قلب لا يعرف الحب شيماء نعمان

انا قلب لا يعرف الحب

كيف اقتحمتى اسوار قلبى لتحطمى غرورى

كيف ملكتى عقلى وكيانى …. اذا كنتى ترغبين فى اقتحامى فانا مستسلم لكى

فانا عاشق ذاب قلبه من نظراتك فاين كنتى ومن اين جئتى

الحلقة الاولى

من انت؟

صباح مختلف عن اى صباح فها نحن الان فى احدى شركات المقاولات والتعمير يدخل دكتور محمدخيرى صاحب الشركة وواحد من اشهرالمهندسين المعمارين يدخل مكتبه
محمد:صباح الخير ياهدى
هدى السكرتيرة:صباح النور يافندم
يجلس على مكتبه:اجمعيلى كل المهندسين يكونوا عندى بعد عشر دقايق
هدى:حاضر يافندم
بعد عشر دقائق يجتمع مهندسين الشركة فى مكتب محمد يجلس على راس منضدة الاجتماعات
محمد:صباح الخير ياولاد
الجميع :صباح النور يا دكتور
محمد:فين نور
نطق احد المهندسين يوسف:على وصول يادكتور
ماهى الا لحظات وتدخل فتاة جميلة متوسطة الطول محجبة بيضاء البشرة وبعيون عسلية مائلة للون الاخضر انها نور
نور:السلام عليكم ورحمة الله وبركاته
الجميع:وعليكم السلام ورحمة الله وبركاته
محمد:ايه اللى اخرك كده يانور
نور:معلش يادكتور كنت فى مكتب المناقصات بسحب الملف زى انت ما طلبت
محمد:طيب اسمعونى كلكم انتوا طبعا عارفين انا ولادى كلهم مسافرين بره وانا بصراحة تعبت من الشغل وعايز استريح عشان كده هسافر عند ابنى فى السعودية ….. وهبيع الشركة
احاديث جانبية كثيرة واحساس بالضيق يتملكهم جميعا
نور:ازاى يادكتور يعنى حضرتك بعتها خلاص
محمد:ايوه يانور انا ان كلكم زعلتم بس عايز اطمنئكم كل حاجة هتفضل زى ماهى انا اتفقت مع المشترى على كده
يوسف :وهو مين ده يادكتور
محمد:بكره هيجى وهتقابلوه اتفضلوا دلوقتى
خرجوا جميعا متساءلين عن المشترى الجديد من يكون؟

اليوم التالى الكل على استعداد للقاء المدير الجديدالساعة التاسعة صباحا تقف امام المبنى سيارة سوداء فارهة ينزل منها شاب فى حوالى الخامسة والثلاثين من عمره اسمرالبشرة طويل عريض المنكبين بشعر اسود طويل نوعا ما ويتكا على عصا يستند عليها وهو يخرج من السيارة وبصحبته فتاة سمراء بشعر اسود طويل وملابسها الضيقة والقصيرة المستفزة
يدخل الشركة وسط نظرات من جميع الموظفين فظنوه احد العملاء الجدد للشركة
بعد مدة يطلب محمد جميع المهندسين مرة اخرى يدخلوا جميعا حجرة الاجتماعات يجدون محمدمع هذا الضيف والضيفة
محمد”طبعا انتوا عرفتم ان الشركة اتباعت خلاص وسالتم مين صاحب الشركة احب اعرفكم بالباشمهندس {ادهم فخر الدين} صاحب الشركة الجديد وعلى فكرة باشمهندس ادهم كان تلميذى زيكم بالظبط
دقات سريعة على باب الغرفة وتدخل نورترتدى شميز طويل على بنطلون من الجينز وترتدى حقيبة على جانبها
اسف للتاخير
محمد:المهم كله تمام
نور:تمام ياهندسة
نظرت فوجدت اشخاص غريبة عن المكان
محمد:اقعدى يانورانا لسه كنت بقول ان الباشمهندس ادهم هو اللى اشترى الشركة
اومات نور براسها ولم تتكلم واحست بضيق واضح عند سمعاها ما قاله محمد لاحظها ادهم الذى تفحصها بنظراته النارية كما تعود مع الكثيرات من بنات حواء
انتهى اللقاء بينهم وجلس ادهم مع محمد
محمد:ايه رايك ياادهم اظن كده عرفت كل حاجة عن الشركة والمهندسين كمان
ادهم:بس باين ان فى حد مضايق من وجودى
محمد:تقصد مين
ادهم:البنت اللى دخلت متاخر تقريبا…..نور
محمد:اه ه ه بص ياادهم نور دى مش هتلاقى زيها تعتبر افضل مهندسة عندى هنا صحيح فى اكبر منها بس البنت دى موس شغل معندهاش غير الشغل وبس
نطقت جيلان المرافقة لادهم:باين اوى بامارة ما جت متاخر
محمد:لالا نور كانت فى مشوار شغل دى عمرها ماتيجى متاخر الا اذاكانت تعبانة وصدقنى ياادهم حط ثقتك فى نور ومتخافش

بعد فترة سافر محمد الى السعودية للاقامة مع ابنه الاكبر وترك الشركة بعدما استلمها ادهم
جيلان:مش عارف ياادهم ليه الشركة دى بالذات
ادهم:كفاية سمعتها دى هتبقى بداية قوية ليا هنا فى السوق اقتربت منه وجلست على المكتب امامه
وقالت بدلع ايه رايك نروح شقتى نتغدى هناك
نظر اليها قليلا :وانا من امتى بروح شقتك ياجى جى
جيلان:وفيها ايه مدام واثفين من بعض خلاص
ادهم:ههههه المفروض انا اللى اقول الكلمة دى مش انتى ثم انا مش فاضى
ضغط زر بجواره :تعالى لوسمحتى
دخلت هدى سريعا بيدها دفتر صغير:تحت امر حضرتك
ادهم:بصى ياهدى انا عايز اعرفك نظامى
املئ عليها كل ما المطلوب منها وعندما همت بالخروج:قوليلى ياهدى مين هنا كان المسئول بعد الدكتور محمد
هدى :الباشمهندسة نور كانت دراعه اليمين فى كل حاجة
ادهم:طيب خليها تيجى لوسمحتى
تذهب هدى لكتب نور المنشغلة فى عملها باحد المشاريع
هدى:نور تعالى بسرعة باشمهندس ادهم عايزك
نور بضيق:عايز ايه
هدى:مش عارفة بصراحة
نور:اوكى
تذهب نور الى مكتب ادهم تستاءذن بالدخول لتجد جيلان جالسة على المكتب امام ادهم بصورة مخجلة
نوربضيق:حضرتك عايزنى
ادهم:اه
صمت سيطر على المكان وادهم منشغل باوراق امامه
التفت نور لتخرج من المكتب
ادهم:انا مقلتش امشى
التفت نوربحدة:اه بس طلبتنى ووقفتنى اودامك من غير سبب
جيلان:انتى ازاى تتكملى كده
نور:انا موجهتش كلام ليكى انا بكلم الباشمهندس
ادهم باستفزاز:روحى هاتى ملفات العمليات الجديدة
نور:حاضرحاجة تانية
ادهم:لامتتاخريش بس مش تقوليلى بكره ولا بعده
نور:عشر دقايق ويكونوا عندك
خرجت وتركتهم واتجهت الى مكتبها وهى تشعر بضيق من ادهم وجيلان احضرت الملف وخرجت من المكتب نادا عليها يوسف
نور ممكن اقولك حاجة
نور بنفاذ صبر:خير يايوسف
يوسف:ايه مالك
نور:ابدا الراجل اللى جوه ده خنيق اوى ومستفز
يوسف :لحقتى يا شيخة تفهميه
نور:طبعا ده انا خبرة فى البشر
يوسف:ماشى ياخبرة ….. طيب مردتيش عليا فى موضوعنا
نور:يوسف انا قلتلك قبل كده احنا اخوات وانا لحد دلوقتى مش بفكر فى جواز ولا غيره فبلاش تتعب نفسك معايا احنا اخوات وزمايل احسن من اى حاجة
شعر يوسف بالحزن:خلاص يانور اللى تشوفيه
نور:لالالا التكشيرة دى هتكلفك غداء النهاردة للمكتب كله
ضحك يوسف بشدة:كده ضحكت ادفعى انتى
نور:منين هو انتم خليتم حلتى حاجة اسيبك بقى واروح لقدرى
دخلت مكتب ادهم:اتفضل الملف اهو اى خدمة
ادهم:انتى روحتى تجيبى الملف ولا تتمسخرى
نوربغضب:نعم بتقول ايه
ادهم:بقول ملهاش لازمة الضحك والكلام مع زمايلك فى الطرقة
نور:اه ه ه طيب بص ياباشمهندس لو لقيتنى قصرت فى شغلى ابقى اتكلم غير كده ملكش حاجة عندى اتكلم اقف انا حرة انت مش هتحكمنى
ادهم:استنى عندك ايه محدش عاجبك ولا ايه
جيلان:باين كده يادودو
نظر اليها ادهم بغضب عندما نطقت باسمه كذلك
ادهم:شوفى يانور مدام بتشتغلى عندى يبقى تحترمى صاحب الشركة اللى انتى بتشتغلى عندى فيها فهمتى
نور:طيب يا باشمهندس احب اعرفك انى محترمة غصب عن عين اى حد

الحلقة الثانية
لاتتحدانى

نظر الى عينيها مباشرة:بتقولى ايه سمعينى كده تانى
نور:اظن سمعتنى عن اذنك وخرجت وتركتهم مندهشين من جراتها
جيلان:ايه ده ايه البجاحة وقلة الادب دى
ادهم:ماشى يانور ماشى بكره هتشوفى ايام سودة منى
دخلت مكتبها غاضبة والقت بجسدها على كرسى مكتبها دخلت عليها صديقتها تقى وجدتها حزينة غاضبة
تقى:ايه يانور مالك
نور:ابدا مفيش
تقى:لالا وهو انا مش عارفاكى يانور مالك بقى
قصت عليها ماحدث بينها وبين ادهم
تقى:نور انتى غلطانة بطلى اسلوب التحدى بتاعك ده ومتنسيش انه دلوقتى صاحب الشركة ولازم تروحى تعتذرى
نور: اعتذر دى لو فيها رفدى من الشركة مش هيحصل
تقى :عمرك عنيدة ودماغك انشف من الحجر
نور: الحمد لله انك عارفة ياتوتا بقولك انا مش فاضية لوجع القلب انا رايحة الموقع اتابع العمال هناك سلام
خرجت من مكتبهارن هاتفها فردت عليه توقفت امام المصعد حتى وقف امامها ماان ركبت حتى وجدت ادهم وجيلان امامها
نور:ايوه يارجب لا مفيش حاجة تتطلع من غير ما اتاكد منها …لا انا جاية اهوو سلام
ركبا سويا بدون اى كلام حتى خرجت من المصعد وركبت سيارة صغيرة الواضح عليها انها قديمة نوعا ما
جيلان:هههه شوفت العربية ايه ده
ادهم:زمان مكنش عندى زيها
جيلان:بس انت دلوقتى ايه يادودو انت ادهم فخر الدين
ادهم:عمرى وانا ادهم فخر الدين بس دلوقتى بقيت ادهم العاجز

عدة ايام مضت وهويراقب كل شئ خلف مكتبه من خلال الزجاج العازل الذى من خلاله يرى الخارج ولا يراه احد
كان يراها شقية مرحة مع كل من حولها ظلها خفيف تجذب اليها الجميع ببساطتها وخفة دمها
كان يمر يوما على مكاتب الموظفين مع جيلان التى لاتتركه ابدا كظله
سمع اصوات من ناحية غرفة المهندسين وجدهم يتحدثون بصوت عالى ويضحكون وهم يجلسون حول نور
زميل نوراكرم:بس تصدقى يانوركان شكله مسخرة وهو نازل هوب على الرمل كان نفسى اصوره وانزلها على الفيس
نور:لالا حرام احنا بتوع كده برضه فيديو وعلى اليوتيوب عدل
اكرم:ههههه واحطله اغنية بتاعت تامر حسنى …. وانا عاصر على نفسى ليمونة بستحمل وبقول مجنونة
صاح معه الجميع:هيه هيه هيه
ايه المسخرة دى
نطقها ادهم بوجهه الغاضب وهو ينظر اليهم ارتعب كل من فى المكتب ووقفوا امامه بحرج شديد ماعدا نور
ادهم:اظن ده مكان شغل مش قاعدين على قهوة تغنوا وتهزورا لازم تعرفوا ان ده مكان شغل واللى مش عاجبه يشتغل باحترامه هنا يتفضل مع السلامة ونظر الى نور التى لم تتحرك من مكانها وبيدها كوب شاى ترتشف منه غير مبالية بحديثه نظر اليها نظرة نارية
تعالى ورايا ياانسة نور
وخرج وتركهم خائفين من حديثه
اكرم:نور الله يخليكى اعملى اى حاجة مش ناقصة
قامت نور :اكرم
نعم
وانا عاصر على نفسى ليمونة
اكرم:امشى يانور امشى

وقفت امام الباب تسترد ثقتها بنفسها دقت الباب سمعت ادهم
ادخلى
كان يراجع اوراق عمله وحده بدون جيلان نظر اليها لثوانى ثم اعاد نظره مرة اخرى قائلا:بصراحة انا مش فاهم ده مكان شغل ولا مسرح تغنوا فيه
نور:هى الساعة كام
ادهم:نعم انا بقولك ايه وانتى بتقولى ايه
نور:شوف ياباشمهندس ياريت بلاش الاسلوب الاستهزاء ده
ثانيا الساعة دلوقتى تلاتة ونص يعنى وقت البريك بتاعنا اظن من حقنا نعمل اى حاجة فى خلال الساعة دى
نظر اليها قليلا حتى قال:اه بس مش لدرجة انكم تغنوا
نور:وايه المشكلة مدام احنا محترمين اوقات شغلنا يبقى ايه
ادهم:يبقى اسمها ان اى عميل يدخل يشوف المنظر ده هيقول شركة سايبة
نور:اولا العملاء كلهم عارفين نظام الشركة وكلهم بيعملوا احترام للكل
ادهم:يعنى انا مش محترم حد
نور:انا مقولتش كده انا بقول ان ده من حقنا واحنا معملناش حاجة غلط
ادهم:بقى كده ولو خصمت لكل واحد فيكم اسبوع هتقولى ايه
سكتت قليلا:اللى تشوفه لو ده هيرضى ضميرك اعمله
التفت لتخرج:استنى عندك
قام من مكانه مستند على عصاه ووقف امامها فاحست بقلة حجمها امامه ابتلعت ريقها:افندم
ادهم:انتى ليه واخدة اسلوب عداء معايا مع ان مفيش بينا مشاكل ولا حاجة
نور:لا طبعا مفيش مشاكل ولا فى بينى وبينك عداء بس انت اللى بدات باحراجى وده رد فعل طبيعى منى
ادهم:اه ه يعنى بتردهالى
نور:لا عادى انا بس بوضحلك
ادهم:طيب وليه اسلوبك مع زميلاك مختلف مع ان المفروض انى صاحب الشركة على الاقل تجاملينى ولا ايه
نور:انا مش بعرف اجامل حد
اقترب منها بخبث:طيب ايه رايك نتعشى مع بعض النهاردة
اندهشت نور من جراته:اسفة مش بخرج مع حد غريب
ادهم:بس انا مش غريب ده انا ريئسك المباشر حتى لو جيتلى البيت هيحصل ايه
وغمزلها بعينه عادى يعنى
كانت تريد صفعه ولكنها تمالكت نفسها:هو انت عندك اخوات بنات
اندهش ادهم:ايوه اتنين
ابتسمت نور بتحدى:يبقى لازم تعرف ان كل كلمة قلتها هتتقال لاخواتك وانا لولا انى بحترم نفسى كنت هعرفك معنى الكلمة دى ايه…. سلام

رواية قلب لا يعرف الحب.

بقلم شيماء نعمان.

الحلقة الثالثة

غريبة انتى؟
تركته وذهبت وظل مكانه حتى صرخ بهدى:هدى تعالى هنا
هدى بخوف من صوته:تحت امرك
ادهم:اكتبى قرار باعفاء الباشمهندسة نور مختار من منصب النائب وتعيين يوسف حجاج بدالها
وقفت هدى مكانها مذهولة حتى صرخ بها :روحى اعملى اللى قولت عليه
هدى:حاضر
ذهبت هدى وطبعت القرار وذهبت الى مكتب المهندسين
وقفت امامهم ولاتعرف كيف تعلم نور بخبر اعفاءها من منصبها
اكرم:ايه ياهدى مالك واقفة كده ليه
هدى:بصراحة فى قرار من ادهم بيه ولازم تعرفوه
توقفت نور عن الكتابة دون ان ترفع راسها
تقى:فى ايه ياهدى
اعطتها الورقة لتقراها امسكت تقى وقرات ما فيها اندهشت مثل هدى من القرارولم تتحدث
روفيدة خطيبة اكرم وزميلتهم:ايه الورقة دى فيها ايه هاتى كده
قراتها هى ايضا ولم تتكلم
اكرم:ايه احنا اترفدنا ولا ايه
دخل يوسف فجاة:نور قراتى القرار
نور:خير هدى واقفة بقالها مدة ومش عارفة الورقة دى فيها ايه
امسكت الورقة من يوسف وقراتها ومالبثت ان انطلقت فى الضحك
ايه وواقفين عاملين زى اللى اكلم سد الحنك ولا تزعلوا مش فى دماغى والله وبصراحة يايوسف كان حمل كبير عليا الله يكون فى عونك ….
ارتدت حقيبتها :انا رايحة الموقع سلام ياقطاقيط
اكرم:هو فى ايه يايوسف ايه اللى حصل
يوسف:مش عارف يااكرم مش عارف
تقى :نور هى السبب
روفيدة:ازاى؟
تقى:يعنى مش عارفين نور ودماغها النشفة
يوسف:ليه هو حصل ايه
تقى:مشكلة هايفة بينه وبين نور وهى كاالعادة خدتها تحدى
ربنا يستر من اللى جاى
انتظر فى مكتبه لتاتى اليه تطلب منه عودتها الى منصبها ولم يحدث وقف امام شرفة مكتبه راها تخرج وتركب سيارتها ظل ينظر اليها حتى رفعت راسها وجدته ينظر اليه ابتسمت بسخرية وركبت سيارتها ولم تبالى به
ظل يفكر فيما فعله هل كان صائبا ام خاطئا فالبفعل لايرضى ان يتحدث احد مع اخواته بهذا الاسلوب كاد عقله ان ينفجر من التفكير حتى جاءته هدى
مستر ادهم فى واحد بره بيقول اسمه زياد
ادهم:اه ده زياد صاحبى وهيبقى مكانى هنا فى اى حاجة تخص الشغل لو انا مش موجود
يعنى هتقعد تشرحلها وانا واقف بره
اتاه صوت زياد حتى قام من مكانه واحتضن زياد صديقه الحميم
حمد لله على السلامة ياصاحبى
زياد:الله يسلمك ياصديق
ادهم لهدى:ده باشمهندس زياد اخويا يعنى هيبقى مكانى فى اى حاجة سامعة
هدى:حاضر يافندم تامر بحاجة
ادهم:لا اتفضلى …. ثم استرد:هو انتى بلغتى المهندسين بالقرار
هدى:ايوه يافندم
ادهم:ونور عملت ايه
هدى:ابدا كانت مبسوطة وقالت انها شالت حمل تقيل
ادهم:بقى كده ماشى روحى انتى

تركتهم وذهبت واقفين مكانهم
زياد:فى ايه ومين نور
ادهم:اقعد بس رجلى وجعتنى
زياد:اه صحيح الدكتور سامى كلمنى بيكلمك مش بترد ليه بيقول ان فى دكتور جاى من المانيا كمان اسبوعين وعالج حالات زيك كتير
ادهم:كبر دماغك انا تعبت من العمليات والعلاج سيبك انت قولى عملت ايه
اعطاه اوراق :كل حاجة جاهزة المفروض خلال شهرين نتبدى على طول
ادهم:تمام والباشا عامل ايه
زياد:بيلف حوالين نفسه عشان يعرف صاحب الارض
ادهم:خليه يلف لحد ما يجيلى وساعته هوريه من العذاب الوان
زياد:ادهم احنا ماشين فى سكة طويلة محدش عارف اخرها والانتقام مش عارفين نهايته ايه
ادهم:لو هخسر عمرى مش هسيبه غير وهو مشلول زى ماعمل فيا هعمل فيه…. وفيها
زياد:لسه بتحبها
ضحك ادهم بشدة:احبها احب مين انا الحب ده اتمسح من قاموس حياتى معدتش ليه وجود انا حالف لاخسرهم كل حاجة سمعنى كل حاجة

كانت نور تركب سيارتها ويبدو عليها الغضب الشديد لقد تمالكت نفسها امام الجميع حتى لاتظهر ضعيفة امامهم وخصوصا هو وهى تراه ينظر اليها فقالت بينها وبين نفسها
ماشى ياباشمهندس هنشوف اخرتها معاك ايه

مرت فترة ولا يوجد جديد بينهم ماعدا تلك النظرات التى تنم عن التحدى والعند
كان ادهم فى مكتبه يراجع بعض الاوراق مع زياد فوجد اخطاء كثيرة فى الاوراق فنادا هدى
ابعتى الباشمهندس يوسف يجيلى دلوقتى
هدى:حاضر
بعد قليل حضر يوسف مرتبكا:افندم حضرتك طلبتنى
ادهم:ايه الاخطاء دى كله ياباشمهندس
تناول يوسف الاوراق وقراها:انا اسف يافندم غلطة مش هتكرر
ادهم:يعنى ايه غلطة لو مكنتش خدت بالى عارف الشركة كانت هتخسركام ولا هو من غير نور الشركة متمشيش
يوسف:بصراحة يافندم نور كانت شايلة حمل كبير انا مش اده فانا بطلب من حضرتك تعفينى
ادهم:روح يا يوسف روح
خرج وتركه مع زياد الذى ظل صامتا الى ان خرج يوسف
هى مين نور دى اللى من ساعة مارجعت وانا بسمع اسمها
ادهم:نور … نور دى حكاية لوحدها من ساعة ما مسكت الشركة واحنا على طول مشاكل ونقار مع بعض
ضحك زياد بشدة:بقى ادهم فخر الدين فى بنت تعنده ولا تعمل معاه مشاكل
ادهم شاردا:اهى دى مختلفة عن كل اللى عرفتهم حاولت معاه كتير اوقعها زى غيرها مقدرتش ابدا حالة غريبة متعرفش دى ازاى
ضحك زياد مرة اخرى:لتكون وقعت ولا حد سمى عليك
ادهم: وغلاوتك ما هسيبها غيرلما تيجى راكعة
زياد بحركة مسرحية:وانا واثق
لحظات ودق باب غرفة ادهم :ادخلى ياهدى
نور:انا مش هدى
اندهش ادهم منها وهى تدخل المكتب وظن انها رجعت اتعتذر
ادهم بغرور:خير يا انسة نور
نظر اليها زياد عندما نطق ادهم اسمها
نور:حضرتك عايز تشيل منى مسئولية النائب انت حر شايف ان كده بتعاقبنى ميخصنيش بس لحد الاقى العهدة بينقص منها حاجات يبقى لا ياباشمهندس
ادهم:عهدة ايه اللى ناقص منها حاجات
نور:عهدة الاسمنت والحديد اما يحصل انها تنتقل من مكانها تروح مكان تانى وباذن منك يبقى ايه
ادهم:انا مامرتش بحاجة اكيد فى حاجة غلط
ضغط زر بجواره:هدى ابعتى يوسف حجاج
بعد قليل حضر يوسف:تحت امرك
ادهم:تقدر تقولى ازاى عهدة من عند نور تنتقل مكان تانى من غير اذنى
ارتبك يوسف:اكيد غلطة عمال يافندم
ادهم:مدام غلطة عمال يبقى حضرتك مش شايف شغلك كويس والواضح ان نور كانت فاهمة شغلها اكتر منك تتفضل ترجع مكانك تانى وانا بعفيك من النائب
يوسف باحراج:اللى حضرتك تشوفه عن اذنك
التف الى نور:اظن كده عرفتى انى مليش يد فى الموضوع
نور:اسفة لو كنت انفعلت بس دى مسئولية عليا وعلى العمال وهما ملهمش ذنب
نظر اليه قليلا:انا دلوقتى اتاكدت انك الوحيدة اللى تقدرى تبقى دراعى اليمين هنا
ظل زياد ينظر اليهم حتى خرجت نور:ايه ده دى صاروخ يابنى مين يقدر عليها دى
ادهم”:زياد ايه بتتكلم كده ليه مينفعش
زياد بخبث:لا والنبى مينفعش ليه هو احنا بنغير ولا ايه
ظل صامتا لم يتكلم حتى قال:مش انا اللى اى واحدة تجبرنى احبها اكيد واحدة مختلفة ….. ونور مختلفة

الحلقة الرابعة

نظرة جديدة

يجلس شاردا ينفث سجائره بشراهة فى غرفته المغلقة عليه دائما بعيدا عن الجميع يدق بابه ويفتح بدون اذن منه فتدخل رودينا اخت ادهم الكبيرة فادهم له اربع اخوات اثنين من الذكور واثنين من الاناث ورودينا هى اكبرهم جميعا
رودينا:حبيب اخته قاعد لوحده ليه حتى سعلت بشدة :ايه ده يابنى ريحة الاوضة عاملة كده ليه انت بتنتحر
واتجهت الى الشرفة تفتحها
ايه ياحبيبى مالك قاعد لوحدك ليه
ادهم:يعنى هعمل ايه يارودى ادينى قاعد اهو
رودينا:ياحبيبى اخرج للناس فين ادهم بتاع زمان اللى كانت ضحكته ترج البيت راح فين
ادهم شاردا:مات يارودينا واندفن
رودينا:اخص عليك متقولش كده بعد الشر عنك ياحبيبى انت زى الفل اهوو طب ده حتى فى حتة بنت بره اطلع شوفها يمكن تعجبك
ادهم:مين دى؟
رودينا:دنيا اخت داليا مرات اخوك
ادهم:ياشيخة حرام عليكى دى داليا ومستحملها باالعافية عشان عمر استحمل اختها كمان
رودينا:هههه تصدق عندك حق بس مش يمكن يعنى تعجبك
ادهم:رودى حبيبتى كبرى دماغك وفوكك منى خالص اقولك هجوزها لاشرف جوزك
قامت عليه فجاة وامسكت برقبته :اه ده عشان يبقى اخر يوم فى عمرك بجد
ضحك ادهم بشدة:خلاص خلاص يبقى اياد ايه رايك ولا نجوزها الحاج فخر الدين ونخلص اصل بينى وبينك شكله خستع على الاخر وامك مش قايمة باللازم
رودى:تصدق انك قليل الادب قوم بقى
ادهم:لالا انسى
رودى:انا نفسى اعرف هتفضل كده لحد امتى
قام من مكانه على عصاه:لحد ما اخد بتارى واشفى غليلى
رودى:انسى بقى ياادهم انسى وعيش حياتك
التف اليها بعصبية:انسى انسى ايه انسى ستة شهور فى السجن من غير تهمة انسى الانسانة الوحيدة اللى حبتها وقلت اخدها بالحلال وتبقى مراتى تخونى مع صاحب الشركة وتكون شريكته انى ادخل السجن وبكل بجاحة تجيلى السجن تقولى لو عايز تخرج من هنا تتطلقنى وبكره تكون حر ويوم ما احاول اخد حقى يتلموا عليا كلابه ويكسروا وابقى عاجز يبقى انسى ازاى قبل ما اخد حقى مستحيل مستحيل
احست رودى بالشفقة تجاهه:حبيبى ده كان زمان دلوقتى انت ادهم فخر الدين رجل الاعمال وحقك هتاخده منه طول انت ناجح
ادهم:خلاص خلاص يارودى مش عايز افتكر حاجة
رودى:خلاص تعالى قابل البنت شوية مش من الذوق نسيبهم لوحدها
ادهم:ماشى يااوختى ماشى
خرجا سويا وجلس مع دنيا فتاة ملفتة للنظر بكل ما فيهابملابسها بمكياجها الصارخ بطريقة جلوسها ممكن ان ينجذب اليها الكثير من الرجال اما ادهم فقد شعر بالاشمئزازوهو يراها امامه تركهم الجميع على امل ان تعجبه ظل ينظر اليها كثيرا وهى تتدعى الخجل وتنظر اليه نظرات خقية لا يعرف لماذا ظهرت نور امامه فى هذه اللحظة ببساطتها واحترامه لذاتها وتعاملها مع الجميع باحترام يجعل كل ممن يعرفها يصبح مجبورا على الاعجاب بها قاطع تفكيره صوت دنيا”ايه هتفضل ساكت
ادهم:هقول ايه ؟
دنيا:يعنى اى حاجة بصراحة نفسى من زمان اتعرف عليك بسمع عنك كتير وعجبتنى من قبل ما اشوفك
ضحك ادهم بشدة من جراتها:تعرفى احنا الاتنين مننفعش لبعض ابدا هما جابوكى هنا عشان اعاين البضاعة واشوف تعجبنى ولا مع ان المفروض انى انا اللى اجيلك فى بيتك بس الموضة اختلفت ولا ايه
دنيا:طبعا كل حاجة اختلفت الحاجات كانت زمان مش دلوقتى
ادهم:اممم عندك حق وعشان كده بقولك انى راجل صعيدى ميعجبنيش الحال المايل ولاارضى انى اتجوز واحدة عاملة نفسها عرض للرايح والجاى عن اذنك
قام على عصاه وهى تنظر اليه مندهشة دخلت اليها داليا:ايه يادنيا عملتى ايه
دنيا:ده بنى ادم معندوش دم ولا ذوق مش كفاية انى رضيت اقعد مع واحد اعرج
دقت الكلمة فى اذن ادهم وهو يغادر ظل مكانه لم يتحرك لثوانى وهو يفرك عصاه بعصبية شديدة
اتجه الى غرفته ووراه امه خديجة:ايه ياحبيبى ايه رايك
ادهم:ماما انسى الموضوع ده انسيه خالص لحد ما انا بنفسى ما اقولك ممكن ياامى
خديجة:طيب ليه ياحبيبى معجبتكش
ادهم:عشان خاطرى ياماما انا تعبان ومضايق دلوقتى وصدقينى قريب هفرحك متخافيش بس بعد مااعمل العملية
خديجة:ايه هتعملها ياادهم
ادهم:ايوه ياامى هعملها وباذن الله هرجع اقف على رجلى تانى

ادهم فى مكتبه كالمعتاد يدخل عليه اكرم بعد الاستئذان
صباح الخير ياادهم بيه
ادهم:صباح الخير يااكرم بس وحياة ابوك بلاش بيه دى عصر البشوات خلاص عدى
اكرم:تحت امرك انا بس كنت جاى اعزم حضرتك على خطوبتى
ادهم:ازاى ورفيدة
اكرم:هى روفيدة بس احنا كنا يعنى عاملين قراية فاتحة كده بسيطة لحد اخوها ما يرجع من السفر والحمد لله رجع وده كارت الدعوة للخطوبة اتمنى ان حضرتك تيجى
ادهم:الف مبروك ياكرم وبارك لروفيدة بالنيابة عنى وهحاول باذن الله احضر
اكرم:لالا حضرتك لازم تحضر هنكون مبسوطين اوى
ادهم:خلاص باذن الله
تدخل جيلان فجاة عليهم يشعر اكرم بالاحراج ويفضل الخروج:عن اذن حضرتك
ادهم:اتفضل يااكرم
جيلان:بيبى وحشتنى اوى ياادهم
حاولت ان تقبله لكنه ازاح وجهه بعيداجيلان:ايه مالك فى ايه
ادهم:ابدا مفيش هيكون فى ايه كنتى فين الايام اللى فاتت
جيلان:ابدا روحت عند ماما فى اسكندرية قعدت يومين وجيت
ادهم:اه هو انتى شايفة ان وضعك ده طبيعى
جيلان “:تقصد ايه
ادهم:اقصد ان وضعك مش طبيعى انتى فى حتة ومامتك فى حتة عادى ده
جيلان باندهاش:غريبة يعنى ماانت عارف كده ايه اللى غيرك
ادهم:ولا حاجة ولا حاجة
جيلان:طيب متنساش يوم الخميس عيد ميلادى
ادهم:هههههه عيد ميلاد مين مش من كام شهر عيد ميلادك انتى عايزة ايه قوليلى
وضعت يدها على خده:بصراحة خاتم الماظ تحفة عينى طالعة عليه
ادهم:اه قولى كده بقى بس يوم الخميس انا مش فاضى عندى خطوبة
جيلان:مين
ادهم:اكرم اللى كان هنا من شوية
جيلان:مش لازم تروح انا اولا ولا ايه
ادهم:ربنا يسهل
اليوم خطوبة اكمل وروفيدة فى احدى القاعات الصغيرة الجميلة كان ادهم متردد يذهب لجيلان ام الخطوبة ذهب الى بيت جيلان ووقف امام البيت قليلا يفكر ثم انطلق بسيارته الى حفل الخطوبة دخل متاخرا نوعا ما وجد الجميع فى فرحة وسعادة وجد اكرم مع اصدقاؤه يرقص ويغنى فى قمة سعادته
حتى جاءت اغنية فيروز سهر الليالى وجدهم يلتفون حول العروسين وروفيدة تذهب الى فتاة جالسة مع المدعوين بفستان احمر جميل لم يعرفها فى البداية ولكنه الان تاكد انها….. نور
اندهش من جمالها وسحرها والعيون تراقبها ظل ينظر اليها وهى تراقص روفيدة على نغمات الاغنية بخفة ورقة والجميع يلتفون حولهم
لاحظ اكرم وجود ادهم ذهب اليه سريعا:اهلا ادهم بيه بصراحة كنت خايف متجيش
ادهم:مادام وعدت مش هخلف وعدى الف مبروك يااكرم وبطل بيه دى بدل ماازعلك
اكرم:ههههه خلاص خلاص ياباشمهندس اتفضل اتفضل وصل لمكان روفيدة التى كانت مع نور واصدقاءوها
كادت نور ان تقع من طول فستانها لحقها ادهم من خصرها انزعجت لمن يضع يده عليها والتفت لتجده ادهم تسمرت فى مكانها لثوانى معدودة والتقت العيون للحظات حتى انتزعهم صوت يوسف بصوت غاضب نوعا ما
ابقى حاسبى يانور لتقعى
التف اليه ادهم ثم انتقل الى روفيدة يبارك لها على الخطوبة واعطاها هدية صغيرة فتحتها لتجدها خاتم جميل فرحت بها بشدة
استمر الحفل خرجت نور الى الخارج تشم رائحة الهواء العليل راها يوسف ذهب ورائها سريعا
عقبالك يانور
متشكرة يايوسف عقبالك انت كمان
يوسف :من غيرك لا
نور بنفاذ صبر:يوسف اظن اتكلمنا فى الموضوع ده قبل كده وقلنا احنا اخوات ولا نسيت
يوسف:انتى اللى قلتى مش انا وانا قلت هتجوزك يعنى هتجوزك
نور بغضب “:ايه ده انت بتهددنى ولا ايه …لا انسى مش هيحصل يايوسف مش هيحصل لو انت اخر راجل فى الدنيا
كانت عيون تراقبهم بغيرة ما لبثت الى ان تحولت بابتسامة انه ادهم

الحلقة الخامسة

خطا اخر

امسك يوسف ذراعها بقوة:انا قلتلك هتجوزك يبقى هتجوزك
نزعت ذراعها من يده بغضب :انت اتجننت ازاى تمسك ايدى
يوسف :اصلك مش هتبقى لغيرى حتى لو بالغصب
نور: انت ايه اتجننت ولا ايه مش هيحصل سمعنى مش هيحصل
يوسف:طيب قوليلى الوان الشقة تحبيها ايه
نور:لالا انت مش طبيعى مجنون صح لالا مش مجنون انت غبى
رفع يده ليصفعها ولكن يد ادهم منعته:انت اتجننت ولا ايه ترفع ايدك عليها ياحيوان
يوسف بغضب:خطيبتى وانا حر معاها
التف الى نور:خطيبك
نور:لا طبعا ولا عمره هيكون سمعت يايوسف
يوسف:ماشى يانور هنشوف انا ولا انتى
تركهم وغادر وعيونه عليهم
ادهم:مكنش ينفع تقفى معاه لوحدكم
نور:انا مكنتش معاه انا واقفة لوحدى جه ورايا
ادهم:ايوه بس اصراره ده عجيب اللى يشوف كده يقول بينكم حاجة
نور بغضب:انا مفيش بينى وبين حد حاجة ياباشمهندس ولو عايزة هيبقى فى النور واوادم الناس دى كلها
ادهم:انا اسف مقصدش والله انا بس شايف انه غريب
نور:هو فعلا غريب مش عارفة ماله كده
ادهم:هو بيشرب حاجة؟
نور :حاجة ايه
ادهم:يعنى مخدرات كده
نور :بصراحة معرفش عن اذنك
ادهم:نور استنى بصى انا مقصدش ازعلك والله احنا من ساعة ما اتقابلنا واحنا ديما فى نقار من غيرسبب ولا ايه
نور:شوف ياباشمهندس اناعمرى ماكان بينى وبين حد عدواة من اى نوع بس انت فى الاول ضايقتنى وانا رديت عليك لانى انا مش بسيب حقى بس انت اتمديت فى احراجى اكتر من مرة وبعدين عينت يوسف مكانى انتقام منى على رفض عزومتك مع انك المفروض تبقى مقتنع بكلامى ولا ايه
ادهم:ومين قالك انى مقتنعتش بكلامك بالعكس عجبنى ردك اوى لانك حسستينى ان لسه فى ناس بتعرف تربى اولادها
وكونى عينت يوسف مكانك ده مش عقاب لا انا كنت عايز اعرف رد فعلك ايه والدليل انك رجعتى مكانك تانى عشان انا نفسى عرفت انك الوحيدة اللى ممكن احط ثقتى فيكى ومخافش
نظرت اليه باندهاش:طيب وليه كل ده
اقترب منها قليلا:عشان انا ديما بحب اعرف الناس اللى يهمونى وانتى تهمينى
نور:يعنى ايه
ارتبك قليلا:اقصد ان دكتور محمد وصانى عليكى انتى بالذات وقالى حط ثقتك فى نور وكان لازم اتاكد واتاكدت خلاص
نور:من ايه
ادهم:ان ممكن احط ثقتى فيكى ومخافش
نور يانور
نادتها تقى فالتفت اليها:ايوه ياتقى جاية حالا
التفت لادهم:عن اذنك
ادهم:نور
نور:ايوه
ادهم:انا اسف لو كنت زعلتك منى غصب عنى صدقينى
لاتعرف ماذا حدث لها ىتستطيع انزال عينها من عينه ولكنها انتفضت فجاة واستغفرت ربها سرا وابتعدت سريعا وهو ينظر اليها وعيناه لا تفراقها

ركبت سيارتها مع تقى ولكن السيارة لم تستجيب مرارا وتكرارا وجدت ان عجلاتها الاثنين قد اصابهم خلل ولن تتحرك من مكانها الا بتبديلهم وليس لديها بديل لهم
تقى:طيب هنعمل ايه دلوقتى
نور بضيق:مش عارفة ياتقى واخاف نركب تاكسى لوحدنا
اتاها صوت يوسف من خلفها:وليه تاكسى ما انا موجود اتفضلوا
تقى :يلا يانور يوسف يوصلنا
نور باصرار:لا
تقى:ليه بس بدل مانمشى لوحدنا
نور:لا ياتقى مش هركب ونظرت ليوسف الذى قد بدا يفقد اعصابه
اركبى احسنلك مش هتلاقى تاكسى هنا
نور:شكرا هدور على اى عربية
راهم ادهم يقفون مع يوسف الذى بدا عليه الغضب اقترب منهم
ايه ياجماعة فى حاجة
تقى :ابدا الكاوتش اتخرم ومش عارفين نمشى ونور رافضة يوسف يوصلنا
نظر الى السيارة:فردتين مرة واحدة اكيد بفعل فاعل
نور:يعنى ايه
نظر ليوسف الذى بدا عليه العرق
يعنى حد قاصد يعمل كده اقفلى العربية وتعالوا اوصلكم زى ماانتوا عايزين
تقى:يلا بقى يانور
نظرت ليوسف بتحدى :خلاص ماشى موافقة
ركبتا السيارة مع ادهم وعيون يوسف تشتعل بالغضب كانت تقى بجانب ادهم ونور فى الخلف ظل ينظر اليها فى مراة السيارة احيانا تلتفت تجده ينظر اليها فتنظر فى الجانب الاخر اكثر من مرة حتى نزلت تقى ووصلت بيتها
تقى:متشكرةاوى ياباشمهندس على التوصيلة
ادهم:على ايه انا معملتش حاجة
تقى “:طيب تصبحوا على خير سلام يانور
تركتهم وغادرت حتى قال ادهم:ممكن تتطلعى اودام اصل اللى يشوفك كده يقول السواق بتاعكنزلت وركبت بجواره على مضض ظل ينظر اليها كثيرا وهى غير مبالية به حتى وصلوا قريبا من منزلهم:هنا لوسمحت
ادهم:هو البيت هنا
نور:لا هو كمان شوية بس انا هكمل عادى
ادهم:لالا مينفعش لازم اوصلك لحد البيت
نور:ملوش لزوم كفاية هنا
ادهم:لا هوصلك لحد البيت
بعد اصرار منه وافقت :هنا كويس متشكرة اوى
ادهم:نور ممكن اطلب منك طلب
نور:خير
ادهم:ايه رايك نتغدى بكره مع بعض فى اى مكان انتى تختاريه
التفت اليه بغضب:اظن سبق وقولت لحضرتك انى مش بخرج مع حد غريب
ادهم:اعتبريها معاهدة صلح بينا
نور:اولا مكنش بينى وبينك حرب عشان يبقى فى معاهدة صلح وثانيا انا مش بخرج اى مكان مع اى حد غريب
ادهم:انتى ليه مصرة تعملى بينا مسافات وحواجز
نور:عشان هو ده الصح
امسك يدها فجاة اندهشت من جراته نزعت يده عنها:
اديك طلعت زيك زى يوسف وخرجت من السيارة واغلقت بابها بعنف

ظل ينظر اليها وهى تدخل بيتها وهو يلوم نفسه على فعلته ولكنه لايعرف لماذا فعل ذلك
عادت نور الى بيتها وجدت ابواها واخته الصغرى مريم واخيه مازن يشاهدون التلفاز
نور:السلام عليكم دار قوم مومنين
الجميع :وعليكم السلام ورحمة الله وبركاته
والدها مختار حسين وهو مدرس اول سابق خرج على المعاش منذ فترة صغيرة ووالدتها امل ربة منزل مثلها مثل اغلب الامهات
اما مريم فهى طالبة فى الفرقة الثالثة كلية الاداب
اما مازن فهو توام مريم ولكنه بالفرقة الثالثة بكلية التجارة
امل :ايه اللى اخرك كده يانور
نور:اسكتى يا ماما مش العربية عملتها معايا وفردتين الكاوتش ناموا
مختار:ازى الكلام ده ده انا لسه مغيرها من يومين والاتنين طيب جيتى ازاى
ارتبكت قليلا:بصراحة يابابا بشهمندس ادهم صاحب الشركة وصلنى انا وتقى
مختار:وده ينفع يانورتركبى مع راجل غريب
نور:والله يابابا كنا مضطرين وخفنا نركب تاكسى لوحدنا
امل:خلاص يامختار ثم صاحب الشركة يعنى اكيد راجل محترم ولا ايه يانور
نور بغيظ:اه محترم اوى
مختار :نور دى اخر مرة تحصل سمعتينى
نور:حاضر يابابا عن اذنكم داخلة انام تعبت اوى النهاردة
الجميع تصبحى على خير
دخلت معها مريم:ايه يانور قوليلى بقى صاحب الشركة ده هو ادهم اللى حكتيلى عنه قبل كده
نور:ايوه يامريم هو
مريم:طيب هو شكله ايه
نور:مريم تصبحى على خير اختك هلكانة
ظل ليله يفكر فيما فعله عندما بدات تترك عنادها هى حتما ستعود لما كانت عليه تدخل عليه رودينا وهو شارد تقطع تفكيره:اخى العزيز سرحان فى ايه
ادهم:هو انتى كل ساعة هنا ملكيش بيت يارودى
ضربته على كتفه:اخص عليك هو عشان اشرف مسافر يومين هتزهق منى
قبل راسها بحنان:حبيبتى ده بيتك ياقلبى انا نفسى بس تسمعى الكلام وتيجى تعيشى فى الشقة بتاعتك فوق
رودى:شوية كده ياادهم لسه سنة على اعقد الشقة ما يخلص بس سيبك منى كده وقولى مالك
ادهم:ابدا كل ماافكر انى بصلح حاجة اترينى بخسرها
رودى:تقصد ايه
ادهم:هقولك بس اوعدينى محدش يعرف بالكلام ده غيرى انا وانتى
رودى:حبيبى من غير مااوعدك انت عارف سرك فى بيرقول بقى
قص عليها كل ما حدث مع نور من يوم لقاءهم حتى اليوم
ادهم:ايه رايك بقى
رودى:بصراحة انا لو مكانها كنت قتلتك بنت جدعة مش زى الزفتة اللى عاملة زى االزقة وراك فى كل حتة ومفيش بينكم اى ارتباط
ادهم:لالا دى حاجة تانية خالص كل حاجة فيها مختلفة متعرفيش ليه شقاوتها ولاضحكتها ولا اخلاقها حاجات كتير اوى بس عنيدة اوى يارودى
ضحكت رودى بشدة:هى فعلا حاجة تانية بامارة انها خليتك مشغول بيها
ارتبك ادهم:لالا مش مشغول ولا حاجة عادى يعنى
رودى:لا مش عادى وانا متاكدة انك بدات تحبها اعترف ياادهم حتى لو بينك وبين نفسك

الحلقة السادسة

اعتذار
خرجت نور من بيتها كالمعتاد لتذهب لعملها وجدت السيارة امام المنزل لاتعرف كيف اتت ومن جاء بها الى هنا وقفت تنظر اليهاحتى تتاكد انها هى وجدت ظرف معلق عليها اخدتها وقراته
شوفى يانور من غير مقدمات كتير انا اسف معرفش ليه
عملت كده بس والله انا مش زى يوسف انا غلطت اه
بس هتصدقينى لو قولتلك معرفش ليه كان عندى رغبة قوية
انى امسك ايدك انا بعتذرلك تانى واوعدك معدتش هتحصل
ابدا
اغلقت الورقة وابتسمت ابتسامة خفيفة ركبت السيارة وهى تشعر بسعادة لاتعرف سببها تحاول ان تفهم ادهم غريب الاطوار هذا فمن اول لقاء لهم وتصرفاته مختلفة عن كل مرة
نفضت راسها بشدة:وانا مالى انا كل واحد حر
دخلت الشركة تلقى الصباح على كل العاملين كعادتها عندما همت بدخول مكتبها وجدت يوسف امامها
يوسف:صباح الخير يانور
نور:اهلا صباح النور
يوسف:ممكن اعرف ازاى مترضيش تركبى معايا العربية وتركبى مع راجل غريب
نور:اولا حركة العربية دى مش هتخيل عليا يايوسف انا متاكدة ان انت اللى عملتها ثانيا باشمهندس ادهم مش غريب ولا حاجة ده صاحب الشركة ولو كان غريب انت كمان غريب وتصرفاتك بقت اغرب
همت بدخول المكتب امسك يدها مرة اخرى صرخت فيه وهى تنزع يدها
انت ايه مجنون احترم نفسك بقى
يوسف:يعنى هتعملى ايه
جاءه صوت من خلفه:انا اللى هعمل مش هيا
التف خلفه فوجد ادهم يقف وراءه يشاهد كل شئ
ادهم:يوسف تعالى على المكتب عايزك

ذهب الى مكتبه وخلفه يوسف جلس على المكتب ينظر له بنظرات متفحصة
ادهم:انت عايز ايه من نور يايوسف
يوسف:دى حاجة شخصية ياباشمهندس ملهاش علاقة بالشغل
ادهم:اه طيب بص يايوسف لو قربت ناحية نور تانى هتشوف منى وش صعب اوى تعرفه
يوسف:ده تهديد ولا ايه
ادهم:اعتبره زى ما تعتبره المهم تعرف انك لو قربت منها ولا ضايقتها مش هيحصلك طيب سمعتنى
يوسف:ماشى ياباشمهندس عن اذنك
هما ليخرج نداه ادهم:بقولك ايه بلاش الحركات البيئة دى مفيش واحد محترم يفرقع كاوتش عربية بنت فى وقت متاخر كده عشان تركب معاه مش رجولة يعنى
يوسف:متشكرين على النصيحة عن اذنك
كان يوسف وصل لحد كبير من الغضب من ناحية ادهم وبدا يشعر ان هناك شئ غريب بينه وبين نور بدليل انها تركته وذهبت معه
دار يومهم عادى الا ان هناك اوراق تحتاج امضاء من ادهم ذهبت اليه لم تجد هدى فى مكتبها اقتربت من الباب دقت عليه فسمعت صوت ادهم :ادخل
دخلت اليه وجدت جيلان تجلس معه غاضبة بعض الشئ وادهم غير مبالى بها
ادهم:تعالى يانور
نور:انا اسفة اصل هدى مش موجودة بره والاوراق دى محتاجة امضة حضرتك
ادهم:هاتيها
وضعت الاوراق امامه لاحظت نظرات جيلان المتفحصة لها ولكنها لم تعيرها اهتمام قامت جيلان من مكانها فجاة ولفت يدها حول رقبة ادهم الذى كان يراجع الاوراق وقبلته على خده وهى تنظر لنور
حبيبى انا ماشية بقى اشوفك بالليل ….. بااااى
اندهش ادهم ونور من جراتها الزائدة
نور:بعد اذنك لو الورق خلص ممكن امشى
ادهم:نور استنى بصى اصل جيلان متعودة على كده مع اى حد فمش عايزك تتضايقى
نور:واضايق ليه كل واحد حر فى تصرفاته هى خطيبتك وحرة معاك
ادهم:لالا جيلان مش خطيبتى احنا مجرد اصدقاء
نور بسخرية:اصدقاء
ادهم:انا عارف ان ده غلط وصدقينى حاولت كتير ابعد عنها بلاقيها ورايا فى كل حتة
نور:دى حاجة تخص حضرتك عن اذنك
ادهم:نور استنى
قام من مكانه على عصاه لاتعرف لماذا احست بالشفقة عليه للحظات حتى وقف امامها
ادهم:نور انا مش عارف ليه ديما مش بنلحق نتصالح نزعل بسرعة تانى
نور:لا ابدا وانا هزعل ليه
ادهم:نور انا ممكن اغيب فترة عن الشغل عشان هعمل عملية وعايزك تبقى مكانى انا وزياد صاحبى وشريكى فى فترة غيابنا
نور:”عملية ايه خير
اشار على قدمه:عملية رجلى ادعيلى يانور
نور:هدعيلك والله بس انا كنت فاكرة انك مولود بيها
ادهم بمرارة:لالا دى حادثة من زمان….. محبش افتكرها ثم اللى اودامك ده كان بطل الجمهورية فى الكونوفو
نور بدهشة:معقول
ادهم:ايوه مش يوم الحادثة دى من اكتر من سبع سنين وطبعا مقدرش العب
نور:باذن الله هتقوم بالسلامة طول ماانت عندك ارادة وهدف هتقدر توصل
نظر اليه مطولا للحظات ارتبكت من نظراته وفضلت الخروج
عن اذنك
ادهم:اتفضلى

ذهبت لمكتبها حائرة تفكر فى ادهم ما لبثت حتى ظهرت امامها صورة جيلان وهى تقبله نفضت راسها كانها تخرج صورتهم من عقلها وبدات فى عملها كالمعتاد
دخل عليها يوسف المكتب واغلقه
نور:ايه ده فى ايه
يوسف:انا عايز افهم ايه اللى بينك وبين ادهم
نور:نعم هى حصلت انت مالك سلامتك
يوسف:انا اللى مالى ولا انتى تقوليلى مش راجل غريب وهو يهددنى لما مبعدتش عنك هياذينى يبقى ايه
نور:هو قالك كده
يوسف: شوفى يانور انا مش هسيبك فى حالك لو بقى اخر يوم فى عمرى سمعتى
نور:وانت فاكرنى هخاف منك لا انسىى واتفضل من هنا مع السلامة
خرج ادهم من مكتبه وحدث هدى:هدى انا رايح مشوار ممكن اتاخر ابقى روحى انتى
هدى:حاضر يافندم مع السلامة
خرج ادهم وركب سيارته واتجه الى طبيبه دكتور سامى الذى رحب به بشدة
سامى:تصدق انا مش عارف اعمل فيك ايه مبتردش عليا ليه ياجدع
ادهم:سامى انا تعبت عمليات وعلاج لما فقدت الامل
سامى:لااله الا الله ايه يابنى الكلام ده مش ادهم اللى يياس من حاجة
ادهم:غصب عنى انا عملت كذا عملية لما فقدت الامل خالص انى امشى بس قولى الدكتور الالمانى ده انت واثق فيه
سامى:طبعا عمل عمليات كتيربنفس حالتك وشهر والتانى بقوا زى الفل وبالغصب ياادهم عمليتك بعد يومين ايه رايك بقى
ادهم:ايه ياعم يومين ايه لالا مينفعش
سامى:بىلاش استعباط الراجل فاضله اسبوع ويرجع بلده وانا حاجز اسمك بالعافية يعنى تتلم وتنجز
ادهم:بذمتك فى دكتور يقول اتلم وانجز مش عارف كليات طب ايه دى
سامى:اسم الله على الهندسة اللى انت خارج منها
ادهم:عمرى اقول عليك بيئة
سامى:اه ماانا عارف اخلص بعد يومين تجهز نفسك
ادهم:باذن الله
اليوم الثانى طلب ادهم كل الموظفين والمهندسين بالشركة
اجتمع ادهم مع الجميع
بصوا ياجماعة انا هغيب عنكم مدة ممكن تكون شهر اتنين لسه مش عارف عشان كده الباشمهندس زياد هيبقى موجود مكانى وفى حالة زياد مش موجود هتبقى الباشمهندسة نور وونظر باتجاه نور
وياريت لو اى حد زعل منى فى يوم من الايام ميزعلش منى وياريت تدعولى لانى داخل على عملية خطيرة وربنا وحده العالم هقوم منها ولا لا
اكرم:لالاان شاء الله هترجعلنا بالسلامة
ادهم:ربنا يخليك يااكرم وياريت بعد كده بلاش باشمهندس دى خليها ادهم بس احنا تقريبا قريبين من بعض فى السن ممكن تتفضلوا
بدا الجمي يخرج من المكتب لكنه استوقف نور
ادهم :نور ممكن كلمة
نور:تحت امرك
ادهم:نور انا عارفة انى زعلتك كتير بس صدقينى انا مريت فى حياتى بحاجات كتير تخلينى اتعامل مع الستات كده ممكن تستغربى انا بقولك كده ليه بس انا بجد نفسى تبقى عارفة انك ……
نور:انى ايه
ادهم:انك الوحيدة اللى قدرتى تكسرى كل حاجز جوايا يمكن عنادك يمكن اخلاقك يمكن كل حاجة عشان كده بقولك اوعى تزعلى منى
نور:وانا مش زعلانة وان شاء الله هترجع بالسلامة واحسن من الاول كمان بس خليك واثق فى ربنا وخلى ديما عندك امل انك توصل لهدفك صدقنى هتوصل
ادهم:انا حاليا ليا هدف واحد بس
ور:ايه هو
ادهم:لو قومت من العملية سليم هتعرفى صدقينى هتعرفى
ارتبكت نور :طيب عن اذنك
ادهم:اتفضلى
خرجت من مكتب ادهم وهى فى عالم اخر لاتعلم ماذا حدث كيف يشغلها هكذا ماذا يريد منها اهى لعبة منه ام انها الحقيقة
قاطعها صوت يوسف:كان عايزك ليه
نور بعصبية:وانت مالك حاجة تخصنى متخصكش
يوسف:بقى كده ماشى يانور حسابك بعدين

الحلقة السابعة

اعتراف بالحب
اجرى ادهم العملية وسط دموع ودعاءالجميع خصوصا والدته التى لاتكف يوما عن الدعاء له كان قلبها ينفطر على ابنها الحبيب بعد حوالى ثلاث ساعات خرج ادهم من غرفة العمليات والتف حوله الجميع دخل عليه سامى مع الطبيب الالمانى وطمنهم على حالته واكد لهم ان العملية ناجحة …..
بدا ادهم يفيق تدريجيا من المخدر ويتحدث بكلمات غير مفهمومة اقتربت والدته وهى تضع يدها على راسه
حبيبى عايز حاجة
كان يتمتم باسم غير مفهوم….نو……نور
خديجة:نور نور مين
قالت رودينا سريعا:اكيد ياماما قصده نور الاوضة
خديجة:نور اوضة ايه لا ده بيقول نور
رودينا :ياامى بنج بقى ومش دارى عن نفسه
عمر شقيق ادهم:هو فعلا قال نور بس هى مين
رودى:يااخى انت كمان النور مضايقه تعالوا نخرج بره ونقفله
خديجة:لالا مش هسيبه لحد مايفوق
فخر الدين والد ادهم:سيبه يا خديجة يستريح شوية
خديجة:لا يافخر عايزة افضل جنبه
عمر:خلاص يابابا سيبها دلوقتى
بعد حوالى ساعة استيقظ ادهم وجدهم كلهم امامه كان يريد ان يجدها امامه عندما يفتح عينيه
ولكن كيف له هذا ولا يربطهم ببعض اى شئ
خديجة:حمد لله على السلامة ياحبيبى
ادهم:الله يسلمك ياامى …. بس رجليا وجعانى اوى
فخر:معلش ياحبيبى من اثر العملية بس الدكتور طمنا على العملية وقال خلاص انها نجحت
جلست دارين الاخت الصغرى لادهم بجواره:الا قولى ياادهم ياحلو انت مين نور
انتفض ادهم عند سماعه الاسم ونظر لرودينا فاشارت له بالنفى
ادهم:نور مين
دارين:بتسالنى اسال نفسك وانت فى البنج نطقت اسمها تتطلع مين
خديجة:بس بقى سيبى اخوكى فى حاله لسه تعبان
دارين:ماشى ماشى بس لازم اعرف
ادهم:امشى يابت من هنا امشى
دارين:يالهوى فيك اللى فيك وبتزعقلى برضه
ادهم:امشى هخبطك بحاجة

عاد ادهم الى بيته بعد حوالى اسبوع وبدات حالته تستقر شيئا فشيئا كانت رودينا معه باستمرار كانت يوما معه فى غرفته
ادهم:فضحتينى اقول سر تسيحيلى كده
رودى:ههههه انتى اللى فضحتى نفسك يابيضة مش انا وانت فى البنج نور نور تعالى يانور….. ايه هتعمل بيها ايه اهدى شوية
ادهم:تصدقى انا غلطان انى بتكلم معاكى امشى من هنا
رودى:تصدق انا اللى غلطانة كنت فضحتك وقولتهم مين نور….. بس قولى ياادهم انت اد كده ىبتحبها
ادهم:اوى يارودى اوى ومعرفتش كده غير لما بعدت عنها حاسس انى تايه تعبان مش عارف بس حاجات كتير نقصانى فى غيابها تصدقى لو اقدر امشى كنت روحت دلوقتى عند بيتها وشوفتها
رودى:هييييييه فينك يااشرف تسمع وتشوف يمكن تحس على دمك وتقولى كلمتين حلوين كده
ادهم:ياشيخة روحى اشرف كبيره اوى طاجن بامية ويبقى كده وتمام اوى
رودى:تصدق صح ايه رايك انااروح امسك فيه عشان يبطل اكل ويبقى رومانسى كده
ادهم:هههههه ابدا ده مستحيل خلاص راحت عليكم سيبولى شوية