لست فقط حبيبي بقلم نونة ج1
الفصل الثامن
ياتى يوم الخميس وتذهب نور مع اميرة لحفل عيد ميلاد صافى ويذهب معهم باسم بامر من جده …….
باسم : واوووووووووووووو
ايه الجمال ده كله
مااقدرشى انا على كده
مافيش خروج النهارده
عاوزانى اخرج بيكى كده دول كانوا يخطفوكى منى
اميرة : يخطفوها منك ياخسارة الرجالة وقال معانا راجل قال
باسم : راجل غصب عنك وعلشان الكلمتين دول هنخرج وامرى لله بس امانة عليكم ابقوا سلملولى على جدى وماما وبابا وكل العيلة لانى اكيد هكمل السهرة فى القسم
نور : هههههههههه
طب يلا بقى احنا كده هنتاخر
تصل نور واميرة وباسم لفيلا صافى ……
صافى : يااهلا يااهلا كده الحفلة اكتملت
اميرة : كل سنة وانتى طيبة ياصافى
اتفضلى
صافى : ميرسى اوى ياميرو
نور : كل سنة وانت طيبة ياقمر وعقبال مية سنة
اتفضلى
صافى : ميرسى ميرسى
بس قمر ازاى بقى مابقتشى انا القمر هنا فى وجودك
نور : لاازاى انتى القمر طبعا
باسم : احنا هنقضيها القمر والنجوم ونفضل واقفين كده مش هتقوليلنا اتفضلوا ولا ناخد حاجة نشربها ولا حتى ناكلها شكلنا كده اتقلبنا فى الهدايا
صافى : ياباااااااااااى على لسانك لولا انك جاى مع اميرة ونور كنت وريتك شغلك
باسم : ياشيخة روحى طول عمرك بق
صافى : عاجبك كده يااميرة
اميرة : معلشى ياصافى ماانتى عارفاه وعارفة رخامته وبعدين انتوا زمايل دراسه قدام والداخل بينكم خارج
صافى : طب اتفضلوا اتفضلوا تحبوا تقعدوا فين؟
باسم : انا هقعد فى الحتة اللى هناك دى
الجو هناك طراوة ومليان حلاويات
صافى : اشبع بيهم يااخويا طول عمرك عنيك زايغة
اتفضلى يااميرة
تعالى يانور اعرفك على بابى
اعرفك يابابى نور حفيدة انكل فاروق
اعرفك يانور ببابى شاكر بيه الاسيوطى
نور : اتشرفنا ياافندم
شاكر : الشرف لينا احنا
انا سمعت عنك كتير وكان نفسى اشوفك
نورتى مصر كلها
اتفضلى معانا
نور : ميرسى ياافندم
تجلس نور وسط شاكر ومع مجموعة من اصدقائه جميعهم رجال اعمال ويتحدثون فى امور الشغل والبيزنس ……
نور : اه اه طبعا اكيد هيكون في بينا تعاون كبير
ممكن حضرتك تبعتلى ملف المشروع وان شاء الله ندرسه واقول لحضرتك راييى فى اسرع وقت
شاكر : وهو كذلك هيكون عندك فى اقرب وقت جوز بنتى هو المسئول واللى بيدير اعمالى كلها
تتعرفوا وتدرسوا المشروع سوا
نور : وهو كذلك ياافندم
ممكن استاذن من حضرتك ثوانى
شاكر : اه طبعا اتفضلى البيت بيتك واكتر
نور : ميرسى عن اذنكم
تذهب نور لاميرة التى كانت جالسة مع صافى وبعد الصديقات
نور : كده بردوا سيبانى لوحدى وسط جلسة العمل المستمر دى
اميرة : وانا مالى ماانتى اللى قعدتى معاهم وشكلكوا اندمجتوا ماانا عارفة البيزنس الكلام فيه مابيخلصش وانا مش قد وجع الدماغ ده هيبقى فى الشركة والحفلات كمان
نور : ماشى ياندلة خليكى فكراها
صافى : تشربى حاجة يانور
نور : ميرسى مالوش لزوم
صافى : ايه رايك فى الحفلة واالفيلا بتاعتنا
هى اكيد مش قد قصر انكل فاروق
نور : لا ازاى تقولى كده الحفلة حلوة اوى والفيلا جميلة وشيك جدا
ربنا يحفظها ويحفظ اهلها
صافى : ميرسى ياحبيبتى كلك زوق
نور : امال فين ميدو
صافى : ميدو ؟ ميدو مين ؟
نور : اقصد احمد الصغير اصله وحشنى ونفسى اشوفه اوى
صافى : ااااااااااااه
انتى لسه فاكراه
صحيح انا عرفت انكم زورتوه فى المستشفى
سورى ماكنتش موجودة كان عندى مشوار مهم جدا
نور : لاولايهمك
صافى : احمد نايم اصله تعبان شوية
مش قولتلكوا يومها شيطان معجون بماية عفاريت مش بيبطل شقاوة ابدا واخرتها نايم فوق عنده نزلة برد جامدة شوية
نور : لا الف سلامة عليه
ربنا يشفيه ويحفظهولك يارب
صافى : ميرسى ياحبيبتى
نور : هو انا ممكن اشوفه
صافى : طبعا ياحبيبتى البيت بيتك
اتفضلى معايا
تصعد نور مع صافى لغرفة الصغير
صافى : طب عن اذنك انا يانور هسيبك ثوانى بس هخش اشوف باباه فى الاوضة اللى جنبك واجيلك على طول
نور : اتفضلى
تقترب نور من احمد النائم
نور : الف سلامة عليك ياحبيبى
تضع يدها على جبهته
ياربى انت سخن اوى ازاى سايبينك كده
تلتفت نور لتجد بجانبها ترمومتر فتاخذه وتقيس حرارته لتجدها 38.5
ياربى الطف
مافيش حد هنا
تخرج نور وتجد احدى الخادمات الفيلا فتناديها وتطلب منها ان تحضر لها طبق به ماء بارد وقطعة قماش فتسرع الخادمة فى تلبيه طلبها
تقوم نور بعمل كمادات خافضة للحرارة للطفل وتجد بجانبه دوائه الخاص
نور : هو اخد الدوا ده اخر مرة امتى
الخادمة : مش عارفة ياافندم
الدادة بتاعته هى اللى تعرف
نور : وهى فين دى ؟
الخادمة : ثوانى ياافندم هشوفها لحضرتك حالا
تستمر نور فى وضع الكمادات
الدادة : ياخبر والله غصب عنى نسيت اديله الدوا فى ميعاده والله يانور هانم
نور : يعنى الولد مااخدشى دواه
الدادة : لا ياهانم كان المفروض اديهوله من ساعتين وراح عليا خالص
نور : راح عليكى ؟ انتى ماعندكش قلب
ربنا يسامحك ياشيخة
تاخذ نور الدواء وتعطيه لاحمد
………………………………………….. ………………………………………….. ……….
فى الغرفة الاخرى
صافى : يعنى مصمم ماتنزلشى عيد ميلادى يارءوف
رءوف : عيد ميلادك ايه ؟ انتى هتضحكى عليا انا كمان ؟
عيد ميلادك فات من زمان ياهانم انتى لحد دلوقتى عاملة ولا خمس حفلات عيد ميلاد فى سنة واحدة
صافى : اعمل خمسة والا مية وانت ده ضارك فى ايه بقى والا انت دافع حاجة من جيبك ياسى رءوف ماكلها من فلوس بابى
رءوف : وهو انا مايضرنيش غير الفلوس
انتى مش واخدة بالك ان البيت ده فى زوج محتاج اهتمامك ولو عشر اهتمامك بالحفلات والسهرات
والولد اللى نايم تعبان فى اوضته ده وحضرتك ولاعندك اى احساس ونازلة تعملى حفلة
صافى : وعاوزنى اعمله ايه بقى ان شاء الله
اقعد جنبه امرضه واداديه مامعاه الدادة بتاعته والا عاوزنى على اخر الزمن صافى هانم تشتغل داداة وممرضة
رءوف : لا فعلا ماينفعشى صافى هانم تشتغل دادة وممرضة
لان ده محتاج ناس عندهم دم واحساس لكن انتى معدومة من الاتنين
انا مابقتشى قادر استحمل العيشة دى ولا قادر استحمل تصرفاتك
انا خارج وسايبلك البيت كله ليكى ولاصحابك وحفلاتك
صافى : امشى يارءوف بس خليك عارف انك انت اللى هترجع لانك مالكش مكان تانى تروح فيه ولاهتقدر تستغنى عن المنصب ولا شركات واموال بابى
يخرج رءوف غاضبا مغلقا الباب خلفه بقوة ويتجه لخارج الفيلا دون ان يلقى النظر على اى احد من الموجودين وياخذ سيارته ويذهب بها …………….
………………………………………….. …………………………..
باسم : هى نور فين يااميرة ؟
اميرة : مش عارفة من شوية كده طلعت مع صافى تشوف احمد بس اتاخروا اوى ولسه مانزلتش
ههههههههه تلاقيها نسيت نفسها وقاعدة تلعب معاه
باسم : اهى صافى جاية هناك اههيه … بس دى نازلة لوحدها
امال فين نور ياصافى
صافى : هى لسه مانزلتش ؟
اميرة : لامانزلتش من ساعة ماطلعت معاكى
صافى : انا سبتها مع احمد ودخلت لرءوف وبعدين نزلت تصورت ان زمانها نزلت
اميرة : نور دى مش معقولة ……. بتحب الاطفال بطريقة
زمانها ناسية نفسها وبتلعب مع احمد
صافى : تلعب ؟ هى ليها صبر للعب مع الاطفال لفترة طويلة كده impossible
باسم: انا همشى ياميرو بدل مايجرالى حاجة وانا لسه شباب وصغير يااختى وادينى اطمنت على نور
………………………………………………………………….
تظل نور بجانب احمد قرابة الثلاث ساعات متواصلة حتى تنخفض حرارته ويفتح عينيه …
نور : اخيراااااا …. رعبتنى عليك ياعم ميدو
احمد : نوووووور
نور : ايوه نور ياسى ميدو
وحشتنى اوى ……… كده تنسى اصحابك وماتسالشى عليا
احمد : انا تعبان يانور
نور : الف سلامة عليك ياحبيبى
انت زى الفل ويوم والا اتنين وهتنزل تجرى وتلعب وتبقى زى الحصان …. ماتخافشى ياحبيبى
احمد : عاوز انااااام
نور : تغلق مصباح النور الذى بجانب سريره ويبقى فقط ضوء خفيف
نور : نام ياحبيبى تحب احكيلك حدوته
احمد : اه
تبدا نور فى سرد حدوتة لاحمد وهى تملس بيديها على جبينه وشعره والذى كعادة كل الاطفال ينام من منتصف الحدوته ……
نور : الحمد لله …احمدك واشكر فضلك يارب
وتضع يدها على جبهته وتقرا بصوت منخفض بعض ايات الله وتسال الله ان يشفيه ويحفظه…..
ثم تلتف الى الدادة التى لازالت موجودة معها هى والخادمة….
الدادة : ارجوكى يانور هانم ماتجبيش سيرة لصافى هانم ولا لرءوف بيه دول ممكن يقطعوا عيشى وانا محتاجة اوى للشغل ده
ارجوكى
نور : بس انتى كنت هتضيعى الولد المسكين ده باهمالك ليه وكان ممكن الف بعد الشر يجراله حاجة بلاش اقولك راعى شغلك وان دى امانة مامنينك عليها اصحاب البيت
لكن الطفل البرئ ده ماعندكيش قلب علشان تسبيه كده وهو مريض
الدادة : اوعدك عمرى ماهكرر غلطتى دى تانى ابدا وهاخد بالى منه كويس اوى
بس ارجوكى يانور هانم مايرضكيش عيشى يتقطع وابقى فى الشارع انا مسئولة عن عيلة كاملة عايشة من مرتبى اللى باخده هنا
ارجوكى ياهانم
نور : _____________
خلاص انا مش هقول لحد حاجة المرة دى بس هتوعدينى وتقسمى انك هتهتمى بالولد وتراعيه كابنك واكتر ولو فى يوم خالفتى الوعد والقسم ده وعرفت وقتها مش هقول لصافى بس.. انا وقتها هازيكى انا بنفسى
ياريت ماتضطرنيش انى اعمل كده
الدادة : اوعدك واقسم بالله العلى العظيم مش هتكرر تانى وهاخد بالى منه كويس واراعيه
نور : خلاص اتفقنا
…………………………………….
تنزل نور للحفلة…….
اميرة : ايه ده يانور انتى عارفة الساعة بقت كام دلوقتى؟ انا كنت لسه هطلعلك ده معظم الناس مشيت
نور : معلشى يااميرة ماخدتش بالى ان الوقت عدى اوى كده
اميرة : طب يلا بينا بقى احسن انتى فوق مهيصة مع سى احمد وانا هنا خلاص قربت اتخنق واطق من صافى واصحابها
نور : هههههههه ماشى
امال فين باسم ؟
اميرة : اهوه مع البنات هناك اهوه ياستى
ماكل واحد فيكوا شاف راحته مع الحاجة اللى بيحبها وانا اللى اتدبست لوحدى مع صافى وتقل دمها
نور : هههههههههههه معلشى حقك عليا عندى دى
……………………………………………………..
تصل نور مع اميرة وباسم لمنزلهم ويجدوا فى بهو الفيلا عصام فى استقبالهم ………
عصام : والله مالسه بدرى مستعجلين ليه ماكملتوش السهرة للصبح ليه؟؟؟
باسم : ايه اللى بتقوله ده ؟ شايفهم راجعين لوحدهم ؟ مش معاهم راجل والا انا مش مالى عينيك والا ايه؟
عصام : لاراجل اوى اللى يسهر البنات بره لوش الصبح يبقى راجل اوى
باسم : راعى الفاظك ياعصام وخد بالك كويس من كلامك و…
نور : باسم
خلاص هتتخانقوا دلوقتى هتصحوا اللى فى البيت ماينفعشى كده
سورى ياعصام انا اللى اخرتهم من غير مااقصد
عصام : لازم تعرفى ياهانم ان البيت هنا ليه اصول ولازم تحترم والسرمحة والسهر لوش الفجر لو كنتى متعودة عليه قبل كده فها مش هينفعوا هنا ولو متخيلة ان جدك مريض فى سريره يبقى مافيش هنا رجالة تعرف ازاى تحافظ على البيت تبقى غلطانة اوى
نور : انت اانسان قليل الادب
وتصفعه على خده بقوة وتتركهم وتذهب لغرفتها وسط زهول الجميع…………
