رواية لست فقط حبيبي(الفصل الحادي عشر إلى الثامن عشر) بقلم نونه

الفصل الثالث عشر

تعود نور مع باسم ليجدوا اميرة وعصام فى استقبالهم …………….

عصام : انتوا كنتوا فين؟…… وصحيتوا امتى ؟؟؟

باسم : الناس تقول صباح الخير الاول….

اميرة : احنا بجد قلقنا على نور اوى خصوصا انها تعبانة امبارح ولما صحينا مالقنهاش خوفنا يكون حصل حاجة…..

نور : انا كويسة الحمد لله بس حبيت اتمشى شوية على البحر وباسم مارضيش انى اخرج لوحدى….

عصام : وماصحتنيش ليه ؟

باسم : بتقولك بااااااااااااااااااااااسم خلى فى دم بقى انا لو منك اخلع واسيب مكانى للى يستاهلوا……

عصام : انا مش فايق لهزارك السخيف ده على الصبح….

نور : طب اسيبكم تتخانقوا وهطلع اجهز نفسى للسفر علشان هنرجع النهارده ان شاء الله….

اميرة : ليه ؟ احنا لسه قعدنا…..
وبعدين انتى لسه تعبانة يانور

نور : لاياحبيبتى انا بقيت كويسة الحمد لله
وعاوزة ارجع الشغل وكمان جدى وحشنى اوى

عصام : وكل التغير المفاجئ ده حصل فى ليلة!!!

اللى يشوفك امبارح مايشوفكيش دلوقتى يعنى

نور : يعنى اخلينى زى امبارح احسن ؟

عصام : ماقولتش كده …..انا اكيد عاوزك تبقى كويسة بس كمان حاسس انى زى الاطرش فى الزفة….

نور : لاده بيتهيالك

باسم : انا هروح اودع البحر واخدلى غطسين قبل مانمشى عيب لما باسم المصرى يجى الساحل وماينزلشى الماية الا مرة واحدة….
على ماتخلصوا تجهيز الشنط وتفطروا اكون جيت ….
سلام

اميرة : امرى لله هروح اجهز شنطتى اللى مالحقتشى تتفضى

نور : معلشى ياميرو متعوضة مرة تانية ان شاء الله….

اميرة : ولا يهمك ياقمر كله فداك ياجميل المهم انك تكون تمام….

………………………………………….. ………………………

فى فيلا صافى ……

صافى : ازاى يعنى هتسافر دلوقتى شغل ايه ده اللى وراك؟؟؟ مالشغل كله هنا …
والا كل مانقرب من نور وماصدقنا لقينا فرصة تكلمها فيها اصلا عاوز حضرتك تنزل اسكندرية وتضيع الفرصة دى

رءوف : انا مش هكمل المشروع ده وهشوف اى حد تانى يخش شريك معانا فيه…..

صافى : حد تانى مين!!!!!!

ده بقى ان شاء الله اللى هيكون فى حجم مجموعة المصرى جروب

وليه اصلا عاوز تشوف حد تانى ماانت كنت موافق ومتحمس كمان لغاية امبارح بس ؟؟؟؟

رءوف : والله انا ادرى بشغلى ومتشكر اوى لتعب حضرتك معايا

صافى : انت شكلك كده اتجننت ودادى مش هيرضى ابدا بالتخاريف بتاعتك دى

رءوف : انا نازل اسكندرية وهاخد احمد معايا وانتى لو عاوزة تقعدى اقعدى لوحدك براحتك….

صافى : وهتاخد احمد كمان لا ده كده فى حاجة وراك ولازم اعرفها

رءوف : لاورايا ولا قدامى ……
عن اذنك…..

ينصرف رءوف مع سميرة الدادة واحمد وينطلق بسيارته للاسكندرية …..

………………………………………….. ………..

الخادمة فى فيلا صافى :
فى واحد بره بيقول اسمه باسم عاوز يقابل حضرتك

صافى : باسم !!
ايه اللى جابه ده كمان دلوقتى!!!
قوليله جاية….

اهلا اهلا ده ايه النور ده كله باسم باشا عندنا بنفسه

باسم : النور ده نور القمر اللى نزل من السما وواقف قدامى ؟

صافى : ههههههههه ومن امتى بقى الكلام الحلو ده كله

باسم : من زمان بس انتى اللى مش واخدة بالك

صافى : لا بالعكس ده انا واخدة بالى كويس اوى

المهم اتفضل….. تشرب حاجة؟؟؟

تنادى صافى على الخادمة التى لاتسمع نداءها وتتاخر فى الرد

صافى : اووووووووووووف راحت فين دى كمان والا مشيت مع البيه هى كمان…..

باسم : بيه مين اللى مشى ؟

صافى : رءوف ياسيدى خد احمد ونزل على اليكس من شوية

باسم : فجاة كده ؟

صافى : واالنبى ياباسم قفل على السيرةدى ….
ده شكله اصلا اتجنن وانا خلاص مابقتشى لاعارفة افهمه ولا طيقاه

باسم : طب ماتفهمينى بس فى ايه يمكن اقدر اساعدك ؟

صافى : ممكن فعلا تقدر تساعدنى ؟

باسم : اكيد ياجميل انا تحت امرك ومستعد اعمل اى حاجة علشانك

صافى : هههههه لا ده واضح ان النهارده كلكوا مش طبيعين خااااااااااااااااالص

عموما شوف بقى ياسيدى

كان فى مشروع كده كان دادى فكر فيه من فترة على حتة الارض بتاعتنا اللى هنا لكن مااتنفذشى لعجز السيولة وكنا فكرنا ان رءوف يعرضه على نور وتدخل معانا شريكه فيه ورءوف كان موافق ومتحمس لكن فجاة النهارده لقيته بيقول انه مش عاوز يعمله وعاوز يشوف شريك تانى

باسم : بس كده غالى والطلب رخيص اوى ياقمر…..

يمكن بس رءوف خاف لنور ترفض والا حاجة ويبقى عمل شرخ فى الصداقة اللى مابينا فماحبش يدخل الصداقة فى البيزنس

صافى : لو كده يبقى انا فعلا عندى حق مابقاش يطاق بجد….. اوووووووف ياربى

باسم : ماتزعلشى نفسك ولاتحرق دمك ياقمر…
انتى دلوقتى انزلى حصليه وكلمتين حلوين منك هيسلم سلاحه على طول…..
و انا اضمنلك انى اجيبلك موافقة نور على المشروع من بكره وبالشكل اللى يريحكم وبكل الشروط اللى تطلبوها

وكمان مش هنسى الكومشن بتاعك انتى من حقك عمولة بردوا اه بيزنس از بيزنس وهتكون عمولة هتعجبك اوى هدية من بسوم وعربون محبة….

صافى : انت بتتكلم بجد والا بتهزر كعادتك؟؟؟؟
تقدر تعمل اللى بتقول عليه ده ؟

باسم : ابعتى انتى بكره رءوف المجموعة وهتشوفى انى قده وهيرجعلك بموافقة وبكل الشروط اللى تحددوها ومعاهم شيك بعمولتك ياجميل انا عاوز بس رضاكى وسسعادتك مش اكتر

صافى : لو صدقت فعلا ياباسم هيبقى جميل كبير اوى وعمرى ماهنساهولك ابدا

باسم : علشان خاطر الابتسامةا للى تسحر دى اى حاجة تبقى تحت رجليكى باشارة واحدة بس

صافى : اتفقنا بكره هيكون رءوف فى المجموعة

بس هو مش نور هنا وانتوا هتقعدوا هنا كام يوم؟؟؟؟

باسم : لاماانا كنت جاى اسلم عليكى واقولك اننا هنسافر دلوقتى علشان عندنا شغل فى المجموعة والحمد لله انى جيت فى وقتى

صافى : فعلا جيت فى وقتك المناسب…..

خلاص انا هقوم اجهز نفسى انا كمان وانزل اسكندرية وبكره رءوف هيكون فى المجموعة…

يقف باسم من مجلسه ويتقدم باتجاه صافى وفى عينيه نظرة هائمة ويمسك بيديها ويقبلها……

باسم : عن اذن القمر اشوفك فى اسكندرية واكيد هشوفك كتير اوى الايام الجاية….

صافى : اوك….. باى
باسم : باى ياقمرى……

………………………………………….. ………………………………

تعود نور الى الاسكندرية وكل مايدور فى عقلها وتراه امام عينيها هو احمد ورءوف وتفكر فى كلام باسم…..

وتتسال من الذى كان وراء حرمانها من حبيب عمرها وابنها ؟؟؟
من سلبها قلبها ومزقه مليون قطعة وجعل بيتها الذى كان عامر بالحب والود والسعاده يتحول لركام من الاطلال ؟؟؟
ولماذا ؟
هل اذت احد فاراد الانتقام منها ؟

ولكنها طوال حياتها لم تؤذى حتى طير او حيوان ولم يكن لها اختلاطات ولاعلاقات …ولم تعرف طوال حياتها الا اشخاص معدودين على اصابع اليد الواحدة…..

فمن هذا الذى فعل بها كل هذا ؟
لابدا وان تعرفه ؟
لابد وان تعيد كرامتها وشرفها قبل اى شئ

لابد وان يعود ابنها الا احضانها
ورءوف ؟ هل ياترى لايزال يحبها كما قال باسم اما ان كلامه مجرد اوهام ؟…………..

تجد صورة صافى تقفز امامها عند ذكرها لحبيب عمرها….

ياترى هل يحبها ؟
كيف ؟
ولما تزوجها ؟
هل هى الزوجة المناسبة له والام لابنه ؟

ولكنها رات بعينيها انها ليست بالام الصالحة وبسبب اهمالها تعرضت حياة احمد لاكثر من مرة للخطر

ينخلع قلبها من بين ضلوعها قلقا وفزعا على احمد وتذكرت كيف انه شارف على الموت بسببها وانه ليس بمامن بين يديها …
اذا فلابد ان تسترده منها باسرع وقت ولابد ان تضمن حمايته وسلامته حتى يعود اليها…..
ولكن كيف ؟

اميرة : نور احنا وصلنا

نوووووووووووووووور

ايييييييه انتى فين ؟

نور : ها ؟ بتقولى حاجة يااميرة

اميرة : بقول احنا وصلنا لكن انتى ماكنتيش معانا خالص طول الطريق….
اللى واخد عقلك

باسم : يتهنابوا طبعا
هنيالك يابسوووووووووووووم وينظر لعصام متعمدا

عصام : طب يلا يااخويا اتفضل انزل وصلنا

ينزل الجميع ويقترب باسم من نور ويهمس فى اذنيها

باسم : عم قول يارب

تبتسم نور وتمضى الى الفيلا بينما يلحظ عصام ماحدث ويثير غضبه مابين نور وباسم…………….

نور : وحشتنى اوى اوى اوى اوى ياجدى

فاروق : انتى كمان وحشتينى اوى ياحبيبتى وكنت بفكر اجيلكم لانى مابقتش اقدر مااشوفكيش يوم واحد كمان

باسم : ياسلام هى بس اللى وحشتك دى حتى حفيدتك من كام شهر انما احنا احفادك من زمااااااااااااااااااان يخونك العشرة ماكانشى العشم ياباشا

فاروق : الحاجة الحلوة الوحيدة فى سفركم انى كنت مرتاح منك انت بالذات

باسم : بقى كده ماشى انا بقى مش هريحك منى ابدا بعد كده ولازقلك هنا طول عمرى

نور : طب عن اذنكم هطلع اغير هدومى واستريح شوية

فاروق : ماشى ياحبيبتى وبالليل ابقى عدى عليا علشان عاوزك

نور : حاضر ياجدى

………………………………………….. ………………………………………….. ………………

تصل صافى لفيلتها وتتصل بوالدها وتقص له كل ماحدث وتنتهى بوعد باسم …….

شاكر : طب خلاص كده رءوف هيرفض ليه بقى؟

صافى : والله ممكن يعملها رءوف اصله شكله خلاص اتجنن ومابقاش طبيعى

شاكر : خلاص انا هتكلم معاه اول مايجى

فى تلك الاثناء يصل رءوف …..

شاكر : حمد الله على السلامة يارءوف

رءوف : الله يسلمك ياعمى

شاكر: الورق بتاع مشروع القرية السياحية جاهز معاك مش كده؟

رءوف : ايوه ياعمى وانا كنت لسه هكلم حضرتك بخصوص المشروع ده ….
انا لقيت مستثمر تانى مستعد يشاركنا فى المشروع بدل المصرى جروب

شاكر : بنسبة كام ؟

رءوف : زى ماقولنا قبل كده خمسين فى المية لخمسين فى المية

شاكر : لاعدل النسبة وخليها 51 فى المية لينا ويكون لينا حق الادارة المطلقة وزود مواصفات القرية المطلوبة والتكلفة…

رءوف : ايوه ياعمى بس كده عمره ماهيوافق
كده هنكون مساهمين بنسبة ماتستحقش الخمسين فى المية حتى …انت كده بتزود التكلفة عليه وبتقلل نسبته كمان !!!!!!!!

شاكر : يرفض براحته انا عندى اللى هيوافق بالشروط دى يبقى ليه ارضى بالاقل؟

رءوف : مين ده اللى موافق بالشروط دى ؟

شاكر : نور المصرى

رءوف : ايه ؟
مش هينفع مش ممكن

شاكر : ايه اللى خلاه مش ممكن

رءوف : انا اتفقت خلاص مع الراجل ونهيت كل حاجة ازاى ارجع فى كلامى وكمان نضمن منين انهم هيوافقوا على الشروط دى

شاكر : انت اتفقت من نفسك ودى مشكلتك اتحججله باى حاجة والبيزنس مافيهوش اتفقت وكلمتى فيه مكسب وخسارة ولو عاوز يكمل المشروع بالشروط الجديدة نبقى نفكر

اما بالنسبة لايه يضملنها ان نور توافق …فصافى اخدتلك موافقة ووعد مباشر وميعاد انك تروح بكره للمجموعة وتخلص كل حاجة وتمضى العقود

رءوف : ازاى وامتى ؟

شاكر : مش مهم معانا ازاى وامتى المهم ان ده حصل وكمان هتاخد شيك بعمولة كويسة اوى لصافى …..الشريك بتاعك ده كان هيدفعها ؟

يعنى مكسب لينا من كل النواحى

رءوف : خلاص يبقى حضرتك ممكن تباشر المشروع ده بنفسك وبكره هبقى ابعت مهاب بالاوراق يمضيها….

شاكر : انت اللى هتروح بنفسك….
ازاى تبعت واحد طلع والا نزل موظف عندك عاوز يقولوا علينا بنستقل بيهم

انت عارف فاروق المصرى لو غضب علينا ممكن يعمل فينا ايه؟

ده يفعصنا باصغر صباع ليه ومايتبقلناش اى اثر فى السوق

بكره تاخد الاوراق وتروح تخلص الموضوع كله وده اعتبره امر ولازم تنفذه

ينصرف رءوف دون ان يجيب وياخذ سيارته وينطلق بها………..

صافى : شفت يادادى بقى دى عمايل واحد عاقل

شاكر:معاكى حق حاجة غريبة فعلا
واحد غيره كان زمانه مبسوط بالمشروع ده
لكن مش ده المهم دلوقتى المهم انه ينفذ وبس وهينفذ سواء برضاه او غصب عنه…..

………………………………………….. …………………………………….

نور : تحت امرك ياجدى كنت قولت انك عاوزنى

فاروق : اقفلى الباب وتعالى

انا عرفت مكان رءوف

نور : وانا كمان

فاروق : انتى كمان ؟ انا كنت فاكر انك هتتفاجئ ؟

نور : انا قابلته فى الساحل الشمالى مع صافى مراته و احمد

فاروق : ابنك….. صح؟

نور : ايوه

فاروق : وايه اللى حصل بالظبط لما اتقابلتوا ؟

تقص نور كامل ما حدث مع جدها بداية من روئيتها لرءوف حتى الحديث الذى دار بينها وبين باسم …..

فاروق : باسم عنده حق

لازم نعرف مين السبب فى كده وليه عمل كده

نور : والاهم لازم اطمن على ابنى ياجدى انا مش مطمنة عليه وهو مع صافى…..

فاروق : مسالة احمد دى سهلة ممكن تشوفيه زى ماتحبى ولو حابه يعيش معاكى كمان وكل الناس تعرف انه ابنك سهلة بردوا

نور : ازاى ورءوف مش هيسمحلى بس بانى اشوفه؟؟

فاروق : مايقدرش يعمل حاجة

نور : رءوف عنيد ومش هيسلم بسهولة وانا مش ممكن اوافق على اى حاجة فيها ضرر ليه

فاروق : نبرة الضعف اللى فى صوتك دى لازم تنتهى وفورا مش ممكن نور المصرى تبقى ضعيفة قدام اى حد من النهارده

نور : رءوف مش اى حد ياجدى
ومش ممكن اكون قوية على روحى وعمرى حتى لو قدرت اقتل روحى فبردوا مش هقدر اقوى على رءوف

فاروق : انا بكره القلب لما يحب

بيضعف ويخيب ويخلى الكلاب تنهش فيه وهو مستسلم حتى من غير اى مقاومة

نور : مش بارادتى ياجدى

فاروق :لكن بارادتك انك تنتنازلى عن حقك …..تتنازلى عن ابنك …..تتنازلى عن سمعتك وشرفك …..تتنازلى عن شرف العيلة كلها لو رءوف نفذ تهديده وقال لكل الناس ليه طلقك….
ليه قادرة تنتنازلى عن كل ده ومش قادرة تنتازلى عن مرض لعين اسمه الحب؟؟؟؟؟؟؟!!!

نور : انا ماقولتش انى هتنازل عن اى حاجة من دى

لكن مش على حساب رءوف

رءوف ضحيه زيي بالظبط ويمكن اكتر منى كمان انا متاكدة انه كان ضحيه لحد لعب بيه وبيا
وزى ماازانى ازاه….. فازاى هدوس على الضحية التانية علشان اوصل للجانى ابقى انا كده فرقت عنه فى ايه؟؟؟؟

فاروق : ماتفرقيش عن احلام كتير………..

ماشى وانا موافقك واقتنعت بس تقدرى تقوليلى ازاى هتطمنى على احمد

نور : مش عارفة بس لازم افكر

فاروق : خلاص فكرى براحتك ولما توصلى لاى فكرة قوليلى

بس ليا عندك طلب صغير

ياريت لو قابلتى رءوف تانى واكيد هتقابليه ماتظهريش ضعيفة قدامه لانه هيفسره احساس بالذنب لازم تكونى قوية لانك ماغلطتيش وتحسسيه هو بانك مش حاسة باى ذنب

نور : حاضر ياجدى ……….

………………………………………….. ………………………………..

يستمر رءوف قراية الساعتين وهو يقود سيارته لايعرف الى اين يذهب ولكنه يود لو باستطاعته ان ياخذ ابنه ويبعد عن كل الدنيا يهرب منها تلك التى عادت تطارده كشبح من الماضى الذى لم ينساه يوما……..

وفى النهاية كعادته يستقر امام عمارة صديقه مهاب الذى لم يعد له اصدقاء سواه بعد ان ترك مصر واستقر فى الاسكندرية وانقطعت جميع اتصالاته باصدقائه القدامى وظل له مهاب فقط يعمل معه بالشركة بالنهار وبالليل يسهر مع ويشكى له همومه …………

مهاب : اهلا اهلا بالباشا اتفضل

يدخل رءوف ويرتمى بجسده على كرسى ويبدو عليه الهم كمن يحمل جبل على صدره …

مهاب : مالك يارءوف شكلك مايطمنش؟

رءوف : لو قولتلك مالى مش هتصدق

مهاب : ياسيدى قول وهحاول اصدق

رءوف : نور

مهاب : نور ؟ نور مين؟

اااااااااااااااااااه نوووووووور

ايه فكرك بيها بعد السنين دى كلها هى عرفت مكانك هنا ؟!!!!!

يحكى رءوف لمهاب كل ماحدث فى الساحل انتهاءا بحديث واومر شاكر بيه…………………

مهاب : انت بتخرف بتقول ايه يارءوف ؟ اكيد انت اتجننت وبيجيلك تهيات

ايه هيجيب نور طليقتك لنور المصرى

رءوف : مااعرفشى لكن اللى متاكد منه انها هى

مهاب : مش ممكن !!!!!!!!! بقى نور تبقى حفيدة فاروق المصرى الملياردير

رءوف : انا ماكنتش قادر اتحمل لما شفتها قدامى لدقايق

ازاى هشتغل معاها واشوفها تانى وتالت وعاشر؟؟؟؟

وازاى هقدر احمى ابنى منها؟؟؟

مهاب : ابنك ؟ وتحميه منها ليه؟ هى معقولة هتازى ابنها يعنى؟؟؟

رءوف : تازيه ايه يامهاب….. احميه من انها تاخده

مهاب : اكيد هى مش هتقدر تاخده هتقول ازاى انه ابنها وتفتح الباب للتفتيش فى الماضى وكمان انت هددتها انك تفضحها يبقى اكيد لوماخافتش على نفسها فاروق المصرى مش هيجازف بسمعته يعنى

لكن اللى بتقوله ده معناه ان ابنك بقى عنده ثروة ضخمة نص ثروة فاروق المصرى بجلالة قدره دى تبقى طاقة القدر واتفتحتلك انت وابنك

رءوف : ايه التخاريف اللى انت بتقولها دى

مهاب : انا مابخرفش انت ممكن تكسب مكاسب خرافية …
مشاريع ابوابها متفتحه…. وفلوس مالهاش اخر …والمقابل انك تخليها تشوف الولد مرة كل اسبوع والا حتى كل شهر مش حاجة يعنى

رءوف : انت اتجننت انا اخد منها فلوس؟

انا اتاجر بابنى ؟

انا لاعاوز اشوفها ولا ابنى يعرفها طول عمره اصلا

عاوز اطفش واسيب البلد والدنيا كلها واروح مكان ماحدش يعرفنى فيه لانا ولا ابنى

مهاب : تهرب وتطفش من مين

انت لو نزلت تحت الارض فاروق المصرى باشارة منه يجيبك حتى لو سافرت اخر الدنيا…..

وليه ترفص ثروة جتلك لحد عندك من غير اى تعب ولا سعى؟؟؟
واهوه يبقى بتدفعها تمن جريمتها وبتنتقم منها كمان ياسيدى وبتبرد نار قلبك اللى لحد دلوقتى قايدة…..

انت لو ضحكت على نفسك مش هتضحك عليا

مش اللى مجننك بس انها تشوف احمد او حتى تاخده

انت لسه بتحبها ومش هتتحمل تشوفها ولاتتعامل معاها لانك لسه بتحبها

رءوف : بحبها !!!!!!!!!!!!!