيب معدلًا عويناته: بأذن الله مش هنتأخر.. مبدئيا هي محتاجة دعامة للقلب وبعدها نتابعها ولو الوضع تأزم أكتر، يبقى هنلجأ لحل جراحي.. بس خلينا مانسبقش الخطوات.! وحالًا هنعملها بعض فحوصات ضرورية.. وربنا ييسر إن شاء الله غارد الطبيب، وتبادل الشقيقان النظرات الوجلة والخوف ينضح منهما. وهتف الأصغر: هنعمل أيه يا عبد لله؟! أجابه بصوت ملتاع: هنقول يارب ياخالد، مافيش احسن منه نلجأ له .. بإذن الله أمي هتكون بخير، هنعملها دعامة زي ما الدكتور قال.. وأي حاجة تحتاجها بس ترجع لصحتها وعافيتها..! ************************** عبر الهاتف!! _ أنت بتقول أيه ياأحمد. فريال في المستشفى وهتعمل دعامات للقلب! ولسه فاكر تقولي دلوقت؟! يومين اختي في المشفى وانا معنديش خبر؟!! _ أهدي ياهند.. أنا ماحبتش اقلقك، وأنا وولادها حواليها، هتيجي تعملي أيه زيادة.. كفاية اللي فيكي هتفت ببكاء: ولو يا أحمد، مهما كانت مشاكلي، دي أختي وفي محنة، ومستحيل أسيبها لوحدها..! أرجوك ابعتلي يمنى تقعد مع ماما والولاد، عشان أقدر اجي! أجابها: من غير ما تطلبي.. يمنى دقايق وهتكون عندك فعلا.. وموقع المستشفى هبعتهولك، خدي تاكس وتعالي.. مستنيكي! أغلقت الهاتف ودموعها تنساب بغزارة دون سيطرة، وراحت تستغفر دون إنقطاع.. فالأمور حولها تتأزم والفواجع والنكبات تحاصرها..! توضأت لتصلي وتناجي ربها بخشوع مرددة دعاء النبي " صل الله عليه وسلم" حين دعى ربه! {اللهم إليك أشكو ضعف قوتي وقلة حيلتي وهواني على الناس، أنت رب المستضعفين وأنت ربي اللهم إلى من تكلني؟ إلى بعيد يتجهمني؟ أم إلى عدو ملكته أمري؟ إن لم يكن بك غضب علي فلا أبالي غير أن عافيتك هي أوسع لي. أعوذ بنور وجهك الذي أشرقت له الظلمات وصلح عليه أمر الدنيا والآخرة أن ينزل بي سخطك أو يحل علي غضبك لك العتبى حتى ترضى} . ************************** بعد فترة أستدعت حالة فريال تدخل جراحي لتبديل شرايين القلب..! لم تكن الأمور المادية متاحة بشكل كبير، فاضطر خالد بيع سيارته التي كان يستثمرها بتوصيل" أوبر" كما باع عبد لله مصوغات زوجته رجاء وأيضًا زوجة أخيه عايدة.. كما ساهم أحمد بمبلغ كان يدخره، ورغم رفض أبناء شقيقته إلا أنه أصر، فهي شقيقته قبل أن تكون والدتهما..! وتم توفير تكلفة العملية، وخضعت لها بعد أن أوصت الجميع بالكثير، كما طلبت مسامحة شقيقيها أحمد، ووالدتها..! وتمت الجراحة بنجاح.. ومكثت أسبوع أخر للمتابعة بشكل وافي ثم عادت لمنزلها لتمر بمرحلة أخرى ليست هينة.. فكان لابد لها من ملازمة الفراش عدة أشهر مرتدية حزام خاص يضم القفص الصدري بإحكام حتى يلتحم القفص المشقوق بفعل الجراحة مرة أخري! ولن تتحرك إلا بحرص شديد حتى لا تتآذي عظامها وتعود لطبيعتها مع الوقت! ........................ في منزل فريال! هند: حمد لله على سلامتك يا ست الكل. نورتي بيتك تاني ياحبيبتي! أحمد وهو يقبل رأس شقيقته الكبري: دي نورت الدنيا كلها مش بس بيتها ياهند..! خيط دموع صامت يسيل على خديها، تأثر بحنان أحمد وهند اللذان غمراها بعاطفة واهتمام لم تكن تتخيله يومًا.. محنة مرضها كشفت لها الكثير، وأعادت داخلها الحسابات.. كم نحن ضعفاء أمام المرض وكم نحتاج الدعم والمؤازرة من أحبائنا. أهكذا شعرت والدتها القعيدة التي اهملتها وكانت تبعث لها زوجات ابنائها بدلًا منها؟؟ هل حقا أحسنوا رعايتها؟ أم اخفقوا وأسائوا إليها؟ لما لم تشك لحظة أنها تعاني، وتحتاج برها وحنانها.. هي الأن بحالتها تلك.. لا تحتاج شيء بقدر حنان ورعاية من حولها..! عبد لله مجففًا دموعها بأصابعه: جرى أيه ياست الكل.. أيه لازمة البكى ما انتي خارجة زي الفل أهو وقمر 14..! خالد وهو يحيط كتفيها برفق: شكلها عايزة تدلل علينا زيادة.. ثم قبل كفها هاتفًا: وهي تدلل براحتها..! فريال بصوت خافت: ربنا مايحرمني منك أنت واخوك، ولا منك يا احمد أنت وهند.. سامحوني بهدلتكم معايا ومخليتش حيلتكم حاجة بعد تكاليف العملية!! ياريتني كنت م............ . كمم عبد لله كفها هاتفًا بحزم: أيه اللي بتقوليه ده بس تكاليف أيه دي، فداكي كنوز الدنيا، الفلوس هتيجي غيرها هنشتغل وهنفضل مستورين بدعواتك انتي وبس .. ماتحمليش هم حاجة طول ما احنا على وش الدنيا.. انتي جايبة رجالة!! ألتمعت عين أحمد بإعجاب مما قاله عبد الله ورغم أنه مازال محتفظًا بغضبه تجاه سوء تهذيبه معه بصدام سابق بينهما، إلا أن الوضع يختلف الآن، فلا مجال للخصام وشقيقته بتلك الحالة.. فربت على كتفه هاتفًا: جدع ياعبد الله.. ربنا يبارك فيك. أنت وأخوك!!! بوغت أحمد فعل عبد الله الذي التقط كفه ولثمها: سامحني ياخالي، عارف إنك زعلان مني وإني قليت ادبي معاك وإني......... .. أحمد مقاطعًا بمزاح: إيه ياعم انت مصمم تقلبها دراما ليه.. وبعدين هو أنا ياواد سكتلك، ما انا ظبطك في ساعتها.. لكف متين.! عبد الله بندم حقيقي..خاصتًا بعد وقفة أحمد معهما كتفًا بكتف في تلك المحنة: _ولو يرضيك ا*ض*ر*بني تاني بس سامحني يا خالي.. سامحني لأني عمري ما هنسى وقفتك معايا أنا واخويا..! أحتضنه أحمد بقوة : ياعبيط دي أختي قبل ما انتَ تيجي للدنيا.. وعمري ماهقصر معاها مهما حصل! أبتسمت فريال لتلك المصالحة.. وتمنت أن تحظى هي الأخرى بفرصة لطلب السماح وإبداء الندم!!!!

مقالات ذات صلة

الطقس غدا.

ظننته حبا 2

تركيا اليوم

قصة.دويدار بقلم هدير نور

يونس4

احببت جاهل

اترك تعليقاً إلغاء الرد