للنصيب رأي أخر بقلم لوليتا ج5

الحلقة ( ٣١ )….
وائل بحب: حبيبى أنا لسه صاحى لغاية دلوقتى ليه؟؟؟
نهى غمضت عنيها واخدت نفس جامد وخرجته بالراحة وبحب: بلاش أطمن على قلبى واغلس عليه شويه قبل ما أنام؟؟؟
وائل جسمه أشعر أوى و قلبه بيدق جامد وبيتنفس بصعوبه، وقالها بمنتهى الرقه: واحده واحده عليا…. أنا مش قدك…
نهى حست بتوتره، فقالت بهدوء: كنت بطمن وصلت البيت بالسلامه ولا لسه؟؟؟
وائل بهزار: لأ ! ما تقلبيش بالشكل ده، الأول كان أحسن….
نهى بغيظ: يعنى لا كده عاجب ولا كده عاجب…. بص بقى يا باشمهندس شكلك مش هينفع معاك غير المياه الساقعه…
وائل ضحك جامد أوى: لأ بلاش خلاص حرمت مش هعمل كده تانى…
نهى ضحكت وبهدوء: لأ بجد بطمن عليك…
وائل بإبتسامه: اه يا حبيبى لسه واصل من شويه ويادوب أخدت شاور وغيرت هدومى…
نهى بحب: طيب يلا ريح شويه عشان اليوم كان طويل عليك…
وائل بغلاسه: إستنى هنا رايحه فين!! أنا لسه متخانقتش معاكى…..
نهى بإستغراب: لسه متخانقتش معايا!!! هو أنت مكفاكش الخناقه بتاعت إمبارح، لسه عايز تتخانق كمان إنهارده؟؟؟
وائل بغيره: عايز أعرف معنى الكلام إللى قاله إسلام ده إيه؟؟؟ وائل بجديه: نهى أنا ملاحظ إن إسلام قريب منكوا أوى بشكل غريب….
نهى إبتسمت على غيرته: أنا معرفش هو يقصد إيه بكلامه….
وائل بغيظ: نهى!! هتسطعبتى !!! يعنى انتى مش ملاحظه!!!
نهى ضحكت على طريقته: بص يا حبيبى.. وائل غمض عنيه واخد نفس بالراحه وخرجه بالراحه وقلبه رجع يدق من تانى، وهو بيسمعها وهو مغمض عنيه: إسلام أتقدملى زمان من قبل ما اتجوز… وائل فتح عينه بغيظ وفاق من إللى هو فيه وبيجز على سنانه، وهى بتكمل كلامها: أنا رفضته لأنى بعتبره زى كريم.. أخ وجار مش أكتر من كده…
وائل بغيظ أكتر: برده عايز أعرف درجه قربه من فادى و سامى إيه… خالك عزمه فى عيد ميلاد بنته…..
نهى بإبتسامه هاديه: عشان اونكل فادى و سامى كانوا بيعملوا شغل ليه ولأهله وكمان هم على تواصل مع بعض على الفيس…
وائل اخد نفس وهدى شويه وسألها بإهتمام: نهى! هو أتقدملك تانى بعد ما إتطلقتى؟؟
نهى بإبتسامه هاديه: لأ يا حبيبى… هو متقدمش تانى، نهى بتطمن وائل: ولو كان حصل كنت برده هرفضه…
وائل بإستفسار: طب ليه؟؟؟
نهى غمضت عنيها واخدت نفس جامد وخرجته بالراحة وبهدوء: مش إحنا أصحاب…
وائل إبتسم أوى:اكيد طبعا أصاحب…
نهى بإبتسامه : هأقولك على حاجه بس متقولش لوائل إنى قولتلك، deal…
وائل ضحك جامد أوى: deal…
نهى بحب: ساعات كنت بحس أن فى حد موجود عشانى وأنا عشانه… بس معرفش هو مين ولا أعرف أى حاجه عنه… ولا اسمه ولا عنوانه ولا حتى شكله… نهى بتتكلم من جوه قلبها: إحساس غريب كنت بحس بيه، كل إللى أعرفه عنه أنه تايه، بيدور عليا بس مش عارف يوصللى، بس الاهم من ده إنه مش إسلام ولا عصام…
وائل بلع ريقه بالعافيه وبتوتر: إزاى ده ومن إمتى إحساسك ده؟؟؟
نهى بهدوء: من فتره طويله كان دايما الإحساس ده واصلنى مش عارفه إزاى..
وائل بمكر وهو مبتسم: وياترى ده إحساسك ناحية وائل؟؟؟
نهى بهزار: احمم!! وأدركت شهرزاد الصباح فسكتت عن الكلام المباح…..
وائل ضحك جامد أوى، وبهزار: منصوووووور…….
نهى بضحك: مولاى، سبنى لبكره الله يخليك……
وائل ونهى ضحكوا جامد لدرجه انهم بيمسحوا عنيهم من كتر ما دمعت من الضحك… نهى بعد ما مسحت دموعها: يلا بيتك بقى… كفايه عليك كده إنهارده…
وائل بحب: ماشى يا قلبى أول ما تصحى كلمينى علطول…. deal؟؟؟
نهى بحب: deal…سلام
وائل بحب: سلام يا قلبى أنا…
وائل قفل مع نهى وفرحت قلبه مش سايعاه… حاسس كأنه في دنيا تانيه خااالص… عمره ما عاشها قبل كده… طريقه هزارهم مع بعض طريقة غلاستهم وجنانهم عجباه، حاسس كأنه كل لحظه مع شخصيه مجنونه وجديده… فعلا مش عارف كمان شويه هتكون إيه، وهو متشوق جدا لما يتجوزوا ويعيشوا مع بعض فى بيت واحد… هو بيتمنى الفتره دى تعدى بسرعه عشان يكتشف حياته معاها… لحظات عدت وقطع عليه أفكاره تليفون محمد ليه..
وائل بإبتسامه: الو… إزيك يا محمد….
محمد بغيظ منه: انت يلا! مش قولت هتكلمنى بليل… تليفونك مشغول مع مين؟؟؟
وائل إنفجار من الضحك، ومحمد متغاظ أوى منه… فوائل بيقوله وهو بيمسح دموعه من الضحك: غيرانه يا قطتى…ماتزعليش… كنت مع خاطبتى….
محمد ضحك جامد أوى: اه يا واطى… من لقى احبابه نسى أصحابه…
محمد و وائل ضحكوا جامد… شويه ومحمد بيقول لوائل: بمناسبه أصحابه مش هتقول لمروان وشادى؟؟؟
وائل بإبتسامه: طبعا هقولهم… بكره هكلمهم واعزمهم على يوم الخميس….
محمد بجديه: المهم عايز أعرف سيادتك كنت مش طايق نفسك ولا طايقنى الصبح ليه؟؟؟
وائل بتنهيده: بسببك إمبارح نهى قلبت عليا و إتخانقنا…
محمد بصدمه: ها!!! ليه بقى ؟؟؟
وائل حكى لمحمد إللى حصل، ومحمد فضل يضحك عليه جامد، وائل بغيظ: تصدق أنا غلطان إنى حكتلك…
محمد بيمسح دموعه من الضحك: انت فعلا غلطان…. يعنى حبكت تفتكر كلامى فى وقت زى ده… ده انت طلعت قفل بجد…
وائل ضحك هو كمان : تصدق أنا غلطان إنى بسمع لواحد زيك….
محمد بهدوء: يا بنى فى حاجات لازم تاخد بالك منها… الستات دول مجانين ومخابيل… زى ما عمنا أبو الليف قال عليهم ” دولا مجانين “…
وائل بضحك: أبو إيه يا خويا؟؟؟
محمد بضحك: أبو الليف… ما تقلقش هتقعد أسبوع عسل وسكر وبعد كده هتقعد جنبنا على القهوه وتسمع أبو الليف معانا…
وائل و محمد فضلوا يضحكوا ويهزروا…. شويه وخلصوا مكالمتهم وقفلوا مع بعض…
نهى بعد ما قفلت مع وائل إتصلت بولاء وحكتلها على إللى حصل مع وائل وأنهم اشتروا الشبكه، و حكتلها على موضوع جيهان ومنار…
ولاء بغيظ: تصدقى يا نهى أنا لو كنت معاكم يوم الجمعه مش بعيد كنت ولعت فى البت جيهان دى…. دى بت بارده وقليلة الذوق… بس العيب مش عليها.. العيب على…
نهى قطعت كلامها: من غير ما تكملى يا ولاء… أنا عارفه أن الغلط عند اونكل فادى… وبعد إللى وائل حكاه عرفت ليه هو سكت ودافع عنها…
ولاء بغيظه: أنتى بتديله مبرر؟؟
نهى بإستنكار: لأ طبعا… أنا مش موافقه ولا قابله إللى عمله… أنا متضايقه و زعلانه منه… هو عمره ما هيتغير، والأهم من كده دلوقتى إنى كل ما بصفى من ناحيته بيرجع أسوء من إللى فات… وإللى هيزيد معاه إنى اتغيرت وبقيت أرد عليه… وده منرفزه ومضايقه أكتر… بس بصراحه مبقاش فارق معايا يزعل ولا لأ… بقى كل إللى يهمنى راحتى وبس…
ولاء بإبتسامه: إللى حصلك ده يا نهى قواكى أكتر من الأول….
نهى بتأكيد: فعلا يا ولاء ده حقيقى… نهى بجديه: المهم حضرتك ما تتأخريش عليا يوم الخميس تعملى حسابك تصحى تكونى عندى أنت والعيال… و أحمد باشا يجى براحته… فاهمه يا هانم….
ولاء بإبتسامه: طبعا يا مزتى… وخصوصا لازم أستعد لمنار هانم… بصراحه أنا مستحلفالها… اصلى أنا عارفه أمك… هتعمل خاطر لأخوها… بس وحياتك ما عتقاهم….
نهى وولاء فضلوا يضحكوا ويهزروا… شويه وبعدين قفلوا مع بعض…
تانى يوم…
نهى صحيت متأخره، وبصت فى تليفونها لقت رسايل كتيره من وائل… إبتسمت بحب وبدأت تقرأ فى الرسايل… بعد ما خلصتهم إتصلت بيه…
وائل كان قاعد مع محمد فى الكافيه لما تليفونه رن بأغنية أسبانيا إسمها “ve y dile ” لمغنى اسمه “nyno Varga” ( الاغنيه فعلا حلوه…. اسمعوها، بتتكلم عن الواحده تسيب الماضى و ماتتمسكش بيه و وتتحرر من أذى العلاقه دى و تشوف راحتها، لأنها تستاهل الافضل 😉)
وائل عارف إن نهى بتحب الاغنيه دى وهو كمان حب الاغنيه بسببها، فعملها نغمه ليها…. وائل إبتسم أوى ومحمد لاحظ ده فضحك جامد وهو بيقوله: انت وقعت و لا الهوا رماك!!!!
وائل بيضحك جامد وهو بيقوم عشان يرد على التليفون بعيد عن محمد: و الله يابنى ما أنا شايف…..
محمد و وائل ضحكوا، و وائل راح بعيد، وبمنتهى الحب: صباحك عسل يا عسل..
نهى ضحكت جامد: صباحك بغاشه يا باشا…
وائل ضحك جامد أوى: اه يانى منك يا مجنونة قلبى…. بذمتك شفتى رومانسيه زينا كده..
نهى بتضحك جامد: شكلك هتعودنى على الدلع ده، ولو بطالته، مش بعيد تلاقينى عامله جناية…
وائل ضحك بهستيريا: اه يا قلبى يانى منك… لمضه ومش هعرف أخد حق ولا باطل معاكى… المهم عامله إيه انهارده يا قلبى أنا ؟؟؟
نهى اتنفست بالراحه و بإبتسامه: تمام الحمد لله يا حبيبى… لسه صاحيه وشفت الرسايل…
وائل غمض عنيه وفتحهم، وبتنهيده حب: حبيبى!! تعالى نقلبها كتب كتاب… انا مش قادر أستنى اكتر من كده…. حرام عليكى..
نهى بهدوء: اصبر عليا شويه يا وائل… وسبنى اتدلع عليك براحتى…
وائل بحب: ماشى يا قلبى أنا…. ربنا يصبرنى على بعدك عنى لغاية ما تبقى مراتى…
نهى ضحكت جامد وبتقوله بهزار: كل دى رسايل… أنا مش حمل كده…
وائل بإبتسامه: أعمل إيه… فضلت مستنى تليفونك لقيتك اتأخرتى فى النوم ومردتش أتصل بيكى عشان معملكيش قلق، قلت ابعتلك الرسايل… وائل بمنتهى الرقه: وحشتينى أوى أوى يا نهى… عايز أشوفك، وراكى إيه انهارده؟؟
نهى بإبتسامه هاديه: اممممم! بفكر أنزل أشترى فستان ليا ولندى عشان الخطوبه، بس لسه مش عارفه هنزل فين…
وائل بفرح: ده كده حلو أوى… هخلص شغل وأعدى عليكى نتغدى بره ونشترى الحاجه إللى أنتى عايزها وبالمرة نفسح ندى…. إيه رايك؟؟؟؟
نهى بتفكير: اممم! تمام… هتيجى على إمتى كده؟؟؟
وائل : يعنى ممكن على الساعه ٤ أكون عندك….
نهى بصت فى الساعة، و بعدين قالتله: تمام… أنا هنزل اروح الجيم ساعتين تلاته كده… وأرجع البيت…
وائل بهزار: ماشى يا كوتش، بس إتمرنى بذمه عايزك رامبو…..
نهى بغلاسه: ههههى! ظريف أوى!! لو أنا هبقى رامبو أنت هتبقى إيه ؟؟؟
وائل برخامه: هبقى هولاكو….
نهى و وائل ضحكوا جامد… وبعد ما هديوا شويه، نهى بإبتسامه: وائل!! بفكر أكلم حنان واعزمها على خطوبتنا… إيه رأيك؟؟؟؟
وائل بإبتسامه: وماله يا حبيبى…. كلميها واعزميها…
نهى بإحراج: بس معلش يا حبيبى، كنت عايزاك تبقى تعدى عليها وتجبها معاك… هيبقى صعب عليها تيجي لوحدها بليل….
وائل بحب: ومالك بتقوليها بإحراج كده ليه… طبعا يا قلبى أنا، انتى تأمرى وأنا أنفذ…
نهى غمضت عنيها وفتحتم و بحب من جواها: يسلملى قلبك يا سيدى أنا….
محمد كان مركز مع وائل أوى، و ملاحظ تعبيرات وشه وحركاته وضحكته إللى فضحته قدام صاحبه… وفرح من جواه أنه أخيرا صاحبه لقى نصه التانى، واحده تغير حياته وتشقلبها وخلته يعيش أوقات هو نفسه عمره ما تخيل إنه هيجى اليوم إللى يشوفه عايشها بالشكل ده…
وائل غمض عنيه من كلام نهى واخد نفس ورا نفس وكأنه مش لاقى هوا، وجسمه بدأ يترعش ويتوتر…. نهى ما اخدتش بالها هى عملت إيه فيه بكلامها إللى قالته بتلقائيه هو حسه من جواه، هى قالته فعلا بإحساسها وهى صادقه فى مشاعرها ناحيته، فبيحاول يتمالك نفسه، فتح عنيه بتعب: نهى! قبل ما أتحرك من الشركه هكلمك… وائل بهزار عشان يخرج من الحاله إللى نهى حطته فيها: خلى بالك من نفسك، وبلاش تتهورى وتضربى حد، عايزك سليمه من غير إصابات… ماشى يا عم رامبو….
نهى بضحك: حاضر ياسى هولاكو….
وائل بغيظ بس بهزار: ماشى يا نهى أما أشوفك إنهارده… وائل بحب: سلام يا قلبى أنا….
نهى بحب: مع السلامه يا سيدى أنا….
وائل قفل مع نهى… واخد نفس جامد وخرجه جامد وكأنه مكانش بيتنفس… كل ده ومحمد ملاحظ عليه حالته… لما وائل رجع لمحمد، محمد قاله بهزار: تصدق أنا فرحان فيك…
وائل بصله بغيظ: ولا !! لم نفسك الموضوع مش ناقصك، كفايه إللى الهانم عملاه فيها…
محمد بيضحك جامد: والله و طبيت يا وائل….
وائل أبتدى يهدى من جواه، وضحك جامد على كلام محمد، بعد ما هديوا شويه من الضحك، وائل كلم شادى وعزمه على خطوبته، وشادى بفرحه: ياااااه! أخيرا ياض… والله ووقعت ومحدش سمى عليك….
وائل بضحك: مالكوا فرحانين فيا كدا ليه… محسسينى كأنى كنت قاعد على قلبكوا….
شادي بهزار: بصراحه أنا فرحان فيك… إشمعنى إحنا نتدبس لوحدنا… وانت الوحيد إللى فينا بره القفص الزوجي…
وائل بضحك: أدينى دخلت القفص برجليا…
شادى بحماس: ولا! أنا عايز أعرف عرفتها إمتى وإزاى…
وائل بص لمحمد إللى كان سامع مكالمته مع شادى، وإستغرب أوى لما لقى محمد و وائل ضحكوا جامد أوى… فشادى بيقولهم بغيظ: مالك ياض انت وهو!!! بتضحكوا عليا ليه؟؟؟
محمد بيمسح دموعه من الضحك: أبدا أصل وائل إتعرف عليها فى خناقه…
وائل بغيظ ضرب محمد بهزار فى دراعه: ما تلم نفسك ياض، بدل ما اشلفطلك وشك ده…
محمد بضحك: لأ خلاص! وعلى إيه عايز أحضر الخطوبه وأنا سليم…
وائل ضحك، وشادى بغيظ: ما تتكلم أنت…
وائل بحب: هى بتشتغل معانا هنا فى الشركه… بس أدى كل الموضوع. .
شادى بغيظ: بس كده… ماشى يا وائل… اما اشوف وشك…
وائل ضحك وفضل يهزر شويه مع شادى ومحمد وقفل معاه، واتصل بمروان وعزمه على خطوبته، ومحمد مربع إيده و هو عارف مروان هيكون إحساسه أيه لما يعرف… فهو بيحاول يستشف من ملامح وائل رد فعل مروان…
مروان بيحاول يدارى زعله: مبروك يا وائل… إن شاء الله تعالى هنيجى يوم الخميس… مروان بحزن: أبعتلى العنوان وإحنا هنروح على هناك على الساعة ٨…. ماشى…
وائل إستغرب رد فعل مروان، بس متكلمش كتير وأداله العنوان، وقفل معاه بسرعه…
وائل بعد ماقفل مع مروان سكت واتضايق من تصرفه وبص لبعيد… فمحمد بيهديه: وائل….
وائل بصله بهدوء بس من جواه كان زعلان من مروان أوى… و محمد بإبتسامه: متزعلش منه يا وائل!! هو كان نفسه أن سلمى تكون مكان نهى جواك… محمد بيهون عليه: هو مايعرفش نهى بالنسبالك إيه… عشان كده هو زعلان…
وائل أخد نفس جامد وخرجه بالراحه: مش بإيدى يا محمد، وائل إبتسم بحب: نهى مسيطره على قلبى و عقلى وكيانى كله…حتى من قبل ما أعرفها… وائل بص لمحمد وبهزار: مش عارف هى عملالى عمل ولا إيه بالضبط….
محمد و وائل ضحكوا جامد، ومحمد بيقوله برخامه: ولا… خلى عفاريتك بعيد عنى… أنا مش ناقص…
وائل بهزار: ماتقلقش هم هيخافوا منك أصلا….
وائل ومحمد فضلوا يضحكوا ويهزروا مع بعض، ونهى كلمت حنان وعزمتها على خطوبتها، وعرفتها ان وائل هيجبها ويرجعها، حنان فرحت من قلبها أوى إن نهى عزمتها و أهتمت بيها…..
مروان قفل مع وائل وكانت ملامح وشه حزينه، ونسمه لاحظت عليه حزنه، فسألته بإهتمام: مروان!!! مالك يا حبيبى… فيه إيه؟؟؟ وائل كان عايز إيه؟؟؟
مروان بصلها بحزن: هى سلمى فين؟؟؟
نسمه بهدوء: سلمى فى الصيدليه…
مروان سكت، ونسمه سألته بإستغراب: فى إيه يا مروان؟؟؟
مروان بحزن و توتر: وائل عازمنا يوم الخميس على خطوبته…
نسمه بصدمه: إيه!!!! خطوبته!!! طيب إزاي؟؟؟
مروان بصلها بذهول : إزاى!!!! هو إيه ده إللى إزاى!!! واحد وهيخطب… نقوله إزاى تخطب؟؟؟
نسمه بزعل: مقصدش يا مروان… بس إستغربت إكمنه مش بيفكر فى الموضوع ده..
مروان بحزن: و هو فكر فيه… مروان بتنبيه على نسمه: نسمه!! لازم تقولى لسلمى تنسى موضوع وائل ده نهائى، وتشوف حياتها ومستقبلها… فاهمه…
نسمه بحزن: حاضر يا مروان… هقولها إنهارده…
نسمه بتوتر: مروان!! هو أنت هتروح خطوبته؟؟؟
مروان بصدمه: طبعا…. دى من غير مناقشه يا نسمه… مهما كان ده صاحبى وعشره عمر، مش هقدر مروحش.. مروان بحزن: لو مش عايزه تيجى ماتجيش… مروان فكر للحظه، و بعدين قالها بجديه: بصى الأفضل إنك فعلا ماتجيش عشان سلمى ما تتعبش، خليكى قاعده معاها…
نسمه بزعل: ده برده رأيى…
عند فادى….
فادى كان سايب البيت من آخر خانقه إتخانقها مع منار… بس من وقت للتانى كانت ريم وبتحاول ترجعه البيت.. بعد يومين فادى قرر إنه يرجع بيته، دخل البيت لقى ريم خارجه من المطبخ، وبعد ما سلمت عليه.. فادى بيسألها بإهتمام: منار فين؟؟؟
ريم بهدوء: ماما راحت عند رنا، وقالتلى أحضر الغدا عقبال ما تيجى… هى على وصول…
فادى هز دماغه بتمام، ودخل ياخد شاور… وعقبال ما خلص كانت منار رجعت البيت، وأول ما شافته قالتله بهدوء: حمد الله ع السلامة يا فادى…
فادى بصلها بهدوء: الله يسلمك….
منار بتحاول تصلح مع فادى: فادى ما تزعلش منى… أنا مكنش قصدى إنى…..
فادى قطع كلامها بإشاره من إيديه: منار!! مش عايز أسمع كلمه زياده فى الموضوع ده…
منار بغيظ: يا فادى أنا….
فادى بصلها بغضب: لو فتحتى الموضوع ده تانى مش هرجع البيت تانى يا منار…
منار بنرفزه سابتله الأوضه وخرجت بره، وهى بره إفتكرت كلامها مع رنا….
{…..فلاش باااك…….}
رنا أول ما عرفت بخطوبة وائل لنهى من منار فى التليفون: إيه!!!! معقوله!!!! طب إزاى؟؟؟ وجيهان!!! يعنى خلاص كده، جوازها من وائل إنتهى!!!
منار بنرفزه: بقولك أبوكى ساب البيت بسبب الزفته جيهان، تقومى تقولى جوازها من وائل إنتهى!!! أنتى معندكيش دم، مش بتحسي….
رنا بغضب: يا ماما وأنا اعمل إيه… هو كان بإيدى يعنى… ما هى إللى زودتها فى العزومه… ونهى كمان لو ماكنتش رددت عليها كان الموضوع خد وضع تانى….
منار بتأكيد : تصدقى أبوكى عنده حق، حتى لو كانت نهى ماردتش عليها برده وائل ماكنش هيتجوزها…
رنا بغيظ: يا ماما أنتى معايا ولا معاهم، ما هى لو جيهان اشتغلت عند وائل كانت ممكن تكون مكان نهى….
منار غمضت عنيها وبتنهيده: رنا … الجواز مش بالعافيه… اصبري شويه وبعدين نشوف حد تانى ليها…..
رنا بغيظ: طيب هتعملى إيه مع نهى؟؟؟ هتروحى خطوبتها؟؟؟
منار بعصبيه: لأ مش هروح… هتحجج بأى حاجه…
رنا بتنهيده: ماشى يا ماما…
{….. بااااااك…..}
منار بغيظ من فادى: ماشى يا فادى… هسيبك كام يوم تهدى و بعدين نتكلم…
فادى قاعد فى أوضته وبيفكر يعمل إيه مع منى ونهى… هو عارف نفسه إنه غلط فيهم بس كبريائه مانعه أنه يعتذر أو يعدى إللى حصل… ولو هو مارحش خطوبت نهى الأمور هتتأزم أكتر معاهم، ومش بعيد يخسر أخته… فادى اخد نفس جامد وخرجه جامد وغمض عنيه وراح فى النوم….
نهى راحت الجيم، و اتمرنت شوي، و وائل كلمها وهو رايحلها… نهى روحت بيتها و اخدت شاور، ولبست هى و ندى ونزلوا قابلوا وائل اتغدوا مع بعض واشتروا فستانين بلوازمهم ليها ولندى.. بعديها راحوا فاميلى لاند يفسحوا فيها ندى…
سلمى رجعت من شغلها و إستغربت هدوء مروان ونسمه… فبتسأل نسمه بإهتمام: نسمه!! هو أنتى ومروان إتخانقتوا مع بعض؟؟؟
نسمه بصتلها بحزن: لأ يا حبيبتى… إحنا مش متخانقين مع بعض…
سلمى بإستغراب: أمال مالكوا عاملين كده ليه!!! حاسه كان فى حاجه فى البيت ده…
نسمه بلعت ريقها بصعوبه وقالتلها بحزن: بصى يا سلمى فى موضوع عايزه أتكلم معاكى فيه…
سلمى بصتلها بجديه وبغضب: نسمه!! لو جيبالى عريس تانى أنا….
نسمه قطعت كلامها وبجديه من غير أى مقدمات: وائل خطوبته الخميس الجاي يا سلمى….
سلمى بصدمه: إيه!!! بتقولى إيه!!!
نسمه بزعل قالت لسلمى مكالمة وائل لمروان و عزومته ليه…
سلمى بإنهيار ودموعها بتنزل: لأ… لأ…. الكلام ده مش حقيقى…. مش حقيقى… سلمى بصت لنسمه بغضب ودموعها بتنزل منها بغزاره: انتى بتكدبى عليا… صح… انتى بتكدبى عليا… أنتى جيبالى عريس وبتقولى كده عشان أوافق عليه… وأسيب وائل… صح يا نسمه… صح…
نسمه بدموع على أختها وبتقرب منها: حبيبتى … أنا مش بكدب عليكى… لازم تفوقى لنفسك بقى… هو خلاص بقى لواحده تانيه…
سلمى لسه منهاره: لأ… الكلام ده مش حقيقى يا نسمه… سامعه مش حقيقى… سلمى بتمسح دموعها بغضب وعصبيه: انتى بتقولى الخميس الجاى مش كده… يبقى لازم أشوف ده بعينى… لازم أشوفه بعينى…
مروان كان واقف بره بس شايف وسامع كلام سلمى… بص فى الأرض وسكت وهو حزين وموجوع على سلمى… موجوع عليها كأنها بنته مش أخت مراته… هو إللى مربيها بعد وفاه حماه… زعل على حبها إللى من طرف واحد، وهو عارف كويس إن وائل مالوش ذنب فى حبها ليه…
سلمى فضلت تعيط بهستيريا لغايه ما نامت من كتر العياط، و نسمه خرجت لمروان بعد ما سلمى نامت، وسألته بجديه: مروان!! لو سلمى أصرت إنها تروح خطوبته هنعمل إيه ؟؟؟
مروان بحيره وزعل: مش عارف يا نسمه.. حقيقى مش عرف… على العموم لسه فاضل يومين على الموضوع ده من هنا للخميس ربنا يساويها على خير…
الأيام عددت علي أبطالنا…. وجه يوم الخميس……
نهى صحيت من النوم، وهى متوتره وقلقانه وخايفه كأنها أول مره تتخطب… هى فعلا أول مره تتخطب عن حب… نهى بصدمه لنفسها: إيه ده يا نهى!! حب.. انتى بتعترفى إنك بتحبى بجد.. ده أنتى عمرك ما عملتيها مع عصام… عمرك ما اعترفتى لنفسك إنك بتحبيه… نهى إبتسمت لنفسها اوى… وردت على نفسها برده: اه حبيت وائل معرفش إمتى ولا إزاى بس حبيته.. يمكن من جنانه او إهتمام…. او … نهى ضحكت أوى: او يمكن بسبب غلاستنا مع بعض…
نهى فاقت من إللى هى فيه على دخول منى عليها…. منى بنرفزه وعصبيه: يا نهى قومى بقى ورانا حاجات كتير أوى وأنتى لسه نايمه لغاية دلوقتى….
نهى بصت فى تليفونها لقت الساعه ١٢ ونص، ولقت رساله من وائل على الواتس… فإبتسمت لمنى: خلاص يا ماما انا صحيت أهو… هقوم أشوف إيه إللى ورايا….
أمل سابتها وخرجت، نهى فتحت الرساله لقته كاتبلها ” انا جتلك هنا لوحدي وحنتلك وبكرة الوقت يثبتلك بحبك قد اية وبهواك…. ماجبتش حاجة من عندى ده احساسى فى بعدك روحى بتقاسى….. مابرتاحش الا وانا وياك…..
ناديلى…. قلبك أعرفه وأكلمه وأفهمه أن العيون دى بيخطفوا وبيسحروا وبيشغلوا…
ناديلى…. حد أشهده على كل يوم بيك بحلمه….. على كل وعد أنا بوعده و علشان غرامك هعمله…..
ده أنا جيتلك وجوايا حنين زايد… حبيبى ده ربنا رايد أقابلك يبقى بينا معاد…. مافيش ولا نجمة فى سمايا بنور ضيك من الأخر مافيش زيك ولو لفيت بلاد وبلاد”…
أغنيه ” ناديلى ” رامى جمال …
نهى دموعها بتنزل من الفرحه وهى بتقرأ رسالته ليها، وحست إنها طايره فوق سابع سما… نهى بعد ما خلصت الرساله إتصلت بوائل….
وائل أول ما سمع نغمة نهى إبتسم أوى ورد بحب: ألو…..
نهى بدموع الفرح: بحبك  !!!!
وائل قلبه دق جامد بسرعه وبتتنيحه: ها!!! قولتى إيه؟؟؟
نهى بحب ودموعها بتنزل منها بفرح: حبيتك، وبحبك و هفضل أحبك لأخر يوم فى عمرى… يا حبيبى أنا… يا روحى انا…
وائل غمض عنيه وبلع ريقه بالعافيه…. لحظات و فتح عينه وقالها بإبتسامه، و بحب مع دقات قلبه السريعه: نكتب كتابنا إنهارده؟؟؟؟