رواية الجـ,ـر.م الأكبر بقلم دفنا عمر الجزء 2
أسترسلت حسناء حديثها دون أن تنتبه لتعبيرات مروان المصدومة، هاتفة!
_لأن عمك وهو لسه طفل رضيع مات بعد ما سابه جدك معاها بيومين بس، وهي معرفتش تتصرف، ازي تبلغ جدك بالمصيبة دي وهو حزين على تدهور صحة مراته، لحد ما فكرة خبيثة سيطرت عليها، إنها هتبدل الولد اللي مات بطفل تاني.. والطفل التاني ده ماكانش غير… ابن اختها الغير شرعي!!!!
ودي كانت صدفة عجيبة وقدرية إن اختها اللي خلفت طفل نتيجة علاقة غير شرعية، ولدت بعد جدتك بيوم واحد، وكانت بتحاول تشوف حل ينقذها من العار ده، لحد ماجت الفرصة إنها تداري فضيحة أختها، وبنفس الوقت ترحم الأم والأب من خبر موت ابنهم! ولأن الأطفال بأول ايامهم شكلهم بيكون متشابه، محدش ابدًا لاحظ الفرق!
وتعافت الأم ورجعت بيتها تاني عشان تفرح بابنها اللي مالحقتش من مرضها تتملى حتى من ملامحه!
أما الأم الأصلية لشاهين، واللي وافقت مجبرة على فكرة اختها عشان تداري فضيحتها، مقدرتش تتحمل بعد ابنها عنها، تعبت فترة طويلة، لحد ما اتوفت وشاهين عمره سنتين.. ومبقاش حد عارف سر شاهين غير خالته نعيمة.. الخدامة!!!
صممت تتجرع شربة ماء اخرى لجفاف حلقها مما سردته، ثم اكملت:
وده فسر قصاد جدك ليه كان دايما حاسس إن شاهين مش حتة منه، واخلاقه مختلفة وشكله مالوش أي علاقه به او بزوجته او اي قريب في العيلة!!
حزن على موت ابنه الرضيع اللي حتى مادفنوش بإيده واترحم عليه.. وحزن إنه عاش في كدبة كبيرة وخدعة شيطانة زي نعيمة، حتى لو اعترفت وهي على شفا الموت، بس ده مايشفعش ليها ابدًا ..!
وطبعا حصل صدام بين جدك وشاهين لما رجع البيت ولاقاه راجع بيطوح من اللي بيشربه، ساعتها اتحكمت فيه مشاعر الكره لإن واحد زيه اتنعم في خيره مكان ابنه اللي مات، وضربه قلم عشان يفوقه من تأثير المشروبات المحرمة، ولأن شاهين كان تقريبًا فاقد الوعي من السُكر رد الضربة لأبوه بقلم خلاه يفقد توازنه ويقع على الأرض، جدك وقتها صعب عليه نفسه وهو مريض قلب ما اتحملش الموقف، وجاتله الأزمة واستغاث بشاهين يجيبله دواه، بس التاني رفض!
قام جدك صارحه بحقيقته إنه ابن زنا من اخت خدامة! وده خلى شاهين يفقد عقله أكتر ويثور ويتهمه بالجنون وصمم أكتر يمنع عنه العلاج وهو بيصرخ ويكذبه، لحد ما فعلا جدك مات!!وكله افتكر موته طبيعي نتيجة أزمة قلبية!
