العانس بقلم نوني الهواري ج٢ من الفصول

الفصل الثاني عشر
كان ادم يساعد نسرين في معرفة اماكن الاشياء في المطبخ ونادية على وجهها ابتسامة كبيرة وسعادة تتراقص في عيناها تراقبهم في هدوء وهي تكاد ان تطير من شدة سعادتها اخيرا ابنها تزوج وهو في قمة سعادته وعلى وجهه ابتسامة رائعة وعيونه تلمع بفرحة كبيرة فهي اول مرة تراه سعيد لهذه الدرجة فهي ترى الحب يملأ عيونه لنسرين وهي ايضا سعيدة لان نسرين طيبة ودخلت قلبها فعلا واحبتها كثيرا وتتمنى ان يعيشوا في سعادة دائمة فاقت من شرودها على صوت مجيدة التي تنظر لنسرين بأشمئزاز وتمطت جانب شفتيها وكأنها لاتعجبها ..هو احنا بقينا الضيوف قاعدين برا والاغراب قاعدين في المطبخ هي الدنيا انقلب حالها خلاص
نادية استغربت من طريقة كلامها ولم يعجبها نظراتها لنسرين وارادت ان تفهمها بهدوء ان الوضع تغير ..اغراب ايه مفيش حد غريب دي نسرين مرات ادم وهي صاحبة البيت وهتعيش فيه لازم تتعود علي كل حاجة فيه
لم يعجب مجيدة رد نادية وحركت فمها يمين ويسار وقلبت عيونها بملل
نظرت نسرين ارضا فنظرات مجيدها لها وطريقة كلامها تعني انها قد وضعتها في رأسها ولن تتركها في حالها
اما ادم شعر بالغضب من كلام خالته فعقد حاجبيه واحمرت عيناه وضغط على اسنانه ولا يعلم لما كلمتهم والدته فهذه زيارة نسرين الاولى وكان يود ان يكون على حريته مع امه وزوجته
نظرت نادية ل ادم وجدت ان ملامحه تغيرت واختفت ابتسامته وحل مكانها الغضب ونظرت ل نسرين وجدت وجهها احمر من الإحراج
فكرت نادية قليلا واردت امتصاص التوتر بهدوء..خلاص يامجيدة ولاتزعلي تعالي نقعد احنا برا ونتكلم شوية
مجيدة نظرت ل ادم..وانت مش طالع معنا
ادم بنفاذ صبر..لأ هساعد نسرين
مجيدة مطت جانب شفتيها بأبتسامة ساخرة وقالت بتهكم..انت اللي هتساعدها تعالا انت اقعد معنا وغادة تساعدها
نظرت نادية ل نسرين نظرة اسف ونظرت ل ادم بمعنى معلش يوم ويعدي
خرج ادم وهو يكاد ينفجر من الغضب وذهب معهم الى الصالة حيث تجلس غادة التي على وجهها ابتسامة كبيرة مستفزة لان امها نجحت في ابعاد ادم وخالتها عن نسرين
مجيدة نظرت لها وغمزت لها ..قومي ياغادة ساعدي اسمها ايه اللي في المطبخ بدل خالتك وادم
غادة قامت مسرعة من مكانها وعلى وجهها بأبتسامة مستفزة ..حاضر ياماما
وتحركت من ناحية ادم وخبطت فيه متعمدة وقالت..اسفة مكنش قصدي
ادم بحدة وغيظ فهي دائما تتعمد فعل هذا نظر بعيد عنها..انتي مش هتبطلي حركاتك دي
مجيدة رفعت حاجبيها وتصنعت الدهشة ..حركات ايه ياادم دا بدل ما تسندها دي كانت هتوقع تقول حركات هو احنا بتوع حركات بردو
نادية حاولت تهدئة الموقف ..خلاص بقى يامجيدة انتي عارفة ان ادم مش هيسندها ولا هيلمسها
ونظرت ل ادم..اقعد يا ادم
جلس وهو يكاد ينفجر من الغضب وهو يفكر في نسرين كان مخطط ليوم سعيد لكن للاسف وجاء في باله لماذا وافقت غادة على مساعدة نسرين فهي دائما تأتي مع خالته ولا تساعد امه مرة من المرات فلماذا الان فاق من شروده على صوت مجيدة التي على وجهها ابتسامة غريبة..انا هروح اشرب وقامت من مكانها وذهبت الى المطبخ
انتهز ادم الفرصة وسأل امه..ليه ياماما كلمتيهم انهاردة ماهما دايما هنا انا كان نفسي اكون براحتي معاكي انتي ونسرين
نادية..والله يابني ماكلمتهم انا بس قولت لخالتك امبارح واحنا في العربية قبل انت ما تنزل اني بفكر اعزم نسرين على الغدا بس
ادم نظر لها ..وطب وانتي عاجبك اللي بيحصل دا
ناديةربطت على ركبته ..معلش يا حبيبي يوم ويعدي
………….
في المطبخ
غادة تجلس على كرسي تراقب نسرين وهي واضعة قدم فوق الاخرى وتنظر لها من فوق لتحت
اما نسرين لا تعيرها اهتماما يكفيها حب ادم لها ومعاملة نادية لها ولخاطرهم عليها تحمل مجيدة وابنتها فاقت من شرودها على صوت مجيدة وابتسامتها المستفزة وقالت بتعالي وتكبر ..انتي جبيلي كوباية مية بسرعة
نظرت لها نسرين واشارت على نفسها..انا حضرتك بتكلميني انا
مجيدة رفعت حاجبيها ومطت جانب شفتيها ..ايوة انتي اومال خيالك
نسرين بأبتسامة هادئة ..لا ابدا اصل انا اول مرة ادخل المطبخ دا وعرفت فيه حاجات بسيطة عشان كدا فكرت ان الكلام مش ليا واحضرت كوب وملاءته ومدته لها
نظرت مجيدة للكوب ومطت شفتيها بأشمئزاز كأنها رأت شئ مقرف ثم نظرت لنسرين وقالت..ايه دا مية من الحنفية
نسرين هزت رأسها بهدوء..ايوة اومال حضرتك بتشربي منين
مجيدة..طبعا ماانتي واخدة عليها وفاكرة ان كل الناس زيكم
شعرت نسرين بالاهانة وضمت شفتيها في محاولة لمنع دموعها من النزول لكنها لم ترد خاصة عندما رأت ادم يقف على باب المطبخ
تقدم ادم حتى اصبح امام خالته ونظر لها بنفاذ صبر..خالتي كل دا بتشربي
مجيدة بأبتسامة زائفة..ايوة ياحبيبي شربت في حاجة

ادم تنهد بضيق فهو سمع كلامها ورأى طريقة تعاملها مع نسرين ..لا ابدا ماما بتسأل عليكي ونظر لكوب الماء واخذه وسم بالله وشربه
نظرت له مجيدة بأستغراب من فعلته..انت بتشرب من مية الحنفية
ادم تنهد بهدوء …ومالها مية الحنفية في غيرنا بيشربو من الترع على طول نقول الحمد لله وبعدين دا فلتر
تحركت مجيدة كي تخرج اوقفها صوت ادم..خالتي خدي بنتك معاكي ماما عايزاها وهي كدا كدا مش بتعمل حاجة
وقفت غادة عن مكانها وهي في قمة غضبها وخرجت مع امها
لاحظ ادم ان نسرين ساكتة ووجهها حزين كانت تقطع السلطة وغير منتبهة لسـ,ـكين الذي بيدها وهي شاردة في تصرفات مجيدة التي ليس لها مبرر فهي لم تفعل لها شئ وتفكر كيف لها ان تتحملها وتسكت في كل مرة تزورهم فيها فاقت من شرودها على صوت ادم الذي اقترب منها عندما رأها شاردة الذهن والسـ,ـكين جرح اصبعها وهي غير منتبهة..نسرين حاسبي
انتبهت لأصبعها الذي ينزف دما
امسك ادم يدها وقال بصوت يملأه الخوف والقلق عليها ..كدا بردو مش تأخدي بالك ووضع يدها تحت المياه كي يغسل الجرح وقبل يدها بحب..بيوجعك اوي
هزت نسرين رأسها بالنفي بأبتسامة حزينة فهي فعلا لم تشعر بألم ما يؤلمها اكثر هو مايحدث معها وكأنها ليس من حقها الفرح والسعادة
ادم كم ألمه نظرتها الحزينة..مالك يا حبيبتي
نسرين بصوت مخنوق..لا ابدا مفيش حاجة
ادم ..طب انا هروح اجيب لصقة جرح لصبعك
خرج ادم من المطبخ فنزلت دمعة حارة على خد نسرين مسحتها سريعا ..يارب انا مليش غيرك ساعدني وابعد عني مجيدة وبنتها
وسرحت وتخيلت ان مجيدة تعمل معها مثل الروايات وتبعت لها رسائل غراميةمن رقم مجهول على انها حبيبها وترسل ل ادم صور لها مع شخص او تكلف احد ان يتصل بها ويقول لها ان ادم تعبان وتذهب فتجده فخ وهناك احد يخدرها ويأتي ادم يراها في السرير مع احدهم
فاقت من شرودها على صوت ادم وهو يمسك يداها ويلصق اللصقة على اصبعهاوقال..ها ياحبيبتي كدا احسن
قالت بفزع عندما رأته امامها ..والله ياادم انا معملتش حاجة انا مظلومة محصلش حاجة والله
ادم بقلق من شدة فزعها فشكلها اخافه كثيرا عليها ..مالك في ايه
نظرت حولها وكأنها تائهة تنهدت براحة عندما انتبهت انها في المطبخ ومارأتها مجرد تخيل ولم يحدث منه شئ..هااا لأمفيش انا شكلي سرحت شوية
نظر لها وجد وجهها اصفر والعرق الذي يملأ وجهها كأنها كانت تجري ويبدو عليها الخوف اقترب منها ..طب كنتي سرحانة في ايه
نسرين ببراءة مثل الاطفال حكت له ما تخيلته
ضحك ادم على تفكيرها وقال بمرح..هي الروايات كمان واكلة دماغك مش كفاية الافلام امسك يدها بين يداه وظل يحرك اصابعه على يدها كي يشعرها بالراحة والامان وقال وهو ينظر في عيناها وعيونه مليئة بالحب..وانتي تفتكري اني ممكن اصدق حاجة كدا عليكي صحيح خالتي لسانها صعب شوية بس طيبة وعندها بنت يعني استحالة تعمل حاجة زي دي ولا ايه
نسرين شعرت بالراحة من كلامه ونظرته اراحت فلبها ابتسمت إبتسامة رائعة وقالت ..ربنا يخليك ليا يادومي ريحت قلبي اوي بكلامك دا
اقترب منها ادم ونظر لها نظرة مطولة عاشقة تعبر عن مدى حبه لها ..طب ماتريحي انتي كمان قلبي وتقوليلي
اذابت نظرته قلبها لكنه ادعت انها لم تفهم ..اقول ايه بس
نظر لها بحب..يعني مش عارفة
نسرين بأبتسامة رائعة..انت احلى حاجة في حياتي لأ انت حياتي كلها عارف لما كنت بتكشر في وشي كنت ببقى مضايقة اوي ونفسي اعمل اي حاجة عشان ما اشوفش انك مش طايقني كدا عارف انا كنت هسيب الشغل في المكتب
ادم مط شفتيه بزعل مصطنع وربع يده امام صدره..ياسلام بقى كدا كنتي عايزة تسبيني
نسرين..لا والله بس كنت عايزة اريحك من وشي اللي كل ما تشوفه تتعصب عارف لما كنت مسافر انا كنت زي اللي تاه من اهله وبيدور عليهم مفيش حاجة ليها طعم
أبتسم ادم بمكر ..يعني كنت وحشك
نسرين ..كنت وحشني اوي
ادم اقترب منها بخبث..طب كنتي بتعملي ايه في مكتبي
نسرين نظرت له وابتسمت ..تصدق لو قولتلك مش عارفة دي كانت اول مرة ادخل مكتبك وانت مش موجود اماني يومها اتأخرت وعم مصطفى نزل يجيب اكل كان نفسي ادخل بس والله مالعبتش في حاجة قالت جملتها الاخيرة ببراءة مثل الاطفال
ضحك ادم ضحكة رائعة..يعني افهم من كلامك انك بتحبيني زي مابحبك
هزت نسرين رأسها بنعم عدة مرات
ادم كاد قلبه ان يخرج من مكانه من شدة سعادته فهي اعترفت له بحبها همس امام وجهها فهو قريب منها ..بس انا نفسي اسمعها منك
نسرين بصوت واطي ناعم فأقترابه بهذا الشكل يشعرها وكأنها مخدرة لا تستطيع ان تقاوم..انا بح…….
قاطعها صوت مجيدة الاتي من الصالة..كل دا والاكل ماخلصش
ارتبكت نسرين وفاقت لنفسها وانه قريب منها بهذا الشكل ابتعدت عنه وقالت..شوفت انت بتعطلني وهاخد صفر كبير
اما ادم كاد ينفجر من شدة الغضب ومسح على وجه بغيظ..هو يوم مش فايت انا عارف
حضرت نسرين السفرة ووضعت الطعام ورتبت كل شئ
قامت مجيدة وهي تحرك فمها يمين ويسار ووراءها ابنتها اما نادية فرحت بشكل السفرة وهي مرتبة وشكل الاكل جميل يفتح النفس جلس ادم على رأس الطاولة وعلى يمينه امه وارادت غادة ان تجلس على يساره
ادم بهدوء..دا كرسي نسرين
تحركت غادة وهي تود** نسرين وجلست بجانب امها وبدأوا بالاكل
ناديةبفرح فنسرين ليست فقط طيبة وهادئة وجميلة وطباخة ماهرة فهي زوجة كاملة..ماشاء الله تسلم ايدك يا حبيبتي نفسك حلو اوي في الاكل
نسرين بفرح انها قد اعجبها الاكل..ربنا يخليكي يا ماما.بالهنا والشفا
ادم بأبتسامة ..تسلم ايدك
نسرين بخجل..بالهنا والشفا
غضبت غادة من كلامهم ونكزت امها ..شايفة ياماما
مجيدة بصوت واطي..ولا يهمك وقالت بصوت عالي..اكيد اكلها كويس هو في وحدة في سنها مش بتعرف تطبخ دي اللي في سنها عندها بدل العيل اتنين وتلاتة
صدمت نسرين من كلامها فهي لم تعد تتحمل منها اي كلمة اخرى وضعت الملعقة من يدها وقامت من على السفرة ودخلت البلكونة تبكي
اما ادم نظر لخالته وعقد حاجبيه بغضب ونظر لها نظرة مشتعلة لكن اخلاقه لا تسمح له بالرد عليها واخذ نفسا وزفره بقوة
اما نادية التي شعرت بالاحراج امام نسرين وادم فهي اختها وافعالها لم تعد تتحملها نظرت ل ادم..قوم صالح مراتك
نظرت ل اختها ..اسمعي بقى يامجيدة انا من الصبح وانا ساكتة على كلامك مش عايزة اتكلم عشان متزعليش بس انت زودتيها اوي ومن الاخر كدا انا ماصدقت ان ابني يتجوز وفرحان بعروسته هو حر في اختياره ولو كان عايز يتجوز واحدة تانية كان خدها مهي كانت قدامه
مجيدة اتسعت عيناه بصدمة من كلامها..انتي قصدك ايه
نادية نظرت لها بهدوء..انتي فاهمة مافيش داعي اوضح اكتر من كدا وياريت لما تزوريني تحترمي نسرين لانها زي بنتي بالضبط ومش هسمح لحد يهينها ولو مش هتقدري تتحكمي في نفسك خليكي وابقى ازورك انا
مجيدة شهقت بصدمة واتسعت عيناها بغضب.. .هااا.انتي بتطرديني من بيتك يانادية عشان خاطر دي
نادية بنبرة محذرة ..لوسمحتي دي مرات ابني وليها اسم تناديها به
نظرت مجيدة لغادة..يالا يابنتي اظاهر خلاص خالتك مش عايزانا في بيتها واخذت ابنتها وذهبا
………….
في هذا الوقت دخل ادم على نسرين في البلكونة وجدها جالسة على الكرسي واضعة يدها على وجهها و تبكي بشدة أمسك يدها وازاحها من على وجهها وقال بحزن على حالها..انا اسف
رفعت نظرها له بعيونها الباكية التي يملأها الحزن ..وانت ذنبك ايه
ادم نظر لها نظرة يملأها الاسف..يعني انتي مش زعلانة مني
هزت نسرين رأسها بالنفي
ادم ..طب انا جعان والاكل حلو ممكن تيجي تأكلي معايا
نسرين بأبتسامة هادئة والحزن مخيم على وجهها..مش هقدر روح انت كل بالهنا والشفا وتعالا وصلني عشان عايزة اروح
شعر ادم بحزنها كم مزقت قلبه نظرتها لكن اراد اضحكها وقال بمرح..ايه دا عايزة تمشي على طول دا لسة ماما هتنزل وتعلي صوت التليفزيون وتقفل الباب بالمفتاح و……
قاطعه ضحكها على طريقة كلامه
ادم ضحك هو أيضا ..ايوة كدا خلي الشمس تطلع بدل المطرة دي كلها
واخرج منديل من جيبه واعطاه لها اخذته ومسحت به عيونها
ادم بنبرة حانية يملأها الحب..عارفة لو مكناش في البلكونة كنت مسحتها انا
نظرت نسرين حولها ..بس مفيش حد
ضحك ادم وغمز لها..يعني كنتي عايزاني انا اللي امسحها
في هذا الوقت سمعوا صوت نادية..تعالو بقى انا جعانة وهأكل واسيبكم
دخل ادم وبعده نسرين كأنها تحتمى به لكنها رات نادية بفردها
ادم رفع حاجبيه بأستغراب..اومال خالتي فين
نادية بهدوء..ابدا اتحرجت من اللي عملته ومشيت يالا بقى نأكل الاكل هيبرد وهتأخدي صفر كبير
ضحكت نسرين وبدأوا بالكل وكان يوم رائع عكس بدايته كله ضحك وكلام وحب وود وبعد صلاة المغرب صلت نسرين ونادية وجاء ادم من الجامع وجد نسرين تستعد لذهاب لبيت والدها سلمت على نادية وذهبت مع ادم
………………..
في السيارة
ادم نظر لها ..انا عارف ان اليوم ماكنش……..
قاطعته نسرين..بالعكس اليوم معاك انت وماما نادية كان جميل اوي
ادم بسعادة وابتسامة رائعة على وجهه ..بجد كان جميل
نسرين ..ايوة والله ولو على خالتو مجيدة فأنا مش زعلانة منها انا اهم حد عندي انت وماما نادية
امسك يدها وقبلها بحب..يسلملي حبيبي العاقل
ابتسمت نسرين إبتسامة رائعة..ربنا يخليك ليا حبيبي
ادم بفرح وسعادة لاتوصف ..ايه قولتي ايه
نسرين بكسوف..قولت ربنا يخليك
ادم..يا ايه
نسرين بحب..ياحبيبي
ادم تنهد بحب..ياااه لو تعرفي انا مستني الكلمة دي اسمعها منك من امتى
نسرين اتسعت عيناها بسعادة وابتسامة رائعة على وجهها..من امتى ياروح قلبي
ادم بلع لعابه بصعوبة فنظرتها وصوتها وكلامها حرك مشاعره واذاب قلبه..نسرين حرام عليكي ارحميني ربنا يعدي الأسبوع دا على خير وبسرعة
ضحكت نسرين وخجلت من كلامه
وصلو البيت ودخل معها وهم يتكلموا ويضحكوا وجدوا الجدة طبعا في مكانها سلموا عليها وهي في منتهى السعادة من اجل نسرين
صعدو السلم وهم مازالوا يضحكوا وصلوا لباب شقة والدها وجدوا معنز ينزل من على السلم وما ان رأهم حتى اشتعل غضبا وغيرة وتكاد عيونه تخرج من مكانها من شدة غضبه وعقد حاجبيه بشدة ونظر ل نسرين ولم ينظر ل ادم وكأنه اراد تجاهله..انتي كنتي فين يانسرين لحد دلوقتي انتي خارجة من الصبح
نظرت ارضا لم ترد عليه
بادله ادم نفس نظراته الغاضبة المشتعلة واراد ضربه فهو تجاهله وكأنه لا يراه ووجه كلامه لها لكن تمالك نفسه واكتفى بنظرة حادة وقال بحدة..اولا ماتقولش اسمها كدا لو سمحت ثانيا هي كانت معايا في عندك مانع
معتز مازال على حاله وقال بغضب شديد وصوت عالي ..ايوة عندي مانع لما تكون معاك من الصبح لحد دلوقتي ليه دا كله وكنتوا فين
ادم ابدل نظرته بنظرة باردة جامدة وقال بهدوء عكس ما بداخله من غضب منه ..والله دي مراتي وانا استأذنت من ابوها ممكن افهم ايه مشكلتك
خافت نسرين ان تحدث مشكلة فطرقت على الباب وفتح والدها وسمع جملة ادم الاخيرة ومن شكلهم فهم الموضوع
عزت بهدوء حاول امتصاص غضبهم فشكلهم لايبشر بخير..السلام عليكم
ادم/معتز…وعليكم السلام
عزت ابتسم بهدوء..في ايه ياولاد مالكم
لم يرد اي منهم واكتفو بنظرات نارية قاتلة لبعضهم………