للنصيب رأي أخر بقلم لوليتا ج5

للنصيب رأي أخر《جمود أنثى》
الحلقة ( ٣٢ )….
نهى بدموع وبفرح: موافقه…. يا سيدى أنا…
وائل إبتسم أوى، و الدنيا مش سايعاه من كتر الفرح وقالها بلهفه وبإرتباك : أنا.. أنا.. أنا هكلم سامى دلوقتى، وهقوله إنهارده نكتب الكتاب…. وائل بسعاده: مش هستنى دقيقه واحده….
نهى بتضحك و هى بتمسح دموعها: مجنون يا وائل….
وائل ضحك جامد أوى وبفرح: مجنون بيكى يا قلبى أنا…. وائل بلهفه: حبيبتى… هقفل معاكى دلوقتى وهكلم سامى و الشيخ يوسف… وانتى قولى لماما وكريم…
نهى بحب: حاضر يا قلبى أنا…
وائل بحب: سلام مؤقت يا مجنونة قلبى….
نهى بإبتسامه: مع السلام حبيبى…
وائل قفل مع نهى، واتصل بسامى وقاله… سامى بصدمه: ها!! بس إزاى يا وائل!!! إحنا إتفقنا على خطوبه وبس…
وائل بإبتسامه: مشكلة نهى فى كتب الكتاب إنها كانت خايفه تاخد الخطوه دى، وهى لما حست بالأمان وافقت، وبصراحه أنا ما صدقت إنها وافقت، ف ليه نأجل بقى!!! خير البر عاجله…
سامى بحيره: مش عارف منى ممكن توافق بالشكل ده ولا لأ….
وائل برجاء: أستاذ سامى!! خليك فى صفى… وأقنع مدام منى….
سامى بإبتسامه: صدقنى يا وائل أنا من الأول فى صفك، ولو نهى وافقت أنا معنديش مانع… سامى بحب: أنا هكلم منى وأشوف نهى قالتلها إيه…
وائل بإبتسامه هاديه: وأنا هكلم الشيخ يوسف واخليه يستعد لكتب الكتاب..
سامى قفل مع وائل، و وائل بيعمل اتصالاته مع الشيخ يوسف و عم عبده….
نهى بعد ما قفلت مع وائل، خرجت لمنى وقالتلها بتوتر: ماما….
منى بصتلها بنرفزه لما لقتها لسه زى ما هى: أنتى مش واخده بالك إن إنهارده خطوبتك ولازم تساعديني فى توضيب الحاجه؟؟؟
نهى قربت منها و حضنتها جامد أوى وباستها فى خدها و منى بغيظ: نهى! مش وقت عواطف دلوقتى…. عايزاكى تساعديني…
نهى إبتسمت بهدوء: ماما.. ممكن تقعدى الأول وتسمعينى… أنا عايزه اقولك على حاجه مهمه أوى…
منى بنرفزه قعدت وبصتلها بغيظ، ونهى بتوتر : وائل عايز يكتب الكتاب إنهارده…
منى بصتلها بصدمه وذهول: مش إحنا إتفقنا خلاص بعد شهرين ثلاثه، هو لعب عيال ولا إيه…
نهى بإبتسامه هاديه: لأ يا حبيبتى مش لعب عيال ولا حاجه… نهى بتحاول تمتص غضب منى: أنا كنت عايزه أجل عشان كنت خايفه، وعايزه أحس بالأمان… بس دلوقتي أنا موافقه….
منى ضحكت بتهكم: موافقه!!! إيه فجأه كده حسيتى بالأمان…
نهى بإبتسامه: لأ يا ماما مش فجأه، نهى مش عارفه تقول لمنى إيه، فبتحاول تلاقى أى كلام: ماما مش أنتى موافقه على وائل يبقى ليه لأ دلوقتى؟؟؟
منى أخدت نفس جامد وخرجته بعصبيه: عشان الكلام إللى إتغير فجأه كده من غير أي مقدمات….
نهى راحتلها وقعدت تحت رجليها وبحب: حبيبتى، ده هيبقى كتب كتاب مش فرح يعني جواز مع إيقاف التنفيذ….
منى بصتلها بضحك: ما أنا عارفه إنه هيبقى مع إيقاف التنفيذ….
نهى بإبتسامه: يبقى توافقى بقى… عشان خاطرى….
منى بصتلها بحب: خلاص يا نهى!! أنا موافقه….
نهى خدتها فى حضنها جامد وباستها وقالتلها: ربنا يباركلى فيكى يا أمي….
منى باستها فى راسها وداعتلها بالخير هى وندى و وائل…
نهى و منى لقوا سامى بيتصل بمنى، ونهى قالتلها: أكيد وائل كلمه وقاله وهو بيتصل بيكى عشان يقولك…
منى بإبتسامه: طيب روحى خلصى إللى وراكى عشان نستعد لبليل…
منى رددت على سامى إللى إتفاجأ بموافقتها، و منى قالتله إنه يكلم فادى ويعرفه عشان يبقى عامل حسابه… سامى كلم فادى وبصدمه: أنتو بتهزروا ولا بتسطعبتوا!! كتب كتاب إيه ده؟؟؟ هو لعب عيال!!!
سامى اخد نفس جامد وخرجه جامد، وبشك سأله: فادى!! أنا عايز أفهم حاجه، هو أنت معترض على جواز نهى و وائل… ولا فى إيه بالضبط… سامى بمكر: من ساعة ما عرفت بالموضوع ده وموقفك غريب جدا… وكمان اتعصبت على منى بسبب جيهان، هو فى إيه بالضبط؟؟؟
فادى بنرفزه من كلام سامى: أنت بتقول إيه يا سامى…. إيه الكلام الفارغ ده!! هو أنت شايف إن إللى بيعملوه ده صح.. فجأه كده من خطوبه لكتب كتاب…
سامى بإبتسامه مكر: هو أصلا كان جى على كتب كتاب مش خطوبه… ومن الواضح جدا إن نهى غيرت رأيها و موافقه على كده.. سامى بيوضح لفادى موقفه: بص يا فادى… من رأيى إنك ماتعترضش إنهارده بالذات، عشان أنت عارف كويس إن الأمور هتتأزم أكتر مع منى ونهى، وماتنساش حاجه مهمه أوى…
فادى ساكت و متغاظ من كلام سامى، و سامى بيكمل بهدوء: نهى مش محتاجه لوالى عشان جوازها… نهى ولية نفسها، ف بلاش تعقد الأمور لأنها فى الاخر هتبقى فى وشنا إحنا… ومن الواضح إن نهى ماحكتش حاجه لوائل عن خلافك معاها، سامى بتنبيه عليه بس من تحت لتحت: وبلاش هو يحس بحاجه من دى… وائل مش غبى يا فادى…
فادى سكت وهو متضايق من كلام سامى، وبعصبيه: ماشى يا سامى… أعملوا إللى يريحكوا….
سامى قفل مع فادى وهو مبتسم، حس كأنه وصل فادى لنقطه هو كان قاصد إنه يوصله ليها، سامى كلم وائل وقاله إنهم موافقين، وائل فرح أوى وقاله أنه كمان رتب أموره مع الشيخ يوسف وعم عبده…
فادى قفل مع سامى وهو متنرفز ومتعصب من إللى حصل… خلص شغله وروح بيته، لقى منار قاعده مع ريم، فقالهم بهدوء عشان منار متلاحظش عليه ضيقه من موضوع نهى: على فكره وائل ونهى هيكتبوا كتابهم إنهارده، أنا قولتلكم عشان لو عايزين تيجوا معايا… ولو مش عايزين تيجوا براحتكوا…
منار برقت بغيظ وصدمه: إيه!! كتب كتاب!! منار بنرفزه: أنت مش قولت خطوبه بس… إيه إللى حصل؟؟؟
فادى بهدوء مستفز لمنار: نهى وافقت على كتب الكتاب، هى حره يا منار… نهى مش صغيره… فادى حب يستفز منار أكتر: من الواضح إن وائل ونهى بيحبوا بعض… فليه مايكتبوش كتابهم…
فادى إبتسم بخبث وسابهم و دخل أوضته عشان يستعد لبليل….
منار بصت لريم بغيظ، و ريم بتوتر لمنار: ماما!! هنروح ولا لأ؟؟؟
منار بصالها وهى متنرفزه: ماشى يا ريم هنروح عشان ده كتب كتاب… كلمى رنا وقوليلها تستعد لبليل….
ريم قامت واتصلت برنا وقالتلها، و رنا بقى حالها مش أقل من حالة منار، ف هى كمان قررت تروح، طبعا عشان الشكل العام، وبريستيجهم….
وائل أتصل بمحمده وقاله على إللى جد، محمد بصدمه: ولا !! أنت بتستهبل!!! قلبتها كتب كتاب…
وائل بضحك: اه!! عاجبك ولا مش عاجبك…
محمد بغيظ منه بس من جواه فرحان أوى لصاحبه: عليا النعمه أنت اتجننت خلاص… هى نهى عملت فيك إيه؟؟؟
وائل بهيام: عرفت إزاى تخطفنى من نفسى ومن حياتى، عرفت إزاى تشقلب حياتى وتخلينى أبقى مش على بعضى، نهى دى خلتنى مش عارف أشوف ولا أحس بحد غيرها وبس… وائل بحب أوى: مجنونة قلبى أنا….
محمد بضحك: إيههههه…. كفايه يا عم الأمور…. إرحم أمى أنا… ما أنا عارف إن الليلة دى هتيجى على دماغى أنا…
وائل ضحك جامد أوى: اه يا خويا… هتيجى على دماغك… المهم، وائل بجديه: عايزك تعمل………..
محمد بتتنيحه: ها!! أنت بتتكلم بجد؟؟؟
وائل بإبتسامه: إيه رأيك، هيبقى تحفه….
محمد ضحك جامد: بصراحه هيبقى جنان…
وائل بإهتمام : محمد هتلحق تخلص ده دلوقتى؟،؟
محمد بجديه: اه طبعا… ما تقلقش أنت… محمد بص فى ساعته وبعدين قاله: أنا هنزل دلوقتى عشان ألحق أخلص ونتقابل على الطريق ونروح سوا لنهى… ماشى…
وائل بإبتسامه وحب: محمد! أنا مش عارف من غيرك أنت وناديه كنت هعمل إيه يا صاحبى…
محمد بحب لوائل بس بهزار، عشان مش عايز يظهر عواطفه: ولا !! ما فيش بين الاخوات الكلام الفارغ ده، أنت سامع، محمد بهزار: ويلا بيتك بقى عشان متهورش….
وائل ومحمد ضحكوا جامد، وقفلوا عشان كل واحد يخلص إللى وراه… محمد قال لناديه على جنان وائل وفرحت هى كمان ليهم…
ولاء راحت لنهى البيت، ونهى قالتلها على إللى حصل، ولاء بحب وسعاده: للللللللووووووووى.. ألف ألف مبروك يا موزتى، ولاء بمكر: شكلك وقعتى على بوزك يا هانم…
نهى بتضحك على كلام ولاء: ماكنش يخطر على بالى أى حاجه من دي خااالص…
ولاء بتغمز لنهى: شفتى بقى فايده شرب اللمون بالنعناع…
نهى بصت لولاء بذهول، وافتكرت اول مقابله ليها مع وائل، وأول كلام ليها مع ولاء، ومره واحده انفجرت من الضحك ومقدرتش تمسك نفسها هى وولاء لغاية ما عنيهم دمعت من كتر الضحك… منى وأحلام دخلوا عليهم ولاقوهم بالمنظر ده، فمنى قالتلهم بهزار: بقى بذمتكم دى منظر واحده خطوبتها وكتب كتابها إنهارده…
نهى وولاء بصوا لبعض، و مره واحده ضحكوا جامد على كلام منى ونهى شغلت أغنيه “إنهارده فرحى يا جدعان”…😉 وفضلوا يرقصوا كلهم مع بعض ومعاهم ندى وزياد ومازن….
عدى الوقت على أبطالنا لغايه الليل ما هل….
سامى وسالى راحوا لنهى بدرى عشان يبقوا جنبها… وبعد العشا شغلوا اغانى الخطوبه، شويه وجرس الباب رن، كان فادى ومنار وأولاده، ومعاهم مصطفى و رنا…
نهى وولاء كانوا فى الأوضه جوه، و إتفاجأوا بمنار و رنا جم… كانوا متوقعين إنهم مش هيجوا… فولاء إبتسمت بتهكم: أهلا وسهلا بيهم… جم لقدرهم…👻👻
نهى بصتلها وبضحك: أيون… استعدى بقى يا مزه… أنا مش فاضيه أرد إنهارده على حد… نهى بهزار وهى بتغير صوتها لصعيدى: أنا عايزه أتجوز يا بوى….
ولاء ونهى انفجروا من الضحك… شويه وسمعوا جرس الباب تانى، نهى إتوترت أوى و بإرتباك: ولاء!! ده وائل… أنا حاسه بكده…
ولاء مسكت إيديها لقتها ساقعه، فقالتلها بضحك وهى بتغمزلها بعنيها: يا بت أهدى شويه… ده مجرد كتب كتاب مش حاجه تانيه…
نهى بصتلها بغيظ وراحت ضربتها فى ذراعها بهزار: بت متخرجنيش من المود إللى انا فيه…
نهى وولاء ضحكوا، مافتش ثوانى و ولاء ونهى لقوا ندى بتدخل عليهم بسرعه وبتقولها: مامى…مامى… وائل جه وائل جه….
نهى قلبها دق جامد أوى وأتوترت أكتر، وبصت لولاء إللى حسه بصاحبتها، خدتها فى حضنها وبحب: ربنا يتمملك على خير يا حبيبتى…
نهى حضنت ولاء جامد وغمضت عنها وعنيها بتتلألأ بالدموع: ربنا ما يحرمنى منك يا أختى، وصاحبتى، وعشرة عمرى…
بعد ما وائل وعم عبده والشيخ يوسف ومحمد قعدوا شويه، وائل بتوتر: اححمم! أمال العروسه فين؟؟ هى مستخبيه مننا ولا إيه!!!
كلهم ضحكوا عليه، ومنار و رنا بصوا لبعض بغيظ، فمنى بضحكة: هى هتستخبى منك فين؟؟ كده كده هتقفشها فى الشغل…
كلهم ضحكوا، و فادى إبتسم عليه… شويه و منى طلبت من أحلام إنها تنادى لنهى و لولاء…
أحلام دخلت عليهم وبتقولهم: نهى! يلا يا حبيبتى العريس مستنيكى…
نهى بصتلها بتوتر، وقالتلها وصوتها مبحوح مش قادره تنطق: ه..ه.. هم مش لسه هيكتبوا الكتاب… لما يخلصوا هبقى أخرج…
ولاء بصتلها بتتنيحه، وضحكت جامد على شكلها ومنظرها.. وأحلام بغيظ: يا نهى يلا بقى بلاش دلع…
نهى بجديه وهى متوتره: لأ !!! مش هخرج غير لما يكتبوا الكتاب… هخرج على الأمضه بس…
ولاء حبت تهدى نهى من توترها: حبيبتى ماينفعش لازم تخرجى وتقولى مين وليك قدامهم….
نهى بصت لولاء بزعل، وولاء فهمت صاحبتها وقالتلها وهى بتهون عليها: معلش يا نهى، بس مش هينفع حد تانى غيره، عشان وائل….
نهى بصت فى الأرض بوجع لحظات وبعدين رفعت عنيها بحزن لأحلام: طيب خاللى كريم يجى ياخد إيدى مش هخرج لوحدى…
أحلام إبتسمت وخرجت ندهت لكريم.. كريم بإبتسامه هادية وحب: حبيبتى يلا المأذون مستنيكى…
نهى بلعت ريقها بصعوبه واتوترت أكتر، فأحلام قالت لكريم إنه ياخد نهى ويخرجوا….
كريم خرج هو ونهى إللى كانت باصه فى الأرض و مكسوفه أوى، ومش قادره ترفع عنيها… أحلام و ولاء وراها بالزغاريد، و وائل اول ما عينه جت عليها إبتسم أوى وقلبه دق جامد و إتوتر و إرتبك….
وائل لما راح لنهى كان معاه حنان و عم عبده وإبنه والشيخ يوسف، ومحمد وناديه و أولادهم، وشادى و فايزه مراته وأولاده…. حنان اول ما شافت نهى وهى ماسكه فى إيد كريم، مقدرتش تستنى لغايه ما تقعد، جريت عليها و أخدتها فحضنها وباستها بمنتهى الحب والفرح وقالتها بإبتسامه: الف الف مبروك يا قمر… شفتى مش قولتلك وشك حلو علينا ماكنتيش مصدقانى… حنان بفرحتها لنهى لفتت نظر كريم أوى ليها و إستغرب منها، بس إبتسم إن لسه فى حد ممكن يفرح لحد بالشكل ده… بالرغم إنه مايعرفهاش ولا عمره شافها قبل كده، بس فرح من جواه بفرحتها بنهى…
نهى بإبتسامه خجل: الله يبارك فيكى يا حنان، وعقبالك كده قريب..
حنان بهزار: طيب إستنى لما أقرصك فى ركبتك عشان أحصلك فى جمعتك…
حنان قرصت نهى بهزار، ونهى إتأوت شويه، والكل لاحظ ده، فوائل بغيظ من تصرف حنان، و مأخدش باله إنه قاعد فى وسط الناس: ما بالراحه عليها يا حنان… يعنى عايزاها تتعور يوم كتب كتابها…
نهى غصب عنها بصتله بإبتسامه وخجل، وهو وشه نور اول ما جت عينه فعنيها، ومأخدش باله إنهم كلهم بيبصوله لتصرفه ده، نهى بسرعه رجعت بصت فى الأرض، و كلهم ضحكوا علي كلامه، وهو إتحرج أوى وبص فى الأرض هو كمان، وحنان بهزار: معلش بقى يا أبيه!! أصل أنا ما صدقت هى قالت كده…
كلهم ضحكوا على كلامها… وكريم بصلها وهو مبتسم على تصرفها الطفولى مع نهى…
منار و رنا كانوا بيبصوا لبعض وهم مش قادرين يتكلموا ولا ينطقوا….
ناديه وفايزه قربوا منها وعرفوها بنفسهم وباركولها، كل ده و وائل عينه عليها مش قادر يشيلهم ومستنى لما نهى تجيب عنيها فى عنيه… بس هى لسه مش قادره تبصله… فمنى قالتلها: حبيبتى تعالى اقعدى عشان نكتب الكتاب…
نهى إبتسمت بخجل من غير ما تبص لوائل وهو متغاظ منها أوى عشان هى مش مدياله فرصه إن عنيهم يتقابلوا تانى…
نهى قعدت جنب فادى… وسمعوا جرس الباب بيخطب…
كريم راح فتح الباب كان مروان ونسمه ومعاهم سلمى، مروان سلم عليه وعرفه بنفسه، محمد أول ما لقى سلمى معاهم قرب من ناديه و وشوشلها و ناديه إبتسمت… دخلوا كلهم جوه، و مروان سلم عليهم وأخد وائل بالحضن وباركله، مروان قعد جنب شادى ومحمد، وسلمى ونسمه قعدوا جنب ناديه وفايزه، بس سلمى ونسمه لاحظوا إن شكل القاعده مش مجرد خطوبه… بصوا لبعض أوى و سلمى بصت على نهى إللى قاعده جنب فادى وبقت مش قادره تستوعب إللى هى شايفاه وفهمته..
محمد بإبتسامه: مش يلا يا شيخنا نكتب الكتاب ونعللى الجواب…
سلمى و نسمه بصوا لبعض بصدمه، ورجعوا بصوا لمروان إللى صدمته ماتقلش عنهم، وهو كمان بصلهم وهو مش عارف إيه إللى بيحصل… اقرب من شادى وسأله بغيظ: مش وائل قال خطوبه ولا أنا سمعت غلط؟؟؟
شادى بذهول: أنا زيك برده… كنت فاكر إنها خطوبه وشبكه… معرفش هم قلبوها كتب كتاب إمتى وإزاى…
مروان رجع بص لسلمى بحزن وزعل، لقاها ماسكه فى إيد نسمه وعنيها بتلألأ بالدموع…
الشيخ يوسف سأل نهى بجديه: ها يا عروستنا!! هتبقى وكيلة نفسك، ولا هتوكلى حد؟؟
نهى بصت لوائل وهى مبتسمه ورجعت بصت لفادى بإبتسامه هاديه: اونكل فادى وكيلى…
نهى كانت موجوعه من جواها إن فادى هيكون وكيلها مش كريم، بس هى عارفه الظروف والموقف إللى كلهم محطوتين فين… الشيخ يوسف إبتسم، وبدأ يسمى الله، و يكتب الكتاب، فوسط ذهول وصدمه نسمه وسلمى ومروان، وغضب وغيظ من منار و رنا، وفرحة حنان و ولاء وأحلام و منى وكريم و سامى ومحمد وناديه، وطبعا فرحة عريسنا إللى الدنيا بحالها مش سايعاه…
نهى على قد ما كانت مبسوطه وفرحانه، كانت برده متوتره و مرتبكه وسرحانه… مافقتش من إللى هى فيه غير بعد ما المأذون قال: بارك الله لكما، وبارك عليكما وجمع بينكما فى الخير …
فجأة المنديل إتشد من إيديهم، كان كريم، فبهزار : مافضلش غيرى بقى… ولا إيه يا جماعه!!!
كلهم ضحكوا على تصرفه، وغصب عنه عينه جت فعين حنان إللى قالت بهزار: طيب حضرتك أخدت المنديل و مفيش ورد عشان نهى تحدفه ليا… أعمل أنا إيه دلوقتى!!!!
كلهم ضحكوا عليها، وكريم بإبتسامه قرب منها وأدلها المنديل وقالها بإبتسامه هاديه: ما عنديش مانع تخديه بس بشرط واحد…
حنان بضحك: إيه هو!!!
كريم وهو لسه محتفظ بإبتسامته: تشلهولى معاكى وإللى يتجوز الأول ياخده… إيه رأيك!!!
حنان بإبتسامه وخفه شدت منه المنديل: موافقه…
كريم إبتسم على تصرفها وسابلها المنديل وراح يبارك لنهى…
نهى و وائل مضوا على قسيمة الجواز، وبعد ما خلصوا كلهم بيباركولهم ويهنيهم، ماعدا نسمه وسلمى إللى لسه الصدمه مأثره عليهم، و وائل قرب من نهى و عينه فعنيها بيقول كلام كتير أوى، وبإبتسامه ملت وشه كله وبهمس وبحب: مبروك عليا أنتى، يا مجنونة قلبى…
نهى إبتسمت بخجل وهى بالعافيه بتحاول تبص فى عنيه: اححم!! وبعدين بقى… مش هتبطل رخامتك دى…
وائل ضحك جامد على منظرها ولخبطتها إللى هى فيه، وقالها بهزار: تؤ تؤ، لأ يا حبيبتى مش هبطل… ده أنا هبدأ الرخامة على أصولها … وائل بيغمزلها بعنيه: إستلقى وعدك بقى يا قطه…
نهى إبتسمت أوى ودورت وشها الناحيه التانيه من كسوفها… وفجأة لقوا ندى بتقرب منها، و بتقول لنهى بمنتهى البراءه: مامى… مامى… هو فيه إيه!!
نسمه وسلمى ومروان بصوا لبعض بصدمه وذهول أكتر من الأول، بس الصدمه دى ماكنتش ليهم لوحدهم، دى كمان كانت لشادى وفايزه، وحنان… بس حنان إبتسمت، وإفتكرت لما وائل كان زعلان مع نهى بعد ما اتخطبوا، وفهمت ليه هو كان متضايق أوى، بس كانت من جواها فرحانه، لأنها أدركت معنى إن ربنا بيعوض الناس على كل حاجه وحشه حصلت فى حياتهم…
سلمى بصدمه لنسمه: هى مخلفه، وائل إتجوز واحده معاها بنت… طب إزاى وليه…
نسمه بإستغراب سألت ناديه: ناديه!! هى العروسه مطلقه، ولا أرمله؟؟؟
ناديه بإبتسامه هاديه: مطلقه وعندها بنت عندها ٦ سنين…
سلمى بغيظ : وهو إيه إللى يجبره إنه يتجوز واحده مطلقه ومخلفه….
ناديه بإبتسامه هاديه: القلب وما يريد يا سلمى… عقبالك يا جميل…
ناديه سابتهم و هم متضايقين من كلامها، وراحت لنهى عشان تباركلها…
وائل إبتسم على كلام ندى أوى وشالها وحضنها جامد أوى كأنه بيخبى نفسه فيها، وباسها وقالها بمنتهى الحب والحنان: قطتى الصغيره من إنهارده تقوليلى يا بابى… وائل وعنيه بتلمع بالدموع ونهى شافتها وإبتسمت بحب، وهو بيكمل كلامه: زى أول مره قولتيلى فيها… وائل بتمنى من جواه: إتفقنا يا قطتى….
ندى بإستغراب وبراءة طفلة: مش أنت إسمك وائل… طب ليه أقولك بابى؟؟
وائل بحب: عشان أنا بقيت بابى…
ندى بحيره بصتله وبطفوله: اممم!!! أوكيه.. يا بابى…
وائل ضمها أوى أوى وباسها فى خدها، وبص لنهى بحب فعنيها وعنيه فضحاه، ومن غير ما يشعر حط إيده فى وسطها وضمها عليه وباسها فى رأسها قدامهم كلهم، وفوسط صدمه نهى والكل… نهى بسرعه من كسوفها شالت إيده، وهو إنتبه إن الكل بيبصله، وبص لمحمد عشان يخرجه من الموقف ده لقاه عمال يضحك عليه، شويه و ندى نزلت من إيد وائل وراحت تلعب مع باقى الأطفال ، و ناديه قربت منهم عشان تبارك لنهى، و فى نفس الوقت تنقذ وائل من الموقف ده: مبروك يا وائل، ربنا يتمملك على خير، مراتك وانت حر فيها….ناديه اخدت نهى فحضنها وباستها بحب وقالتلها بهزار: يعنى تكيدوا العوازل براحتكوا…
كلهم ضحكوا على كلامها، وولاء ردت هى كمان بهزار: أيوه صح، كيدوا العوازل على راحت راحتكوا، ولاء بصت لناديه وبتغمزلها: وإحنا هنقوم بالواجب وزياده ولا إيه….
ناديه بصتلها وضحكت: آه طبعا صح… ناديه بإبتسامه لولاء: شكلنا كده متفاهمين أنا وإنتى مع بعض…
ولاء بضحك: طبعا يا جميل… حتى إسألى وائل عليا…
نهى إبتسمت وبصت لوائل وبحب وهى حاضنه ولاء: أحب أعرفك بحماتك التانيه، ولاء… نهى شدت من حضنها لولاء، فوائل بإبتسامه: متهيألى هتبقى فى صفى صح!!! وائل بص لنهى بحب وبعدين كمل كلامه: أصلك عارفه صاحبتك مجنونه وممكن تقلب عليا فى ثوانى….
نهى بصتله بغيظ وغضب، وهو بيقولهم: أهو!! شفتوا بنفسكوا بتعمل فيا إيه….
كلهم ضحكوا على كلامه وهزاره، وولاء بصت لنهى بحب: هى اه مجنونة، بس جنانها لذيذ، ولاء بمكر وهى بتغمزله: مش زى جنان ليلى والدوش…
وائل بص لنهى أوى وهى كمان بصتله، والثلاثة انفجروا من الضحك، لدرجه إن دموعهم نزلت، فوائل بيمسح دموعه من الضحك وبيقول لنهى: هو أنتى ماعتقتيش ولاء من ليلى…
نهى وولاء بيمسحوا دموعهم هما كمان، وولاء رددت عليه: ما ينفعش أسبها لوحدها… مش صاحبتى….
ناديه بحيره: لأ بقى… انا عايزه أعرف مين ليلى و يعنى إيه الدوش ده…
وائل ونهى وولاء بصولها ورجعوا يضحكوا من تانى، فولاء قالتلها وهى بتضحك: أنا هقولك مين ليلى دى…
كل ده حصل قدام نسمه وسلمى و رنا ومنار وكل واحد فيهم جواه مشاعر كتير ناحية وائل ونهى…
سلمى ما قدرتش تمسك نفسها اكتر من كده ، فقامت ونسمه مسكتها من إيديها، بس سلمى إبتسمت لها بغيظ وشددت إيديها منها و راحتلهم….
سلمى بإبتسامه مصطنعه: مبروك يا وائل… ألف مبروك….
وائل بإبتسامه هاديه: الله يبارك فيكى يا سلمى… عقبالك..
سلمى بتهكم: مرسى يا وائل… سلمى بصت لنهى من فوق لتحت بطريقه ملفته ليها و لوائل إللى إستغرب نظرة سلمى لنهى، و بتهكم: مبروك يا عروستنا… سلمى بغيظ: بس انتى مش شايفه انكوا استعجلتوا أوى فكتب الكتاب، سلمى بغيره معرفتش تكتمها: هو أنتو تعرفوا بعض من إمتى؟؟؟
وائل ونهى، و محمد وناديه وولاء إستغربوا أوى من كلام وأسئلة سلمى، وبصوا لبعض بحيره، وناديه بغيظ من سلمى: إيه الأسئله الغريبه دى يا سلمى!! و ده وقته….
ولاء عرفت إنها هتبدأ حفلتها الخاصه بدرى و كمان مش هتبقى الحفله على منار و رنا بس، دى كمان هتبقى على سلمى، فولاء رددت عليها: هو هيفرق معاكى أنهم يتجوزوا بدرى او متأخر، ولا هيفرق معاكى هم يعرفوا بعض من إمتى… ولاء بتهكم: متهيألى إن وائل ونهى مش محتاجين إنهم يبرروا جوازهم، أو يقولوليك يعرفوا بعض من إمتى… ولاء بصت لناديه وبهزار: ولا إيه رأيك يا ناديه؟؟؟؟
ناديه إبتسمت لولاء: عندك حق يا ولاء… ناديه بصت لسلمى وبهدوء: متهيألى يا سلمى إن نسمه ومروان بينادوا عليكى، روحيلهم، شوفيهم عايزينك ليه….
سلمى بصت لوائل بحزن، ونهى بصتلها بإستغراب وبعدين بصت لولاء إللى كانت مبتسمه على كلام ناديه…
سلمى سابتهم وراحت عند نسمه وهى متضايقه ومتغاظه من إللى حصل…
نهى بصت لوائل بضيقه هو لاحظها، فسألته بهدوء بس باين فعنيها الغضب: مين دى يا وائل؟؟
وائل بلع ريقه بتوتر وبص لمحمد و بعدين قالها بهدوء: دى سلمى، أخت مرات مروان… صاحبنا….
نهى إبتسمت بهدوء: تمام….
وائل بصلها بإستغراب من رد فعلها… لأنه متوقعش إن نهى ما سألتش عن سلمى أكتر من كده…. بس سكت عشان مش عايز يدخل فى اى حوارات الليلة دى، بس كان متضايق ومخنوق أوى من تصرف سلمى لدرجة إنه بص لمروان وعينه جت فى عنيه بغضب ظاهر ليه، ومروان بصله بحزن وحط وشه فى الأرض من كسوفه من تصرفات سلمى…
نهى حست من أسئلة سلمى إن فى حاجه او حوار بخصوص وائل، بس هى ما حبتش تنكد على نفسها وتبوظ فرحتها بموضوع مش وقته… فسكتت وإكتفت بإبتسامه هاديه….
محمد أتضايق أوى من سلمى بس مكنش فى إيده أى حاجه يعملها….
شويه و منى وأحلام قدموا الشربات و الحلو، وأحلام أدت لوائل علبه الشبكه والدبل عشان يلبسها لنهى….
وفعلا وائل لبسهم لنهى و نهى لبست وائل دبلته، ومحمد قالهم: مش يلا يا جماعة… كده هنتأخر…
نهى بإستغراب: يلا على فين؟؟؟
وائل بإبتسامه: هنخرج كلنا مع بعض وهنسهر بره بمناسبه جوازنا….
نهى بضحك: أنت مجنون، مش يمكن محدش عامله حسابه على الخروجه دى…
وائل بص فعنيها بحب: تفتكرى أنا ممكن أعدى الليلة دى من غير ما أحتفل بيكى يا قلبى أنا…
نهى بضحك: مجنون يا وائل…
ولاء إتصلت بأحمد وقالتله إن وائل عازمهم على حفله فى النيل، هى هتروح معاهم وهو يحصلها على هناك بدل ما يروح لنهى على البيت، وأحمد وافق وقالها إنه هيسبقهم على هناك…
الشيخ يوسف، وعم عبده إعتذروا لوائل إنهم مش هيقدروا يروحوا معاهم، و وائل تقبل إعتذارهم بس طلبلهم أوبر عشان يروحوا…
وائل اخد نهى و ندى و ولاء وحنان معاه فى عربيته، والباقى كل واحد فيهم راح بعربيته…
كلهم طلعوا ورا بعض، وكانوا بيزفوهم بكلكس العربيه و الأغانى إللى مشغلنها…
وصلوا للمكان ، و احمد فعلا كان مستنيهم هناك، سلم عليهم وبارك لنهى و وائل، ونهى عرفته بيه لأن احمد مش مجرد زوج صاحبتها وبس… لأ… ده هم الثلاثه أصحاب من أيام الكليه…وعشره عمر، وائل فرح أوى لانه حس إن نهى وولاء وأحمد يشبهوه هو و محمد وناديه فى علاقتهم ببعض… وخصوصا بعد ما ولاء وناديه ردوا على سلمى بداله…
نهى إتفاجأت بالمكان والقاعه إللى وائل حجزها، وإستغربت إنه إمتى وإزاى لحق يخلص بالسرعه دى…
المكان كان عباره عن قاعه فى النيل، وفيها فقرات إستعراضيه، وفرقه موسيقية هو حجز ترابيزات كتير بس طبعا مش القاعه كلها لأن الموضوع كان على غفله وبسرعه، بس هو حب إن نهى وقرايبها وأصحابها يغيروا جو…
أول ما دخلوا من باب القاعه الفرقه رحبت بيهم على طريقتهم بالاغانى والفقرات… شويه وإشتغلت أغنيه سلو إسمها ” lady” و وائل إبتسم أوى وقام وقف و مد إيده لنهى، وهى بكسوف حطت إيدها فى إيده واخدها على الاستيدج عشان يرقصوا… نهى كانت مكسوفه أوى، وباصه فى الارض، و مره واحده وائل حط إيده فى وسطها، وهى جسمها أشعر أوى وحست بإرتباك، وهو قرب منها أوى وحط خده على خدها وهو مبتسم وقالها بهمس:….