طع,نات الغد,ر والحب الكاتبة ايمي ج6

كانت سلمى تمسك بالجرنال وهى تقرأ فيه بصمت واخذت تقلب صفحاته بهدوء
وفجأة لفت نظرها خبر غريب فعقدت حاجبيها وهى تدقق فى الخبر واخذت تقرأ التفاصيل
طوت الجرنال وقامت متجهه الى والدتها ونادت عليها:مامى
مامى انتى فين
سمعتها والدتها وجاءت اليها فوجدت سلمى تمسك بالجرنال وفتحته على تلك الصفحة ثم اعطتها الجرنال قائلة:بصى؟؟
شوفى الخبر ده؟؟
نظرت سوسن فى الجريدة واخذت تقرأ الخبر فنظرت الى سلمى بتعجب قائلة:معقول!!
يعنى عمر دلوقت مسجون؟؟
سلمى:ايوة وشكله كده هيقضى بقية حياته فى السجن
بس احسن اما انا فرحانه فيه فرح
قال وكان بيهددنى انه هيقول لسيف كل حاجة
سوسن:ايوة بس كده سمعتنا هتبقى فى الارض متنسيش انه مهما كان من العيلة واللى يمسه يمسنا
ويا ترى اخته بقى خدت خبر ولا لسة
اكيد لو عرفت هترجع من السفر مينفعش تتخلى عن اخوها فى الظروف دى
سلمى:سيبك انتى من الكلام ده
بلا مننا بلا كلام فارغ
وبعدين اخته يعنى هتعمله ايه؟؟
دى مش بعيد تتبرى منه لما تعرف اللى عمله
وبعدين هو كده كده معترف على نفسه يعنى القضية لبساه لبساه
اهو اللى حصل ده وفر عليا المجهود اللى كنت هعمله علشان اخلص منه
اما بقى المحروسة التانية حبيبة القلب فهى كده كده
مرمية فى المستشفى ويا عالم هتعيش ولا لأ
وحتى لو عاشت هتعيش مذلولة بعد اللى عمر عمله فيها
محدش هيقبل يتجوز واحدة حد غلط معاها قبل كده
اما سيف بقى؟؟
فده له عندى مفاجأة بس ايه
هتطلع من نفوخه
بقى انا يضربنى بالطريقة دى ويشمت فيا الخدامين اللى عنده؟
وكمان يرمى الدبلة فى وشى؟؟
انا بقى هعرفه سلمى دى ممكن تعمل فيه ايه
سوسن:انتى ناوية على ايه بالظبط يا سلمى؟؟
اوعى تكونى ناوية تأجريله حد يضربه؟؟
سلمى:تؤ تؤ تؤ
ايه الكلام الفارغ ده
هو انا بتاعة الكلام ده برده
وبعدين سيف مينفعش معاه الكلام ده
دا انا هجزهله حاجة اكبر من كده
حاجة كده تليق بمقامه
ولا ايه؟؟
سوسن:متريحينى بقى وتقولى هتعملى ايه؟
سلمى:مش وقته يا مامى
لما ابقى انفذها هبقى اقولك
الموضوع محتاج شوية تفكير ووقت علشان يتنفذ
بس صدقينى انا مش هيهدالى بال
الا لما انتقم منه واردله كل اللى عمله فيا
سوسن:انا خايفة عليكى يا سلمى
اوعى تعملى اى حاجة من غير ما تقوليلى؟؟
سلمى:متقلقيش يا مامى
بنتك ميتخافش عليها
سوسن:برده متعمليش اى حاجة الا لما ترجعيلى الاول
احنا مش ناقصين مصايب
……………………
استطاع حازم الحصول على اذن بزيارة عمر
جلس حازم فى المكتب منتظرا قدوم عمر فى قلق
بعد قليل ادخله الحارس واغلق الباب
هب حازم واقفا واتجه اليه ليأخذه بالحضن
ضمه بشده وهو يطبطب على ظهره قائلا:ازيك يا عمر عامل ايه
نظر اليه عمر بابتسامة حزينة وقد نبتت لحيته بعض الشئ
قائلا:كنت متأكد انك هتيجى
حازم:هو انا اقدر اتخلى عنك برده يا عمر ده احنا عشرة عمر
جلس عمر واتبعه حازم بالجلوس
نظر اليه عمر بلهفة قائلا:طمنى يا حازم
نيرمين عاملة ايه؟؟
حازم وهو يضع كفه على ركبة عمر مطمئنا اياه:اطمن يا عمر
الحمد لله حالتها بقت احسن
عمر بفرحة:يعنى فاقت؟؟
حازم:لأ مش للدرجة دى يا عمر
هى حالتها بقت احسن بس لسة شوية على ما تفوق
عمر بحزن:اومال اتحسنت ازاى بس؟!!
حازم:يا عمر احنا كنا فين وبقينا فين
انت مشوفتش اللى احنا شوفناه
عمر:انتو!!
انتو مين
حازم:آآآه صحيح ما انت متعرفش ان سيف جه بعد ما قبضوا عليك مباشرة
عمرمحاولا اخفاء حزنه:الحمد لله انه جه
علشان حتى يبقى معاها فى الظروف دى وميسبهاش
حازم:اما احنا اطحطينا فى موقف
قلبنا وقع اول ما الدكتور خرج من عندها وقال انها ماتت
كنا خلاص قلبنا هيقف لكن ربنا ستر
سيف ساعتها كان زى المجنون
كويس انك مكونتش موجود ساعتها متهيألى كان هيجرالك حاجة
عمر:طب ازاى الدكتور يقولكوا كده؟؟
حازم:ماهو الدكتور لفتكرها ماتت لما لقى القلب مش راضى يستجيب خالص
لكن د وليد اللى كان بيحاول معاها قدر ينقذها على آخر لحظة
وطمنا انها فى طريقها للتحسن وان شاء الله هتفوق قريب
تنهد عمر بحزن قائلا:انا السبب
حازم:خلاص بقى يا عمر اللى حصل حصل متحملش نفسك فو طاقتها
عمر:معلش يا حازم انا تاعبك معايا
لكن انت عارف انا ماليش حد غيرك دلوقت
حازم:متقولش كده يا عمر
انت زى اخويا واكتر كمان
عمر:نيرمين وحشتنى اوى يا حازم
نفسى اشوفها
نفسى اطمن عليها
كل اللى بتمناه انها تفوق واترجاها تسامحنى على اللى عملته معاها وبعد كده يحصل اللى يحصل
حازم:ان شاء الله هتفوق وهتسامحك وانت هتخرج من هنا
عمر:اخرج؟؟
ده مستحيل
حازم:ليه بس كده ياعمر خلى املك فى ربنا كبير
عمر:يا حازم انا معترف بكل اللى عملته
ومش هقدر انكر لانى استاهل اللى انا فيه دلوقت
لازم ادفع تمن اللى عملته
خالد جالى هنا وطلب منى انى اغير اقوالى وهو هيقف جنبى وهيحاول يخرجنى من هنا
لكن انا رفضت
حازم بغيظ:ورفضت ليه يا عمر انت عاجبك اللى انت فيه ده
بطل نشوفية دماغك اللى هتوديك فى داهية دى
عمر:يعنى عايزنى اغير اقوالى قدام النيابة؟؟
ماهو حتى لو عملت كده لما يسألوا نيرمين اكيد هتقولهم كل حاجة
حازم:مش يمكن تسامحك؟؟
عمر:تسامحنى؟؟
تسامحنى على ايه ولا ايه ولا ايه
اصلك متعرفش انا عملت فيها ايه
حازم:كويس انك فكرتنى
صحيح
انت قربت منها ياعمر
يعنى …
من الاخر كده لمستها ولا لأ
تنهد عمر بضيق ثم نظر اليه قائلا:بتسأل السؤال ده ليه؟؟
حازم:سيف حالف لينتقم منك ومش هيسيبك وقالى ابلغك انه لو اكتشف انك لمستها هيقتـ,ـلك
والمصيبة انه بيتكلم بجد
عمر باستهزاء:هيقتـ,ـلنى؟؟
طب ما انا كده كده ميت
وبعدين سيف لا هيقتـ,ـلنى ولا هيعمل حاجة
ده مجرد كلام بس من زعله على اللى عملته فيه
سيف قلبه طيب صحيح انا اذيته كتير
بس انا متأكد اننا هنرجع زى الاول فى يوم من الايام
لانه ميقدرش ينسى ابن عمه بسهولة كده
ده احنا كنا زى مانكون روح واحدة
ابتسم بحزن قائلا:صحيح احنا مختلفين فى طريقة تفكيرنا
لكن كنا حاجة واحدة وكيان واحد
نفسى نرجع زى زمان ومنفترقش عن بعض ابدا
دخل الحارس قائلا:الزيارة انتهت
حازم:عمر
خد بالك من نفسك وياريت تسمع كلام خالد صاحبك هو ادرى بمصلحتك
اقترب الحارس وامسك بزراع عمر قائلا:الزيارة انتهت يالا
عمر وهو يخرج:انا هتعرض على النيابة بكره الصبح يا حازم
بلغ المحامى بتاعى يحضر معايا وابقى طمنى على نيرمين
مع السلامة
حازم:حاضر ياعمر
مع السلامة