نوفيلا درس العمر بقلم دفنا عمر الجزء الأول
نوفيلا درس العمر بقلم دفنا عمر
الفصل الأول.
______
تَشِب عَلِي قدَّماهَا بِمجْهود وَاضِح تُحَاوِل أن تُعلِّق فَرْع الزِّينة اَلأخِير ، لِتزْفر بِضَجر مُحبَّب لَمِن يُراقبهَا مع قوْلهَا: أوف، مش عارفة اعلق الفرع ده يا عمو، آدم قرب يجي وعايزة اخلص عشان أفاجئه بزينة رمضان.
اِبتسَم العجوز وشاكسهَا: مساكين القصيرين دول بيعانوا، لو كنتي طويلة كانت مشكلتك اتحلت.
رمقتْه بِعتاب مُحَذرَة: والله أزعل منك يا عمو.
أَطلَق ضِحْكاته لِيلاطفهَا بِقوْله: متزعليش بهزر معاكي يا لولو، وسعي انتي وأنا اعلقوا بدالك.
أَعطَته مجالا لِيعْتَلي المقْعد وَيثبِت الفرْع جيِّدًا بِموْضِعه وينْتَهي أخيرًا مِن تَعلِيق الزِّينة بِسائر الجدْران ، فراحتْ تَتَأمَّل تَلألُؤ اللَّمْبات الصَّغيرة الملوَّنة اَلتِي تَضوِي بِتتابع جميل لِتغْمرهَا الفرْحة وَهِي تصيح كأنَّهَا طِفْلَة :: الله يا عمو، الشقة شكلها بقا يجنن ومليانة بهجة ودفى، ده أول رمضان ليا أنا وآدم بعد جوازنا.
تَبسَّم ثَغرُه بِحنان: ربنا يا بنتي يجعله شهر مبارك عليكم ويتقبل منا ومنكم صيامه وقيامه ويجعلنا من عتقاء النار والمغفور لهم.
_ اللهم امين ياعمو.
أسْتأْذنهَا لِيهْبط شَقتَه فِي ذات البناية ، غاب دَقائِق ثُمَّ عاد وَأَمرهَا بِودٍّ: غمضي عيونك يا ليان.
تعجبت: ليه ياعمو؟
_ غمضي بس ومش هتندمي.
اِمْتثَلتْ لِأمْره مُتَحمسَة لِيصلَهَا صَوْت عَبثِه بِكيس بِلاسْتيك كَأنَّه يَخرُج شيْئًا ( فتحي عيونك يا لولو)
فَتحَت عيْناهَا وشهقتْ فَوْر رُؤيَة فَانُوس كبير أنْواره الخلَّابة خَطفَت اِنْتباههَا وَسرَت قلْبهَا بِشدَّة ، لِتقْتَرب وتتحسَّسه بَيْن يديْهَا بِفرْحة وَاضِحة: الله يا عمو، الفانوس الجميل ده عشاني؟
منحهَا نَظرَة أَبوِية حَانِية: أمال عشان مين غيرك يا لولتي، هو انتي فاكرة نفسك مرات ابني وبس؟ ده انتي في معزة بنتي اللي كان نفسي فيها.
اِنْدفَعتْ تَعَانقَه بِتأثُّر وَمَحبَّة خَالِصة مع قوْلهَا: ربنا يخليك لينا يا عمو، دي أول هدية تجيلي في رمضان بعد جوازي.
_ ربنا يهنيكي بيه وعقبال كل سنة.
واستطرد بمرحه المعهود: والسنة الجاية يبقا معاكي عفريت صغير يبوظلك الزينة اللي تعبتي فيها دي كلها.
ضحكت من قلبها وهي تؤمن: اللهم امين، في حياتك يا عمو، وبدال ماتجيب فانوس واحد يبقوا اتنين.
_وأنا هجيب لأغلى من حفيدي.
واستطرد: أنا هنزل بقا شقتي ياليان عشان ارتاح شوية أحسن انتي هديتي حيلي معاكي في تعليق الزينة.
ضحكت مع قولها: سلامتك ياعمو، طب اوعي تنسى السحور، أول ما ارن على حضرتك تطلع عشان نتسحر كلنا سوا.
_ ماشي يا حبيبتي، ابقي سلميلي على آدم لحد ما اشوفه.
ثم توقف قبل أن يبتعد مع تحذيره: أوعي يا لولا تعملي الخشاف، أنا اللي هتسلي فيه بكرة مع باقي العصاير.
_ متقلقش يا عمو، احنا اتفقنا طول رمضان قسم الخشاف والعصاير علي حضرتك،.وأنا عليا عمايل الفطار والسحور.
_________
“ممكن اعرف ليه مش عايزة تفطري معانا أول يوم يا ماما؟”
_ يا حبيبي قولتلك خالتك عازماني ومقدرش اعتذر لها هتزعل مني.
_ بس حضرتك كنتي عارفة أني عازمك اول يوم رمضان.
واستطرد بمكر: عموما أنا عارف ليه بتتهربي من عزومتي يا ست ماما.. مش عايزة تشوفي بابا صح؟
زفرت بحنق: وبعدين معاك يا آدم، مش عايزة اشوفه ليه يعني؟ ده في النهاية والدك وطبيعي نتقابل من وقت للتاني في أي مناسبة.
_ما هي المناسبة جت اهي وحضرتك بتتهربي.
_ ابدا مش بتهرب، بس مش عايزة ازعل خالتك.
ثم لاطفته بربتة حانية علي خده: متزعلش يا حبيبي الأيام جاية كتير، وأعدك مش هعتذر عن عزومتك المرة الجاية.
_ العزومة الجاية مش بعيد أصلا، أنا عازمك تاني يوم رمضان، لأن بعدها حماتي عازماني، هتيجي ولا هتخترعي حجة تاني؟
رضخت لرغبته بالنهاية: خلاص هاجي إن شاء الله.
لثم كفها بتقدير حاني مغمغما: حبيبة قلبي، كل عام وانتي بخير يا أحلي أم في العالم.
منحته ابتسامة راضية: وأنت طيب يا نور عيني.. يلا بقا روح لمراتك، الطريق هيكون زحمة وهتاخد وقت على ما توصل.
_ ماشي، أنا جبتلك كل الياميش وحاجات رمضان، ناقصك أي حاجة تاني؟
_ لا يا حبيبي أنت جبت كل حاجة ربنا يخليك ليا.
_ ويخليكي ياحبيبتي.
__________
