لفت انتباه بقلم امينة الريحاني ج 2

الفصل العاشر سهى: انت بتضحك عليا ولا على نفسك عايز تقولى انك لحقت اول ما قلتلك انى اتخطبت تحب فى يومين وتخطب كمان يعنى عايز تقنعنى انك حبتها فى يومين ماجد: لا طبعا انا حبيت ريم قبل كده بكتير سهى: يعنى حبتها عليا يعنى انت الى بدأت وخونتنى ماجد: لا طبعا مخونتكيش بدليل انى مخطبتش ريم غير لما الهانم قررت تتخطب سهى: يعنى عايز تقولى انك بطلت تحبنى يا ماجد؟ ماجد: يا سهى حاولى تفهمى انا دلوقتى مبحبش حد غير ريم خطيبتى والى هتبقى مراتى بعد كام يوم سهى بتقرب من ماجد وبتلف دراعها حوالين رقبته سهى: يعنى عايز تقولى انى موحشتكش ماجد اتعصب جدا من حركتها ومسك ايديها الى حوالين رقبته عشان يشيلها لكن هى كان متبتة فيه ودخلت ريم فى الوقت ده وافتكرت ماجد بيحضن سهى ماجد فى صدمة: ريم ! ريم دموعها وقفت فى عينيها وضربات قلبها بقت متسارعة ريم بصوت مكتوم: انا اسفة يا دكتور دخلت فى وقت مش مناسب خرجت تجرى وهى منهارة ماجد: استنى بس يا ريم انتى فاهمة غلط صدقينى لكن ريم جريت وهى منهارة ماجد: منك لله يا شيخة انتى ايه الى عملتيه ده انتى خلتيها افتكرتنى بخونها معاكى سهى: ما تفتكر الى تفتكره واهى تيجى منها وتسيبك ونرجع لبعض يا ماجد ماجد: انتى ايه يا شيخة ازاى كنتى بالغل والانانية دى وانا مشوفتش فيكى كل ده السنين الى فاتت انتى فعلا انسانة مريضة وانا ندمان انى عرفتك فى يوم من الايام سهى: انت رايح فين ماجد: رايح ادور على ريم ولازم ارجعها انا مقدرش اعيش من غيرها بـــــــــــــــــــــــــــاك ماجد بيرجع للواقع ماجد فى نفسه: يا ترى انتى فين يا ريم ويا ترى هتقدرى تصدقينى وتعرفى انى فعلا بحبك وعمرى ما فكرت اخونك ماجد وهو بيلف بالعربية بيلمح ريم وهى قايمة من على الكورنيش بيقف بسرعة بعربيته وبيجرى ناحيتها ماجد: ريم ... استنى يا ريم ريم: عايز منى ايه ماجد: اسمعينى يا ريم انتى فاهمة الموضوع غلط انا اتفاجئت بوجود سهى عندى فى العيادة وهى الى كانت.... ريم: بس بقى يا ماجد ارجوك كفاية لعب بمشاعرى اكتر من كده ماجد: صدقينى يا ريم انا بحبك وعمرى ما هفكر اخونك ريم: اصدقك !!!! زى ما صدقت انك جتلى عشان بتحبنى ماجد: قصدك ايه يا ريم؟ ريم: قصدى انا فهمت كل حاجة يا دكتور انت اتغاظت لما حبيبتك راحت اتخطبت لواحد تانى غيرك فحبيت تثير غيرتها فجيت للهبلة الى بتحبك وخطبتها واهى هتفرح بكلمة بحبك وتريل علطول ما هى واقعة بقى وساعتها سهى حبيبتك الى بجد تتغاظ وترجعلك تانى مش هى دى اللعبة ماجد: ياه يا ريم انتى فكرتى فيها ازاى كده انا عمرى ما فكرت اعمل كده انا مش بالبشاعة دى انا فعلا بحبك ريم بزعيق وعياط: امال ليه خنتنى وانت عارف ان اكتر حاجة بتوجعنى الخيانة دا انت اكتر واحد عارف صدمة امى لما شافت ابويا فى حضن واحدة غيرها تقوم انت تكرر نفس المشهد بكل تفاصيله انت ايه يا اخى حالف لتوجعنى وتعذبنى .انت عارف انا كان منظرى ايه ادام نفسى وانا شيفاك مع حبيبتك الاولى وفى حضنها انت عارف انا حاسة بايه دلوقتى ماجد: مخنتكيش يا ريم صدقينى مخونتكيش سهى الى فرضت نفسها عليا وانتى لو كنتى جيتى بدرى كنتى سمعتينى وانا بقولها ان بحبك انتى وان انتى حبيبتى وهتبقى مراتى وشريكة عمرى ريم: مراتك وشريكة عمرك لا والله كتر خيرك دا كرم كبير منك ريم بتقلع دبلتها وبتديها لماجد فى ايده: اتفضل ماجد: ايه ده يا ريم؟ ريم: دى الحاجة الى كانت ربطاك بيا دلوقتى انت حر تعمل الى انت عايزه وتروح للى انت بتحبها ماجد: يا ريم ارجوكى انا مبحبش غيرك متسبنيش ريم: ارجوك انت بقى كفاية وسبنى احترم نفسى مرة واحدة من ساعة ما عرفتك. كفاية يا ماجد انا من ساعة ما عرفتك وانا بتوجع وبس ريم بتركب عربيتها وبتروح اما ماجد فبيقف باصص للدبلة ومصدوم ومش مصدق نفسه انها سابته فى بيت ريم: ريم اول لما بتروح بتقابل ابوها الى بيقلق اول لما بيشوف شكلها على بقلق: مالك يا ريم؟ وشكلك عامل كده ليه؟ ريم فضلت بصاله فترة : هو انا ينفع اترمى فى حضنك على: طبعا يا حبيبتى ريم اترمت فى حضن ابوها وانهارت فى العياط على: ايه يا بنتى الى مزعلك وعامل فيكى كده انتى اتخنقتى مع خطيبك ريم: ممكن اسالك سؤال يا بابا؟ على: طبعا يا حبيبتى اسالى ريم: انت مكنتش بتحب ماما الله يرحمها ؟ على بصدمة: ليه يا ريم بتقولى كده امك الله يرحمها دى كانت حب حياتى انا محبتش غيرها ولحد دلوقتى عمرى ما قدرت انسى حبها ريم بانهيار: امال ليه خونتها؟ لما انت بتحبها يا بابا ليه خونتها؟ ليه وجعتها الوجع ده كله الى بيحب حد مبيوجعوش انت مش بس وجعتها انت موتها عارف يعنى ايه موتها صدمتها فيك موتتها خيانتك ليها موتتها يا بابا على : غصب عنى يا ريم صدقينى يا بنتى انا عمرى ما فكرت اخون امك بس فى لحظة ضعفت البنت الى امك شافتنى معاها دى كانت بتحاول توقعنى من زمان اوى وانا كنت وفى لامك ومفكرتش فى يوم اخونها لكن فى اللحظة الى امك دخلت علينا فيها كانت اول لحظة اضعف غصب عنى وشيطانى يغلبنى ريم: يعنى المرة الوحيدة الى ضعفت فيها وخونت امى كانت هى نفسها اللحظة الى ضيعت امى على بيحط ايده على وش ريم فى حنان: ايه يا ريم الى فكرك بالموضوع ده بعد كل السنين دى ريم: عشان انا النهاردة بس حسيت بالوجع الى امى حست بيه لما شافت خيانتك ليها النهاردة بس عرفت هى ليه ماتت لما مستحملتش صدمة انها تشوف حبيبها فى حضن واحدة تانية النهاردة انا اتوجعت اوى بس الفرق بينى وبينها انى اتوجعت مرتين مرة ليها ومرة ليا. اهههههههههههههههههه يا امى ياريتنى اموت زيك وارتاح على :بعد الشر عليكى يا ريم ليه يا بنتى بتقولى كده ربنا يديكى الصحة وطول العمر ريم: هعمل ايه بالعمر الى كل الى فيه خيانة وكدب وناس بتمثل على بعض وناس بتوجع بعض على: ممكن تحكيلى الى حصل مع ماجد ؟ ريم: معلش يا بابا بعدين انا محتاجة ارتاااااااااااح بتمر الايام وماجد بيحاول يوصل لريم بكل الطرق لكن هى رافضة تتكلم معاه وعلطول قافلة موبايلها لحد ما ندى صاحبتها جتلها ندى: علفكرة انتى ندلة ممكن اعرف مبترديش عليا ليه؟ ريم: معلش يا ندى مكنتش قادرة اتكلم مع حد. وخصوصا لانى عارفة انتى كنتى هتكلمينى فى ايه ندى: طب يا ريم اسمعيه ماجد بيحبك فعلا انتى متعرفيش حالته بقت عاملة ازاى ريم: ندى ارجوكى انا قفلت الموضوع ده ومش عايزة افتحه تانى ممكن بقى تغيرى الموضوع ندى: ماشى يا ريم الى يريحيك . المهم انا كنت جاية النهاردة اعزمك على فرحى انا وحازم ريم: ايه ده بجد خلاص هتتجوزى. ايوا بقى الاخبار الى تفرح دى الف مبروك يا نودى ندى: عقبالك يا ريم ريم بابتسامة باهتة: ان شاء الله ندى: اوعى تتاخرى عليا ريم: ندى هو انا ينفع محضرش انا بجد مش قادرة اخرج ولا اقابل حد ندى: حتى فرحى يا ريم مش عايزة تحضريه ازاى تبقى صديقة عمرى وتتخلى عنى فى يوم زى ده ريم: ايوا يا ندى بس انتى عارفة..... ندى: انا معرفش غير انى فرحى بعد اسبوع ومن حقى عليكى بعد صداقة العمر دا كله الاقيكى جنبى فى يوم زى ده ريم: حاضر ندى اوعدك انى هاجى ان شاء الله وبيجى يوم فرح ندى فى قاعة افراح: ندى قاعدة جنب حازم فى الكوشة فرحانة وماجد قاعد من ضمن المعازيم بيبص حواليه مستنى ريم تيجى ندى: انا صعبان عليا ماجد اوى يا حازم حازم: تفتكرى ريم هتيجى ندى: معرفش بس انا اكدت عليها ياريت تيجى وتقابله وتديله فرصة تانية حازم: استنى ريم جت هناك اهى بتلمع عين ماجد وبيبتسم اول لما بتدخل ريم القاعة لكن بتروح ابتسامته لما بيشوفها داخلة مع عصام ابن عمها وحاطة ايديها فى ايديه ماجد فى نفسه: ايه ده ....ريم !! الفصل الحادى عشر بتدخل ريم القاعة وايديها فى ايد عصام وسط ذهول كل صحابها وندى وحازم والاهم من كده فى صدمة ماجد . بتروح ريم لحد ندى بتباركلها وتبوسها ريم: الف مبروك يا ندى انا مش مصدقة انك بقيتى عروسة انا بجد فرحنالك اوى ندى: الله يبارك فيكى يا ريم كنت هزعل منك اوى لو مكنتيش جيتى ريم: مقدرش محضرش فرحك يا ندى دا انتى اختى ندى بتهمس لريم: هو ايه الى جاب عصام معاكى وايه الدخلة الى كنتو داخلنها سوا دى ولا كأنكم متجوزين ريم اتعمدت تعلى صوتها وبصت لماجد: انتى بتقولى فيها انا وعصام فعلا اتخطبنا وقريب اوى هنتجوز ندى: ودا من امتى ان شاء الله ريم: مش وقته يا ندى انتى دلوقتى عروسة ركزى فى جوزك الى قاعد جنبك ده وخلينى اروح لعصام عشان قاعد هناك على التربيزة لوحده ريم راحت لعصام وقعدت جنبه على التربيزة واتعمدت ان تربيزتهم تبقى ادام تربيزة ماجد الى كان مراقبهم وعينه متشلتش من عليهم .ريم كمان مقدرش تمنع نظراتها المتقطعة لماجد وتمنعها ازاى وهو حبيبها الوحيد الى محبتش غيره .وبعد شوية بدأت الموسيقى وطلع حازم وندى على المسرح يرقصوا ريم كانت باصة لندى وهى بترقص مع حازم ومن غير ما تحس نظرها راح لحد ماجد وفضلوا باصين لبعض وحلموا هما الاتنين نفس الحلم مع بعض انهم هما العرايس وهما الى بيرقصوا مع بعض كان كل واحد فيهم ضامم التانى بكل ما فيه كأنه خايف ليضيع منه . وفاقوا الاتنين من الحلم الجميل لقوا نفسهم فى الواقع وكل واحد بعيد عن التانى مش فى حضنه واتجمدت الدموع فى عينيهم هما الاتنين. مكنوش يعرفوا ان كان فى الى مراقب نظراتهم لبعض .عصام كان شايف كل نظراتهم لبعض والحزن الى فى عينيهم هما الاتنين وشاف شوقهم لبعض الى كان فاضحهم بص عصام لريم بوجع ورجع بيه الزمن ليومين ورا فـــــــــــــــلاش بـــــــــــــاك عصام قاعد على مكتبه فى الشغل وبتدخل عليه السكرتيرة تبلغه ان فى واحدة عايزة تقابله فبيسمحلها بالدخول وبيتفاجئ انها ريم ريم: ازيك يا عصام عصام ازيك يا ريم انا لما السكرتيرة قالتلى اسمك مصدقش قلت يمكن تشابه اسماء ريم: ليه يعنى ؟ عصام: اخر حاجة كنت اتوقعها انك تجيلى هنا ريم: انت قبل اى حاجة ابن عمى يا عصام عصام: اممم ... تمام اتفضلى اقعدى يا ريم... خير يا ريم اؤمرينى ريم: انا فى الاول يا عصام كنت عايز اعتذرلك عن الطريقة الى كنت بعاملك بيها انا بجد اسفة عصام: لا متتاسفيش على حاجة يا ريم انا الى مكنتش فاهم ان فى حد تانى فى حياتك .هى كانت غلطتى انا الى كنت المفروض اتأكد ان الطريق فاضى قبل ما اقتحم مشاعرك ريم: حد تانى كان فى حياتى!!! عصام: اه ماجد خطيبك الى دافع عنك ساعتها انا فى الاول كنت مستغرب انه كان محموق عشانك كده بس لما اتخطبتوا بعد كده عرفت ان كان فى بينكم ارتباط وانا معرفش . بصراحة عذرته ساعتها فى رد فعله عليا ريم ضحكت بسخرية: انت بقى متخيل انى انا وماجد كنا مرتبطين عشان كده هو اتخانق معاك عصام: اكيد ريم: الموضوع مش كده خالص يا عصام انا وماجد خطوبتنا جت صدفة وفى اقل من يومين مش قصة كبيرة زى ما انت متخيل عصام: حتى لو زى ما بتقولى انتوا دلوقتى مخطوبين والوقت كفيل يكبر شرارة الحب الى فى قلبكم من ناحية بعض ريم: عصام.... انا فسخت خطوبتى عصام: ايه... بتقولى ايه يا ريم ريم: ايه مستغرب ليه بقولك سبت ماجد عصام: ريم... انا مش عارف اقولك ايه بجد ريم: متقولش حاجة يا عصام انا جاية النهاردة اسألك سؤال وتجاوبنى عليه بصراحة؟ عصام: اتفضلى طبعا ريم: انت لسه بتحبنى يا عصام؟ عصام: ريم انا.... ريم: هو السؤال صعب كده انا بسألك لسه بتحبنى ولا لا؟ عصام ساكت ومش عارف يرد عليها ريم قامت وقفت: اظاهر انا غلطت لما جيت انا اسفة عصام: انا لسه بحبك يا ريم وعمرى ما فكرت فى واحدة غيرك ريم: بجد يا عصام ولا كلام وبس عصام: تفتكرى بعد العمر ده كله هيبقى حبى ليكى كلام وبس. ممكن بقى تتفضلى تقعدى وتقوليلى بتسالى ليه ريم: عايز اعرف لسه عايز تتجوزنى ولا خلاص صرفت نظر عصام: انتى بتقولى ايه ؟ ريم: رد عليا يا عصام من فضلت لسه عايز تتجوزنى عصام: طبعا يا ريم دى امنيتى الوحيدة فى حياتى ريم: وانا موافقة يا عصام عصام: موافقة على ايه ريم: موافقة اتجوزك عصام: طب ممكن اعرف ايه الى غير رأيك ريم: اكتشفت ان كلامك كان صح لما قولتلى ان محدش هيقدر يحافظ عليا غيرك لانى من لحمك ومن دمك واكيد هتخاف عليا والاهم من كده انك بتحبنى عصام: طب وماجد خطيبك ريم: ما قلتلك انى فسخت الخطوبة عصام: المهم الى فى القلب يا ريم ريم: حتى الى فى القلب بيتغير يا عصام عصام: خلاص يا ريم انا هجى لعمى بكرة واتفق معاه على كل حاجة ريم: طب ممكن اطلب منك طلب عصام: طبعا يا ريم اؤمرى ريم: ممكن تحضر معايا فرح ندى صاحبتى يوم الخميس عصام: طلب غريب اول مرة تطلبى منى احضر معاكى فرح حد من صحابك ريم: انت ناسى انك دلوقتى بقيت فى حكم خطيبى وكمان عشان مش عايزة اروح لوحدى وارجع بليل عصام: حاضر يا ريم بـــــــــــــــــــــــاك بيرجع عصام للواقع وبيبص لريم الى عينيها تايهة بتحاول تهرب من نظرات ماجد ليها وفى نفس الوقت بتروحله بعينيها غصب عنها ريم: ايه يا عصام سرحان فى ايه؟ عصام: مفيش يا حبيبتى انا كويس ريم: طب مفيش عقبالنا عصام: ربنا يكتبلنا الصالح يا ريم ريم: طب عن اذنك هروح اسلم على صحابى مش هتاخر عليك عصام: خدى راحتك يا حبيبتى بتمشى ريم من ادام عصام وتبعد وبيبص على ماجد بيلاقيه هو كمان بيقوم من مكانه بيبتسم عصام ابتسامة حزينة ريم حست انها مخنوقة مش قادرة تفضل ادام ماجد اكتر من كده شوقها ليه هيموتها وفى نفس الوقت وجودها جنب عصام واجع قلبها هو بيحبها اوى وهى بتحاول تبادله مشاعره بس الامر اصعب مما تخيلت . بيقطع سرحانها صوت ياما هز كيانها وخلى قلبها يدق بسرعة ماجد: جيتى هنا عشان تهربى منى مش كده؟ ريم لفت بصتله شوية وكانت هتمشى وتسيبه لكن مسك دراعها ووقفها ماجد: رايحة فين؟ ريم: عايز ايه تانى يا ماجد. من فضلك سبنى ادخل ماجد: انتى ليه بتعملى كده يا ريم ريم: بعمل ايه ان شاء الله ماجد: انتى عارفة انتى بتعملى ايه كويس ريم: اه .... فهمت قول بقى ان خطوبتى من عصام ابن عمى حرقاك اوى مش متخيل ازاى واحدة تروح من تحت ايديك وتسيبك وتروح لغيرك ماجد: واحدة ! واحدة ايه يا ريم انتى مش بالنسبالى واحدة انتى حبيبتى فاهمة يعنى ايه حبيبتى ريم انا مبحبش غيرك . انتى مش عارفة حياتى عاملة ازاى من غيرك انا مبقاش فى حاجة فى حياتى ليها اى طعم حتى شغلى مش عارف اروحه مش عارف اشتغل عقلى وكيانى كله معاكى. يا ريم انا مش متخيل الحياة من غيرك صدقينى انا عمرى ما تخيلت انى احب بالشكل ده ريم: لو بتحبنى يا ماجد مكنتش خونتنى مكنتش عملت اكتر حاجة بتوجعنى فى حياتى الى بيحب مبيوجعش الى بيحبه الى بيحب بيحافظ على الى بيحبه فى غيابه قبل حضوره ماجد: يا ريم اقسملك انى مخونتكيش انا.... ريم: خلى قسمك لنفسك يا ماجد انا خلاص تعبت مبقتش مستحملة اى اوجاع تانى ارجوك كفاية كده انا قولتهالك اول معرفتك انا مبسامحش فى الخيانة وانت عارف السبب كويس ماجد: وانتى شايفة ان بخطوبتك لعصام حليتى المشكلة ريم: مشكلة ايه يا ماجد . المشكلة كانت فيا انا لانى كنت صممة امشى ورا قلبى وادى قلبى ذلنى ووجعنى اجرب امشى بقى ورا عقلى وبعدين عصام ابن عمى وبيحبنى من زمان وانا عارفة انه هيخاف عليا وعمره ما هيفكر يوجعنى ماجد: بس انتى كده بتظلميه ياريم لما تتجوزيه وانتى بتحبى حد تانى يبقى بتظلميه ريم: ومين قالك انى لسه بحبك دا وهم فى دماغك لوحدك يا دكتور واكيد ادام حب ومشاعر عصام الجميلة دى اكيد مع الوقت هحبه ماجد: يعنى خلاص يا ريم قررتى تنسينى؟ ريم: كفاية لحد كده يا ماجد ارجوك خلينى الملم الى فاضل فيا عشان اعرف اكمل حياتى ماجد بوجع: انا هسيبك يا ريم بس عايز اقولك انا عمرى ما هقدر انساكى ولا عمرى هبطل احبك هتفضلى اهم شخص فى حياتى عن اذنك بيمشى ماجد وريم مبتقدرش تمنع دموعها من النزول هى فعلا بتحبه اكتر من نفسها بس كرامتها منعاها تعترف بده.مكنتش تعرف ان فى الى سامع كل حديثهم وبيتوجع اكتر منهم هما الاتنين عصام بص لريم وغمض عينيه من الوجع كلامهم مع بعض كان بيقطع فى قلبه كأنه خنجر وكان كفيل ياكد كل ظنونه الى كان شاكك فيها بس يا ترى هيرضى يكمل مع ريم بعد الى عرفه وميحرمش نفسه من قربها منه ولا هيقرر يسيبها. الفصل الثانى عشر بتمر الايام وريم بتحاول تقرب من عصام وبتحاول تستجيب لمشاعره وحبه على قد ما تقدر لكن الموضوع كان اصعب مما كانت تتخيل وعصام كان عايش فى حيرة ومش عارف ياخد القرار اما ماجد فحياته بقت باهتة جامدة ونسى تقريبا يعنى ايه ضحك حتى تدريب التنس الى بيعشقه بقى مهمل فيه ومبقاش مركز فيه فى النادى: فى يوم من الايام خرجت ريم مع عصام وراحوا النادى كانت ماشية معاه وحاطة ايديها فى ايديه لكن عينيا كانت بدور على حد . قعدوا الاتنين على تربيزة وكانوا بيتغدوا وبيتكلموا لكن بعد شوية اتفاجئوا بماجد ظهر ادامهم وقعد بعيد عنهم لكن عينه كانت مراقباهم. ريم اول ما شافته حست بقلبها بيدق بسرعة واتلخبطت ومكنتش على بعضها نظرة عينيها لما شافته كانت كلها وجع وماجد كمان كانت باصص عليها بشوق وبوجع فى نفس الوقت . اما عصام فكان شايفهم وحاسس بكل الى بيدور حواليه عصام: ها يا ريم هتفضلى كده لحد امتى؟ ريم انتبهت لنفسها: ها انا معاك يا عصام كنت بتقول ايه؟ عصام بابتسامة باهتة: بقولك هتفضلى كده لحد امتى؟ ريم باستفهام: مش فاهمة يعنى ايه؟ عصام: هتفضلى لامتى بتهربى من الحقيقة ؟ ريم: حقيقة ايه يا عصام انت بتتكلم عن ايه؟ عصام: بتكلم عن ماجد يا ريم ريم: ماجد ! ماله ماجد ! ماجد موضوع واتقفل من حياتى عصام: بس الى شايفه غير كده يا ريم نظرة عينيكى مبتقولش كده ريم: نظرة عينيا بتقول ايه يا عصام عصام: بتقول انك لسه بتحبيه ريم: لو لسه بحبه مكنتش اتخطبتلك عصام: متضحكيش على نفسك يا ريم انا وانتى عارفين انك عمرك ما فكرتى فيا اكتر من انى ابن عمك وبرضه عارفين انتى اد ايه بتحبى ماجد وبتحبيه اوى كمان انا مش عبيط يا ريم عشان اصدق انك نستيه بالسهولة دى عينيكى الى مبتلمعش غير لما بتشوفه غير كده طول الوقت مطفية وحزينة قلبك الى مبيدقش غير وهو موجود حتى لخبطتك وارتباكك الملحوظين اوى فى وجوده . انتى حاولتى بخطوبتك منى تهربى من حبك لماجد كنت فاكرة انك ممكن تنسيه لما تتخطبيلى او على الاقل تهربى من مطاردته ليكى ريم بصتله وسكتت عصام: بصى يا ريم انا صحيح حبيتك ويمكن اكتر ما ماجد حبك بس الحقيقة الواضحة ادامى انك محبتنيش ودا مش بايدك ولا ايدى انا لما كنت بطاردك ومصمم اتجوزك دا لانى كنت عارف ان قلبك خالى مفهوش حد وكان عندى امل اخد مكان فى قلبك لكن طالما قلبك طلع مشغول بحد تانى فانا مليش مكان وصدقينى يا ريم انا كنت اتمنى لو سعادتك تبقى معايا بس للاسف سعادتك مع غيرى مش معايا ريم: حتى لو زى ما بتقول وحتى لو انت قررت تنسحب من حياتى انا خلاص موضوعى انا وماجد فعلا اتقفل وللابد عصام قام من مكانه : صدقينى يا بنت عمى الشخص الى نظراته خرقانى دلوقتى ده بيعشقك مش بيحبك بس وللاسف انتى كمان بتحبيه ونصيحتى ليكى اديله فرصة تانية لاننا نادرا لما الحظ بيحالفنا ونلاقى حد يحبنا ونحبه بصدق وبجد. ومتقلقيش انا هتصرف مع عمى بخصوص ارتباطنا وطبعا مش عايز اقولك انا هفضل فى ضهرك وقت ما تحتاجينى. عن اذنك عصام مشى وساب ريم وهنا بصت ريم من غير ما تقصد ناحية ماجد وقعدت تفكر فى كلام عصام ودموعها خانتها ونزلت. ماجد اول شافها فى الحالة دى قام وكان رايح ناحيتها لكن هى سابته ومشيت قبل ما يجيلها . فى بيت ريم: ريم اول لما دخلت لقت ابوها مستنيها وباصصلها وساكت كانه عرف خبر ملجم لسانه ومتفاجئ بيه وافتكرت من شكله انه عرف ان عصام سابها ريم: مساء الخير يا بابا على:....... ريم: مالك يا بابا؟. لكن قبل ما يتكلم على خرج وليد من الاوضة وليد: كبرتى يا روماااااااااا ريم بصرخة وفرحة : ولييييد جريت ريم واترمت فى حضنه ودموعها انهالت على وشها ريم: وحشتنى اووووووووى يا وليد كل دى غيبة وليد: وانتى كمان يا بت شقية وحشتينى ووحشنى شقاوتك ريم: عندى ليك كلام كتير اوى وحكايات كتير عايزة احكيهالك وليد: وانا وحشنى كلامك وحكايتك ونفسى اوى اسمعك ريم: اوعى تقول انك هتسيبنى وتسافر تانى وليد بص لعلى ريم: لا مش ممكن يا وليد انا مصدقت انك رجعت وليد: يا حبيبتى انا مصدقت اخد اجازة شهر بالعافية ريم: يا وليد حرام عليك انا محتجالك اوى بجد على : سيبى اخوكى دلوقتى يرتاح يا ريم وبعد الغدا ابقوا ارغوا براحتكم ريم: حاضر يا بابا فى عيادة ماجد: ماجد قاعد سرحان وحزين وبتدخل عليه صباح ماجد: فى حاجة يا صباح صباح: فى واحد عايز يقابل حضرتك برة ماجد: مش عايز اقابل حد صباح: دا مصمم يقابل حضرتك وبيقول عايزك فى موضوع مهم بخصوص الانسة ريم ماجد: ايه بتقولى ايه ؟ ريم!!! طب خليه يدخل حالا بعد شوية ماجد: مش ممكن عصام!!!! فى بيت ريم: ريم ووليد وعلى بياكلوا لكن ريم سرحانة ومش بتاكل وليد: ايه يا روما مبتاكليش ليه يا حبيبتى ريم: لا يا وليد انا باكل اهو وليد: فين الى بتاكلى ده دا انتى طبقك متحركش منه رزاية انتى عاملة ريجيم ولا ايه اوعى يكون خطيبك عايزك تخسى لا من الاول كده ياخدك زى ما انتى عجبه على كده عجبه مش عاجبه يتكل ويجى غيره ريم بوجع: طب عن اذنكم على: ايه يا حبيبتى مش هتكملى اكل ريم: شبعت يا بابا الحمد لله ريم مشيت وسابتهم وليد: هى مالها يا بابا؟ على : يعنى لازم تنسحب من لسانك وتجيب سيرة خطيبها وليد: ودى فيها ايه؟ على: فيها يا سيدى ان ريم فسخت خطوبتها من ماجد وليد: ايه ! امتى حصل الكلام ده وليه؟ على : لا دا موضوع كبير وليد: عشان كده وشها قلب لما جبت سيرته يا حبيبتى يا ريم على : المشكلة بقى ان الهانم راحت لعصام ابن عمك وخلته يخطبها ووافقت انها تتجوزه وليد: عصام ! اشمعنى دلوقتى ما هو كان ادامها من زمان وكان هيموت عليها على : شوف انت بقى اشمعنى دلوقتى وليد: وبعدين يا بابا انت وافقت؟ على : عصام يا ابنى جه اتكلم معايا وقالى انه حاسس ان ريم مجروحة اوى ومش عارفة هى بتعمل ايه عشان كده قالى اوافق على الخطوبة يمكن ده يحسن من نفسيتها وتقدر تنسى موضوع ماجد لكن توقعاته طلعت كلها صح ريم مقدرتش تنسى ماجد ونفسيتها زادت سوء. الموضوع اكبر من احتمالها يا وليد اختك فعلا بتحبه وليد: طب وبعدين يا بابا هنسيبها كده؟ على : ايه الى فى ايدى اعمله يا ابنى الواد اتحايل عليها كتير وحاول يوضحلها موقفه وهيموت ويرجعلها واختك الى فى دماغها فى دماغها مش عارف هى بتعاند معاه ولا مع نفسها وليد: هو جالك يا بابا؟ على : اه يا ابنى جالى واتكلمت معاه ووضحلى موقفه والولد فعلا مظلوم بس اختك مش قادرة تسامحه ولا تصدقه وليد: طب ما تحاول تتكلم معاها انت يا بابا على : ما انت عارف اختك يا وليد رافضة تسمع اى كلام منى ومنى انا بالذات وليد بأسى: انا طبعا عارف السبب على: طب ما تجرب تكلمها انت يا ابنى هى بتحبك واكيد هتسمعلك وليد: اكيد لازم هتكلم معاها يا بابا الفصل الثالث عشر فى عيادة ماجد: ماجد: مش ممكن عصام!!!! عصام: انا عارف يا دكتور ماجد انك مستغرب وجودى هنا فى عيادتك بس صدقنى الموضوع فعلا مهم ماجد وتمالك اعصابه: اتفضل يا استاذ عصام. خير انا تحت امرك عصام: شوف يا ماجد. انا عايز اكلمك عن حاجة تخص ريم. ريم مش بس بنت عمى ريم كمان الانسانة الوحيدة الى حبتها فى حياتى كان حبها بيكبر فى قلبى يوم ورا يوم كانت الامنية الوحيدة الى بتمناها فى حياتى انها تبقى مراتى وتشاركنى باقى عمرى ماجد بيغمض عينيه من الوجع ازاى حد يكلمه عن حبيبته بالطريقة دى ويقدر يملك اعصابه ادامه عصام بابتسامة : معلش انا عارف انا كلامى بيوجعك بس سيبنى اكمل. انا صحيح كان اهم احلامى ان ريم تشاركنى حياتى وتبقى مراتى بس لما الحلم ده بقى ادامى وفى ايدى اكتشفت انه مش من حقى ماجد: يعنى ايه مش فاهم عصام: يعنى يا ماجد انا صحيح كنت عايز اتجوز ريم بس دا كان الاول لما كنت فاكر ان قلبها فاضى مفهوش حد كان عندى ساعتها استعداد املاه بحبى واخليها تحبنى زى ما بحبها لكن دلوقتى ريم مبقتش بتاعتى مبقاش ينفع افكر حتى فيها بقت حلم مستحيل بالنسبة لى انا عمرى ما هقبل اكمل حياتى معاها وهى بتحب حد تانى وقلبها مشغول بيه ماجد: عصام انا ...... عصام: ارجوك سيبنى اكمل انا فسخت خطوبتى من ريم لانها عمرها ما شافتنى ولا حست بيا ريم مش شايفة غيرك ولا قادرة تحب غيرك بس انا جايلك النهاردة مش كحبيب حبيبته مبتحبوش انا جايلك عشان انا ابن عمها الى مربيها والى وجعها يوجعنى ريم موجوعة اوى وانا مش عايز اشوفها حزينة ومكسورة كده انا فعلا مش هسمح انها تبقى كده ماجد: انا كمان بعد ريم واجعنى يمكن اكتر ما وجعها صدقنى انا تقريبا حياتى كلها وقفت من ساعة ما ريم سابتنى عصام: عارف وشوفت فى عينيك حبك ليها ودا الى خلانى اجيلك النهاردة مش عشانك علفكرة عشانها هى ماجد: عايزنى اعمل ايه؟ عصام: قربلها يا ماجد حاول ترجع ريم . ريم لو رجعتلك هترجع للحياة من تانى وهترجعلها ضحكتها من تانى ماجد: صدقنى حاولت كتير وهى رافضة حتى تسمعنى عصام: يمكن تكون محتاج تغير شوية طريقة كلامك معاها حاول تلفت انتباهها بشكل مختلف فكر يا اخى دا انت دكتور نفسى حتى ماجد بيبتسم: عندك حق يا عصام انا متشكر ليك اوى وبجد مش عارف اقولك ايه عصام: متقولش حاجة رجع لريم ضحكتها ودا يبقى رد جميلك ليا. استأذن انا ماجد: اتفضل اتحرك عصام ناحية الباب عشان يخرج لكن وقفه ماجد ماجد: عصام عصام:نعم ماجد: هو انت ليه بتعمل كل ده.؟ عصام: الى بيحب حد بيحب يشوفه سعيد حتى لو السعادة دى مش معاه وانا بدور على سعادة ريم فهمتنى ماجد: اكيد عصام خرج وساب ماجد بيفكر ماجد فى نفسه: اظاهر يا ريم مكتوبلى انا وانتى نفضل نلف حوالين بعض عشان نلفت نظر بعض تصدقى بقى دا احنا لو اتعملنا قصة هيبقى عنوانها لفت انتباه تانى يوم فى النادى: ريم كانت قاعدة مع ندى فى النادى بيتكلموا ندى: وحشتينى يا ريم كده يا ندلة طول الفترة دى متسأليش عليا ريم: انتى كمان وحشتينى اوى يا ندى بصراحة كنت مكسوفة وقولت اسيبك تتمتعى بشهر العسل من غير ازعاج ندى: شهر ايه يا حبيبتى دا كان زمان هما اسبوع بالعافية وحازم نزل على شغله علطول ريم: يا سيتى ربنا يجعل ايامكم كلها عسل. قوليلى يا بت انتى مبسوطة فى الجواز؟ ندى: يااااه يا ريم مبسوطة دى كلمة قليلة اوى على الى انا فيه . مش هكدب عليكى واقولك اننا طول اليوم بنحب فى بعض واننا مبنتخانقش بس احلى ما فى الموضوع ان بعد الخناق لما بنتصالح العتاب بيبقى ليه طعم تانى عارفة يا ريم لما تحبى حد اوى وتحسى انك ناقصك حاجة من غير وجوده جنبك وان هو الى بيكملك عارفة يعنى ايه تفضلى مستنياه ومشتاقة لقربه منك وحضنه ليكى عشان يجى اخر اليوم يرمى فى حضنك همومه وحكياته طول اليوم عارفة يعنى ايه الامان فى حضن الى بتحبيه وانتى مش خايفة من اى حاجة طول ما هو جنبك ومعاكى احساس مختلف عن اى احساس حسيته قبل كده يا ريم صدقينى ريم بتسمع ندى وكلامها بيمس قلبها وبتلاقى الدموع بتتجمع فى عينيها من غير ما تحس بتفتكر ماجد وازاى هى ما تمنتش فى حياتها غير قربه منها وانه يكون جوزها وحبيبها ريم انتبهت لنفسها ومسحت الدموع الى فى عينيها واتكلمت بمرح مصطنع: ايه ده كله يا ست ندى بركاتك يا سى حازم ندى: وانتى يا ريم طمنينى عليكى عاملة ايه؟ ريم: انا زى الفل بنزل النادى وبخرج وعايشة حياتى زى ما انتى شايفة ندى: عايشاها بس مش مبسوطة يا ريم ريم: مين الى قال انى مش مبسوطة ندى: يا ريم انا اكتر واحدة افهمك دا انتى صديقة عمرى لو خبيتى عليا كل حاجة مش هتقدرى تخبى عليا الدموع الى حبساها فى عينيكى دى ريم: محدش بيعيش طول عمره مجروح يا ندى وكل حاجة مع الوقت بتتنسى ندى: وماجد؟ ريم: ماله ماجد؟ ندى: هتقدرى تنسيه ؟ ريم: لو ما قدرتش انساه وجع جرحه جوايا هيقدر يخلينى انسى ندى: بس ماجد بيحبك اوى يا ريم انتى مشوفتيش كان هيتجنن ازاى فى فرحى لما شافك مع عصام صدقينى يا ريم ماجد بيحبك بجد وانتى كمان بتحبيه اوى ادى نفسك فرصة تانية تسمعيه حرام الحب ده يروح بجد حرام ريم: ندى الموضوع مش ان اديله فرصة تانية او اسمعه المشكلة ان لو حتى صدقته المرة دى وكملنا مع بعض هيفضل جوايا دايما شك من ناحيته انه بيعرف واحدة تانية عليا الثقة الى بينا خلاص اتهزت هفضل معيشاه فى توتر وقلق وهو نفسه مع الوقت هيزهق ندى: يعنى خلاص مفيش امل ريم: انا محتاجة وقت اراجع حسباتى مع نفسى واحاول استعيد قوتى من تانى واقف على رجلى ندى: بس خدى بالك هو مش هيفضل مستنى وممكن مع الوقت يزهق ريم: يزهق ! يعنى ايه يزهق! ندى: يعنى هو مش هيقعد عمره كله يجرى وراكى ويستحمل صدك ليه ومعاملتك القاسية معاه وممكن جدا يعرف واحدة تانية تملى الفراغ الى انتى سايباه ريم: قصدك انه ممكن يحب غيرى ندى: مش بالضرورى يحب بس ماجد يا ريم شاب ممتاز والف مين تتمناه وعايزة تلفت نظره ليها وهو فى الوقت ده فى امس الحاجة للحنان والحب فهمانى طبعا ريم فكرت فى كلام ندى اول مرة يجى فى دماغها انه فعلا ممكن يرتبط بواحدة غيرها وبعد شوية من التفكير والعناد مع النفس ريم بتحدى: لو بيحبنى مش هيفكر فى غيرى ولو حصل انا ولا هيفرق معايا ندى: متاكدة ريم بتردد: اه... متأكدة .. ولا هيفرق معايا بعد يومييييييين فى النادى: ريم قاعدة مع ندى وحازم بيهزروا ويضحكوا ريم بضحك: احكيلنا بقى يا حازم مميزات الجواز حازم: خدى عندك يا ستى قبل ميعاد الشغل ما يخلص الاقى الى بتتصل بيا تقولى متتاخرش على البيت .لو غلطت وقولت هخرج مع صحابى تلاقى السيمفونية التالتة لبيتهوفين اتفتحت عليا .(بيقلد صوت ندى) عايز تسبنى لوحدى وانا لسه عروسة هو كله خروج ع صحابك مفيش مرة تخرجنى . دا غير حازم يا حبيبى وانت جاى هاتلى كذا لا تصدق نسيت كذا وهاتيا طلبات ندى: بقى كده يا حازم انا بعمل كل ده ريم بضحك: ايه يا ابنى هى دى المميزات امال لو قولتلك قولى العيوب دا انت شردت البنية ندى: لا بس متنكريش انه تخن بعد الجواز ريم: لا وطلعله كرش يا نودى شكل اكلك عاجبه حازم: جرى ايه منك ليها انتوا هتستلمونى تريقة . ماشى يا ندى لما نروح البيت ندى: حبيبى يا حزوم انا اقدر يا حبيبى حازم: ايوا كده ستات متجيش غير بالعين الحمرا ندى: حاااااااااازم حازم بهزار: خلاص هتنزل المرة دى بس اعملى حسابك المرة الجاية لا ممكن تنزل ابدا وقعدوا كلهم يضحكوا على كلام وطريقة حازم لحد ما حازم بص وراهم وصفر حازم: ايه ده ايه ده ايه المزة الجامدة الى داخلة النادى دى ندى: نعم يا اخويا وانا قاعدة كده حازم: سورى يا نودى يا حبيبتى الواحد بيعبر عن الجمال بس مش بيعاكس يا ابن المحظوظة يا واد يا ماجد ريم بصدمة: نعم ! ماجد ! ولفت بصت وراها لقت ماجد داخل النادى وفى ايده بنت جميلة جدا ريم اول ما شافتها وقفت مكانها وحطت ايديها فى وسطها ريم فى نفسها: يا سلااااااام ودا من امتى ان شاء الله الفصل الرابع عشر ريم قاعدة متغاظة فى النادى بعد ما شافت ماجد والبنت الى معاه خصوصا انه اتعمد يقعد على تربيزة ادامها ندى: مالك يا ريم ريم: ها ... مفيش كنتى بتقولوا ايه حازم: لا دا انتى فى دنيا تانية خالص ريم: هى مين الى مع ماجد دى حد فيكم يعرفها ندى: لا اول مرة اشوفها حازم: انا كمان معرفهاش بس عندى استعداد اتعرف يعنى ندى خبطته فى كتفه جامد حازم: ايه فهمتى غلط قصدى اعرفها هى مين واقول لريم ريم: لا وتقولى ليه وانا اصلا يهمنى ايه وانا مالى ان شاء الله تطلع عفريت ازرق هتلاقيها واحدة اى كلام من الى يعرفهم حازم: بذمتك يا شيخة دى يتقال عليها واحدة اى كلام دا الواد ماجد ده طلع سهن وانا معرفش ريم: انت بتغظنى يا حازم ندى: وانتى تتغاظى ليه ريم: ايوا صح اتغاظ ليه وانا مالى حازم: طب بطلى مكابرة بقى تحبى اروح اعرفلك هى مين ريم: لا مش مهتمة.... ازاى هتعرف يا حازم ها ازاى؟ حازم: ولا حاجة هروح اسلم عليه وهو اكيد هيعرفنى عليها. استنوا هنا وانا هجبلكم الخبر اليقين ندى: حازم...وانت رايح تلم نفسك عن البت لاحسن انت عارف حازم: وانا عينى بتشوف غيرك يا نودى ندى: انا قولت اقولك بس حازم بيروح فعلا عند ماجد بيسلم عليه ندى: وانتى مهتمة ليه يا ريم مش قولتى انه مش فارق معاكى ريم: انا مهتمة ! انا شكلى مهتمة ؟ ندى: لا بصراحة انتى شكلك مش مهتمة خالص انتى شكلك بس هتتفرسى ريم: لا مش للدرجة هو فضول بس مش اكتر ندى: فضووووول طب يا ريم لما نشوف اخرتها معاكى حازم بيروح لماجد وبيتكلم معاه بصوت واطى عشان محدش يسمع ماجد: ايه الاخبار؟ حازم: حاسس انها شوية وهطلع نار من ودانها ماجد: بجد ! يعنى شكلها مضايق حازم: مضايق ايه يا عم دى بتاكل فى نفسها لما هتختفى اكتر ما هى مختفية. المهم خلينا نكمل لتلاحظ حاجة ماجد بصوت عالى عشان ريم تسمع: عامل ايه يا حزوم فى الجواز حازم: تمام زى الفل عقبالك يا ماجد ماجد: قريب ان شاء الله حازم: لا ما هو واضح مش تعرفنا على الانسة ماجد: دى انسة لوجى صديقتى حازم: اموت انا فى الصداقة وتوطيد العلاقات وهنا قاطعه صوت من وراه ندى: حازم ممكن تيجى حازم: حاضر يا حبيبتى ماجد: روح انت لاحسن شكلك هتاخد حبس انفرادى النهاردة حازم: عيب يا باشا صاحبك جامد برضه ماجد بيغمز لحازم: وابقى طمنى بيرجع حازم لتربيزة ريم وندى ريم: ها عرفت هى مين؟ حازم: بيقول صديقة ريم: صديقة ! وهو من امتى ماجد بيقتنع بالصداقة بين ولد وبنت حازم: دا الى قاله بس بينى وبينك شكل الموضوع اكبر من كده ريم: ايه الى خلاك تقول كده حازم: يعنى شوية همسات ونظرات كده ريم حست ان كلام حازم وجعها اوى ريم فى نفسها بوجع: معقولة ماجد يحب واحدة غيرى بالسرعة دى ويفكر يرتبط بيها كمان وليه لا ما هو حبنى وهو مرتبط بسهى وبعد ما سابها بكام يوم جيه وخطبنى مش غريبة عليه يعنى وقال كان بيقولى انه بيحبنى ومش قادر يعيش من غيرى اهو قدر وعاش ندى: ريم....رحتى فين ريم: مفيش يا ندى.. انا هروح حازم: ليه يا غلسة ما احنا اتفقنا نخرج بعد النادى ريم: معلش اخرجوا انتوا انا مليش نفس اخرج ندى: ريم ... انتى كويسة؟ ريم حركت راسها بالموافقة ومشيت لكن قبل ما تمشى عينيها اتقابلت مع ماجد فى نظرة كلها عتاب ولوم ووجع ودا وجع ماجد اوى وحس فى اللحظة دى انه نفسه يروح و يقولها ان مفيش واحدة قدرت تقتحم قلبه غيرها هو بس كان عايز يلفت انتباهها لوجى: وبعدين يا ماجد؟ ماجد: وبعدين ايه يا لوجى لوجى: هتستمر فى اللعبة دى لحد امتى؟ ماجد: مش عارف كل الى اعرفه انى لازم اعمل كل الى فى ايدى عشان استفزها واخليها تخرج من مود البرود والتجاهل الى مصدرهولى لوجى: بس انت كده بتوجعها بجد ماجد: انا بتوجع اكتر منها مليون مرة على وجعها بس مش بايدى الوجع المرة دى عشان يفوقها لوجى: خايفة تكون بتبعدها اكتر وانت مش حاسس ماجد: تفتكرى يا لوجى؟ لوجى: مش عارفة على حسب شخصيتها لو قوية كفاية مش هتستسلم وهتحارب ان مفيش واحدة تاخدك منها لكن لو ضعيفة هتستسلم الى بيحصل بكل سهولة ماجد: ريم الى اعرفها زمان كانت قوية لكن ريم الى بشوفها اليومين دول بقت ضعيفة وهشة لوجى: يبقى ارخى الحبل بينكم حبة عشان ميتقطعش ماجد: ارخى الحبل ودى اعملها ازاى لوجى: معرفش..... فكر انت ماجد بتفكير:اعملها ازاااااااى ؟.... لقتها تانى يوم فى النادى: ريم قاعدة فى النادى سرحانة زى عادتها وبتشرب عصير وفجأة بيجرى عليها الجرسون وشكله مخضوض الجرسون: انسة ريم الحقى بسرعة ريم بقلق: فى ايه يا عوض ؟ الجرسون: دكتور ماجد عمل حادثة ادام النادى وخبطته عربية ريم هبت واقفة مكانها فى صدمة: ايه! الى بتقوله ده هو فين دلوقتى؟ الجرسون: برة ادام النادى جريت ريم لحد ما وصلت عنده لقيته مرمى على الارض وماسك رجله وحواليه الناس محستش ريم بنفسها غير وهى بتجرى عليه بلهفة ريم: ماجد! انت كويس حصلك ايه؟ ماجد بوجع مصطنع: اهههههه رجلى يا ريم مش قادر ريم: سلامتك يا ماجد بعد الشر عليك ماجد: انتى خايفة عليا ريم: طبعا اكيد ماجد: لو اعرف انك هتخافى عليا كده كنت رميت نفسى ادام اى عربية من زمان ريم: بس متقولش كده بعد الشر عليك ماجد: طب ممكن اطلب منك طلب ريم: اطلب ماجد: ممكن تخليكى معايا ومتبعديش عنى ابدا انا مش مستحمل بعد تانى يا ريم اتبادلوا مع بعض النظرات وتاهوا فى عالم تانى غير عالمنا لحد ما افتكرت لما شافته فى حضن سهى وافتكرت كمان منظره وهو داخل النادى مع لوجى وهنا اتمالكت نفسها ريم: واخلينى معاك ليه ما كفاية عليك حبيبتك الجديدة ماجد: حبيبتى الجديدة؟؟؟؟ وقبل ما ينطق بكلمة جت لوجى تجرى عليه لوجى: ماجد .حبيبى ايه الى حصلك انا مش سايباك بتركن العربية يا حبيبى ماجد: انا ركنت العربية وانا بعدى الشارع العربية خبطتنى لوجى: سلامتك يا حبيبى طب اسند عليا ويالا عشان اروحك لوجى خدت ماجد من ريم الى كانت سانداه على رجلها ودا ضايق ريم جدا وحست انها عايزة تقتلها. ماجد ركب العربية مع لوجى وسابوا ريم النار بتطلع من ودانها الفصل الخامس عشر فى بيت ريم: ريم روحت البيت ودخلت اوضتها علطول وهى على اخرها موجوعة اوى من ماجد وهو عمال يزيد من وجعها مش قادرة تنسى منظره مع لوجى وهى بتاخده منها وبتدلع عليه ومش عارفة هى موجوعة ليه طالما هى الى صممت تنهى الموضوع بينهم ومش عايزة ترجعله يبقى مش فارق معاها. وبيقطع تفكيرها خبط الباب وليد: ممكن ادخل ريم: طبعا ادخل يا وليد وليد: ممكن يا حبيبتى اقعد اتكلم معاكى شوية ريم: انا الى محتاجة اتكلم معاك يا وليد ومحتجالك اوى كمان وليد: طب يا ريم اتكلمى انا سامعك ريم متكلمتش لكن اترمت فى حضنه وانهارت فى العياط وهو سابها لحد ما هديت فى حضنه وخرجت كل الى جواها من وجع وليد: مالك يا ريم ؟ ريم: موجووووووووووعة اوى يا وليد وليد: مش انتى الى سبتيه يا ريم و رافضة ترجعيله ريم: هو مين يا وليد وليد: الى وجعك بعده عنك ومش قادرة ترجعى للحياة من تانى وهو بعيد عنك ريم: خايفة يا وليد خايفة اوى خايفة لما ارجعله يخونى انا مش قادرة انسى منظره وهو فى حضن واحدة غيرى كأن روح امى اتجسدت جوايا فى اللحظة انا اتوجعت مرتين مش مرة واحدة يا وليد وليد: حاولى تنسى الماضى يا ريم والا شبحه هيفضل يطاردك ويعكر عليكى حياتك ريم: حد بيقدر ينسى امه وليد: محدش بيقدر ينسى امه بس لازم نسامح يا ريم ماما الله يرحمها دا كان عمرها وكان مقدر ليها انها تموت فى الوقت ده حتى لو مكنش بابا عمل كده كانت هتموت باى طريقة تانية طالما عمرها خلص . ومتهيالى لو كانت عاشت كانت ممكن تسامح بابا احنا بشر يا ريم ولازم نسامح وخصوصا الناس الى بنحبهم ولو فرضت معاكى حتى ان ماجد مش مظلوم وبرئ وانه فعلا خانك فلازم تسامحيه لانه بيحبك بجد ريم: بيحبنى؟ وليد: طبعا بيحبك والا مكنش هيفضل متمسك بيكى طول الوقت ده رغم معاملتك القاسية ورفضك ليه متزعليش منى انتى مش ملكة جمال وفى بنات كتير غيرك يبقى ليه هيستحمل كل ده من غير ما يكون بيحبك ريم ابتسمت بسخرية وليد: فى ايه يا ريم؟ ريم: ماجد ارتبط بواحدة تانية وليد: بتقولى ايه مستحيل ريم اترمت فى حضنه وقعدت تعيط ريم : انا خلاص تعبت يا وليد ومش عايزة اقعد هنا تانى خدنى معاك يا وليد وانت مسافر متسبنيش هنا وليد: ايوا يا ريم بس...... ريم: عشان خاطرى يا وليد انا محتجاك اوى ومش قادرة استحمل كل الى بيحصل حواليا هنا لازم ابعد وليد: طب اهدى يا حبيبتى حاضر يا ريم هعملك الى انتى عايزاه بس اوعدينى لحد ميعاد السفر تفكرى فى الى قولتهولك ريم: اوعدك افكر يا وليد فى عيادة ماجد ماجد قاعد على مكتبه وصباح بتدخل عليه صباح: دكتور فى واحد اسمه حازم برة بيقول عايزك فى حاجة مهمة ماجد: حازم!!! دخليه بسرعة حازم دخل وباين على وشه القلق ماجد بخوف: فى ايه يا حازم شكلك ميطمنش ريم جرالها حاجة حازم: ريم هتسافر يا ماجد ماجد: هتسافر ! هتسافر فين! حازم: هتسافر مع اخوها وليد وشكلها مش ناوية ترجع تانى ماجد: ايه الى انت بتقوله ده يعنى خلاص قررت تستسلم وتهرب حازم: المهم انت هتعمل ايه ماجد: معرفش يا حازم انا خلاص تعبت من عندها حازم: يعنى هتسيبها تسافر ماجد: مستحيل دا على ج\ثتى اسيبها تضيع منى ماجد فضل رايح جى فى الاوضة بيفكر لحد ما جاتله فكرة ماجد: اسمع يا حازم انا عندى فكرة اتمنى انها تنفع معاها وقلبها يحن بقى بس محتاج مساعدتك انت وندى معايا حازم: انا معاك بس ايه هى الفكرة ؟ بعد كام يوم فى بيت ريم: ريم فى اوضتها بتوضب شنطتها وندى معاها ندى: يعنى خلاص يا ريم هتسيبنا وتسافرى ريم: معلش يا ندى كده احسن ندى: بس انتى كده بتهربى يا ريم مش بتواجهى ريم: انا خلاص تعبت يا ندى مبقاش فيا قوة ادخل اى حرب تانى انا من ساعة ما عرفت ماجد وحبيته وانا فى حرب علطول لما خلاص تعبت ندى: صعبان عليا فراقك يا ريم ريم: انا هكلمك علطول يا ندى هو انا ليا مين بس اكلمه غيرك ويمكن لما ابعد اهدى واقدر ارجع هنا تانى ندى: طب خلاص يا ريم الى يريحك بس ممكن اطلب منك طلب ريم: طبعا قولى ندى: كل صحابنا فى النادى لما عرفوا انك مسافرة صمموا يعملولك حفلة مخصوص ليكى عشان يودعوكى بيها ريم: مش عارفة اقولكم ايه قصاد كل الحب ده ندى: خلاص هتحضرى ريم: مش عارفة هقدر ولا لا ندى: عشان خاطرى يا ريم دا اخر طلب هطلبه منك ومش معقولة تبقى الحفلة معمولة علشانك ومتحضريش ريم: حاضر يا ندى هحضر هى الحفلة امتى؟؟؟؟؟ بعد يومين وتحديدا قبل ميعاد سفر وليد وريم بيوم بليل فى بيت ريم: ريم بتجهز عشان تروح الحفلة الى صحابها عاملينهالها ووليد هو كمان بيجهز عشان يروح معاها على : ها يا ولاد خلاص رايحين وليد: اه يا بابا خلاص جهزنا على : طب يا ابنى خد بالك من اختك وليد: حاضر يا بابا على : ومتتاخروش عندكم طيارة الفجر ريم: متقلقش يا بابا مش هنتاخر انا اصلا مكنتش عايزة احضر بس عشان صحابى ميزعلوش وليد: ازاى يعنى متحضريش تبقى الحفلة معمولة مخصوص علشانك ومتحضريش دى حتى تبقى قلة ذوق ريم: عشان كده هروح بس مش هطول انا مليش دماغ لاى حاجة وليد: طب يالا يا انسة ريم فى النادى : اول لما ريم بتوصل النادى مع وليد بتلاقى حفلة معمولة ومتجهزلها واول لما بتدخل ندى وحازم بيجروا يسلموا عليها وبعدهم بيجى باقى صحابها بيسلموا عليها. ريم كانت بدور بعينيها فى كل حتة عندها امل تشوفه يمكن يكون عايز هو كمان يسلم عليها ويودعها قبل ما تسافر لكن لما ملقتوش ضحكت بسخرية وسكتت. ريم قعدت هى وندى على تربيزة وفجأة الجو كله هدى والانوار اتغيرت واتحولت على مسرح معمول وطلع حازم على المسرح حازم: يا جماعة الحفلة دى معمولة عشان ريم صاحبتنا واختنا الى مسافرة والى بجد فراقها هيفرق معانا كلنا عشان كده عايز اقولها ان فى مفاجأة معمولة عشانك النهاردة يا ريم ويارب تعجبك حازم بيروح لتربيزة ريم وندى ريم: مفاجأة ايه يا حازم ايه عملينها حازم: اصبرى على رزقك وانتى تعرفى وفجأة الانوار بتركز على المسرح والموسيقى بتشتغل وبيطلع شخص ماسك المايك على المسرح عشان يغنى اول لما بتشوفه ريم بتنح ريم: مش ممكن ماجد!!!!!!!! الفصل السادس عشر والاخير وفجأة الانوار بتركز على المسرح والموسيقى بتشتغل وبيطلع شخص ماسك المايك على المسرح عشان يغنى اول لما بتشوفه ريم بتنح ريم: مش ممكن ماجد!!!!!!!! ماجد بيقف على المسرح وبيغنى بكل احساسه لريم وهو باصصلها " بعد اما ارتاحت روحى ليك وعرفت طعم الدنيا بيك مشيت خلاص ومقولتليش انا هعمل اييييييييييه وازاى هيجيله حبيبى النوم لو مش لاقيك تنسانى ليه بالله عليك وانا قلبى حياته وروحه ليك (وهنا ريم قامت من على التربيزة عشان تمشى راح لحد عندها وقفها وهو بيغنى وباصصلها وبيلف حوالياها وهى دموعها خانتها) انا قلبى كنت بخاف عليه شفتك معرفش جرالى ايه حبيت خلاص محسبتهاش ولا قلت لييييييه كان حلم دا ولا كان خيال لا ارتحت ولا بيرتاحلى بال طمنى وقولى ازاى البعد هقدر عليييييييييه" بعد اما خلص مسك ايديها وخدها لحد المسرح وطلع على المسرح يتكلم فى المايك وهو باصصلها ماجد: انا لو حد كان قالى من كام شهر انى ممكن اقف هنا واغنى او حتى احاول الفت انتباه اى واحدة ليا كنت قولت عليه مجنون لكن لما دخلتى حياتى وبقيتى موجودة فيها كل حسباتى اتغيرت . انا عايز اقول ادامكم كلكم انى بغنى الاغنية دى للانسانة الوحيدة الى ملكت قلبى بجد وخلتنى اشوف الحياة بشكل تانى الانسانة الى خلتنى عايز اعمل علشانها اى حاجة المهم تبقى معايا وجنبى ونزل لحد عندها ووقف ادامها وكمل كلامه ماجد: الانسانة دى الى واقفة ادامى دلوقتى عايز اقولها كلمة واحدة بكل الصدق الى فى الدنيا . بحبك يا ريم وعمرى ما حبيت ولا هحب حد غيرك. بحبك ومتمناش اى حاجة فى حياتى غير انك تفضلى معايا وجنبى ريم اتجمدت مكانها مبقتش عارفة تتحرك فضلوا يتبادلوا النظرات سوا وفى لحظة استجمعت قواها وجريت من ادامه فى صدمة منه وهو جرى وراها لحد ما حصلها ماجد: ريم! ريم لفت وبصتله ماجد: رايحة فين.؟ ريم: ماشية يا ماجد هسافر ماجد بعصبية: مسافرة ! لا عادى خالص انتى ايه يا شيخة بطلتى تحسى بالى حواليكى انا عملت المستحيل عشان متبعديش عنى وانتى برضه مصممة تبعدى انا ايه الى عملته عشان استاهل كل ده منك انا اقسمتلك انى مظلوم وبرئ وانا فعلا مظلوم وبرئ وانتى مش عايزة تصدقى بحاول اراضيكى واتقربلك باى شكل وانتى ايه جبل صنم مبتحسيش. اقولك سافرى يا ريم انتى شكلك بتتلككى وانا خلاص تعبت وزهقت انا مش هفضل اجرى ورا واحدة مع اول موقف بينا قررت تسبنى وتمشى ومدتش حتى فرصة لنفسها انها تسامحينى دا لو افترضت انى غلطت اصلا ريم غمضت عينيها :و انا مش قادرة يا ماجد عايزة ابعد ماجد: وانا مش هفرض نفسى عليكى اكتر من كده اتفضلى سافرى بس لازم تعرفى انك فعلا الانسانة الوحيدة الى قلبى حبها بجد ريم لفت عشان تمشى ماجد: ريم! ريم لفتله: نعم يا ماجد! ماجد: كنت جايبلك هدية وياريت تقبليها منى حتى تبقى ذكرى منى تفكرك بيا طلع من جيبه سلسلة فيها قلب مقفول ماجد: اتفضلى ريم خدتها وبصتلها بحب وبوجع فى نفس الوقت وخدتها منه وسابته ودموعها على وشها حازم بعد ما مشى جاله حازم: ها عملت ايه ماجد: خلاص مفيش فايدة ريم خلاص ضاعت منى الفجر فى المطار: ريم قاعدة جنب اخوها مستنين الطيارة .ريم لابسة السلسلة بتاعة ماجد بس مكنتش خدت بالها ان القلب الى فيها بيتفتح اول ما فتحته فوجئت بصورة ماجد جوا القلب تنحت اول ما شافت صورته وفضلت بصاله بحب اوووى وسرحت فى كلامه ليها "ماجد: يعنى يا ستى بطريقة ما حبيبك يتعرض لاى خطر يعنى عربية هدوسه لوح خشب هيقع عليه المهم يتعرض لاى خطر ماجد بيضحك على كلامها: هو انتى مش بتحبى يبقى لازم تضحى ماجد: بس بجد خدى بالك وانتى بتنفذيها لتروحى انتى فيها ريم بصتله بحب واتكلمت بجد: صدقنى ساعتها هموت مبسوطة لان على الاقل اخر حاجة هشوفها هى نظرة الحب فى عينيه وانى هموت وهو عارف انى بحبه وانى روحت فداه ماجد بصلها باعجاب: ياااه للدرجة دى بتحبيه بجد يا بخته بحبك " وهنا افتكرت لما عمل نفسه عربية خبطته وخلى الجرسون يجرى يندهلها علشان يلفت انتباهها " ماجد: انا كلمتك عشان اقولك ان لقتيلك فكرة جديدة تلفتى بيها نظر حبيبك.... هدية! قدميله هدية ريم: هدية ! هو يعنى الهدية الى هتعرفه انى بحبه ماجد: اكيد بس طبعا مش اى هدية لازم تكون هدية تعبرى فيها عن كل مشاعرك واحاسيسك ليه ريم: ودى تبقى ايه بقى ؟ ماجد: خلى احساسك هو الى يدلك عليها " وهنا قعدك تمسك السلسلة الى جابلها وتمسح عليها ودموعها بدأت تتجمع فى عينيها " ماجد: اصبرى بس وبطلى احباط الى بيحب المفروض ميعرفش يأس ريم: طب ايه الفكرة المرة دى؟ ماجد: الغيرة . ريم: غيرة ايه يا دكتور لما بقولك هو لا شايفنى ولا حاسس بيا يبقى هيغير عليا طب ازاى ماجد: يا ستى اسمعينى بس لازم يحس ان فى حد دخل فى حياتك وسحب البساط من تحتيه طول ما هو شايفك ادامه مش هيشوفك لكن لما يحس انك بعدتى وروحتى لحد تانى وان الحد ده بدأ يشغل تفكيرك هيبتدى يحس بتغيير ويحس ان فى حاجة نقصاه ويرجع يعيد حسباته من تانى" وافتكرت لما صاحب لوجى ادامها وهو اصلا مبيقتنعش بصحوبية الولد مع البنت وازاى كانت بتدلع عليه " ماجد: فضلت محافظ على وعدى ليها بالرغم انها غابت عنى اربع سنين مقدرتش اشوف فيهم واحدة غيرها لحد ما ظهرتى انتى فى حياتى حسيت ساعتها انك بتخطفينى كل يوم بتشد ليكى اكتر من اليوم الى قبله بقى كل تفكيرى معاكى مشاعرى كلها بقت ريحالك بقيتى فعلا محتلة كل مشاعرى وتفكيرى وفى اللحظة دى حسيت انى لو ضعفت واستسلمت لمشاعرى ليكى هبقى بخونها وبخلف وعدى ليها مقدرتش اكون خاين يا ريم مقدرتش حتى لو كان ده هيعذبنى ببعدك عنى ويوجعنى كنت مضطر ابعدك عنى عشان مضعفش ادام حبك " " ريم: اه .... فهمت قول بقى ان خطوبتى من عصام ابن عمى حرقاك اوى مش متخيلى ازاى واحدة تروح من تحت ايديك وتسيبك وتروح لغيرك ماجد: واحدة ! واحدة ايه يا ريم انتى مش بالنسبالى واحدة انتى حبيبتى فاهمة يعنى ايه حبيبتى ريم انا مبحبش غيرك . انتى مش عارفة حياتى عاملة ازاى من غيرك انا مبقاش فى حاجة فى حياتى ليها اى طعم حتى شغلى مش عارف اروحه مش عارف اشتغل عقلى وكيانى كله معاكى. يا ريم انا مش متخيل الحياة من غيرك صدقينى انا عمرى ما تخيلت انى احب بالشكل ده " "ماجد: انا عايز اقول ادامكم كلكم انى يغنى الاغنية دى للانسانة الوحيدة الى ملكت قلبى بجد وخلتنى اشوف الحياة بشكل تانى الانسانة الى خلتنى عايز اعمل علشانها اى حاجة المهم تبقى معايا وجنبى .....الانسانة دى الى واقفة ادامى دلوقتى عايز اقولها كلمة واحدة بكل الصدق الى الدنيا . بحبك يا ريم وعمرى ما حبيت ولا هحب حد غيرك. بحبك ومتمناش اى حاجة فى حياتى غير انك تفضلى معايا وجنبى " وهنا فاقت ريم للواقع ريم فى نفسها: ياه يا ماجد للدرجة دى قسيت عليك كل ده وكنت بتحاول تلفت انتباهى وانا كان كل الى هاممنى شبح الماضى الى بيطاردنى والى انت ملكش ذنب فيه انت كان عندك حق انت كنت اقوى منى بتحاول تحافظ على حبنا وانا كنت ضعيفة ومستسلمة لضعفى وخوفى قاطع شرودها وليد: يالا يا ريم عشان نركب الطيارة ريم فى تردد: طيارة ! وليد: ايه متنحة ليه مش مسافرة يلا ريم: مش هقدر يا وليد وليد: مش هتقدرى ايه ريم: مش هقدر اسافر واسيبه مش هقدر اعيش من غيره انا سعادتى معاه وجنبه وزى ما قلتلى شبح الماضى كان واقف بينا بس انا خلاص مينفعش اخاف بعد كل الحب الى شفته فى عينيه ومينفعش اسيبه وليد: روحيله يا ريم ريم: عشان خاطرى يا وليد متزعلش منى وليد: بالعكس انا فرحان عشانك اوووووى ربنا يسعدك يا حبيبتى واترمت ريم فى حضنه اما هو فسابها وراح ركب الطيارة فى عيادة ماجد: ماجد قاعد مهموم وسرحان خلاص بقى متاكد انه خسر ريم للابد بيقطع شروده صباح صباح: دكتور ماجد فى واحدة.... ماجد: مش عايز اقابل حد يا صباح قوليلهم الدكتور مش موجود مسافر اى حاجة المهم مش عايز اشوف حد ريم بتقطع كلامه: ولا حتى انا يا ماجد ماجد بيقف مكانه من الصدمة وعينيه بتلمع من الدموع: ريم ....انتى مسافرتيش؟ ريم: ازاى اسافر واسيب قلبى هنا طب اعيش ازاى من غير قلب ماجد: قصدك ايه ريم قربت منه ومسك ايده: قلبى معاك انت يا ماجد عشان كده مش هعرف اعيش بعيد عنك ..........انا بحبك ماجد ضمها ولف بيها بفرحة: وانا بحبك وبموت فيكى ......ويالا ادامى حالا ريم: على فين؟ ماجد: على باباكى هحدد معاه ميعاد لكتب الكتاب والفرح انا خلاص مش هستنى تانى بعيد عنك ريم حطت ايديها فى وسطها بمرح: يا سلام يا اخويا طب ولوجى بتاعتك ماجد : لوجى دى بنت خالى مش اكتر ريم : يعنى قصدك ....... ماجد بحب : يعنى بحبك ومبحبش حد فى الدنيا غيرك . الموضوع كله مكنش اكتر من لفت انتبـــــــــــــاه النهـــــــــــــــاية

مقالات ذات صلة

وجع الفراق حنان عبد العزيز

خديني معاكي يا ام سيد

من أجمل القصص 👇

هل مال الابن مباح للأب حتى ولو كان الأب غنيًا؟

متمردة عشقت كبرياءه بقلم دودو محمد ج3

خدعت عمدة الصعيد بقلم فاطيما يوسف

اترك تعليقاً إلغاء الرد